Màtéwò 20
20
Yèésù wà mú olóko-kã̀ yèé wà gba àtsìtsɛ́ ŋa lɔ nóko‐ɛ̀#ɛ́ kpòwe
1Yèésù ní ká rí kíbí Ɔ̀ɖáyé nákó dzoyè gbà#á gé. Olóko-kã̀ fùɖá náàwúrɔ̀ kùtùù, tsí lɔ káà gba àtsìtsɛ́ ŋa fú oko-egi-ɔtí†‐ɛ̀. 2Òŋu àtsìtsɛ́ ŋa#á dzɔ́ kpaá, tsí làá ní nákó sã owó-itsɛ́-ɔdzɔ́-kã̀ fú àŋa, tsí à gbɛ̃́ ŋa lɔ nóko#ɛ́.
3Kíbí ó ɖi ńǹwèrè-ìyálɛ̀#ɛ́, olóko#ɛ́ fùɖá lɔ náàbɔ̀ɔ́mɛ̀ ró, tsí ó rí olòmírɛ̃̀ ŋa gbo ɖóro si náàrì rí itsɛ́-kã̀ ká tse. 4Tsí ó fɔ̀ fú ŋa ní: Àŋa gbo ká lɔ káà tsitsɛ́ nóko-òŋu. Ó ɖi, òŋu nákó sã owó yèé ɖé bá itsɛ́-ŋa#á fú ŋa.
5Tsí à lɔ nóko#ɛ́. Ńǹwèrè-òsã́ gãgã gbo ró#ɛ́, olóko#ɛ́ fùɖá, tsí gba àtsìtsɛ́ ŋa ró. Tsí nódzúùrɔ̃̀-alɛ́#ɛ́ olóko#ɛ́ tɔ́ fùɖá ró, tsí gba àtsìtsɛ́ ŋa bɛ́ɛ̀ ké. 6Tsí ńfúráfúrá-ɔdzɔ́#ɛ́, ó tɔ́ fùɖá ró, tsí rí ɔ̀nyà kã̀ŋa gbo ɖóro si náàbɔ̀ɔ́mɛ̀#ɛ́, tsí ó wà bèrè ŋá ní: Kí tse tsí à wà bí si títí náàwúrɔ̀, tsí à kò wà tsitsɛ́-kã̀?
7Tsí à dzɔ́ŋù fúu ní: Ɔ̀nyà-kã̀ kpókpó kò fú àŋa ńtsɛ́.
Tsí ó fɔ̀ fú ŋa ní: Ó sã̀! Àŋa gbo ká lɔ nóko-òŋu káà tsitsɛ́.
8Ó ɖi náalɛ́ ńǹkɛ̀ɛ́, tsí ɔ̀gá#á fɔ̀ fú ègbènáànyì‐ɛ̀ ní: Kó kpe àtsìtsɛ́ ŋa#á, tsí kó sã owó-kṹnukṹ fúu. Ó ɖi, kó kpée ti ńǹtá-ɛnɛ yèé òŋu gbà kã́ã̀nyì ŋa#á, tsí kó tã́ã ńǹtá-ɛnɛ yèé òŋu tsɛ̃̀tsɛ̃̀ gbà ŋa#á. 9Ńbɛ̀ɛ́, ɛnɛ yèé kpé itsɛ́ ńfúráfúrá-ɔdzɔ́#ɛ́ ŋa#á wá, tsí kṹnukṹ gba owó-itsɛ́-ɔdzɔ́-kã̀. 10Owó#ɛ́ sísã wáa tó ńǹtá-ɛnɛ yèé à tsɛ̃̀tsɛ̃̀ gbà ŋa á. Tsí à ɖédzú ní àŋa nákó gbà lárè bɛ́ɛ̀ ni. Ó ɖi, àŋa gbo#ɛ́, kṹnukṹ gba owó-itsɛ́-ɔdzɔ́-kã̀ ni. 11Tsí kíbí à gba owó#ɛ́, à wà kpɔ̀kɔ̃̀ɔ̃́rɔ̃̀ nára-olóko#ɛ́ ní: 12Àŋa tsitsɛ́-ɔdzɔ́ ɔ̀kã̀ntso kpó nóòruku lákṹ-nyɛ̀ŋɛ̀, tsí ó wɔ̀ àŋa si. Tsí ó sã owó ɔ̀kã̀ntso fú àŋa ɛnɛ yèé ŋa ó gbà kã́ã̀nyì, tsí à tsitsɛ́-aŋgo-kã̀ gé#ɛ́ɛ̀? Óò dza! 13Tsí olóko#ɛ́ dzɔ́ŋù fú ɔ̀kã̀-ŋa ní: Ídzà-mi, ǹ kò ɖíɛ si nɛ́! Kò tsi àŋa dzɔ́ kpaá, tsí làá ní kó tsitsɛ́, tsí kó gba owó-itsɛ́-ɔdzɔ́ ɔ̀kã̀ntso niì? 14Ó ɖi, kó gba owó‐ɛ̀, tsí kó sɔ́ lɔ fú òŋu. Òŋu wò ní ɛnɛ yèé òŋu gbà kã́ã̀nyì ŋa#á kó gba owó ɔ̀kã̀ntso báa. 15Nàmí ɔ̀nà kò wà fú òŋu ní òŋu kó mú owó-òŋu tse iŋɛ́ yèé wu òŋu#ɛ́ɛ̀? Tsí kíbí òŋu dzɛ́ atsore#ɛ́ ní ó kí nódzú fúu#ɛ́ɛ̀?
