Mataio' 8
8
Izesu' Aza Ganadise Gize Dave Ma Do Lamine' O-dine' Gamazi
(Maleko' 1:40-45; Luka' 5:12-16)
1Izesu' aza gololoti' oto lemo ogavo evene' muki' goloso nene e'meti vani'. 2E'meti nivavo ganadise gize dave mali'mo Izesuda ogo obuvolo hize emo ti' lo lo-imine': Guvekasi ve, gaza do lamine' o-nedeline' amuzokasi naine' nene naza mo gele mino do lamine' o-nedeline lo gele nouve. Gaza do lamine' o-nedelesa gele nabe. 3Ne'mine lavo Izesu' aza ana hulo molo oko'nolo' nohito ti' lo lo-imine': Naza do lamine' o-gedelesa gele nouve. Nemu' gaza lamine' ozo. Ne'mine lavo ganadise ne'mo lite' lo hulo-do vavo lamine' giline'. 4Lamine' gelavo Izesu' ti' lo lo-imine': Gele nabe. Gaza lamine' aine' monovo nene evene' hamokisi mo lo-ngemamozo. Eveneto' medelo mino O'moso inite' lehize-daa' ive ne'mo ganadise okongaloti' hulo-gedo vine' nene ningo lo soto' ogavo gaza lamine' aine' nemu' nene evenelite ningi gililizangumu' ve lo ne'mine ozo: Ganadise gizi dave ingine lamine' igi ma ize inite' ne'mine ne'mine O'moso imilisave lo Mose' lo huko lido' nene e'meto eveneto' medelo mino O'moso inite' lehize-daa' ive nene inite' ma O'moso oloku' gize emelingumu' nene do vo emezo.
Izesu' Aza Amiliti Gizebo Ve'mi Gelekele' Gipele Ma Do Guno O-dine' Gamazi
(Luka' 7:1-10)
5Izesu' aza Kahanaumi numuno ebeku' novivo Loma amiliti gizebo ve ma aza Izesuda ogo longo' ogo 6ti' lo line': Guvekasi ve, neni' gelekele' izipe'ne aza nene amuzolo helavo numuda amuzolosi nomivo ongo mino mulumo gono goloso do neine' lae. 7Ne'mine lavo Izesu' ti' lo lo-imine': Naza ha vo do lamine' o-delesuve. 8Lavo amiliti gizebo ve aza ti' lo Izesu'ni lo-imine': Naza evene' goloso nouvonako a'ne'mine'mi numu'neu' alinido' lisihe' amane. Nemu' nene vamo ha gamazivo' lo lamine' ozo lanivo gelekele' izipe'ne nene lamine' ilive lo gele nouve. 9Ido' lamine' ilive lo gele nouvoni' nene naza nene evene' maliti gizebolo' nouve. Ido' neze gizebolo' nesi ami ma nizave. Nemu' nene engikuti' ve mamu' vozo lokuvo ha voloseive. Ido' mamu' ano loloni' nene ha aloseive. Ido' gelekele' izipe'ne nene ne'mine ozo loloni' ha oloseive. Ido' a'mine'mine ogo gaza lanivo siki inite' ne'mo gei' gamazi ha gele do gelekele' izipe'ne nene ha hulo-do voloseive losa gele nosa noluve. 10Lavo Izesu' aza gamazi nene gelo aizo, lo gelo evene' e'meti vave muki' nene ti' lo lo-ngimine': Naza lamineto' nolo-lingimuve. O'mosomu' gili ele'vole' iga' ave gehepeve ve lave Isilaele' aleve lengikutikisi nene heta ato' ve mene'mo gele ele'vole' ine' ne'mini ve hamolitesi ma gili ele'vole' avo ma ningamuvoni' ve. 11Nemu' nene nolo-lingimuve. Isilaele' aleve minamave hotati' ve ho' dizaa' idati' ve ido' ho' lemaa' idati' ve muki' ingine O'moso'mi gizebou' imi hili mini Abalahamule Zakobole Isakalesi noso' nite' nii ngolize izi minilisave. 12Minilisani'za O'moso'mo ei' gizebou' vi hili eze zuho minilizave lo lengele'mize molani' Isilaele' aleve lingine nene hulo heta ogavo liti'muso gehepeveu' vi mini ive nama igi mulumo gili vetine ingihi langolo' igi minilisave. 13Ne'mine lo Izesu' aza amiliti gizebo ve ti' lo lo-imine': Gaza numungala vozo. Gele ele'vole' aineka ma nene soto' o-gemeleseive. Lavo gelekele' izipe nene line' gamene gehepevelo' nene lamine' ine' ve.
Izesu' Evene' Muki' Do Lamine' O-ngidine' Gamazi
(Maleko' 1:29-34; Luka' 4:38-41)
14Ne'mine ogo Izesu' aza Petolo' numu'veu' dizo Petolo' elenahi izeleho nene oko'nolo' olo' lavo ongo neivo ningine'. 15Ningo Izesu' aza analo' davo oko'nou' olo' line' nene osu' lo-dine'. Osu' lo-davo oto Izesu'ni nasahili' o-dine'. 16Ido' nivenga' molavo lu'ningu' sikalahu' goloso minive ma Izesuda ngele'mizi ikevo gamazi lo-ngedo a'mine sikalahu' goloso nene ngimiselo do hulo ido' inite' gizi dave mukikisi do lamine' o-ngidine'. 17Ne'mine ine' nene O'moso'mi veleti' gamazi lo soto' oga' ive polohete Isaia' luhuvo ti' lo gizine' ma nene omo gihile izelive losa nene ne'mine ine' ve:
Di gilizevo i-lidaa' ani' inite' nene asi've do hulo-ledo
inite' lisaa' ine' inite' nesi do hulo-lidine' ve.
