Lúkà 1
1
1Ɔ̀gá Tèyòfílì, ǹ wà kíɛ. Ǹ wà kɔ ìwé yèé ti nára-iŋɛ́ yèé ŋa tse wáa lɔ náàŋírĩ-wa#á. Ɔ̀nyà kã̀ŋa ti kɔ ɛ̀rɔ́ ti nára-kíbí iŋɛ́ ŋa#á lɔ gbà#á. 2Iŋɛ́ yèé à kɔ ŋa#á, ɛnɛ yèé gbé ńǹɖì-iŋɛ́ ŋa#á, bɛ́ɛ̀ ní à fɔ̀ɔ́ fú wa#á. Ɛnɛ nyɛ̀ŋɛ̀ ŋa ní rí iŋɛ́ ŋa#á, tsí wáa ɖi anyàyídzá-afɔ̀-Ɔ̀ɖáyé wérí#ɛ́.
3Tsí èmi gbo, ǹ wáa ǹɖe, tsí ǹ bere òkpì-iŋɛ́ ŋa#á kpó rere títí ńǹkpìnkpìlɛ̀. Tsí ǹ rí ní ó sã̀ ní n kɔɔ́ fú ìwɔ gbo nɛ́kpa nɛ́kpa kpó. 4Ǹ wà kɔ ŋá fɛ́ɛ àtóoríi o mà ní afɔ̀ yèé ò ti gbɔ́ ŋa#á ni afɔ̀-òtítɔ́ ni.
Adzítsɛ́-ɔ̀rɔ̃-kã̀ wà wí fú Sàkàríyà ní aya‐ɛ̀ nákó bíma-kã̀
5Ńǹwèrè yèé Èróɖì† dzɛ́ ólú nérè-Yùɖéyà si#ɛ́, ɔ̀nyà-kã̀ wà bɛ̀, tsí à náa kpèé ní Sàkàríyà. Sàkàríyà#á, atsɛbɔ-Ɔ̀ɖáyé†-kã̀ ní ó dzɛ́#ɛ́. Atsɛbɔ-Ɔ̀ɖáyé ŋa, ɔmalɔ́ma-Àrɔ̃́nì† ŋa ni, tsí à kpɛ̃́ ŋa nɛ́gbɛ́ nɛ́gbɛ́ si. Tsí Sàkàríyà wà nɛ́gbɛ́ yèé à náa kpè ní Àbíyà#á. Aya‐ɛ̀ gbo ɔmalɔ́ma-Àrɔ̃́nì ké ni. À náa kpèé ní Èlìsàbɛ́tì. 6Àŋa méèdzì méèdzì#ɛ́ kpó, ɔ̀nyà-atsòtítɔ́ ŋa ní à dzɛ́ nódzú-Ɔ̀ɖáyé#ɛ́. À wà rɛ̃̀ si nɛ́kpa-Ɔlɔ́dzɔ́, tsí wà tse awù‐ɛ̀ títí à kò rí íbàɖí-kã̀ kpókpó nára-ŋa. 7Ó ɖi, à kò bíma, iŋɛ́ yèé tse#ɛ́, Èlìsàbɛ́tì dzɛ́ àgbàrèbí, tsí àŋa méèdzì méèdzì#ɛ́ kpó ti gbárígbó.
8Tsí ó ɖi nɔ́dzɔ́-kã̀, tsí ɛgbɛ́-Àbíyà#á ǹɖe lɔ ńlé-Ɔ̀ɖáyé†. Àsòkò-ŋa ní tó ní ká lɔ káà sɛ̃ Ɔ̀ɖáyé, tsí à lɔ#ɛ́. 9Tsí atsɛbɔ-Ɔ̀ɖáyé ŋa wà wo ká ma ɛnɛ yèé nákó wɔlé-Ɔ̀ɖáyé, tsí kó mú awu rṹrũ̀ fĩ́rĩ́fĩ́rĩ́ ɖà ńná#á. Tsí à ɖìbò‐ɛ̀ kíbí à náa ti tseé#ɛ́, tsí ó mú Sàkàríyà.
