Yohana 1
1
Mbulingwa.
1Kuandiila mbulingwa ne ii haho, iyo mbulingwa ne ii kwa Mulungu, kangi Mulungu ne mbulingwa. 2Iyo kuandiila ne ii kwa Mulungu; 3vyoshe viumbiγwe ndiyo; iishiho nkahana chiumbiγwecho hata kiṅwe. 4Mwe iyo mbulingwa nkalamo ne ii mumo, kangi iyo nkalamo ne ii langaila ja wantu. 5Langaila jaaka mwe lwiza, miya lwiza nkalujitozize. 6Ne kwina muntu atumiγweye ni Mulungu, zina jakwe ndiye Yohana. 7Uyu aizile kwa longa uwona alongele jiya langaila uwona, kangwe jileke, woshe watozeshe. 8Yuja siye langaila, miya kangwe jiya langaila ajilongele uwona. 9Langaila ja kweli jepwinkukila kila muntu ne jikiiza mwe inu shi. 10Ne jii mumo mwe inu shi, kangi inu shi iumbiγwe ndijo, miya inu shi nkaijitaile. 11Aizile na mwakwe, miya wantu wakwe nkawamhokele. 12Miya woshe wamhokelewo azawainka ufuṅwa wa kuγaluka wanangwa wa Mulungu, ni waja watozeshewo zina jakwe. 13Awa nkawavyelwe ni mpome ao kwa mikundile ya kimuntu ao kwa ntongonyezi za mγoshi, miya wavyelwe ni Mulungu. 14Mbulingwa izaγaluka muntu, izaikala kwetu; tizaona utana wakwe, ni utana viya wa ṅwana avyelweye ike ni ishe, hambu aigisize mbazi na kweli. 15Yohana azamlongela uwona akibilikila angwe: Uyu ni yuja, nilongileye kuti: Yuja mwenitongela nyuma a haho, imi nishizati, hambu ni mkulu ywangu. 16Hambu mwe viya, avyoγenyeza, ishwi toshe tizaγuwa vya mbazi vivyoho vivyoho. 17Mulomongwa uzaiza na Mose, miya mbazi na kweli izalawila na Yesu Kilisito. 18Muntu nkamwene Mulungu kale hoshe; ṅwanangwa avyelweye ike, ndiye akiikala na kukaambatwa ni ishe, ne atiγambileye.
Uwona wa Yohana.
19Uwona wa Yohana shunu: Wayuda we Yelusalemu ne wakituma kwakwe wavikizi na Walewi, kangwe wamwuze kuti: Iwe ni weyo ndai? 20Aho azalonga na kulaviliza, nkafishize, azalonga cha sale kuti: Imi si Kilisito. 21Wazamwuza: Lushe mbuli i zeze? U Eliya? Angwe: Imi siye. Angwe: U mteγanyingwa? Azalandula: Do. 22Wazamuti: U ndai? Kangwe tilandule waja watitumilewo. Ṅwenye uγambai, kuti iwe u ndai? 23Angwe: Imi ni kanwa cha mtakubilikila mwe nyika kuti: Liγanyai sila ya Zumbe, sa mteγanyi Yesaya alongilevyo! 24Waja watumiγwe ni Mafaliseyo. 25Wazamwuza, wazamuti: Ubatiza ywai, ati nku Kilisito ao du Eliya ao du mteγanyingwa? 26Yohana azawalandula angwe: Imi nibatiza na mazi; miya kuna mweγoloka kwenyu gati, mushiyemtaila; 27ni yuja mwenitongela, kwa udodo wangu nkaviniagiza, nikimzaγawila mikowa ya vilatu. 28Ivi vizabontoka Betabala sheja ja Yolodani, ndiho Yohana akiikala akibatiza.
Ṅwangoto ywa Mulungu.
29Keloi jakwe Yohana azamwona Yesu, akiiza kwakwe, ne aholonga: Shuyu ṅwangoto ywa Mulungu mweusha masa ya ngulu ngima! 30Uyu ne ndiye nikilonga kuti: Kuna mγoshi mwenitongela, mwe haho, imi nishizati, hambu ni mkulu ywangu. 31Nami ne nishimtaila, miya kangwe ataiiwe ni Waisilayeli, ne niizilevyo imi nikibatiza na mazi. 32Yohana azalongauwonakuti: Imi nizaona, mpehongwa ikilawa mwe lwingu, ifanana na suwa, izamshelela, izamwikaila. 33Nami ne nishimtaila, miya yuja anitumileye, nibatize namazi, azaniti: Ndiye uone, mpeho ikimshelela, ikimwikaila, uyu ne mwebatiza na mpeho ṅazi. 34Nami nizaviona, ne nilongelevyo uwona kuti: Uyu ni ṅwana Mulungu.
Wahina wa bosi wa Yesu.
35Mhitu wakwe Yohana azaγoloka vituhu na wahina wakwe waili. 36Akimwona Yesu, avyoanga, azalonga: Shuyu ṅwangoto ywa Mulungu! 37Waja wahina waili wakimwiva, avyolonga, wazamlongela Yesu. 38Yesu azahituka, azawaolela, wavyomtongela, azawati: Mulondai? Wazamuti: Labi, (bontokelo jakwe ni kuγamba: Mfuzi) uikala hi? 39Azawati: Izai, mkaolele! Wazahita, wazaona, ahoikala, wazaikala kwakwe uja mushi; miya ni saa kumi. 40Waja wahina waili waivilewo, kangi waγambilwewo ni Yohana, wakimtongela, muṅwe ywawe ni Andeleya, nduγuye ja Simoni Petelo. 41Uyu akiandiila kumwona mkuluwe Simoni, amuti: Tizamwona Mesiya, ni kuγamba: Kilisito. 42Azamwiγala kwa Yesu. Yesu azamwolela angwe: Iwe u Simoni, ṅwana Yohana, neuitangwe Kefa, ni kuγamba Petelo (ao kungu).
Filipo na Natanaeli.
43Keloi jakwe Yesu akikunda kuhalawa, ahite Galileya, azamwona Filipo, azamuti: Nitongela! 44Yuja Filipo ni ywa Betisayida, Andeleya na Petelo wamoanduka namo. 45Filipo azamwona Natanayeli, azamuti: Mose na wateγanyingwa wamteγanyeye mwe mulomongwa, tizamwona, ni Yesu, ṅwana Yosefu ywa Nazaleti. 46Natanayeli azamlandula angwe: Kumbe kuna vitana vyeanduka Nazaleti? Angwe ni Filipo: Iza, ukaolele! 47Yesu akimwona Natanayeli, akiiza kwakwe, azalonga mbuli yakwe kuγamba: Shuyu Mwisilayeli mkweli ashinaye mambeza! 48Angwe ni Natanayeli: Unitaile na hi? Yesu azamhitula, azamuti. Filipo ashizati akulonge, nizakuona, wiikale he mkuyu. 49Angwe ni Natanayeli: Mkulu, iwe u ṅwana Mulungu, iwe u Zumbe ywa Isilayeli! 50Yesu azamwitikila, azamuti: Watozesha, kuti nizakulonga kuti: Nizakuona haja he mkuyu, neuone vyekula kuzinka viya. 51Amuti: Kweli namiti: Nemwone, lwingu luvyozuγuka na walau wa Mulungu wavyokwezanya na wavyoshelezanya, wakimtimila ṅwanangwa ywa muntu!
נבחרו כעת:
Yohana 1: KISHNT05
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Testament in Kishambala © Bible Society of Tanzania, 2005.