Izesu'ni E'metilisa Ani' Alevemu' Lo-ngimine' Gamazi
(Luka' 9:57-62)
18Ido' evene' muki' ika' ika' igi di vodo vodo i-di minani' nene ningo Izesu' aza sipiu' nGalilaia noso ohuno helala ele'mizi vilizave lo izipahala zuho lo-ngimine'. 19Lo-ngemavo Zuda vete laa' ani' mono' gamazi apize ngemaa' ive mali'mo Izesuda ogo ti' lo line': Tisazo, naza nene gei' vilinida alinida ha ge'meto volosuve. 20Lavo Izesu' ti' lo lo-imine': Inite' muki' loposo gulosi ido' namasi nene ingalizani' numu'inesi minaa' nani'za O'mosolati' ve gihile neni' ongalo numu'ne nomine' nenako ha ne'metelibe. 21Ido' eze gonolo' e'meti monave engikuti' ve gohi mali'mo Izesu'ni ti' lo lo-imine': Guvekasi ve, gaza gele nemanivo me'nehine vo do galese ize-dosa ogo ge'metelohe. 22Ne'mine lo line'za Izesu' ti' lo lo-imine': Gaza gelezo. Lu'ine hele vive angise nete hililiza oko'ine di galese izi minilisaze. Ogo ne'metezo.
Hepe' Naba Iline' Nene Izesu' Do Zou Lo-dine' Gamazi
(Maleko' 4:35-41; Luka' 8:22-25)
23Ne'mine ogo Izesu' aza sipiu' vo dizavo Izipahala zuhosi igi dizikevo nosolo' api' igi ledi vani'. 24Ledi nivavo hepe' naba elavo ne'mo noso nene golo gidini dizevo' dizevo' ogo sipi nene hito lulou' velo leme' leme' idi'mo sipiu' nene vai' lolosa ine'za Izesu' nene okise ongo minine'. 25Ongo neivo izipahala zuho ingine ezela vi u'muko' igi ti' li lani': Guvekasi ve, gaza oto do lu' izevo. Noso ne'mo lebele gese' o leize. 26Likevo aza lo-ngimine': Lingine lengehelele nanimu' noizive. Lingine amuzo mili O'mosomu' gili ele'vole' ilizanako gili ele'vole' amave. Ne'mine lo aza oto hepekisi nososi ngelemavo ingine nene mati zou li minasine'. 27Ne'mine ikesivo sipiu' minave ingine ngehelele goloso izavo ga'ine vai' gili ti' li lani': Ve me'mi gamazi nene hepe' matesi noso matesi gili dikeko atoli'mine ve goloso noloseive li lani'.
Ve Sitalitisi Lu'ninguti' Izesu' Sikalahu' Goloso nGimisele Huline' Gamazi
(Maleko' 5:1-20; Luka' 8:26-39)
28Ingine noso helala Gadala vetida vi heteli nivavo sikalahu' goloso lu'ningu' minive sita' nene gonoso mili-ngidaa' ani' geheni mulikuti' igi Izesu'ni votene' asine'. Ingine a'mine ve nene go'ine gasava goloso hize vivo evene' ingine engikumu' ngehelele goloso izavo minasine' akala nene evene' hamokisi ngeli igi vigi monamani'. 29A'mine ve sita' ingine geke' li Izesu'nimu' ti' li lasine': O'moso'mi gipele gaza nosida mene nanitekumu' nane. Gaza mulumo gono lemaa' gamene olihe alitamingu' mulumo gono lemelove losa nabe. 30A'midoti' hoto' ile nene ize mulise naba galese ni nizavo 31sikalahu' goloso lu'ningu' minive ingine amuzonga li Izesu'ni ti' li li-imasine': Gaza limisele hulolo ma nene ize mulise naba voleti lu'ningu' nene limisele hulozo. 32Likesivo aza ti' lo lo-ngimine': Ne'mine li ma alo' vilo lo lo-ngedavo sikalahu' goloso ingine velisi lu'ninguti' limi igi vi izeliti lu'ningu' dizani'. Dizikevo ize mulise naba ingine galese ni minani' golo aveselo' nene mangilise hizi limi vi noso ohungu' hili gese' ani'. 33Hili gese' ikevo ize gizebo ve ingine golise numuno ebeta vi soto' ine' initeli'mi gamazi've nene muki' vetete' igi ngimi ve sita' lu'ningu' sikalahu' goloso minive netisi gamazi nesi li soto' igi li-ngimi osu' lani'. 34Li-ngimi osu' likevo a'mine numuno ebeku' evene' minani' muki' ingine Izesu' neida ani'. Igi ningi engi' misubo nene hulo vilive li ezela amuzonga lani'.
હાલમાં પસંદ કરેલ:
Mataio' 8: aso
Highlight
શેર કરો
નકલ કરો
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
