San Mateo 11

Juan ñeñth apatañtatseꞌthpaꞌ moeñan poeyochreshaꞌ Jesúsesho

(Lc. 7.18-35)

1Yexhatwawan Jesús poeyochreshaꞌ ñeñth xharrasheña ñeñth poechetsa epsheña atethchaꞌ phaꞌyeset, allempoñapaꞌ awoꞌ ñamha Jesús alloth yexhatyesets; serrpareꞌtatyesan acheñeneshaꞌ all paꞌnetsreto.

2Añña Juanpaꞌ alloꞌtsena all yottampeñet. Allñapaꞌ oꞌ eꞌmareꞌtan Cristo ateth phaꞌyena, allentha moeñan poeyochreshaꞌ Jesúsesho. 3Ñetña oꞌ xhapoet allpaꞌ ateth otoset:

—Ñatoꞌ phatheꞌña ñeñtheph eꞌñe poꞌñoxh Cristotets ñeñth atarr yekwen awathotheñ oꞌch wapa. Ñerraꞌm amatheꞌ ñeñtheyaypepaꞌ oꞌch eꞌñe photey allochñapaꞌ añchaꞌ yekwaꞌ poꞌpsheñeñ ñeñthchaꞌ wapatsa ñeñth eꞌñe Cristo.

4Jesúsñapaꞌ anapanetpaꞌ ateth otapanet:

—Theꞌpaꞌ oꞌch awerres seserrpareꞌtatwerchaꞌ Juan ora allpon ñeñth ateth sentyeswennanaꞌ arr ñamha ora allpon ñeñth ateth seꞌmyeswennanaꞌ arr. 5Oꞌch eꞌñe seserrpareꞌtatwer ora amaꞌt attho aporoꞌyethexhnopaꞌ theꞌñapaꞌ oꞌ eꞌñe nekwatyeswerranet ñamha ñeñth chekaꞌrepayetspaꞌ theꞌpaꞌ oꞌ eꞌñe chopeꞌchyeswerret kowen, ñamha ñeñth aꞌptsaresyen leprapaꞌ theꞌñapaꞌ oꞌ eꞌñe aꞌkowentatarethetwerret ñamet, ñamha ñeñth paketneshaxhnopaꞌ amaꞌt ñetpaꞌ theꞌñapaꞌ oꞌ eꞌñe eꞌmyeswerret kowen, amaꞌt ñamha ñeñth rromayets theꞌñapaꞌ oꞌ alla atantatarethetwerret, ñamha amaꞌt ñeñth wokchañneshaxhno theꞌñapaꞌ oꞌ eꞌñe neserrpareꞌtatwerranet añ kowen ñoñets alloch keshperret ñamet.

6Jesúsñapaꞌ alla oterranerr Juan poeyochreshaꞌ:

—Ñamha ellonethpaꞌ oꞌch sotwer Juan ñeñth ateth notenes, atarr kosheñtsoꞌtsen amaꞌt allowen ñeñth atarr neyemtenaya na, ñeñth ama eꞌnenaye poꞌpsheñeñ ñeñthchaꞌ koshaterrawet.

7Allempoña Juan poeyochreshaꞌpaꞌ oꞌ awanerret. Jesúsñapaꞌ alla serrpareꞌtaterranerr acheñeneshaꞌ ñeñth ateth peꞌth awaña Juan, ñeñthpaꞌ ateth otanet:

—Awaña allempo seteꞌth amayo all serrpareꞌten Juan, sapaꞌ amakaꞌ añekpayeꞌ seteꞌtheña all oꞌch sentenaꞌ amoesmaꞌ ateth aꞌymaꞌtateñ mhorr. 8Ñamha amakaꞌ añekpayeꞌ seteꞌtheña all oꞌch senteñaꞌ ñeñth atarr koxhneshaꞌtetsa paꞌshtam all, tharroꞌmar yeñoteñ amayopaꞌ amakaꞌye eñalleña all ñeñth atarr koxhneshaꞌtetsa paꞌshtam. Yapaꞌ yeñoteñ arrña yentenña ñeñth atarr koxhneshaꞌ chorraꞌyenaya shetamoets amhchaꞌtarethepawo. 9Sapaꞌ añekopkaꞌyeña seteꞌthña amayo oꞌch senteñaꞌ all ñeñth poꞌñoxh aꞌmhteneꞌ Yompor poꞌñoñ. Napaꞌ oꞌch notas: Juanpaꞌ attho atarr sherbenan Yomporpaꞌ ello metanaꞌtwan allowen ñeñth attho aꞌmhtenet Yompor poꞌñoñ. 10Tharroꞌmar Juanpaꞌ ñokop eñoseꞌth Yompor awath. Ñewa, allempopaꞌ ateth otneꞌth na ñeñth atethchaꞌ phosa Juan nokop esempoch wapa, ñeñthpaꞌ ateth anareth ñoñets awathotheñ:

