Louka 21
21
I čorveli romni an o Debleskro baro kheer
1Oun o Yezous dikas pre oun dikas, har i bravele pengre love an i lovengri piri an o Debleskro baro kheer dren čivan. 2Oun yob dikas kote ninna i čorveli romni, kay hi lat bouder kek romes. Yoy das douy tikne kotya love o Debleste.
3Koy penas o Yezous: “Me penau t'menge: Koy romni das boudeder har kol tsele vavar, kay bravelo hi. 4Kol vavar dan love dran pengro bravlepen. Kay čorveli romni das halauter, hoy lat hi djipaske.”
O Debleskro baro kheer vella paash dino
5Oun i menshe, kay troul leste tardo his, penan: “Dik, o Debleskro baro kheer! Have shoukar barra oun kouč koova yon o Debleske anan.”
Koy penas o Yezous: 6“Ko tsiro vella, kay halauter, hoy t'mer kate dikenna, paash djala. Kek bar ačell ap i vavareste.”
I čilačo tsiro vella
7Koy poučan yon lestar: “Sikepaskro, kaana#21:7 kaana quand? vella kova? Har nay dikas mer, kay hi ko tsiro kay?”
8Penas lo: “Denn yak! Moukenn t'men kekestar o Debleskro dromestar tele te anell! Koy venna boud morsha, kay penenna: Me hom o Kristo, ko baro ray, kolestar o Devel penas, te vell yob! Oun yon penenn ninna: O tsiro hi kay!
Me penau t'menge: Ma nashenn lenge palla! 9An ko tsiro della boud baro kourepen, oun i menshe hadenn pen pral pengre themeskre rayende. Ma trashenn! Ko hounte vell yaake. Ko tsiro, kay i phoub paash djala, vell gar yaake sik.”
10Palle penas lo ap lende: “Ko tsiro vella, kay kourenn pen i pralstoune pral bare themma vavar pralstunentsa. Oun i menshe dran yek them marenn kolen an i vavar them. 11Oun kay te koy vell i phoub zoreles trisslemen. An boud themma hi i menshen gar doha te rhal, oun baro nasslepen vell ap lende. Oun yon dikenn i baro koova ap o bolepen, hoy krell lenge bari daar.
12Glan ko tsiro, kay kova lauter vella, lenn yon t'men palla, oun taprenn t'men. Yon anenn t'men glan i čačepangre an i biboldengre kangria oun vitsrenn t'men an o stilepen. T'mer patsenn ap mande. Doleske anenn le t'men glan i bare rayende oun glan i pralstunende, te rakrenn yon i phagi vin pral t'mende. 13Yon te krenn kova lauter t'mentsa, palle rakrenn nay mandar. 14Ma moukenn kova an t'maro shero trouyel te djal, hoy t'mer hounte penenn kol rayenge! 15Me dau t'men ko gosvepen, oun penau t'menge, hoy t'mer hounte penenn. Oun palle djinenn le bouder gar, hoy te penenn le. 16Oun t'maro dad oun t'mari day, t'mare phrala oun phenya, oun t'mare vavar menshe phoukrenn ap t'mende, ninna t'mare mala. Oun mank t'mende hi save, kay venn maredo. 17Hakeno hi rhoyedo ap t'mende doleske, kay patsenn t'mer ap mande. 18Čačepah, me penau t'menge: Kek bal ap t'maro shero djal nashedo. 19Ačenn zoreles an o patsepen, oun t'mer lenn ko čačo djipen!”
O foro Yerusalem vella paash dino
20“Te dikenn t'mer, kay boud lourde troul o foro Yerusalem tardo hi, palle djinenn t'mer, kay yon ko foro paash krenna.
21Palle hounte nashenn i tsele menshe dran o them Youdea pral an i berge. Oun koon an o foro hi, hounte djal yaake sik har djala dran vin. Oun koon vin ap o them hi, hounte djal gar an o foro dren. 22An kol divessa vell o Debleskri rholi ap i menshende tele. Palle vell lauter čačo, hoy an o Debleskro lab činlo hi. 23Koy bibarht hi bari kol djouvyenge, kay hi an vavar koova, ninna kolenge, kay hi len i ternepen. O Debleskri rholi vell pral i tsele menshende an kava them. Oun len hi i pharo tsiro. 24Boud venna maredo o rhareha. Vavar venna pandlo oun venna an i vavar themma anlo. Oun o foro Yerusalem vell kol menshendar khetne stakedo, kay venna dran vavar themma. Kova djal yaake rah, har o Devel moukell len kova te krell.”
O Mensheskro Čavo vell pale
25“Ap o kham oun ap o moonto oun ap i bolepangre momlia dikenn t'mer baro koova. Pral i menshende an boud themma vell i bari traash, te dikenn le, har vell o baro pani divyo oun hadell pes pral oun dell bari gole. 26I tsele menshe ap i phoub hi paash-mulo i trashatar pral kova, hoy lauter ap lende vella. I bolepaskri zoor perell khetne. 27Oun palle dikenn i tsele menshe o Menshengro Čaves, har vell lo ap i folka bari zoryah oun raylepen.
28Te dikenn t'mer, har kova lauter vella, avenn zoreles oun trashenn gar! I tsiro hi palle koy, kay o Devel lell t'men dran o čilačepen oun dran o merepen vin.”
O faygetikro rouk
29Oun o Yezous penas lenge save laba, kay i khatedo čačepen dren hi, oun penas: “Dikenn ap o faygetikro rouk oun ap i vavar rouka! 30Te venn i rouka zenelo, palle djinenn t'mer, te vell sik o niyal. 31Yaake hi kova ninna koleha, pral kova rakrom. Te dikenn t'mer, har kova lauter vella, palle djinenn, te vell ko tsiro sik, kay o Devel peskre menshen dran o čilačepen vin lella, oun yob o ray pral i tseli phoub hi.
32Čačepah, me penau t'menge: Kol menshe, kay an ko tsiro djivenna, dikenn kova lauter pengre yakentsa.
33O bolepen oun i phoub ačenna gar. Mire laba ačenn hako tsiro.”
Ma sovenn an t'maro dji!
34“Denn garda, te vell t'maro dji gar pherdo phoubyakro koova, yaake te bistrenn o Debles! Piyenn t'men gar mato! Ma darenn t'maro djipaske! Denn yak, te vell ko dives gar ap yek kopo ap t'mende yaake, te han t'mer tapedo! 35Djinenn! Ko dives vell pral lauterende, kay djivenna ap i phoub. 36Denn yak hako tsiro! Mangenn o Deblestar, te venn t'mer zorelo an o patsepen tardo, oun venn mishto vin dran ko čilačo tsiro, hoy vella! Yaake hounte trashenn t'mer gar o Menshengro Čavestar, te vell lo pale.”
37Hako dives rakras o Yezous an o Debleskro baro kheer. I rati djas yob pash koy berga, hoy kharella djeteskri berga, oun ačas koy.
38Taysarlake van boud menshe an o Debleskro baro kheer, te shounenn yon, hoy o Yezous penella.
હાલમાં પસંદ કરેલ:
Louka 21: Sint-Man2024
Highlight
શેર કરો
નકલ કરો
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
