Luka 20
20
Ubatizi wa Yohana.
1-8.
1Mushi siku akifuza wantu vikiloi na kuwabilikila, kuzainuka wavikizi wakulu na watabaluwangwa haṅwe na waγolokezi, 2wazamuti: Tiγambile: Ivi uviγoshola kwa nguvu ani? Akunkileye unu ufuṅwa ni ndai? 3Azawalandula angwe: Nami nimiuze mbuli ṅwenga, mwiniγambile: 4Ubatizi wa Yohana uanduke mwe lwingu, hambu kwa wantu? 5Waja wazafanyanya mwe myoyo yawe kuγamba: Ati tamuti: Mwe lwingu, atatiti: Nini mkishemtozesha? 6Ati tamuti: Kwa wantu, wantu wosheni watatihomela mawe, hambu wazaisa kutozesha kuti: Yohana ni mteγanyingwa. 7Wazalandula: Nkatitaila, ukoanduka nako. 8Yesu azawati: Lushe nami simiγambila, ati niviγoshola kwa nguvu ani.
Walimi wabada wa mizabibu.
9-19.
9Azaandiila kulonga wantu lushimo ulu: Muntu azahanda mizabibu, azaiinkila kwa walimi, ṅwenye azahita mwe shi ntuhu mishi mingi. 10Mishi ikitimiza, azatuma mubwanga kwa waja walimi, kangwe wamunke mazabibu. Miya waja walimi wazamluta, vikibinda wazamγotosha mikono du. 11Azatuma vituhu mubwanga mtuhu, miya waja wazamluta yohena, wazamkanka, wazamγotosha mikono du. 12Azauγiza kutuma ywa ntatu, miya uyu yohena waja wazamγulusha na kumlavya vilonda. 13Ne yuja ṅwenye mizabibu ahoγamba: Nitende zeze? Nenimtume ṅwanangu, niyemkundisha, minga uyu newaingilwe ni shoni naye. 14Miya waja walimi wakimwona wazafanyanya, kangi wazaγambilana: Uyu ni mupazi; ndokoi, timkome, kangwe ufa uγaluke wetu! 15Wazamluγusha, alawe mwe mizahibu, wazamkoma. Lushe yuja ṅwenye mizabibu atawatenda zeze? 16Atabita, akome waja walimi, ainkile ija mizabibu kwa watuhu. Wakiviiva wazaγamba: Vikashetaγosholwa kwetu! 17Azawaolela, azawati: He ija mbuli igondiγweyo kuγamba: Iwe, wazengo wabentilejo, jizaγaluka shikizi ja heta? 18Kila ndiye akine mwe iji iwe, atabanika, kangi ndiye jinikinile, jitamtiγinta. 19Ija ngela watabaluwangwa na wavikizi wakulu wazalonda, ndivyo wamgwile, miya wazaogoha wantu; hambu wazataila, kuti luja lushimo alulongile kwa mbuli yawe.
Kodi ya Kaiza.
20-26.
20Wazamγoj aγoja, wazatuma, ndiwo wamnyatile, wekionyaonya viya watatozesha, kangwe wamgwize na mbuli, ndiyo alonge, wadahemwinkila kitala na bomani kwa mtoza shi. Wazamwuza angwe: 21Mfuzi, tataila kuti: Ulonga na kufuza vyeγolokela, nkuolela vyeni vya wantu, miya ufuza sila ya Mulungu, ilivyo kweli. 22Vina ṅwiko, tikimunka Kaiza kodi, hambu nkavina? 23Miya azataila ubada wawe, azawati: Nini mkiniγeza? 24Nionyeshai sumni! Ina chapa na ugonde wa ndai? Angwe: Wa Kaiza. 25Azawati: Kwa ivyoho munkei Kaiza viya vya Kaiza, kangi Mulungu mumunke viya vya Mulungu! 26Nkawadahile kumgwila na inu mbuli yakwe, wantu wai hsho, wazamaka milandwile yakwe, wazaleka lwashu.
Ufufuki.
27-40.
27Masadukeyo wazamwizila, ni waja wekela nkani kuti: 28Nkahana ufufuki, wazamwuza angwe: Mfuzi, Mose azatigondela kuγamba: Mkuluwe ja muntu akifa aina mvyele na kusheasha ṅwana, shuti nduγuye amupale yuja muke, amwinulile mkuluwe mbeleko! 29Ne kwina wanduγu mfungate; yuja ywa bosi azaγuwa mvyele, azafa aishina ṅwana. 30Yuja ywa mbili azamupala, yohe azafa aishina ṅwana. 31Hata yuja ywa ntatu azamupala, vivyoho waja woshe mfungate, niiya wakifa nkawaashize wana. 32Kushilikiza yuja mvyele yohena azafa. 33Lushe mwe ufufuki neaγaluke ywa ndai? 34Hambu woshe mfungate, ne waina naye. Yesu azawati: Wana wa inu shi waγuwa kangi waγwiγwa. 35Miya ndiwo wakundiziγwe kuikala mwe ija shi, ndiyo nezeilawile, wafilewo wahozafufuka, waja nkawaγuwa, nkawaγwiγwa. 36Hambu nkezewafe vingi, wafanana na walaungwa, kangi ni wana Mulungu, kwa kuti ni wanangwa wa ufufuki. 37Inu mbuli kuti: Wafilewo wafufuka, hata Mose azabuliza kuilonga haja he jiya shafi, akimwitanga Zumbe: Mulungu ywa Abulahamu na Mulungu ywa Isaka na Mulungu ywa Yakobo. 38Kangi Mulungu SO ywa wafilewo, ni ywa we moyo. Hambu kwakwe woshe wa moyo. 39Watabaluwangwa kuṅwe wazamwitikila angwe: Mfuzi, uzalonga vitana. 40Nkawaγezize vituhu kumwuza mbuli.
Kilisito ni ṅwana Dawidi?
41-44.
41Azawati: Wantu walonga zeze kuti: Kilisito ni ṅwana Dawidi? 42Hambu Dawidi ṅwenye azalonga mwe kitabu cha mazumo kuti: Zumbe azamlonga Zumbe ywangu: Ikala kulume kwangu, 43mpaka ndiho nezeniike wankulu wako shi he milundi yako! 44Dawidi ṅwenye amwitanga Zumbe, lushe ni ṅwanae vivihi?
Masa ya walabaluwangwa.
45-47.
45Wantu woshe wakimteγeleza, azalonga wahina wakwe: Kiγojeshei kwa mbuli ya watabaluwangwa! 46Watamilwa ni kuanga waizwikile shuke za kizumbe, watamilwa ni kuluγushiγwa lwazoi, mwe mavikilo waikala mwe viti vya wazumbe, hata wakilalikwa kwe nkande waikala ha wafuṅwa. 47Waaja nyumba za wavyelengwa wafilwewo ni waγoshi, kangi wakionyaonya, viya wataisiiza kuwahembelezeza. Awa watazalahwa masa yezinka ya weyae wawe.
נבחרו כעת:
Luka 20: KISHNT05
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Testament in Kishambala © Bible Society of Tanzania, 2005.