Phapaꞌ peñochepaꞌch napaꞌ oꞌch nemñonaph poesheñarr ñeñthchaꞌ ñanom otatsa ñeñthchaꞌ phaꞌkowentatyeseꞌ phokop allchaꞌ phoñmos.

11Ñeñthoꞌmarña na theꞌpaꞌ eꞌñe poꞌñoxh ateth notenes: Allowen allpon acheñeneshaꞌ ñeñth eñalletetsa arr patsro amaꞌt poesheñarra ama eñalleña ñeñth atarr sherbets ateth ñerraꞌmrratheꞌ Juan ñeñth apatyesayeꞌth awaña acheñeneshaꞌ Yomporekop. Tharraña ñeñth ama esosheꞌmayeꞌ enteneto amaꞌt mamesha, tharraña ñerraꞌm poeyochreshaꞌ peñ Yompor ñeñth poeꞌntañoꞌtsen attho theꞌpaꞌ ayochreshathtena ña, ñeñthña acheñerpaꞌ atarrkaꞌye sherben, ello metanenan attho atarr sherben Juan.

12-13‘Tharroꞌmar añña ñoñets, Moisés poꞌñoñ ñeñth ateth anareth ñamha añ ñoñets ñeñth kellkaꞌyeseꞌth ñeñth aꞌmhtaꞌyesayeꞌth Yompor poꞌñoñ, ñetpaꞌ ñeñthaña serrpareꞌteteꞌth atthoch atarr ayochreshathterra Yompor tharrempowa allempo orrtosa Juan. Ñamha allempotheñ serrpareꞌtatosanet Juan amaꞌt themeꞌttsen eꞌñe poꞌwamenkokma serrpareꞌtatyeset ateth penaña Yompor poꞌkowenña atthoch ayochreshathterra ña ñeñth poeꞌntañoꞌtsen. Amaꞌt atsrreꞌmñathneshaꞌpaꞌ eꞌñe ñeñtha atarr moenet poeyoxhrokmañen. 14Ñamha ñerraꞌm poꞌnoxh sameꞌñyañchaꞌ Juanpaꞌ ñakaꞌyeña Elíasoterrets ñeñth atarr sekwen ñeñthchaꞌ sewerroya. 15Allowenes ñeñthes neꞌmhñoteneꞌ neñoñ, xhaponasepaꞌchña seyoxhro ñeñth ateth notenes.

16-19Jesúsñapaꞌ ateth oterranerr acheñeneshaꞌ:

