Yohanni 8
8
O Yezous oun koy djouvel, kay rhorhras peskro romes
1O Yezous djas pash o djeteskri berga. 2O vavar dives taysarlake vas yob pale an o Debleskro baro kheer. Oun i tsele menshe van pash leste. Oun yob beshas pes tele, oun penas lenge o Debleskro lab. 3Koy van i čačepangre oun i Farisarya. Kolla anan i romedini romyat pash leste. Koya vas tapedo koy pashel, har yoy i vavar morsheha khetne his. Yon čivan lat mashkral i menshende, yaake, kay dikell lat nay hakeno.
4Oun yon penan ap o Yezouseste: “Sikepaskro, kay romni vas tapedo, har yoy i vavar morsheha khetne his. 5An o Moseskre lila, kay činlo hi, har mer djivas, penas o Mose menge, kay save djouvya hounte venn moulo dino i barrentsa. Hoy peneh tou pral kova?”
6Kova poučan le lestar, te nay taprenn le les an leskre laba, yaake te nay anenn le i doosh ap leste pre. O Yezous čivas pes glan tele, oun činas o goushteha an i phoub.
7Har yon lestar pale poučan, hadas yob pes pre, oun penas: “Koon kek čilačo koova kras, mou vell ko ersto, kay vitsrell i bar ap late!”
8Oun pale čivas pes yob glan tele, oun činas pale an i phoub.
9Har yon kova shounan, djan le penge, yek pal o vavar. I phoureder djan sikeder lendar, har kol vavar. Yob ačas kokres koy romyah, kay kote tardo his.
10Kanna hadas pes o Yezous pale pre, oun poučas koy romyatar: “Hi kek koy, kay kamell, te less i phagi?”
11“Na-a, miro ray, kek hi koy,” penas koy romni.
Penas o Yezous: “Yaake kamau me vitar gar, te less i phagi. Dja khere, oun ma an bouder kek doosh#8:11 doosh faute, péché ap toute!”
O Yezous hi i bari momeli i menshenge
12Pale rakras o Yezous i menshentsa oun penas: “Me hom koy momeli i menshenge. Koon mange palla djala, djal gar an o tamlepen. Me hom koy momeli, kay o djipen della.”
13Koy penan kol Farisarya ap leste: “Tou rakreh toutar kokres oun peneh, koon tou hal. Doleske hi kova či moldo, hoy tou rakreh.” 14Penas o Yezous: “Ninna te rakrau mandar kokres, hi kova čačo, hoy penau. Me djinau, konestar me vom, oun kay me djaua. T'mer djinenn gar, konestar me vom, vitar gar, kay me djaua. 15T'mer dikenn i menshes t'mare yakentsa, oun penenn: Kova anas doosh ap peste! Me krau kova gar. 16Me te penau: Kova anas i doosh ap peste! palle hi kova čačo. Me krau kova gar mandar kokres. Miro dad, kay bičras man, hi pash mande.
17Ninna an o Moseskre lila hi činlo: Te penenn douy pral yekeste vin, yaake hi kova čačo.#8:17 dik: 5. Mose 17:6 18Me penau o čačepen pral mande, oun miro dad, kay bičras man, penell ninna o čačepen pral mande.”
19Poučan yon lestar: “Kay hi tiro dad?” Penas o Yezous: “T'mer prindjrenn man gar, vitar gar miro dades. Te prindjrans t'mer man, yaake prindjrans ninna miro dades.”
20Har yob kava penas, his yob an o Debleskro baro kheer, kote, kay i pirya tardo his, kay i menshe love o Debleske dren čivan. Kote penas yob i menshenge o Debleskro lab. Oun kek tapras les. I tsiro his leske kanna gar koy.
21Pale penas o Yezous ap lende: “Me djau mange. T'mer rodenn man, oun t'mer merenn an t'maro čilačepen. Kote, kay me djaua, nay venn t'mer gar.”
22Penan kol bibolde: “Hoy penell yob kay: Kote, kay me djau, nay venn t'mer gar? Kamell yob pes te marell?”
23Penas yob ap lende: “T'mer han i phoubyatar. Me hom dran o bolepen. T'mer han kay phoubyatar. Me hom gar kay phoubyatar.
24Doleske penom t'menge: T'mer merenn an t'maro čilačepen. T'mer te patsenn gar, kay me kova hom, koon me hom, palle merenn t'mer an t'maro čilačepen.”
25“Pen menge, koon tou hal!” penan yon ap leste.
Penas o Yezous: “Me penom t'menge kova yaake boud kope. 26Me nay penoms t'menge boud koova, kay dikom o čilačepen ap t'mende. Me krau kova gar. Me penau i menshenge, hoy shounom kolestar, kay bičras man. Oun hoy yob penella, hi čačo.”
27Yon hayvan gar, kay o Yezous o Deblestar, peskro dadestar, rakras.
28Koy penas o Yezous ap lende: “Te hadan t'mer o Menshengro Čaves pral, palle djinenn t'mer, koon me hom, oun kay me či mandar kokres kraua. Hoy o dad mange penas, kova penau me doureder.
