Yoane 12
12
Marĩa akahakabaya ebisando bya Yesu
(Mt 26.6-13; Mk 14.3-9)
1Neryo ebiro ndatu embere wʼEbiro Bikulu byʼErikiruka, Yesu mwahĩka eBetanĩa, aho Lazaro abya, oyo Yesu alũbũkaya oko baholĩ. 2Eyo mobamũhũkĩra ebyalya byʼobũgenĩ. Marata abya akahũkũla, nĩkwa Lazaro abya ukwʼabo babya oko mesa haguma na Yesu. 3Neryo Marĩa mwĩmya ekihande kyʼelĩtre kyʼamagũta wʼenardo awakakumba ndeke kutsibu awʼobũgũlĩ bunene, mwahakabya ebisando bya Yesu, kandi mwasangula ebisando biwe omo nzwiri siwe, nʼenyũmba yosĩ moyũsũla mwʼekikumbo kibuya kyʼamagũta ayo. 4Nĩkwa Yũda Ĩskarĩota, omuguma gʼoko biga buwe, oyo wahotera Yesu, mwabũga ati, 5Busana nakĩ amagũta aya sialitagũlĩbwa busana nʼesyofranka magana asatu, isyahabwa oko bera kwehĩ? 6Nĩkwa Yũda abũga atya butsira erĩbũga ati atsomene abera, nĩkwa kusangwa abya mũrahĩ. Yũda abya akaheka engunza ĩnĩakĩba esyahĩrawa muyo. 7Neryo Yesu mwabũga ati, Mumuleke! Abikego busana nʼekiro nasyatabwa! 8Kusangwa muli nʼabera haguma nenyũ ebiro byosĩ, nĩkwa ĩngye Sindi haguma nenyũ ebiro byosĩ.
Embĩta yʼerĩĩta Lazaro
9Neryo endeko nene yʼAbayũda mobowa Yesu kwʼali eBetanĩa. Neryo mobasa, butsira busana na Yesu ĩyowene, nĩkwa batoke erilangira Lazaro nibya, oyo Yesu alũbũkaya oko baholĩ. 10Nĩkwa abahererĩ bakulu mobaya embĩta yʼerĩĩta Lazaro nibya. 11Kusangwa busana na Lazaro Abayũda bangi mobalũa kubo mobĩkĩrĩrya Yesu.
Yesu akingira eYerũsalema inianemupipwa
(Mt 21.1-11; Mk 11.1-11; Lk 19.28-40)
12Engyakya endeko nene eyahĩka oko Biro Bikulu ebyo, omugulu bowa ambu Yesu akandĩhĩka eYerũsalema, 13Mobatwa oko bisanza byʼamabondo, mobayahĩndana naye, nʼeribirikira bati, Nyamuhanga apipawe! Nyamuhanga atsumule oyukasa omo lĩna lyʼOmwami Mukulu, iye yo Mwami wa Ĩsraelĩ. 14Neryo Yesu mwabana ekyana kyʼepunda, mwĩkala kukyo, ngoko kĩsakĩre kiti, 15Uwe Mwali wʼeSĩonĩ, Sigubahe!
Lebaya, omwami wawe akasa,
Ĩnĩanĩkere oko kyana kyʼepunda.
16Abiga biwe mobataminya emyatsi eyĩ erĩmbere, nĩkwa omugulu Yesu ahabawa olukengerwa, mobibuka ngoko emyatsi eyĩ yasakawa busana naye, kandi ngoko bamukolera emyatsi eyĩ.
17Neryo endeko eyabya haguma na Yesu omugulu abirikira Lazaro omwʼisinda nʼerĩmũlũbũkya oko baholĩ, moyatũla omwatsi oyo busana naye. 18Kyaleka endeko eyo ĩyahĩndana na Yesu, kusangwa bowa kwʼakola ekitiko-tiko ekĩ. 19Neryo Abafarĩsayo mobabwirana bati, Mwamalangira, sitwetatokakĩ! Mũlebaye, ekihugo kyosĩ kyamamukwama!
Abandi Bagĩrĩkĩ bakasonda-sonda Yesu
20Neryo habya Abagĩrĩkĩ omo katĩkatĩ kabo abahetukira eYerũsalema erĩyaramya omo Biro Bikulu ebyo. 21Aba mobahĩka uku Fĩlĩpo, oyo wabya wʼeBetesaĩda yʼeGalĩlaya. Mobamũbũlya bati, Mukama, twanzĩre erilola uku Yesu. 22Fĩlĩpo mwayabwira Anderea, neryo Anderea na Fĩlĩpo mobabwira Yesu. 23Neryo Yesu mwasũbĩryabo ati, Endambĩ yabĩrĩhĩka, Omugala wʼOmundu ahabawe olukengerwa. 24Kwenene, kwenene ngababwira, embuto yʼengano yamatenditogera omo kitaka, nʼerihola, ikabyaho ĩyoyene; nĩkwa yamahola, ikaheta kwʼesyombuto nyingi. 25Oyukanza engebe yiwe akatalayayo; nʼoyũkakwa engebe yiwe yʼobusu omo kihugo kino, asyabikayo oko ngebe yʼerikota. 26Omundu amanyikolera, anyikwame, nʼaho nyiri ha nʼaho omugombe wage asyabya. Omundu amanyikolera, Tata asyamũsĩkya.