—Ñewa, napaꞌ oꞌch neñotatas ñeñth ateth pena patantarr acheñeneshaꞌ ñeñth yentyen theꞌ ñeñth amaꞌt errothena ama akshatpoteneto. Ñeñthpaꞌ fariseoneshaꞌ ateth petsa. Tharroꞌmar amaꞌt allempo orrta Juan ñeñth apatañtatseꞌth ñapaꞌ ama rraneꞌthe ñeñth yokrramh yepen alloweney, ama orraneꞌthe ñeñthekma yorren alloweney. Ñeñthoꞌmarña ñapaꞌ xha sotyeseꞌth xhoꞌtheꞌ chorreña oneñeth; amaꞌt eꞌñe mameshapaꞌ ama pokteyeꞌ señcheꞌthe. Theꞌñapaꞌ oꞌ norrterra namha Ñeñthen Acheñetosets. Napaꞌ paꞌnamen nerraꞌyen ñamha norryen. Saña theꞌpaꞌ attha sesochatseꞌtyenen namha atarroꞌ arratsñathen ñamha atarroꞌ orrarñathen napaꞌ añoꞌchña eꞌñe neyemoetyena ñeñth atarr ochñatheneshaꞌ ñamha ashkarñathexhno ñeñth atarr cobraꞌyeneꞌ acheñeneshaꞌ kelle. Tharraña amaꞌt ateth sepennoñpaꞌ Nomporña eꞌñe eñoteneꞌ ñeñth poꞌñoxh atarr sherbets ñokop. Ñamha alloweney ñeñthey eꞌñe poechemereshaꞌ phoweney ñeñthey kotheneꞌ ña pokthaphña yapaꞌxhoꞌña eꞌñe yeñotwenña ñeñth poꞌñoxh atarr sherbets. Ñeñthoꞌmarña yorrtatyeññañ ñeñth kowen enten ña. Sañapaꞌ amaꞌt eꞌñe mameshapaꞌ ama akshatpawoyayso, eꞌñe atthes ñerraꞌmrratheꞌ cheshaneshaꞌ ñeñth xhokma poꞌpoñ entannaꞌtwenet amach moeno oꞌch yemtana all yellsheñen poꞌpotantañ pakmachoreshaꞌ all plazo all shontena acheñeneshaꞌ. Ñetñapaꞌ amach moeneñeto oꞌch koshaprechet pakmachoreshaꞌ. Ñeñthoꞌmarña ñetpaꞌ attho yellsheñenetpaꞌ ateth oteñet poꞌpotantañ pakmachoreshaꞌ: “Yapaꞌ amaꞌt oꞌ yerekërkaꞌwa allo yokshameꞌtenapaꞌ sañapaꞌ amaña sesheꞌrarampenye; allothpaꞌ amaꞌt oꞌ yepoktorareꞌtwa ñeñth yaꞌchpeñtsorexh allo yellkanrrortenapaꞌ sañapaꞌ amaña sellkapretenyo.”

Attho Jesúspaꞌ eños epoꞌmar anetsokop all ama ameꞌñyeto

(Lc. 10.13-15)

20Allempoña Jesúspaꞌ xha moeneꞌ cheꞌptareꞌtyenan acheñeneshaꞌ all paꞌnetsreto all epayeꞌ entatyenanet poꞌpartsoña awañmoꞌchotheñ. Amaꞌt entatyenanetañ poꞌpartsoña ñetñapaꞌ ama es kothapeꞌchenaye ello kowen Yomporekop, ñeñthoꞌmarña allpaꞌ xha moeneꞌ cheꞌptareꞌtyesanet. Ñeñthpaꞌ ateth otyesanet:

21—Nanakchaꞌ llekëñtsoꞌtsaꞌyenes coraziñoꞌmarneshachaꞌ, nanakchaꞌ llekëñtsoꞌtsaꞌyenes samha betsaidoꞌmarneshachaꞌ. Tharroꞌmar amaꞌt atarr norrtatyennaseñ nepartsoña sesho, sañapaꞌ amaña sokthapeꞌcherroña ello kowen Yomporekop. Ñerraꞌm arrchaꞌña norrtatañ nepartsoña tiroꞌmarneshesho ñamha sidónoꞌmarneshesho, ñetñapaꞌ awathotheñtheꞌ kothapeꞌcherretañ eꞌñe kowen Yomporekop. Ñetpaꞌ atthoch eꞌñe orrtetañ xha llekatenanet poꞌchñaret, kotnasheꞌmach chorraꞌyesetañ, tsapñach epachshemaꞌtyenetañ all anorrxhaꞌtyenet poellkëñothet. 22Ñeñthoꞌmarña theꞌpaꞌ notenes: Esempowañen allempoch akrarethetwerra allowen acheñeneshaꞌpaꞌ tiroꞌmarneshaꞌ ñamha sidónoꞌmarneshaꞌ ñetñapaꞌ amach tama aꞌkoñchatarethterretoña allempo. Coraziñoꞌmarneshachaꞌ ñamha betsaidoꞌmarneshachaꞌ saña allempopaꞌ atarrchaꞌ aꞌkoñchatarethes. 23Ñamha sa capernaumoꞌmarneshachaꞌ xhatheꞌ sotenapañ attho eꞌñe kowen sentyena sañeña, Yomporñapaꞌ allenthach aꞌtapaterres poeꞌntaño. Ñeñthpaꞌ amachkaꞌye attheyeꞌ perrsoña Yompor, allachkaꞌye waporeꞌterres oꞌpono koñchaꞌpoetso all parraren tsoꞌ. Tharroꞌmar amaꞌt atarr norrtatonaseñ nepartsoña sesho, sañapaꞌ amaña semnoña oꞌch sokthapeꞌcherr kowen Yomporekop. Ñerraꞌm arrchaꞌ ñanom norrtatañ awathotheñ nepartsoña sodomoꞌmarneshesho ñetpaꞌ allorokmatheꞌ kothapeꞌcherretañ kowen Yomporekop. Allempopaꞌ amatheꞌ aꞌpoyatatarethterretañeña paꞌnetser. Oratheꞌ alloꞌtsenaraña. 24Ñeñthoꞌmarña theꞌpaꞌ notenes: Esempowañen allempoch akrarethetwerra allowen acheñeneshaꞌpaꞌ sodomoꞌmarneshaꞌ ñetpaꞌ amach tama aꞌkoñchatarethterretoña allempo. Capernaumoꞌmarneshachaꞌ saña allempopaꞌ atarrchaꞌ aꞌkoñchatarethes.