10Tsí ìwèrè tó, tsí ká mú awu#ɛ́ ɖà ńná, tsí Sàkàríyà ǹɖe wɔlé#ɛ́ lɔ. Tsí ɔ̀nyà kpíkpɔ̀ wà nóòɖe si ńkpàtá#á, tsí à kpérí kpó, tsí wà wúùre. 11Kíbí ó wɔ̀ ńnɔlé#ɛ́ lɔ#ɛ́, adzítsɛ́-ɔ̀rɔ̃†-kã̀ nya ara‐ɛ̀ ŋàá. Adzítsɛ́#ɛ́ ɖóro nákpálà-àwóòtã́-kpɔ̃rɔ̃ ńbí à náa dzoná awu#ɛ́. 12Kíbí ó ríi#ɛ́, ɛ̀ɖɔ̃̀ ɖáa gbòkã́, tsí odzo kpée tsítse.
13Tsí adzítsɛ́-ɔ̀rɔ̃#ɛ́ wà fɔ̀ fúu ní: Sàkàríyà, kó máa sá, iŋɛ́ yèé tse#ɛ́, Ɔ̀ɖáyé gbɔ́ ìre wúwú‐ɛ̀. Báàyí#ɛ́, aya‐ɛ̀ Èlìsàbɛ́tì nákó bíma ɔnɔkɛ̃̀ɛ̃-kã̀ fúu, tsí nákó sɔɔ́ ní Yòhánà†. 14Ɔma#á nákó tɛ́ɛ náyè títítí, tsí ɔ̀nyà kpíkpɔ̀ gbo nákó táyè ti nára-bíbí‐ɛ̀. 15Nákó wáa dzɛ́ ɔ̀nyà lákṹ-kã̀ nódzú-Ɔlɔ́dzɔ́. Ó ɖi, kò wà ní kó mɔtí líle-kã̀ kpókpó. À nákó bíi wá òŋu Mímí-Ɔ̀ɖáyé† gbòkã́ ni.
16Tsí nákó tse tsí ɔma-Ìsàràyɛ́lì† ŋa kpíkpɔ̀ kpíkpɔ̀ nákó sɛ̃̀ wá ńɖi-Ɔlɔ́dzɔ́ Ɔ̀ɖáyé-ŋa. 17Tsí Ɔlɔ́dzɔ́ nákó fúu ńdzídziná òŋu ikpá kíbí ó fú Èlíyà† wáa lɔ#ɛ́, tsí nákó tsúwádzú-Ɔlɔ́dzɔ́ wá. Nákó tɔ́tse àŋírĩ-boba òŋu ɔma, tsí nákó tse tsí ɛnɛ yèé kò wà rɛ̃tígbè-Ɔ̀ɖáyé ŋa#á, ká nɛ́ ìrã̀ã́mà kíbí ɔ̀nyà-atsòtítɔ́ ŋa. Bɛ́ɛ̀ ní nákó tse tsí ɔma-Ìsàràyɛ́lì ŋa nákó kpaɖí si, tsí ká gba Ɔlɔ́dzɔ́#ɛ́.#1:17 Ìwé-Màlàkí 3:23-24 (Malachie 3:23-24)
18Tsí Sàkàríyà wí fúu ní: Kí nákó nyà ɖíre ní òtítɔ́ ní ó fɔ̀#ɛ́? Ó ɖi, òŋu aya-òŋu méèdzì, àŋa ti gbó.