16Tsí Yèésù fɔ̀ máa ní: Ńbɛ̀ɛ́, ɛnɛ yèé dzɛ́ ɛnɛ-wá ŋa si báàyí#ɛ́, à nákó wáa ɖi ɛnɛ-ànyì ŋa, tsí ɛnɛ yèé dzɛ́ ɛnɛ-ànyì ŋa si báàyí#ɛ́, à nákó wáa ɖi ɛnɛ-wá ŋa.
Yèésù tɔ́ wà fɔ̀ nóláànkɛ́ɛta‐ɛ̀ ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé
(Mákò 10:17-31; Lúkà 18:31-34)
17Yèésù òŋu ɔmatsɛ́‐ɛ̀ ŋa làkóò ńYèrúsàlɛ́mì. Kíbí à làkóò#ɛ́, ó kpe ɔmatsɛ́‐ɛ̀ máàméèdzì ŋa#á wáa lɔ nákpálà-kã̀, tsí fɔ̀ fú ŋa ní: 18Ká rɛ̃tígbè! Ó ɖi, àŋa làkóò ńYèrúsàlɛ́mì, tsí òŋu, Ɛnɛ yèé ɔ̀nyà bí#ɛ́†, à nákó mú òŋu fú onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa. Tsí à nákó ɖáàbi fú òŋu ní ká kpa òŋu nóòkú, 19tsí mú òŋu bɔwɔ́-ɛnɛ yèé kò dzɛ́ ɔma-Ìyúɖà ŋa#á, tsí ká mú òŋu tse, tsí tsɔ òŋu náàtàmì, tsí kã òŋu si ńǹtá-egi-ìɖáàgàlàdzà†, tsí òŋu kó kú. Tsí nɔ́dzɔ́-ɛ̀kɛ́ɛta‐ɛ̀, òŋu nákó sɛ̃̀ dzí ti náàŋírĩ-òkú ŋa wá náyé.
Yèésù ní ɛnɛ yèé wà wo kó dzɛ́ ɔ̀gá#á, kó sɔ ara‐ɛ̀ ɖi adzítsɛ́
(Mákò 10:35-45)
20Aya-Sèbèɖé gbɛ̃́ ɔma‐ɛ̀ ŋa banɛ́, tsí tìmá Yèésù, tsí ó kálɛ̀, tsí wà tsìkálɛ̀-kã̀ fúu. 21Tsí Yèésù wà bèrèé ní: Kí ó wà wò?
Tsí ɔnɔbɛ̃̀ɛ̃#ɛ́ dzɔ́ŋù fúu ní: Kó dzɛ́ fú òŋu ɖé ní ńǹwèrè yèé nákó waà dzoyè#ɛ́ ni ɔma-òŋu méèdzì yèé ŋa ká dzokó gbèé. Ɔ̀nyà-kã̀ kó dzokó náàwóòtã́‐ɛ̀, tsí enìkéèdzì‐ɛ̀ kó dzokó náàwóòsì‐ɛ̀.
22Tsí Yèésù dzɔ́ŋù fú ŋa ní: À kò ma iŋɛ́ yèé à wà bèrè#ɛ́. Ó ɖi, ìréré yèé wà ɖóro ɖe òŋu#ɛ́ fe, à nákó nyáa dzɛ́ tsí kó rã̀ ŋáà?
Tsí à wí fúu ní: Àŋa nákó dzɛ́, tsí kó rã àŋa.
