BEGGAR 25
25
Abraham gv Sinam hoo Mwwg Hotam
1Abraham nywxw akta naanum, hog eminv Ketura. 2Mwn mwam ko bwwjnum Jimran, Joksan, Medan, Midian, Isbak, hoo Sua 3Joksan Seba gvla Dedan abv. Dedan ko tuupv Assurim, Letusim, hoo Leummin. 4Midian ko tuupv Epa, Eper, Hanok, Abida, hoo Eldaa. Soq tulu si Keturag ko tulungv. 5Abraham hog mwlwngam Aisaknvn jiknum. 6Hvbmabde mwwg xwwbaq nywxw ko tuup tulungam gumnam pengtwl Abraham mwwg swwl dooi yikho bulam Aisak hoqgv dou-caga daiya gvdab wpaq mvnum.
7Abraham vnyw 175 gob swwnum. 8Abraham dumpo-xiima nyekam pvg dvb dootwr peekul, hoo mwwg nyiilungam goqkum tvl mwv svqriq kunum. 9Mwwg ko tuup Aisak la Ismaiyel bunyiv mwam dou-caga Mamreg, Hittait nyi Johar ko tuup Epronwg, rongo Makpela lwwpwqho svma liinum, 10Hoqhv Abraham Hittait nyi tulu hoqgv rongo rvnamv. Hoqho Abrahamnvn mwwg nywxw Sara lvgab liiknum. 11Abraham sixo kokw so Pwnbov mwwg ko tuup Aisaknvn lvqcnum. Hoo Aisak Beer-lahai-roi ho nvmcw dooknum.
12Soq tulu si Abraham gv ko tuup Ismaiyelg hotamv, hiyam Sarag Ijipt hoqg paqn Hagarg Abrahamnvn ko bwwjnum. 13Soq tulu si Ismaiyelg ko tuup tulug eminam xitw kwlwl xinam eminv: Nebaiot, Ismaiyelg tuup vbw cociq; hoo Kedar, Adbeel, Mibsam, 14Misma, Duma, Massa, 15Hadad, Tema, Jetur, Napis, hoo Kedema. 16Soq tulu si Ismaiyelg ko tuupv hoo bulug eminv, bulug nampam dook hoqg eminv hoo bulug doogw go gvda hoqg eminv hoo bulug nyob hoqgv lvpw atv camleq vnyi go eminum. 17(Ismaiyel vnyw 137 gob swwnum. Mwwg nyiilungam goqkumnv mwv svqriql hoo siknum.) 18Bulv Habila hoqgv Sur namgub nvmcw doonum, hoqhv Ijipt taqcgon daiyag Assiriyab lamta wkv. Mwv mwwg imiq dvpar hoqgv asaq loodab nvmcw doonum.
Esu la Jakubnvn Dwrbuqnam
19Soq tulu si Abraham gv ko tuup Aisakwg hotamv: Abraham Aisakwg abv, 20hoo Aisak vnyw campy gob axa yukho mwv Rebekanvn mwwg nywxwb naanum, Paddan-aram ho doonbo Aramean Betuel gv ko nyemv, Aramean Labanwg bwrmv. 21Hoo Aisak At Swn mwwg nywxw gab swgwnum, hoggab mwn twrngumnum. Hoo At Sw mwwg swgwnam mam loorwqnum, hoo mwwg nywxw Rebeka ko gvnum. 22Ko vnyiv mwnwg kepo ho vs-axaq gob nyidu basnum, hoo mwn benum, “Soq si hvb nyid nyiloqkam, hoggab soq si ngam nyidwn?” Ho mwn wnv At Swn toxnum. 23Hoo At Sw mwnwn benum,
“Nyob nyiilu vnyi go noqg mamb hv doodwn,
hoo noqg kepo ura hoqgv nyiilu jeqnyi go mvpin-mvra tayin;
akwn hv akwn ham ator yaatayin,
vbw akv boram bon nyijtayin.”
24Hwdlo mwn ko bwwd aalv hvvnwq yukho, kaato mwnwg mamb ho kongv vnyi go doonum. 25Otuq akv mwwg gvngv vm-rvsab lwwcw tvl lengnum, ho bulv mwam Esu hvl eminum. 26Kokw so mwwg bor akv Esug ludam gvbw tvl lengnum, ho mwwg eminam Jakub hvl eminum. Hwdlo mwn bulam ko bwwi yikho Aisak vnyw camx gob nyiknum. 27Hwdlo ko tulungv akam duku, Esu tumr-xiram palaq jaqnum, mwv nyoro nyiib nyinum, hvbmabde Jakub yanbo nyiib nyinum, hoo tombu uraho doodu keetwqnum. 28Aisak Esunvn abynum hoggab mwwg tumr-xiram panam mam lwxiam mwv dvnum, hvbmabde Rebeka Jakubnvn abynum.
Esu Mwam Ko Bwwtaqnam Gumnam Puqnam
29Lok Jakub vdin-oo xwwdu dvkho, Esu nyoro hoqgv haanum, hoo mwv vcjaqb kanol nyelinum. 30Hoo Esu Jakubnvn benum, “Noqg vdin-oo xwwdu gvdwn hoqgv ngam meeg dvdwb jila bv, hoggab ngo vcjaqb kanol nyelin do!” (Hoqgab mwwg eminam Idom hvl eminum.) 31Jakub benum, “Nam ko bwwtaqnam gumnam ngam puqto?” 32Esu benum, “Ngo siriq sv doodo; ngam ko bwwtaqnam gumnam hoggv mvn tayin?” 33Jakub benum, “Sija no ngam puqtayin hvl dingr to.” Ho mwv dingr kunv hoo mwwg ko bwwtaqnam gumnam Jakubnvn puqnum. 34Ho Jakub Esunvn wtw hoqla vdin-oongv jinum, hoo mwv dvpe-twwpe kul gorabl mwwg lamtab wknum. Soq sib Esu mwam ko bwwtaqnam gumnam puqknum.
נבחרו כעת:
BEGGAR 25: NISS
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Nyishi, DVRWQ PVVB @ Bible society of India 2016