19Tsí adzítsɛ́-ɔ̀rɔ̃#ɛ́ wí fúu ní: Òŋu ní dzɛ́ Gàbìyɛ́lì#ɛ́. Òŋu ní náa ɖóro ńwádzú-Ɔ̀ɖáyé, tsí wà dzítsɛ́ fúu#ɛ́. Ó ɖi, ó bɛ òŋu wá ní òŋu kó wáa dzíkɔ̀ ɖíɖɔ̃̀ yèé bɛ́ fúu ni. 20Afɔ̀ yèé òŋu fɔ̀ ŋa#á nákó tsɛ ìɖéǹɖè. Ó ɖi, kíbí kò gba afɔ̀-òŋu gbɔ́#ɛ́, nákó ɖi mùnù, tsí kàkó nyáa wíìnyɛ̀ ró títí fú ɔdzɔ́ yèé iŋɛ́ ŋa#á nákó tsɛ#ɛ́.
21Ńǹwèrè nyɛ̀ŋɛ̀#ɛ́, ɔ̀nyà ŋa wà ɖóro ɖe Sàkàríyà nóòɖe, tsí à wà ɖíìhã̀ŋù ní kí tse tsí ó kpɛ̃́ ńnɔlé#ɛ́ tó bɛ́ɛ̀? 22Kíbí ó fùɖá ńǹkɛ̀ɛ́#ɛ́, kò nyáa wíìnyɛ̀ ró, ó ɖi mùnù. Tsí ó wà sàwé iŋɛ́ ŋa fú ŋa nɔ́wɔ́. Gbòkã́#á, ó yé ɔ̀nyà ŋa ní ó rí iŋɛ́-kã̀ ńnɔlé#ɛ́.
23Ńbɛ̀ɛ́, kíbí itsɛ́-Sàkàríyà tã́ ńlé-Ɔ̀ɖáyé#ɛ́, ó sɛ̃̀ wáa lɔ ńlé‐ɛ̀. 24Kíbí ó bɔ̀ wáa lɔ#ɛ́, kò kpɛ̃́ gé, tsí aya‐ɛ̀ nɛ́fũ̀, tsí mú ara‐ɛ̀ ɖúkù títí fú òtsùkpá mɛ́ɛrú. 25Tsí ó wà wí ní: Ɔlɔ́dzɔ́ rí ànyínɔ́ fú òŋu, tsí ó wò ní òŋu kó nya anɔ́ nódzú-òŋu ńǹkɛ̀ɛ́, tsí ɔ̀nyà ŋa ká máa rã́ã̀rĩ́ fú òŋu ró. Ńnɛ̀ ní ó tse ore yèé fú òŋu#ɛ́.
Gàbìyɛ́lì wáa wí fú Màríyà ní nákó bíma-kã̀
26Kíbí efũ̀-Èlìsàbɛ́tì wà nóòtsùkpá-ɛ̀kɛ́ɛfà‐ɛ̀ si#ɛ́, Ɔ̀ɖáyé bɛ adzítsɛ́-ɔ̀rɔ̃†‐ɛ̀ Gàbìyɛ́lì ní kó lɔ ńǹlú-òmírɛ̃̀-kã̀ nérè-Gàlìlé. À náa kpe ìlú#ɛ́ ní Nàsàrɛ́tì. 27Ó bɛ̀ɛ́ ní kó lɔ ńɖi-èkíɖã-kã̀ bɛ̀. À náa kpe èkíɖã#á ní Màríyà†. Màríyà#á kò ma ɔkɔ gìɖì wòná. Tsí ɔnɔkɛ̃̀ɛ̃-kã̀ gbo wà bɛ̀, tsí wà ɖíìgbã̀nà‐ɛ̀. Ɔnɔkɛ̃̀ɛ̃#ɛ́, ɔmalɔ́ma-ólú Ɖàfíɖì† ní ó dzɛ́#ɛ́, tsí à náa kpèé ní Yòsɛ́fù†.
28Tsí adzítsɛ́-ɔ̀rɔ̃#ɛ́ tó ńɖi-Màríyà, tsí kíi ní: Tútùúrɔ̀ fɛ́ɛ! Ó gba ore-ɔ̀fɛ́ ńɖi-Ɔ̀ɖáyé! Ó ɖi, Ɔlɔ́dzɔ́ wà báa si.
