Yoane 7
7
Yesu nʼabagala babo
1Enyũma wʼemyatsi eyĩ, Yesu mwalendera eGalĩlaya, kusangwa siabya anzĩre erirendera eYũdea kusangwa Abayũda basonda-sonda erĩmwĩta. 2Neryo ebiro bikulu byʼAbayũda byʼamahema byabya hakũhĩ. 3Abagala babo Yesu mobamubwira bati, Ũlũe hano, uye eYũdea, abiga bawe batoke erilola oko mĩbĩrĩ yawe eyo ukakola. 4Kusangwa omundu sialĩbĩsa ebyo akakola, amabya akasonda eriminyikala ndeke. Wamakola emyatsi eyĩ ũyĩmĩnyĩkalaye oko kihugo. 5Kusangwa abagala babo nibya mobatamwĩkĩrĩrya. 6Neryo Yesu mwabũga nabo ati, Endambĩ yage siriyahĩka, nĩkwa endambĩ yenyũ ĩkahĩka emigulu yosĩ. 7Ekihugo sikiritoka erĩbakwa obusu, nĩkwa kĩkanyĩkwa obusu, kusangwa ngabwirakyo nyiti emĩbĩrĩ yakyo ni mibi. 8Ĩnywe muye oko biro bikulu ebyo. Sindiendisyaya oko biro bikulu ebĩ, kusangwa endambĩ yage siyeyaberwa. 9Yesu abere abwirabo emyatsi eyĩ, mwasĩgala eGalĩlaya.
Yesu oko biro bikulu byʼamahema
10Nĩkwa abagala babo babere babigenda oko biro bikulu ebyo, Yesu mwayayo butsira embere syʼabandu, nĩkwa omo bũbĩso-bĩso. 11Abayũda babya bakamusonda-sonda oko biro bikulu, bati, Alihi kwehĩ? 12Neryo habya eminigonigo mingi omo katĩkatĩ kʼendeko busana naye. Abandi mobabũga bati, Ni mundu mubuya, nʼabandi bati, Iyihi, akatalaya endeko. 13Nĩkwa sihabya mundu ukamwahula embere syʼabandu, busana nʼeriubaha Abayũda.
14Neryo omo katĩkatĩ kʼebiro bikulu ebyo Yesu mwaya omo Hekalũ, mwatsũka erĩkangĩrĩrya. 15Neryo Abayũda mobasweka bati, Omundu oyũ amatoka akalasi ko ati isialitakangĩrĩrĩbwa kwehĩ? 16Yesu mwasũbĩryabo ati, Ebyo ngakangĩrĩraya si byage, nĩkwa ni bya Nyamuhanga oyo wanyituma. 17Omundu Oyukasonda erikola erianza lya Nyamuhanga, asyaminya erĩkangĩrĩrya eryo nga ni rya Nyamuhanga kutse nga ngabũga omwʼiyihana lyage. 18Omundu oyũ akabũga ebiwe, akasonda eripipa liwe; nĩkwa Oyukasonda eripipa lyʼoyo wamutuma, iye ni kwenene, kandi sihali ekitatunganene omwisi wuwe. 19Musa mwatabaha Emigambo kwehĩ? Nĩkwa sihali muguma gʼũkwʼĩnywe oyukakenga Emigambo. Busana nakĩ mukasonda-sonda erĩnyĩta kwehĩ? 20Endeko mobamũsũbĩrya bati, Uli ko mbĩnga! Nindi yukasonda-sonda erĩkwĩta kwehĩ? 21Yesu mwasũbĩryabo ati, Monakola omũbĩrĩ muguma, ũnywe bosĩ momwaswekerago. 22Busana nʼomwatsi oyũ, Musa mwabaha eribana. Si rya Musa, nĩkwa lyalũa oko botata-kulu benyũ. Neryo mũkabanaya omundu oko kiro kyʼeSabato. 23Omundu amabanĩbwa oko kiro kyʼeSabato, Emigambo ya Musa isiyeketawa, mukanyihitanako kusangwa ngalamaya omundu yo ndeke oko kiro kyʼeSabato kwehĩ? 24Simutswere erilolwako, nĩkwa mutswere eritswera litunganene.
Yesu nĩ Masĩya kwehĩ?
25Neryo abandi bʼoko bandu bʼeYerũsalema mobabũga bati, Oyũ si yo bakasonda erĩĩta kwehĩ? 26Kandi lebaya, akabũga embere syʼabandu, ĩsĩbebũga mwatsi naye! Kwʼabatabalĩ banasĩ ndeke kwʼoyũ ni Kristo kwehĩ? 27Nĩkwa ekiro Kristo asyasa, sihali mundu oyo wasĩ eyo alũa. Nĩkwa tũnasĩ eyo mundu oyũ akalũa.
