Markus 8
8
OCHTO KAPITLO.
1An kola divese kai has kome but čel ketene ta len has či ta chal, khardeslo lesker sikermangerende ketene ta phendeslo ape lenge: 2Man kaiela o čeles; dikhena, trin divese rikeren pen paša mande vri, ta hi len či ta chal. 3Ta mekau len ta džan penge bokheles pali khereste, pala merena api drom; buteder lenge vejenes duralester. 4Lesker sikermangerende rakerden lehe: Kater našte ta vel jekes ani fulelo them maro ta chan penle? 5Ta job phučjes lenge: Keci maro hi tume? — Jon phendena: Efta. 6Ta job phendes api čeleske, ta bašen pen len api phub tele: Pala andeslo kala efta marenge, parkerdes, phagerdesla, ta dejesla lesker sikermangerende ta čiden les glan, ta jon čiden o čeleske glan. 7Len his nina jekender mačenge, ta job bachtelo nina kala ta mekjes ta čidenle len glan. 8Ta jon chanden džin ta has len čalo; ta jon haderden i marenger koter pre, efta korčnica perdo. 9Kola kai chanden has štarmerdeššal; ta job mekjes len.
10Pala gejeslo lesker sikermangerende ani bero drin, ta vejes ani them o Dalmanutester. 11O Farizearia vejen pen ta čingerden len peske. Jon kamena ta dikhena i boto o bolopeneste lester, ta jon midžerden les. 12Job ta haderdes pes ani šero ta phendes: Hoske kamela kaua čel i boto? Čačo me phenau tumen, kava čel vel gar kenk boto. 13Ta job mekjen len, štejes kome ani bero drin ta gejes prala verkel.
14Ta jon bisterden ta lejen pen maro, len has ger buteder her jek maro paša lende ani bero. 15Ta job rakerdes lenge ta phendes: Dikhene ta rakene tume glane šutesker‐biblo o Herodeseske. 16Pala biche jon ta phenden vaverkend: Kava hi, kai hi men kenk maro. 17Her hajerdes Jezus kava, phendeslo ape lende: Kaidene tume, vel ta hi tumen kenk maro? Hajvene les tume kome gar? 18Hi tume kome džiskerdo? Tume hi jaka ta dikhena či? Tume hi kan, ta hunena či, ta hi tumen gar hajerdo, 19kai phagjomes kola panč marenge i pančšalester, keci korčnica pherdo koter haderden tume pre? Jon phenden apa leste: Dešedui. 20Ta phagerdomes kola efta marenge i štaršalender, keci but korčnica pherdo koter haderden tume pre? Jon phendena apo leste: etta. 21Ta job phendes ape lende: Hajveneles tume kome gar?
22Ta jon vejena pale Betsaida. Pale vela i kašiko paša leske andlo, ta mangden pen les, ta taperelo les. 23Ta job andes o kašikeskero vast, ta gejes lehe glano gab vri, čungerdes api leskre jaka, čides leskre vast apo leste ta phučes les: eka dikhelo čomoni. 24Ta job dikjes pre ta phendes: Me dikhaua o dženenge ta našen penge her i rukia. 25Pale čideslo leskre vast komoli api leskre jaka: ta job dikjes zorelo, les has kome sasto ta dikhes nina duralester lauter mišto. 26Ta job bičerdes les pala khereste ta phendes: Ta vehas ani gab drin, pala phene les kenkes.
27Jezus ta gejes lesker sikermangerender nikli an i gabende o Cezarea Filipi. Api drom phučeslo lesker sikermangerende ta phendes ape lenge: Ho phenena o gadžende, kon hom me? 28Jon rakerden ta phenden: Johanes o boldomaskero, ta vaver: Elias; ta kome vaver: Jekes i profetenge. 29Pala phendeslo ape lenge: Ho phenen tume, kones hom me? Petrus rakerdes ta phendes apo leste: Tu hal Christus. 30Job preterdes len ta phenena kenkes či lester.
31Ta job sikerden len pralduno, ta hunte štelo o dženenger čavo but vri o phuriender, baro rašaiender, livrosikermangerender, velo praserdo, vela merdo, ta hunte štejeslo pala trin dives papele pre. 32Ta job rakerdes kava lab piro. Pala andes les Petrus api rik, ta mangdeslo les, ta rakerelo gar keake. 33Job ta riserdes pes drumo leste, dikhes ape lesker sikermangerende, preterdes o Petruses ta phendes: Dža pala mande, satan! Tu hajeve kava gar ho Devleske hi, foni kava kai hi o dženenge. 34Pala khardeslo o čeles ta lesker sikermangerende ketene ta phendes ape lende: Kon kames ta našes mange pale, kova phučes či paleste, ta ane lesker trušul apo leste, ta našes mange pale. 35Kones kai kamela lesker džiben, kava našerelo les, kava ta našerela lesker džiben vaške mange ta o evangeliester, kova rikervela pes les. 36Ho hi pala, ta vel o dženo o celo phub, ta lesker mulo hi dukhedo (nikli)? 37Ho našte del o dženo, ta mekelo lesker mulo papele drin? 38Kova kai ladželo pes mander ta mire labenge glano kava luvakanenger ta došadiko čeles, koles ta ladželo pes nina o dženenger čavo, ta velalo ani baro kovmaster lesker dadeske ta i dulo englenca. 39Ta job phendes ape lenge: Čačo me phenau tumenge, dela jekte tela kalen kai hi kate tarde, ta sungena o merapen gar, džin ta dikhena ta velo o Devlesker them ani leskr zorelopen.
נבחרו כעת:
Markus 8: SINT1912
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
First published by the British and Foreign Bible Society in 1912.