29Kíbí ó gbɔ́ afɔ̀ nyɛ̀ŋɛ̀#ɛ́, ó tsàlá fúu, tsí ó kí nyɛ̀ɛ́nyɛ̀ɛ́, tsí wà bere ara‐ɛ̀ ní okũ-ìrɔ́ mɛ̀ɛ́ ńnɛ̀ɛ́?
30Tsí adzítsɛ́-ɔ̀rɔ̃#ɛ́ wà wí fúu ní: Màríyà! Kó máa sá. Ó wɛ éwo-ire ńɖi-Ɔ̀ɖáyé héŋú. 31Kó rí gé! Nákó nɛ́fũ̀, tsí bíma-ɔnɔkɛ̃̀ɛ̃-kã̀, tsí nákó sɔ ɛ́kɔ fúu ní Yèésù†. 32Nákó wáa dzɛ́ ɔ̀nyà lákṹ-kã̀, tsí à nákó kpèé ní Ɔma-Ɔ̀ɖáyé Oléwo. Ńbɛ̀ɛ́, Ɔ̀ɖáyé Ɔlɔ́dzɔ́ nákó múu dzoyè kíbí gbágbóǹgbàgbò‐ɛ̀ Ɖàfíɖì dzoyè wáa lɔ#ɛ́. 33Nákó dzoyè fú ɔma-Ìsàràyɛ́lì† ŋa kpó títí lɔ náàrìtã́. Oyè‐ɛ̀ kàkó tã́ láyé.
34Tsí Màríyà wà wí fúu ní: Kíbí òŋu kò ma ɔkɔ#ɛ́ fee, bí òŋu nákó nyáa tse fáà, tsí nɛ́fũ̀?
35Tsí adzítsɛ́-ɔ̀rɔ̃#ɛ́ ní: Mímí-Ɔ̀ɖáyé† nákó tì wɔ̀ ńǹtá‐ɛ̀, tsí ikpá-Ɔ̀ɖáyé Oléwo nákó wá ńǹtá‐ɛ̀. Àtóoríi bɛ́ɛ̀ ní ɔma yèé nákó bí#ɛ́ nákó dzɛ́ ti Ɔ̀ɖáyé, tsí à nákó kpèé ní Ɔma bíbí-Ɔ̀ɖáyé#ɛ́. 36Tsí ó ní: Kó rí gé! Ìtátsì‐ɛ̀ Èlìsàbɛ́tì yèé gbárígbó tã́, tsí ɔ̀nyà ŋa kpó náa kpè ní àgbàrèbí#ɛ́, ó ti nɛ́fũ̀, tsí efũ̀#ɛ́ wà tse òtsùkpá mɛ́ɛfà báàyí ná. 37Ó ɖi, Ɔ̀ɖáyé kà tse iŋɛ́-kã̀ kpókpó kũ̀.
38Ńbɛ̀ɛ́, Màríyà ní: Ó sã̀, arú-Ɔlɔ́dzɔ́ ní òŋu dzɛ́#ɛ́. Ó ɖi, kó tsɛ fú òŋu kíbí ó wíi#ɛ́.
Kíbí ó wí bɛ́ɛ̀ tã́#á, adzítsɛ́-ɔ̀rɔ̃#ɛ́ ǹɖe ńɖɔ̀‐ɛ̀.
Màríyà lɔ káà kpalɛwo Èlìsàbɛ́tì
39-40Nára-ɔdzɔ́ nyɛ̀ŋɛ̀#ɛ́, Màríyà† ǹɖe, tsí yára dzì nɔ́ɔ̀nà-ìlú-kã̀ nérè-Yùɖéyà. Ìlú-òkè-kã̀ ni. Kíbí ó tó ńǹlú#ɛ́, ó lɔ ńkpàtá-Sàkàríyà, tsí ó rí Èlìsàbɛ́tì bɛ̀, tsí kíi.