Yesu akahula oluholo luwe
27Na lino omutima wage amahũkahũka; neryo nyĩbũgekĩ kwehĩ? Nyiti, Tata ũnyĩlamaye oko ndambĩ eyĩ kwehĩ? Nĩkwa busana nʼomwatsi oyũ namahĩka oko ndambĩ eyĩ. 28Uwe Tata, ulete olukengerwa oko lĩna lyawe! Neryo omulenge mwalũa elubula ati, Nabĩrĩhamyalyo, kandi nasyaswahamyalyo.
29Neryo endeko eyabya ihangene hakũhĩ nʼerĩowa omulenge oyo, mobabũga bati, Bwamalũma! Abandi bati, Omũlaĩka amabũga naye! 30Yesu mwasũbĩrya, ati, Omulenge oyũ Sĩalĩtabũga busana nage, nĩkwa busana nenyũ. 31Lino eritswera lyamahĩka oko kihugo kino; lino omũtabalĩ wʼekihugo kino asyaguswa eyĩhya. 32Nage, namasumbirwa endata oko kihugo, nasyakurira abandu bosĩ bʼũkwʼĩngye. 33Nĩkwa abũga ebĩ iniakahula omũsĩndo wʼoluholo olo asyahola. 34Neryo endeko moyamũsũbĩrya iti, Twabĩrĩowa omo Migambo iti Kristo ayĩkala kera na kera. Neryo ũkabũga uti kwehĩ? Uti, Omugala wʼOmundu atolere iniasumbirwa endata. Omugala wʼOmundu oyũ nindi kwehĩ? 35Neryo Yesu mwabwirabo ati, Ekyakakala kikine kandi omo katĩkatĩ kenyũ oko katambĩ kake. Mulendere omugulu mukine nʼekyakakala ekyo, omwĩrĩmya siabatange. Oyukalendera omo mwĩrĩmya sĩasĩ eyo akaya. 36Omugulu muli nʼekyakakala mwĩkĩrĩraye ekyakakala, mutoke eribya bandu bʼekyakakala.
Erĩtendĩkĩrĩrya lyʼAbayũda
Yesu abere abĩbũga emyatsi eyĩ, mwalũaho mwayĩbĩsa kubo. 37Nĩkwa nomo anakola ebitiko-tiko bingi embere wabo, mobatamwĩkĩrĩrya. 38Ekĩnywa kyʼomũmĩnyererĩ Ĩsaya ikyatoka eribererera ekyabũga kiti,
Omwami Mukulu, nindi yo wabĩrĩkĩrĩrya erĩtũlago lyetu kwehĩ?
Omwami Mukulu abirĩbĩsũlĩra amaka wuwe ukundi kwehĩ?
39Busana nʼomwatsi oyũ, mobatatoka erĩkĩrĩrya, kusangwa Ĩsaya mwaswabũga ati,
40Nyamuhanga abĩrĩrĩba ameso wabo, Abĩrĩkalya emitima yabo,
Ameso wabo syalangire,
Nʼemitima yabo siyiminye,
Kandi sibabinduke,
Nage, ngalamyabo.
41Ĩsaya mwabũga emyatsi eyĩ kusangwa mwalangira olukengerwa lwa Yesu, kandi mwamwahula. 42Nĩkwa abatabalĩ bangi bʼAbayũda mobĩkĩrĩrya Yesu; nĩkwa busana nʼAbafarĩsayo mobatakangyalyo, bakasyahigwa omo nyũmba yʼerĩhĩndanamo. 43Kusangwa mobanza erĩsĩmwa nʼabandu kwilaba erĩsĩmwa na Nyamuhanga.
Ekĩnywa kya Yesu kikatswera
44Neryo Yesu mwabũga nʼomulenge munene ati, Oyũkanyĩkĩrĩraya, sĩalĩnyĩkĩrĩraya ĩngyowene, nĩkwa akĩkĩrĩraya oyo wanyituma. 45Kandi oyukanyilolako, akalola ukwʼoyo wanyituma, 46Nabĩrĩhĩka muna-kihugo ngʼekyakakala, neryo oyũkanyĩkĩrĩraya sĩasyĩkala omo mwĩrĩmya. 47Kandi omundu amowa ebĩnywa byage, isialibikabyo, sindimutswera, kusangwa mondasa eritswera ekihugo, nĩkwa nasa erĩlamya ekihugo. 48Oyukanyigana, isialilangira emyatsi yage, awite oyukamutswera; ekĩnywa ekyo nabũga kyo kyasyamutswera oko kiro kyʼenyũma-nyũma! 49Kusangwa mondabũga omwʼiyihana lyage, nĩkwa Tata oyo wanyituma abirinyihana ebyo nangabũga nʼebyo nangatũla. 50Kandi nyĩnasĩ erihana liwe ni ngebe yʼerikota. Neryo emyatsi eyo ngabũga, ngabũga ngoko Tata abirimbwira.
Bible in Kinandi © Bible Society of the Democratic Republic of Congo, and Bible Society of Uganda, 1980.
