APUNG ANYIM 39
39
Yosep naiuso Potipar Tsammongnyiu
1Lo Ismael haiüh Yosep Ijip ai kanlükhun, küta apa Potipar, sau Farao nokpao ün asonghoi tsak ongko khaiunia tsak noiküla, naiuso nokpao nou khemko süpai hoi ahei tsak noiküla apa hau janthiowan. 2Apaou nou Yosep ko hakü noiküla, naiuso apa chhisiya alum ko ashio epm. Apa Ijip hai ashe tsak tsamai kiha, 3apaüh Yosep ko Apaou nou hakü noin ta epsan, naiuso apa chhisiya apem ko ashio epji ta ngela. 4Potipar apa tü monglamkü noiküla, küta apa meshen dongko shimkü noiau ayathsüotsün tsak taiukiu, nungtiphe apaüh Yosep hau apaüh taiutsün jengtsaiu nouso naiuso chaiou nouso chiai apaotsangao taiukiu. 5Nung atao nai yakü Yosep shioko Apaou nou Ijip hai nou tsamkhaiu nai, tsammong nai, naiuso eiu nai ouk kiu. 6Potiparüh apa jengtsaiu apem khaiuko Yosep apaotsang phamongai kiuwan, apa meshen heshiutsün thaiutha tü simkü amao ti tü ayang tsünoikü Yosep apaotsang khemko thumkü kiuwan.
Yosep konsitheng nai, naiuso aluao meikü pühe tsak noiküla. 7Atao intso yathsüokü shikütün phiai apa ün Apaou tsammongnyiu Yosep ko kamhaao chinekkü iula, küta Yosep tü apako aikü then ai khukü kamao sang. 8Apaüh shanankü nyiuhai nou tü ngiom, “Athaplu, jü Apaou nou tsamai taiutsün jengtsaiu alum thaiutha ti ayangelat tsünoi, tiautenai ngo nungko noin. Apaüh meshen taiutsün alum khako ngo apaotsangao taiukiu. 9Tsam nai apa oukong ko wekü jü oukong noin, naiuso ni tü simkü apaüh jü khako titso tsangkü, lolaokü tsütaiu. Titi thekü ngo nungtin tsümeikün angei chhi Goa thako chhi-e?” 10Nyiuhai nou ajekhaiu tsütukü apa tü sang lüko, Yosep nyiuhai nouko then ai tsükhu.
11Lüko nyitso tilai Yosep apa chhi chhiao tsamai napkü noiküla, nungai tsamkihoi sautso nungai tsünoiküla. 12Nyiuhai nou Yosep tü phakhut nai thalou küta ngiom, “Ngü ko then ai ashi.” Lüko Yosep apa phakhut nyiuhai nou phamongai letaiukü kengchiai jingkü khuwan. 13Tilai nyiuhai nou Yosep apa phakhut letaiukü khuwantsün, naiuso tsam ainou jingkü khuwantsün ep, 14nyiuhai nou apa tsamki nouso tü jonkü ngiom, “Nung tü athaplu! Nung Ibri hai nou jü tsammongpoüh tsamai kankü shikü taiutsün nou sam lochi-iu. Apa jü tsampai ai napküta kojakü mongdem tsümeikün ajisiwop chhiau kowe, lüko ngo ashiotsün lektso sungkü wekü ngiom. 15Tilai apaüh ngo shihtsün lula, apa phakhut jü dongko leankü kengchiai jingkü khuwan.”
16Potipar tsamai moshikün lektso nyiuhai nou phakhut apa ko taiu. 17Nungai nyiuhai nou apa hao nung ngiolatlu chiten: “Ibri hai sua nou ni tsamai niakü shitaiutsün jü tsampai ai nap, küta ngo lomiamiu. 18Lüko tilai ngo sang songkü wekü ngiom, apa neshe jüdongko taiukü kengchiai jingkü khuwan.”
19Potipar mongmat sung 20küta Yosep kelokü nokpao ün akhotaiu- tsünso taiu nai wan, loto Yosep nungai noian. 21Lüko Apaou nou Yosep ko hakü noiküla, naiuso apa ouk kiu, nungai akhotsam aniakei nou apako monglingkü noiküla. 22Apaüh Yosep amao akhotaiu nouso khako apaotsangao taiukiu, küta akho tsamai chhisiya alum ko ahei theau taiukiu. 23Akhotsam yamai asong nou Yosep hau apaotsang oukong kiuwantsün tü ti athaisanau tsüpokü noiküla, tiautenai Apaou nou Yosep ko hakü noiküla, naiuso apaüh chhitsün chhisiya alum ko ashio epm.
נבחרו כעת:
APUNG ANYIM 39: KHIABSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.