41Kíbí Èlìsàbɛ́tì gbɔ́ okũ#ɛ́ gé#ɛ́, ɔma#á kpé dzídzà ńnɔ́‐ɛ̀. Tsí Mímí-Ɔ̀ɖáyé† tì wɔ̀ ńǹtá-Èlìsàbɛ́tì gbòkã́. 42Tsí ó ɖúgbe-ayè títɛ́ lákṹ-kã̀, tsí wà fɔ̀ ní: Màríyà, Ɔ̀ɖáyé tu kùsɛ̀ɛ̀ fɛ́ɛ náàŋírĩ-ɔnɔbɛ̃̀ɛ̃ ŋa kpó, tsí ó tu kùsɛ̀ɛ̀ fú ɔma yèé wà ńnɔ́‐ɛ̀ɛ#ɛ́ gbo. 43Ìnà-Ɔlá-mi ní ò dzɛ́#ɛ́. Ǹ kò dzɔ o wáa kpalɛ̀wò mí gìɖì. 44Iŋɛ́ yèé tse tsí òŋu wí bɛ́ɛ̀#ɛ́, kíbí okũ‐ɛ̀ dzì nétí-òŋu gé#ɛ́, ayè tɛ́ ɔma-òŋu gbòkã́, tsí ó kpé dzídzà ńnɔ́-òŋu. 45Ó wɛ éwo-ire, iŋɛ́ yèé tse#ɛ́, ó yáa gbɔ́ ikɔ̀ yèé Ɔlɔ́dzɔ́ bɛ̀ fúu#ɛ́, tsí nɛ́ àkaralé ní nákó tsɛ ìɖéǹɖè.
Màríyà wà kpèlè fú Ɔ̀ɖáyé
46Tsí Màríyà† ní:
Ǹ wà nyɛ Ɔlɔ́dzɔ́.
47Ayè tɛ́ mi kadzá náàtsùgbé-Ɔ̀ɖáyé Agbanɛlà-mi,
48iŋɛ́ yèé tse#ɛ́, ó tédzú-mi,
èmi, arú‐ɛ̀ tsígíɖí yèé bɛ́.
Ó ɖi, ti nɔ́mbɛ́#ɛ́, ìbìmbí-ɔ̀nyà kpó nákó kí mi ní:
Èmi wɛ éwo-ire,
49iŋɛ́ yèé tse#ɛ́, Ɔ̀ɖáyé Olíkpá ní tse iŋɛ́ lákṹ ŋa fú mi#ɛ́.
Òŋu ní dzɛ́ Olí-mímá#á.
50Tsí ti ńǹtá-gbágbóǹgbàgbò ŋa wáa tó ńǹtá-ɔmalɔ́ma ŋa,
náa nɛ́ àmúɖɔ̃̀ fú ɛnɛ yèé wà nɛ́ àrísá fúu ŋa#á.
51Ó wáa tsikpá‐ɛ̀.
Tsí ɛnɛ yèé ŋa náa kɛ́ ara-ŋa#á,
ó wáa túùnkã́-ŋa.
52Ó wáa gboyè nɔ́wɔ́-ólú lákṹ ŋa,
tsí mú ɔ̀nyà tsígíɖí ŋa si ńǹɖì-lákṹ.
53Ɛnɛ yèé ebi wà kpa ŋa#á,
ó wáa tse ore fú ŋa títí à yó,
tsí ó wáa lé olówó ŋa sɛ̃̀ bɔ̀ lɔ nɔ́wɔ́ nákpo.
54Ó wáa mɔ́wɔ́ gbè fú àwa, ɔma-Ìsàràyɛ́lì† ŋa.
Àtsìtsɛ́‐ɛ̀ ŋa ní àa dzɛ́#ɛ́.
Ó tédzú-wa, tsí nɛ́ àmúɖɔ̃̀ fú wa.
55Àlé yèé ó ta fú gbágbóǹgbàgbò-wa ŋa#á ńnɛ̀ɛ́.
Ó tàlé fú Àbàràhámì† òŋu ɔmalɔ́ma‐ɛ̀ ŋa ní
òŋu nákó nɛ́ àmúɖɔ̃̀ fú ŋa títí lɔ náàrìtã́.
