Matiu 3
3
Yoniu nagami folo epolose bouba mono ka lu epi'ehina
1Ya'mana yupahi Yoniu Yutia kamelugu humofa'na huto mono ka ma luto lu epimofa'na hu'ehina: 2Komopatini i gelehe hite foipanatini he'mi su halo lu'ehina. Hu'mamofihi kokulumalugu kapo'a hokolo hilina kana'a epi'ehina. 3Hu'mamofihi baga'a lu huto huto bo Aisaiyau liyafa huloto ma luto Yoni kumu'i lu'ehina yabe:
Bona'i menehanaga meluguti bo mone'mofihi
bagaguti ma luto nolibe:
Sipi Bomofihi kapo'a li loloba hi etalo.
Kapo kuyugu hu'ehilina li fu nelite
li yuhufana hi ete'ehinogo
ai analo kapo malalibe.
4Yoniu gukete'a hepilata hina kameli yaga oka'a gukete hepito humofa'na hu'ehina. To gilimi'a fatipagu ilata hinaya yaga gufa'atu lolo huto i'ehina yabe. To kenu'i hiti to lopi upe'i fi'ehina'a hiti nose'na'a nolata hu'ehina yabe. 5Ana yupahi Yelusale bona'i to Yutia kegi'a bona'i to asaga hepa'i Yotani nagami bele belehi ninalo neminana bona'i asaga'i Yonihi aitoga e'ahana. 6Ya hite foipana'ani aitoga pa sago Yotani nagamilugu nagami folo epolo'ehina yabe.
7Yoniu Felosi bona'i to Satusi bona'i babu lite nagami'i folo letalane lite ago bu enogoloto ma luto lu epi'ehina: Lenali foipa osifa'mofihi yagapana'a, kuyu'afu lu lepigo Hu'mamofihi italuga logo bise'na alihi huto hilube'mu nohina koli falalune'mu nehabe luto ka epeki'ehina yabe. 8Lenali komopatini i gelehe hilete yalo etonaguti mineme binogo buto komopatini i gelehe i baga ilibe. 9Lenali lenipatinigu ma lite mekehelilo: Abalahau ai afotifu yabe, lali mino fu luse bona'i Hu'mau lifisa meilibe. Nani lu nolepube, Hu'mau ai ka'ma nina efahi liloto Abalahahi pana'a lolo hilina bati nohibe. 10Luhi loloba huto yafa hapa'alo ni'ibe. Asaga yafa legeya'a mehalinamofihi hetigi su hoto logogu genogo logouba lo su halibe. 11Lenali komopatini i gelehe hana'mu luto nani fa'mene nagamitu nofolo lepolobe. Ya nohunaya ai bo mone nani nemegesalo alina bouba ai Sikalafu'i to logo'a hiti folo lepalalina'mu yabe luto Yoniu lu epi'ehina. 12To ai emuha'a yanuga li'ehibe. To kifi foyaguti lilina yabe. To ai nose'na yufagaha'a li nomalana nonugu li nupa huto li malalina'mu yabe. To yana huto sibina'a li nupa huto mesobose loba logogu galina'mu yabe.
Yoniu Yesuhi nagami folo eto'ehina
Mk 1:9-11; Lk 3:21-22
13Ya luto lu'ehina kana'aluga Yesu Galili hepa'i he'mito Yotani'i kegi'a Yoniu nagami'i folo netalibe'mu yabe luto bu'ehina. 14Ya hu'ehina Yoniu: O'e, luto laga hu etoloto ma luto lu emi'ehina: Kai nagami folo netalata bati huto ni'inamo kai nanitoga noane. 15Ya ligo Yesu ka'alo ma luto lu emi'ehina: Ana'a hiligi ya meluto yatai kai lu nokumuna suhi hubo. Ya huto ya'ma kapolo li moloto hilu'inauba Hu'mau lu'ehinamofihi hinogo bati hilina'mu yabe. Ya ligo Yoniu Yesuhi kaga lina mege'i moloto nagami folo eto'ehina yabe.
16Yesu nagami'i afolo etolago mele'isi fa'mene kugutatoga ti molo'ehina. Ya nohigo analo kokuluma'i hokolo nohigo anaguti Hu'mamofihi Sikalafu'a limi'ehina, ai kigopa nama legitana lolo huto oto Yesuhi lataha'alo fi besa lo'ehina yabe. 17Ya nohigo kokulumaluguti kaga mone ma luto lu'ehina: Ya'ma nani'ni pana'ni mana'a nohibe. Laga nebesina pana'ni nohigo ai kumuko hetofa pana'ni yabe luto negelo bi emilata nohuna yabe luto kokulumaluguti lu'ehina yabe.
© 1982, Wycliffe Bible Translators, Inc. All rights reserved.
