LUKA 16
16
Ka’ngguapeu Perusiapeu
1Zai pa ne kenieme dage du salia ze, “Mige keheupeu pe gu tiâkela hangkat bam lei, dadege aipaupeu ne keheupeu gu kerua ramme ze kedak’nggakam’ndibe rasam ze pechu pau’nteurie gai bei de lei. 2Dadege pa ne pechu kû lu pechu, ‘Ning rasam I keseube ze ’ndaigumbe tak tew lau? Nang tâtewbe tak riamprilube raw lu ze achu pei lau, nang tiâkela changdaichi lak lei,’ ze acheu bei de lei. 3Chidadege tiâkela ze pe lung ge acheu sa ze, ‘A Wangpeu ne a gu tiâkela tâ ze tuâ ’ndu daze, I ’ndaigumbe tak tew ra yiza? Kedei I su ra a ran-ga da, zai mâkieteu ra du I ’ngngam de lei. 4Tiâkela gu tâtewbe gene achu tuâ nan dezai, penui ki ge peize achu lugairabe tak I chî de lei,’ kacheu de lei. 5Dadege pe pau gu hepâupungme hangkat-kat je kû lu pa ne, railangpeu je, ‘A pau dage nang hekum ’ndaikie pung lau?’ kacheu de lei. 6Pa ne, ‘Tauduibung dibe haî kat lei,’ acheu bei de lei. Dadege pa ne pechu, ‘Ning gu rangkâng leisi tei lu, ’ntau kelua lu ze rengeu raw gai zu lau,’ kacheu de lei. 7Zai kêdapeu je pa ne, ‘Nang ’ndaikie hekumpung lau?’ ze kacheu de lei. Pa ne, ‘Dekuîmeu bung kedibe haî kat lei,’ acheu bei de lei. Pa ne pechu, ‘Ning gu rangkâng leisi tei lu ze riakdesat raw gai zu lau,’ ze acheu bei de lei. 8Dadege pe pau ne pelingtewmakpeu tiâkela je pa mâ-tewchibe peireige toa gai bei de lei; aipau kedeirei name â penui rehei ting ge â kebabe name suadu ningching’nteu di dadegeu. 9Zai ningnui je I rang lei, miramme hang giepatrabe benai mi kang tewrabe hangge ning dage kedeipeirei heurâ ramme bambe zene teitatew lau. Aigumbe ’mpui gene tinggim ge ningnui hangge ningnui hî misongga ze gekuagaibe chang lei.
10“Mi-mige de mâ-kecheîne peireige katelingbe kau â, maîkiebe peireige du kateling lei; zai mi-mige de mâ-kecheîne peireige telingmakbe kau â, maîkiebe peireige du teling mak lei. 11Gesangmakbe heu peireige ningnui teling makchai â, châu ne ningnui je mi-heu gesang peireige ’nnumtew ra lau? 12Miramme gu peireige ningnui teling mak chaine â, ningnui gu singbe ze châu ne ningnui je pei be ra lau? 13Ka’ngguapeu hangkat ne heguang hangna guâ ’ngguachi lak lei; hangkat je pa hung gu zai kêdapeu je pa ngaugailak ku lei, nune hangkat ze pa pe lung pei gai gu, zai kêdapeu je pa ngau’nna gu lei. Hera benai mi heu guâ ningnui ’ngguaheruachi lak lei,” ze kacheu de lei.
Isua ne Samsabe ramme
(Mat 11.12,13; 5.31,32; Mrk 10.11,12)
14Pharisaime, rangkâng je ka’nchâme ne chipau sam ramme seu lu ze, pechu kakerai de lei. 15Kane pa ne penui je, “Ningnui â ningnui runne ziemmename mikngau ge tewka’nzeime bau lei, kane Hera ne ningnui lungtak chî lei; ziemmename ruage suanggaibe ze Hera mikngau ge katenetbe chang lei.
16“Hingde benai kemeume â Johanbe bamchuraibe ting riâ bam lei; chipau châng dezai Hera gu heguangram gu misuiyibe sam karchibe â pau gai de lei, zai ’nteumena ne chige ’nchi-chine gut lei. 17Kane hingde ge leisirit giakkaibe kat ga gai dera sua â, ting benai kedei ga de ra sêu’nteu lei.
18“Mi-mige de pe nâu je tatuâ nan ze kêdapui je nguakelaktewbe kau â, kahema de lei, zai mi-mige de chi pe napeu ne tapatkaibeipui je nguakelaktewbe kau â, kahema de lei.
Keheupeu benai Lazarabe
19“Zai keheupeu hangkat bam lei, chi gieremangbe linenpaî bâ lu patingnai’nsangne lungkegeuga ze bampeu zeu. 20Zai mige kelaksiapeu pe ji Lazarabe keteube jâm ne dutsut ze kemuiki hiage bam lei, 21chi keheupeu gu mâ-teuterakeubeibe zene teu’nggeugit kai nei ze bampeu zeu; hetei ramme ne du pe jâm ’nniak ze bampeu zeu. 22Chi kelaksiapeu ze chai di de lei, zai angelme ne Abrahambe ga ge pua gai bei de lei. Keheupeu du chai di ze bai gai ’ndi de lei; 23dadege Kechaiberam ge betet’nsî ze bambe gene pa pe mik ’ngngangchupie gai ze kedeu ’mbene Abrahambe ga ge Lazarabe bambe pa ngau de lei. 24Dadege pa ’nrung ze, ‘A peu Abraham, achu ngau’nggia gai lau, Lazarabe ne peize pe bakêrangtûn hedui ge sûm gai lu ze a lei tewhegei gai ra hang lang gai lau; hemimelei geze I bamhereu-desang de lei,’ ze kacheu de lei. 25Kane Abrahambe ne, ‘A na gau, nang â nang keringbe ting ge ning gu mâ-keyibe ramme ngau lu de lei be, zai chigum ze Lazarabe du mâ-kesiabe ramme ngau lu de lei be ze chibam lau; kane chuna â pa aige lungtemi de lei, zai nang â ning duângga de lei. 26Aipau peireige ge du, aigene ningnui dage patneime patlak ra, zai mî du chilia ’mbene anui lam kapat lak ra anui benai ningnui kak ze hekut kedibe kai ’nde lei,’ ze acheu bei de lei. 27Dadege pa ne, ‘Acheu zaine a peu gau, pechu a peu ki lam’mbe tat ra lang gai ra ningchu I kiam lei, 28I ’mpamkeume hangmengeu la lei, chidaze peize pa ne penui je kiânam gai ra hangge zeu, makchai â, penui du ai betedka’nsîbe bâm ge gut kai gu daseu,’ ze kacheu de lei. 29Kane Abrahambe ne, ‘Mosabe benai kemeume penui dage la lei; peize penui kuâ ’ngking le lau,’ acheu bei de lei. 30Dadege pa ne, ‘Mak lei, a peu Abraham gau; chaidime ruagene hangkat penui dage tat bei zaine â penui lung heli gu lei,’ kacheu de lei. 31Pa ne pechu, ‘Mosabe zai kemeume kuâ penui ne ’ngking makchai â, chaidime ruagene hangkat chu dai bei sedu penui je kiâmwang dai ra mak lei,’ acheu bei de lei,” ze kacheu de lei.
נבחרו כעת:
LUKA 16: ZEMEBSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