56Ńbɛ̀ɛ́, Màríyà gbé ńɖi-Èlìsàbɛ́tì bɛ̀ lɔ kíbí òtsùkpá mɛ́ɛta tã́ná kó bɔ̀ wáa lɔ ńǹlú‐ɛ̀.
À bí Yòhánà
57Báàyí#ɛ́, ɔdzɔ́ tó, tsí Èlìsàbɛ́tì kó bíma, tsí ó bíma ɔnɔkɛ̃̀ɛ̃-kã̀. 58Tsí ɛnɛ yèé wà sɔ́má-ilé‐ɛ̀ ŋa#á òŋu ɛnɛ‐ɛ̀ ŋa gbo, à gbɔ́ ní ó bíma. À rí ní Ɔlɔ́dzɔ́ sã̀, tsí mú sísã̀‐ɛ̀ ɖíre fúu, tsí àŋa kpó, à wà táyè báa.
59Nɔ́dzɔ́-ɛ̀kɛ́ɛdzɔ‐ɛ̀#ɛ́, à wáa ɖákó† fú ɔma#á. Tsí kíbí à wá#á, ɛ́kɔ-boba‐ɛ̀ Sàkàríyà ní à wò ní ká sɔ fúu#ɛ́. 60Tsí ìná‐ɛ̀ ní: Òò, à kàkó kpèé bɛ́ɛ̀. Ó ɖi, à nákó kpèé ní Yòhánà† ni.
61Tsí à ní: Ɛ́kɔ#ɛ́ kò wà náro-Èlìsàbɛ́tì nɛ́! Kí tse tsí ó wà wo ká kpèé bɛ́ɛ̀? 62Tsí à tsɔwɔ́ fú boba-maɖé#ɛ́ ní: Bí ó wà wò ní ká kpe ɔma‐ɛ̀ fáà?
63Tsí òŋu gbo tsɔwɔ́ fú ŋa ní: Ká fú òŋu nɔ́kpɔ̃́-kã̀, tsí òŋu kó kɔɔ́ si ńnɛ̀. Tsí à kɛ́ɛ fúu, tsí ó kɔ si ńnɛ̀ ní: Yòhánà ní dzɛ́ ɛ́kɔ‐ɛ̀#ɛ́. Kíbí ó kɔɔ́ tã́ gé#ɛ́, à kí dzã̀maa. 64Gbòkã́#á, oŋù‐ɛ̀ tsí, tsí ó kpé ìnyɛ̀ wíwí, tsí ó tsí arũ, tsí wà nyɛ Ɔ̀ɖáyé.
65Ńbɛ̀ɛ́, ɛnɛ yèé wà bɛ̀ si ŋa#á, dzidzi mú ŋa, tsí ɔ̀nyà ŋa kò mí afɔ̀#ɛ́ wíwí wérí ńǹlú-òkè ŋa kpó bɛ̀ nérè-Yùɖéyà. 66Tsí ó dzɛ́ ìsérè si fú ŋa, tsí ɛnɛ yèé gbɔ́ afɔ̀#ɛ́ ŋa#á, àŋa kpó à wà bere ara-ŋa ní: Maɖé#ɛ́ fee, ɔ̀nyà ìrɔ́ mɛ̀ɛ́ nákó wáa dzɛ́ ná? Iŋɛ́ yèé tse#ɛ́, ikpá-Ɔlɔ́dzɔ́ gìɖì wà ńǹtá‐ɛ̀ si ìɖéǹɖè.
Sàkàríyà wà kpèlè
67Tsí Mímí-Ɔ̀ɖáyé† tì wɔ̀ ńǹtá-Sàkàríyà, boba-maɖé#ɛ́, tsí ó wà gba afɔ̀-Ɔ̀ɖáyé fɔ̀ ní:
68Kùsɛ̀ɛ̀ fú Ɔ̀ɖáyé, Ɔlá-ɔma-Ìsàràyɛ́lì† ŋa.