Jesúspaꞌ ateth oten, eꞌñe sameꞌñeñothen na, napaꞌ naꞌwañamperreschaꞌ ñeñth atarr amoeroxhtatañ sentyen

(Lc. 10.21-22)

25Allempoña Jesúspaꞌ maꞌyochenana Pompor, ñeñthpaꞌ ateth oten:

—Na Apachaꞌ oꞌch naꞌyeꞌchoxhtatonaph, phapaꞌ pha ñeñtheph atarr ayochreshathtetsa peꞌntaño amaꞌt ñamha arr patsro. Naꞌyeꞌchoxhtatonaph tharroꞌmar ora añexhno ñeñth pekowenña pepen, ñeñthpaꞌ ama arreyeꞌ pexhapateñe poeyoxhro ñeñth atarr eñotañ entyetsa. Phapaꞌ aña pexhapaten poeyoxhreto ñeñth ama eñotañeyeꞌ entyetso. 26Tharroꞌmar Apa eꞌñe pemoereñoth ñeñthpaꞌ atethña eꞌñe pokteꞌ penten pha. Arrpaꞌ allowa ñeñth ateth maꞌyochenana Pompor.

27Jesúspaꞌ alla oterranerr acheñeneshaꞌ:

—Nompor allowen poꞌkowenña eꞌñe eñotatwenen. Na ñeñthen Poechemerenpaꞌ ama poꞌñoxh eseshayeꞌ neñotenaye, ñapthaña Nompor eꞌñe eñotenen. Nomporpaꞌxhoꞌña ama poꞌñoxh eseshayeꞌ eñotenaye napthaña na ñeñthen Poechemeren eꞌñe neñoteñ Nompor, ñamha erraꞌtsenchaꞌ ñeñth eꞌñe pokteꞌ nenten na ñeñthen Poechemeren ñeñthñapaꞌ oꞌch neñotater Nompor. 28-30Sewaxhaꞌta nesho allowenes ñeñthes neneꞌ seyoxhro ñeñth atarr amoeroxhtatañ sentyen. Eꞌñe sameꞌñeñothen na, napaꞌ naꞌwañamperreschaꞌ ñeñth atarr amoeroxhtatañ sentyen. Napaꞌ añchaꞌña nenerrnas ñeñth amach xha moeroxhtaterrso; ñeñthña sapaꞌ eꞌñech pokteꞌ senteñ. Atthochña sapaꞌ señotenen napaꞌ atarr nemoerensa ama atsrreꞌmoxhen entñeno amaꞌt eꞌñe poesheñarrokpa. Amaꞌt eꞌñe mamesha ama añeyeꞌ neꞌneno ñeñth eꞌñe nokpa. Atthochña eꞌñe kowen nokshaterres seyoxhro amaꞌt eꞌñe sekamkëñowen.

હાલમાં પસંદ કરેલ:

San Mateo 11: ame

Highlight

શેર કરો

નકલ કરો