Kusintii Andunya 7
7
Kukɔ̃i inyi nla
1Si anyiɛ nɔ Aɔ̃ Lafɛ̃ɛ í sɔ̃ Nowee í ni, lɔ akɔi inyiu, awɔ do inɛi kpasɛ̃ɛ ŋa fei, domi si dimii inɛ ŋau ihɛ̃ fei awɔ akãi ì jɛ dee dee si wajum. 2Nɔ i dasi mɛɛmu ŋa iyi à maaju minji minji ikɔ mɛɛje, akɔ do abo, do mɛɛmu ŋa iyi a kù maaju ŋau minji minji, akɔ do abo, 3do yɛi ŋa má minji minji ikɔ mɛɛje, akɔ do abo, ku ba ka ba dimii aŋa fei si andunya. 4Bɛi ǹ sɔ̃ɛu bɛ, ce bɛɛbɛ domi si ajɔ mɛɛjesia an jɔ̀ ijĩ ku wɔ ajɔ ciiji do idũ ciiji, nɔ andi mii ilu hunde iyi ǹ taka fei n kpa iri nŋa. 5Nɔ Nowee í ce mii ŋa iyi Aɔ̃ Lafɛ̃ɛ í sɔ̃ɔu fei. 6Adɔ̃ cĩɔ mɛɛfai (600) í nɛ si waati iyi ijĩ nlau í naa si ilɛ.
7Nowee í lɔ inɔ akɔi inyiu, nŋu do aboɛ do amaɛ ŋa do aboi amaɛ ŋa ku ba a fita si inyi nla iyi á jɛ inɛ ŋau. 8Hai mɛɛmu ŋa iyi à maaju do iyi a kù maaju fei do yɛi ŋa do iŋa hai nɛ nto ŋa fei, 9aŋa fei à lɔ inɔi akɔu minji minji, akɔ do abo, do Nowee takaɛ ajɔ si bɛi Ilaaɔ̃ í sɔ̃ɔ. 10Si anyii ajɔ mɛɛjeu ijĩ nlau í to wa si ilɛ.
11Si adɔ̃ cĩɔ mɛɛfai Noweeu do cukpa minjisiaɛ si ajɔ maatũ do minjisiau, hai ajɔ nŋu bɛi ijĩ í wɔ kaa kaa hee ilɛ í lu fokĩ. 12Nɔ ijĩu í wɔ zakai ajɔ ciiji do idũ ciiji. 13Si ajɔ nŋui Nowee í lɔ akɔi inyiu, nŋu do aboɛ do amaɛ ŋa iyi à ya kpe Sɛmu do Kamu do Zafɛti, do aboi amaɛ ŋau aŋa mɛɛta, 14nŋu do mɛɛmui sako dimi ikã ikã ŋau fei do mɛɛmui inɔ ilu dimi ikã ikã fei do iŋa hai nɛ nto dimi ikã ikã fei do dimii yɛi ikã ikã fei, fei ndɛɛ fei de. 15Andi mii iyi í nɛ hunde wa mi fei, aŋa fei à lɔ akɔi inyiui minji minji do Nowee takaɛ ajɔ. 16Mɛɛmu ŋau fei à lɔi akɔ do abo, si bɛi Ilaaɔ̃ í sɔ̃ Noweeu. Nɔ Aɔ̃ Lafɛ̃ɛ í cĩmbo nŋa gambou.
17Ijĩ nlau í wɔi ajɔ ciiji. Inyiu í na í la nɔ í wu akɔu hai ilɛ. 18Inyi í kɔ̃ bii fei nɔ akɔi inyiu wa yaa si antaiɛ. 19Inyiu í la wa kɔ̃ɔsi hee í koo í mi iri kuta nla ŋau fei. 20Hai antaii iri kuta ŋau má kugbokai inyiu do lele í to zakai agbãawɔ maatũ. 21Nɔ andi mii iyi í wa si ilɛ fei í kui, hai yɛi ŋa do mɛɛmui inɔ ilu ŋa do mɛɛmui sako ŋa fei do iŋa hai nɛ nto ŋa hee do amanɛ ŋa fei. 22Andi mii iyi wa mi si ilɛ fei í kui. 23Mii ilu hunde fei í ce nfe, hai amanɛ hee ku koo si do mɛɛmu ŋa fei do iŋa hai nɛ nto ŋa do yɛi ŋa fei. Fei ndɛɛ í ce nfei si andunyau. Nowee nŋu akãi í gbe do inɛɛ ŋa do mɛɛmu ŋa iyi aŋaò ŋa à wa si akɔi inyiu ajɔu. 24Si ajɔ cĩɔ do ciitaa inyiu í kɔ̀ wa la si ilɛ.
נבחרו כעת:
Kusintii Andunya 7: MKL
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
2021, SIM International et UEEB