Ó bàa ńɖi-tɛ̀ɛ̀ ŋa, tsí kó wáa gbà ŋá dzɔ̀ɔ́.
69Ó bɛ Agbanɛlà líle-kã̀ bàa fú wa.
Nákó ti náàŋírĩ-ɔmalɔ́ma-Ɖàfíɖì† ŋa.
Ólú Ɖàfíɖì, àtsìtsɛ́-Ɔ̀ɖáyé-kã̀ ní ó dzɛ́#ɛ́.
70Títí dzɔ̀ɔ́ dzɔ̀ɔ́#ɛ́, bɛ́ɛ̀ ní Ɔ̀ɖáyé ti tàlé
gbà ńǹtá-agbáfɔ̀‐ɛ̀ fɔ̀ ŋa si#ɛ́.
71Ó ti tàlé si ní
òŋu nákó gbà wá dzɔ̀ɔ́ nɔ́wɔ́-ɔ̀tɛ̀-wa ŋa,
ɛnɛ yèé wà wo íbàɖí-wa ŋa#á.
72Ó tàlé si ní òŋu nákó ɖíre àmúɖɔ̃̀-òŋu
fú gbágbóǹgbàgbò-wa ŋa.
Òŋu nákó tédzú ní òŋu tse ɔ̀kã̀ntso bá ŋa.
73Ó tse ɔ̀kã̀ntso bá gbágbóǹgbàgbò-wa, Àbàràhámì†,
tsí ó kpe iŋɛ́ si ńǹtá‐ɛ̀ ní
74bí òŋu gbà wá dzɔ̀ɔ́ nɔ́wɔ́-ɔ̀tɛ̀-wa ŋa#á,
àa nákó nyáa sɛ̃ òŋu ńǹkɛ̀ɛ́ náàrìmáa sá ró,
75tsí àa nákó ɖi atsòtítɔ́ òŋu ɔ̀nyà mímá
nódzú-òŋu nɔ́dzɔ́ kɔ́dzɔ́ títí fú ɔdzɔ́-ikú-wa.
76Tsí maɖé yèé bɛ́ gbo,
à nákó kpèé ní agbáfɔ̀-Ɔ̀ɖáyé fɔ̀† ti Ɔ̀ɖáyé Oléwo.
Nákó tsúwádzú-Ɔlɔ́dzɔ́ wá, tsí kó wà tɔ́tse ɔ̀nà si fúu.
77Nákó tse tsí ìlú‐ɛ̀ kó mà ní
Ɔ̀ɖáyé nákó mú àbi-ŋa, tsí ń tɔrɛ fú ŋa.
Bɛ́ɛ̀ ní nákó gbà ŋá là#á, 78iŋɛ́ yèé tse#ɛ́,
Ɔ̀ɖáyé-wa náa rí ànyínɔ́ fúnɛ gìɖì tó bɛ́ɛ̀.
Nákó bɛ Agbanɛlà wá fú wa,
tsí nákó wà kíbí odzúùrɔ̃̀ bɛ́, tsí nákó bɔ́,
79tsí rã̀ si ńǹtá-àwa yèé wà nóòkùkù,
tsí wà nɔ́ɔ̀nà-ilé-ikú si ŋa#á.
Nákó gbɛ̃́ wa lɔ nɔ́ɔ̀nà-tútùúrɔ̀.
80Ńbɛ̀ɛ́, ɔma#á wà ɖonùgbó òŋu ikpá. Tsí ó wáa ǹɖe, tsí lɔ káà gbé nɔ́ɔ̀ɖã̀. Ó gbé nɔ́ɔ̀ɖã̀#á títí fú ɔdzɔ́ yèé ó wáa bɔ́ náàŋírĩ-ɔma-Ìsàràyɛ́lì ŋa, tsí tɔ̃́ itsɛ́‐ɛ̀ tsítse nódzú-ɔ̀nyà kpó#ɛ́.
© (Active), Wycliffe Bible Translators, Inc. All rights reserved.