23Tsí Yèésù wà wí fú ŋa ní: Bɛ́ɛ̀ ni, nákó rã̀ ŋá. Ó ɖi, kò tsi òŋu ní nákó ɖíre ɛnɛ yèé nákó gbé náàwóòtã́-òŋu nàmí náàwóòsì-òŋu#ɛ́. Ìɖì nyɛ̀ŋɛ̀ ŋa#á, ti ɛnɛ yèé ŋa Boba-òŋu ti tɔ́tse ŋá si fú#ɛ́ ni.
24Kíbí ɔmatsɛ́‐ɛ̀ maá àtíbɔ̀ ŋa#á gbɔ́ afɔ̀#ɛ́, à bínɔ́ fú ìnàbí méèdzì ŋa#á.
25Tsí Yèésù kpè àŋa kpó, tsí fɔ̀ fú ŋa ní: Ólú-ìlú ŋa náa kã́rũ-ìlú-ŋà ŋa gbegbé, tsí ɔ̀nyà-ìdzɔba ŋa gbo náa kã́rũ tiŋà ŋa. À mà bɛ́ɛ̀ yá nɔ̀! 26Ó ɖi, kó máa lɔ bɛ́ɛ̀ fú àŋa òŋu. Kà kàa bɛ́ɛ̀, bí ɔ̀nyà-kã̀ náàŋírĩ-ŋa wà wò ní òŋu kó dzɛ́ ɔ̀gá fú ŋa#á, ó wà ní ɛnɛ nyɛ̀ŋɛ̀ kó sɔ ara‐ɛ̀ ɖi adzítsɛ́ fú ŋa. 27Tsí bí ɔ̀nyà-kã̀ náàŋírĩ-ŋa wà wò ní òŋu kó gba iwádzú fú ŋa#á, ó wà ní ɛnɛ nyɛ̀ŋɛ̀ kó sɔ ara‐ɛ̀ ɖi arú fú ŋa. 28Bɛ́ɛ̀ ké ní òŋu, Ɛnɛ yèé ɔ̀nyà bí#ɛ́†, òŋu kò wá ńǹtalɛ̀ ní ɔ̀nyà ŋa ká dzítsɛ́ fú òŋu. Ó ɖi, òŋu wá ní òŋu kó dzítsɛ́ fú ɔ̀nyà kpó, tsí òŋu kó mú ara-òŋu sã́ã̀bi si nárũ-ɔ̀nyà kpíkpɔ̀ ni.
Yèésù tsí odzú fú afɔ́dzú méèdzì-kã̀
(Mákò 10:46-52; Lúkà 18:35-43)
29Yèésù òŋu ɔmatsɛ́‐ɛ̀ ŋa wà fùɖá ńǹlú-Yèríkò, tsí ɔ̀nyà ɛ̀gbɛ̀lɛ́ɛ̀gbɛ̀-kã̀ tɛ̀ náànyì‐ɛ̀. 30Ńǹwèrè nyɛ̀ŋɛ̀#ɛ́, afɔ́dzú méèdzì-kã̀ dzokó si nétí-ɔ̀nà. Tsí kíbí à gbɔ́ ní Yèésù ní wáa làkóò#ɛ́, à wà ɖúgbe ní: Ɔ̀gá! Ɔmalɔ́ma-Ɖàfíɖì†! Kó rí ànyínɔ́ fú àŋa ɖé ooò!
31Tsí ɔ̀nyà ŋa wà gírí ɖí ŋa ní ká famí igbe#ɛ́ bɛ́ɛ̀!
Ó ɖi, àríkɛ̀ɛ́ yèé gìɖì à wà ɖúgbe#ɛ́ kũkũ máa ró#ɛ́ ńnɛ̀ɛ́. À wà ɖúgbe ní: Ɔ̀gá! Ɔmalɔ́ma-Ɖàfíɖì ééè! Kó rí ànyínɔ́ fú àŋa ɖé ooò.
32Ńbɛ̀ɛ́, Yèésù ɖóro, tsí kpè ŋá, tsí wà bèrè ŋá ní: Kí à wà wò ní òŋu kó tse fú ŋa báàyí?
33Tsí à dzɔ́ŋù fúu ní: Ɔ̀gá! Kó tsí odzú fú àŋa ɖé.
34Tsí inɔ́-ŋa nyɔ́ Yèésù tó bɛ́ɛ̀, tsí ó mɔ́wɔ́ kã odzú-ŋa. Ńǹɖì-bɛ̀ gbòkã́#á, odzú-ŋa tsí, tsí à wà rírã, tsí à ǹɖe, tsí tɛ̀ náànyì-Yèésù lɔ.
© (Active), Wycliffe Bible Translators, Inc. All rights reserved.