29Oun kova, kay bičras man, hi pash mande. Yob moukas man gar kokres. Me krau hako tsiro, hoy yob kamella.”
30Har o Yezous kova penas, patsan boud ap leste.
I menshe čingrenn pen o Yezouseha
31Ap kol biboldende, kay kanna ap leste patsan, penas lo: “T'mer te krenna, hoy me t'menge penau, palle han t'mer čačepah mire mala, kay mire laba pre lan. 32Oun t'mer prindjrenna o čačepen. Oun o čačepen krella, te han bouder gar pandlo.”
33Penan yon: “Mer ham o Abrahameskre čave. Oun an kek tsiro hams pandle boudepangre. Har nay peneh tou menge, te ačenn bouder gar pandlo?”
34Penas o Yezous: “Čačepah, me penau t'menge: Koon o čilačepen krella, hi pandlo ap o čilačepen.
35I boudepaskro ačell gar hako tsiro an peskro rayeskro kheer. O čavo ačella yaake rah, har yob djivella. 36Te krell o Debleskro čavo, kay han bouder gar pandlo, yaake han čačepah bouder gar pandlo.
37Me djinau, kay han o Abrahameskre čave. Ninna te hi yaake, kamenn t'mer man te marell. Kova, hoy me t'menge penau, lenn t'mer gar pre. Doleske kamenn t'mer man te marell.
38Me penau t'menge kova, hoy pash miro dadeste dikom. T'mer krenna, hoy shounan t'maro dadestar.”
39Koy penan yon ap leste: “Maro dad hi o Abraham.”
Penas o Yezous: “Te vans t'mer lestar, krans, hoy yob kras. 40Kanna, kay me t'menge ko čačepen penom, kay shounom o Deblestar, kamenn t'mer man te marell. Kova kras o Abraham gar.
41T'mer krenn kova, hoy t'maro dad ninna kras.”
Penan yon ap leste: “Mari day hi kek loubni. Men hi yek dad. Kova hi o Devel.”
42“Te vals o Devel t'maro dad”, penas o Yezous, “kamans man t'mer. Lestar vom me. Me vom gar mandar. Hi o Devel, kay bičras man. 43Hoske hayvenn t'mer miro rakepen gar? T'maro dji hi pandlo. T'mer shounenn nay miro lab gar.
44T'maro dad hi o beng. Oun t'mer krenna, hoy t'maro dad ninna kamella. Yob hi yek, kay marell i menshen hako tsiro. Oun yob hi gar an o čačepen tardo. O čačepen hi gar an leste. Te rakrell yob o rhorhepen, vell kova dran leste. Yob hi i rhorheno, oun anas o rhorhepen ap kay phoub. 45Me penau o čačepen. Doleske patsenn t'mer man gar. 46Koon t'mendar nay penella, kay me yek čilačo koova krom? Me te penau o čačepen, hoske patsenn t'mer man gar? 47Koon o Deblestar vella, shounella ap kova, hoy o Devel penella. T'mer venn gar lestar. Doleske shounenn t'mer gar ap leskre laba.”
48“Hi maro gar čačo?” penan kol bibolde. “Tou hal i Samaritari oun an toute hi o beng, yaake har mer les penam.”
49“Na-a,” penas o Yezous, “an mande hi kek beng. Me sharau miro dades. T'mer kamenn man gar te sharell. 50Me kamau gar, te sharenn man i menshe. Kova hi o Devel, kay kamella, te vap me sharedo. Yob rakrell i phagi pral t'mende vin. 51Čačepah, me penau t'menge: Te hi yek koy, kay krella, hoy me penom, kova merell bouder gar.”
52Koy penan yon: “Kanna djinah mer, kay hi an toute i beng. O Abraham meras, oun o Debleskre rakepangre meran ninna. Oun tou peneh: Te krell yek, hoy me kamau, kova merell bouder gar. 53Hal tou boudeder har maro dad Abraham, kay meras? Oun kol Debleskre rakepangre meran ninna. Hal tou feteder har yon?”
54Penas o Yezous: “Te sharoms me man, vals kova či moldo. Miro dad hi kova, kay sharell man. Kolestar penenn t'mer: Yob hi maro Devel. 55T'mer prindjrenn les gar. Me prindjrau les. Te penaus me, kay prindjrau les gar, voms i rhorheno har t'mer. Me prindjrau les oun krau, hoy yob penella. 56O Abraham, t'maro dad, his barhtelo, har yob dikas, kay me vau. Yob dikas kava dives, oun his barhtelo.”
57Penan kol bibolde ap leste: “Tou hal kek panč-desha bersha phouro oun peneh, kay dikal o Abrahames.”
58Penas o Yezous ap lende: “Čačepah, me penau t'menge: O Abraham his gomme gar boldo, koy homs me koy.”
59Koy hadan yon barra pre, te vitsrenn le kolla ap leste. Oun yob khatras pes, oun djas dran o Debleskro baro kheer vin.
હાલમાં પસંદ કરેલ:
Yohanni 8: Sint-Man2024
Highlight
શેર કરો
નકલ કરો
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