28Neryo omugulu Yesu akangĩrĩraya omo Hekalũ, mwabirikira nʼomulenge munene ati, Mũnyasĩ, kandi mũnasĩ eyo nalũa. Kandi sĩndĩtahĩka nʼehamũlĩ yage. Nĩkwa oyo wanyituma ni kwenene. Inywe sĩmũmwasĩ. 29Nĩkwa ĩngye nyĩnamwasĩ, kusangwa nalũa ewuwe, naye yo wanyituma. 30Neryo mobasonda-sonda erimuhamba, nĩkwa mohatabya mundu oyo wamũhĩra kwʼebyala, kusangwa endambĩ yiwe ĩsĩrĩyahĩka. 31Nĩkwa abangi bʼomo ndeko mobamwĩkĩrĩrya bati, Ekiro Kristo asyasa asyakola ebitiko-tiko bingi kwilaba ebyo mundu oyũ akakola kwehĩ?
Abafarĩsayo bakatuma balembya erihamba Yesu
32Abafarĩsayo mobowa endeko ĩkatsomererya Yesu. Neryo abahererĩ bakulu nʼAbafarĩsayo mobatuma balembya erihamba Yesu. 33Yesu mwabwirabo ati, Nasyabya nenyũ kandi katambĩ, neryo nasyaya ukwʼoyo wanyituma. 34Mwasyanyisonda-sonda, simwendisyanyibana, nʼaho nasyabya Simwangatoka erĩhĩkaho. 35Neryo Abayũda mobakanĩa omo katĩkatĩ kabo bati, Omundu oyũ asyayahi kwehĩ? ati, Sitwendisyamubana. Asyaya oko mĩyĩ yʼAbagĩrĩkĩ aho Abayũda bali, nʼerĩkangĩrĩrya Abagĩrĩkĩ kwehĩ? 36Akabũga ati, Mwasyanyisonda-sonda, nĩkwa simwendisyanyibana, nʼaho nasyabya simwendisyatoka erĩhĩkaho. Akabũgakĩ kwehĩ?
Esyonyũsĩ syʼamagetsi wʼengebe
37Neryo oko kiro kyʼenyũma-nyũma kyʼebiro bikulu ebyo, ekiro kinene kyʼeryusa, Yesu mwahangana mwabũga nʼomulenge munene ati, Omundu amakwa enyota, ase kwĩngye apũlaye. 38Ngoko Amasako akabũga ati, Oyũkanyĩkĩrĩraya, esyonyũsĩ syʼamagetsi wʼengebe syasyasenda sĩkalũa omo mutima wuwe. 39Nĩkwa Yesu abũga ekĩ iniakahula Omũlĩmũ ogo abakamwĩkĩrĩraya basyahabwa. Oko mugulu oyo Omũlĩmũ isialiahabwa, kusangwa Yesu isialiabana olukengerwa luwe.
Erigabana lyʼabandu
40Abandi bandu bʼomo ndeko, omugulu bowa ebĩnywa ebĩ, mobabũga bati, Kwenene oyũ nĩ Mũmĩnyererĩ oyo! 41Abandi bati, Oyũ ni Kristo! Kandi abandi bati, Ko Kristo akasyalũa eGalĩlaya kwehĩ? 42Amasako Sĩalĩtabũga ati, Kristo akalũa oko lubuto lwa Dawĩdĩ, nʼeributirwa eBetelehemũ, omũyi wa Dawĩdĩ abyamo kwehĩ? 43Neryo mohabya erigabana omo ndeko busana na Yesu. 44Abandi mobasonda erimuhamba, nĩkwa mohatabya mundu oyo wamũhĩra kwʼebyala.
Erĩtendĩkĩrĩrya lyʼabakulu bʼAbayũda
45Neryo abalembya mobasuba oko bahererĩ bakulu nʼAbafarĩsayo. Nabo mobabũlyabo bati, Busana nakĩ simwetamuleta kwehĩ? 46Abalembya mobasũbĩryabo bati, Na kera sihali mundu wabuga ngʼomundu oyũ kwʼakabũga. 47Abafarĩsayo mobasũbĩryabo bati, Amabatalya nenyũ kwehĩ? 48Oko batabalĩ nʼAbafarĩsayo hali omundu oyo wabĩrĩmwĩkĩrĩrya kwehĩ? 49Nĩkwa endeko eno eyĩtasĩ Emigambo ya Musa ni batakirwa. 50Nĩkodemo omuguma wa kubo, oyo wahĩka uku Yesu erĩmbere, mwabwirabo ati, 51Emigambo yetu siyetswera mundu batetatsũka erĩmowa, nʼeriminya ebyo akakola. 52Mobamũsũbĩrya bati, Nawe nibya uli wʼeGalĩlaya kwehĩ? Usome Amasako, wasyalebya ko hate omũmĩnyererĩ oyũkalũa eGalĩlaya.
Bible in Kinandi © Bible Society of the Democratic Republic of Congo, and Bible Society of Uganda, 1980.
