APUNG ANYIM 37
37
Yosep naiuso Apa Deisinioso
1Yakob apa po kihtsün Kanan goumchi nai tsülaokü kih. 2Yakob kau ngiolat nungti noin:
Yosep achetpon 17 oum taoko apa po ün sua menyiu tsamki Bilha naiuso Zilpa neta chetsinyimtsün deisinioso ko onnemok hoi naiuso won hoi jimkü noiküla. Apaüh apa po dongai apa deisiniosoüh tsümeikü chhitsün ngem nouso kankü shin.
3Yakobüh apa thsoso apem khaiuko Yosep tsüojin, tiautenai apa asün taoko chetlut. Yakobüh apa hau phalaiu phakhut tsak shankiu. 4Tilai apa deisoüh ngüso poüh Yosep tü ngüso chiai simkü tsüojinji ta ngela, ngüso Yosep ko ngiomei tsüchitekü niokia thsüokü iula.
5Sotso Yosepüh mea mean tsak mean, küta nung thaiutha tilai apaüh apa deisinioso hau chite, ngüsoüh apa tekkü chinyan shikü iula. 6Apaüh ngiom, “Ngo meantsün mea mean tü anglu. 7Sam apemüh eiuai jinyakpong keshikü noiküla, jü jinyakpong ngüchu küta lukü tsakü noiküla, Nungai asam ün jinyakpong nou jü jinyakpong lemloküta nung khako kauthiokü am.”
8Apa deisiniosoüh sangkü ngiom, “Ni sam khako nokpao theküta nokshinge ta yangji süne?” Nungtiphe ngüsoüh apa tü loüh tekkü chinyan, tiautenai apaüh apa mea mean ngüso thaiutha ko chitetsün shioko noiküla.
9Nungaih loüh Yosepüh mea tsak meanshi, küta apa deisinioso tü ngiom, “Ngo loüh amao mea tsak mean shin, nung mea nou ko: aje, alei, naiuso kianthsüo chekü tsak nou ngü tü kaukü amkü epm.”
10Apaüh apa po hau lüko nung mea mean chiten, nungaih apa poüh apa tü thut: “Nung mea mean ti in athat noin? Ni anyiu, adeiso, naiuso ngo, sam khukü ni tü kau-e ta yangji süne?” 11Yosep ün deisinioso apa tü niokiakü noiküla, lüko apa poüh nung apem thaiutha mongai yangkü taiu.
Yosep Janan küta Ijip ai Kanlükhunan
12Nyitso Yosep deiso Shekem nai tilai ngüso po ün onnemok jimao khukü noiküla. 13Yakobüh Yosep tü ngiom, “Ngo ni adeisinioso Shekem nai onnemok jimkü noitsün nai khu-iau aiuji.”
Yosepüh thalakü ngiom, “Ngo khemloukü noin.”
14Apa poüh ngiom, “Adeiso naiuso onnemok hoi apem meikü noi si tsünoi khukü lüthaplu; küta shikü ngü hau achite.” Nungai apa poüh Hebron tsamei ainou apa hong.
Yosep Shekem nai thasao, 15küta nung goumchi nai yamekeikü noin taoko khaiunia tsaküh apa epküta apa tü sangkü ngiom, “Ni ti tü yamji?”
16Apaüh thalakü ngiom, “Ngo jü deiso sauhai ngüso ün onnemok hoi jimkü noin ngüso tü yamji.” “Ngüso tiai noin nung ni chiteau shio-emo?”
17Nung khaiunia nou ngiom, “Ngüso nung ainou khuwaniu. Ngüso Dothan nai khu-e ta ngiotsün ngo lulaküla,” Nungtiphe Yosep apa deiso phi khukü ngüso Dothan nai epiu.
18Ngüsoüh Yosep laiukü nai ta ep, naiuso apaüh ngüso moshisaokün khako, ngüsoüh apa thako kausai küta apa loattao thatsan. 19Ngüso tsak si tsak chitekü ngiom, “Nungko mea meantsün shiji, 20lo ashi, samüh apa loatko, küta apa meapem waikü noitsün temkhao tsak ko yakthio ko. Samüh apa liu thainian nou loattan ta ngioau shio-e. Küta samüh apa mea mean ti iula-e nung epsane.” 21Reubenüh nung lula küta Yosep kipsanau kowe. Apaüh ngiom, “Samüh apa laloatko.” 22“Apa nung liutsa temkhao nailu yakthiowanko, lüko apa tü ti latawai.” Apaüh nung ngiotsün, ngüso ainou Yosep kipsan küta apa po dongai laokü hongshiau ayang noiküla. 23Tilai Yosep apa deiso dongai shisaom, ngüsoüh apa phalaiu phakhut chipekkiu. 24Nungaih ngüsoüh apa niakü khukü temkhao thang nai yakthiowan.
25Ngüso heshiu taoko Ismael hai hoi tsak Gilead ainou Ijip ai khutsün alekta ep. Ngüso ut nouso angannyam nyamtsün pai eiu naiuso painek thsa nou meankü kankü shin. 26Yihudaüh apa deisinioso tü ngiom, “Sam nio loatküta phikü taiutsün tsangkü samüh ti alesan eppe? 27Samüh apa nungso Ismael hai hau jananko, naito samüh apa tü ti tsütawai-e; meiba tsümeiba, apa sam nio, sam nyih, naiuso sam she noin.” Apa deisoüh mongchio, 28küta tilai Midia hai chaile hoi ajantsoüh shiyanlükhun, adei nousoüh Yosep temkhao khanthan ainou tensan küta Ismael hai hau apa tangkason khei he jan-an, küta ngüsoüh apa Ijip nai kankü khuwan.
29Tilai Reuben khanthang nai shikü Yosep nungko tsüepsan apa amongsaiu nou meshen ne chipek. 30Apa deisinioso dongai laokü shiküta ngiom, “Melothso nou nungai tsünoi! Ngo ti in chhi-e?”
31Nungaih ngüsoüh won tsak loat küta Yosep phakhut tü nung ashe nou laolut. 32Ngüsoüh nung phakhut nou ngüso po dongai kankü shikü ngiom, “Samüh nung epsan. Nung athso jengtsaiu süne?”
33Ngüso poüh nung ngesan küta ngiom, “Ah, nung apa ün! Liu thainian ajantso nou apa loattiu. Jü thso Yosep nelangkü chipekkaniu!” 34Yakobüh apa neshe chipekkü mongsaiu küta nyikong nou tenlo. Apaüh apa thso thaiutha atao laiukü mongsaiukü mea shap. 35Apa thso melo si menyiuhoi apem shikü apa lodang ao kowe lüko apa adangao tsüaiukü ngiom, “Ngo jü thso thaiutha mongsaiutsün tsüthonkü eantsün goumchi nai napane.” Nungti apa thso Yosep thaiutha tsülaokü apa mongsaiu.
36Nung taoko, Ijip nai Midian hai nou Farao nokpao ün asonghoi tsak ongko Potipar, sau nokpao kamko ehü ahei tsak noiküla apa hau Yosep jan-an.
נבחרו כעת:
APUNG ANYIM 37: KHIABSI
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.