Mateyo 7
7
Mshelahe.
1Mshelahe wenyu, kangwe mshezalahiγwa! 2Hambu milahile, ndiyo mulahe nayo, ne ndiyo nezemulahiγwe nayo, kangi kihimo, ndicho muhime nacho, ne ndicho nezemuhimilwe nacho. 3Nini ukiolela kashashani ke mwe zisho ja ṅwiyawo; miya jiya γoγo gima je mwe zisho jako nkujiona? 4Ṅwiyawo umlonga zeze: Leka, niushe kashashani ke mwe zisho jako? Kangi shivyo: Γoγo gima ji mumo mwe zisho jako! 5Wahemba iwe! Kuandiila usha jiya γoγo mwe zisho jako! Ukibinda udaheolela, ndivyo uushe kaja kashashani ke mwe zisho ja ṅwiyawo! 6Viṅazingwa msheviinkile kwe makuli! Kangi makalata yenyu msheyaashe kwe nguluwe, zishezayajata na milundi vawe, zikimihitukila, zikimimokolamokola.
Lombezai.
7Lombezai! Nemwinkwe. Londai! Nemwone. Goṅondai! Nemzuγwilwe. 8Hambu kila mwelombeza ainkwa, mwelonda aona, mwegoṅonda azuγwilwa. 9Hambu kwenyu kuna muntu, ndiye amunke ṅwanae iwe, akimlombeza nkande? 10Ao du akimlombeza kapala, amunke nyoka? 11Lushe ati inywi wabada mwadaha kuinka wana wenyu vintu vitana, ishe ywenyu mweikala mwe lwingu asheisiize kuinka vintu vitana waja wemlombeza? 12Vyoshe muvyokunda, wantu wavimiγoshwele, andiilai inywi kuviwaγoshwela! Ne bontokelo ja mulomongwa na ja wateγanyingwa.
Sila ya kweli.
13Ingilai mwe nkili finyu! Hambu kuna nkili sangalamu na sila nkulu, ne yeonya kwa banikila; weiingila ni wangi. 14Kangi kuna nkili finyu na sila shishili, ue yeonya kwe ukalamo, weiona ni waγeke.
15Kiγojei kwa mbuli za wateγanyi wa ulongo! Waiza kwenyu waizwikile sa ngoto, miya uko ndai ni mashuwi yena upakuzi: 16Nemuwataile na miγoshwele yawe! Sabibu wantu wazishenga mwe mishewa? Ao nkuyu wantu wazishenga mwe migunga? 17Ivyoho kila muti mtana uvyala matunda matana, kila muti mbada uvyala matunda mabada. 18Muti mtana nkaudaha kuvyala ntunda mbada, muti mubada nkaudaha kuvyala ntunda ntana. 19Kila muti ushiwotenda kuwo jedi wakelwa, waashiγwa mwe moto. 20Kwa ivyoho nemuwataile na miγoshwele yawe! 21Weniitanga Zumbe! Zumbe! Nkawaingila woshe mwe uzumbe wa lwingu, miya ni waja du weγoshola Tate mweikala mwe lwingu avyokunda. 22Mushi uja wangi newaniγambe: Zumbe! Zumbe! Nkatibilikile mwe zina jako? Nkatiingate mpepo mwe zina jako? Nkatiγoshole vilozo vingi mwe zina jako? 23Ne ndiho niwalavilize kuγamba: Kale hoshe samitaile, ukai kwangu, inywi mγosholewo vishivyoγosholwa!
Muntu mkiyuγo.
24Kila muntu mweiva izi mbuli zangu akiziγoshola atafanana na muntu mkiyuγo mwezenga nyumba yakwe kunguwi. 25Hata fula iisiize, mito imeme, mpeho ikuntishe, itowe ija nyumba nkaikina, hambu izashikainiziγwa mwe kungu. 26Kangi kila muntu mweiva izi mbuli zangu akisheziγoshola atafanana na muntu mubabashi mwezenga nyumba yakwe mwe mshangalaγala. 27Fula ikiisiiza, mito ikimema, mpeho ikikuntisha, ikitowa ija nyumba, itakina, kangi kuchakuka kwakwe ni kukulu.
28Yesu akibinda izi mbuli, wantu wazashentuka mifuzize yakwe. 29Hambu azawafuza sa muntu mwena ufuṅwa, nkafanane na watabaluwangwa we kwawe.
נבחרו כעת:
Mateyo 7: KISHNT05
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Testament in Kishambala © Bible Society of Tanzania, 2005.
