Yohanni 6
6
O Yezous della panč zerya morshen te rhal
1Pal i tsiro djas o Yezous ap i vavar rig o baro panyestar Galilea. Ko pani kharella ninna Tiberias. 2Boud boud menshe djan leske palla. Yon dikan, havo baro koova yob an o Debleskri zoor kras ap i nasslende.
3Khetne peskre malentsa djas o Yezous ap i berga, oun beshas pes lentsa tele. 4His i tikno tsiro glan i biboldengre bare divessa, kay kharenna Passa. 5Har o Yezous dikas, kay boud boud menshe leske palla djan, poučas lo o Filipestar: “Kay nay ginah mer yaake boud mare, te vell i tsele menshen rhapaske?”
6Yob kamas te dikell, har leskro patsepen hi. Doleske poučas yob lestar kova. O Yezous djinas kokres, hoy yob kamas te krell.
7O Filipo penas: “Ninna te vals men douy-sheel roupene beme, vals kova gar doha, te lell hakeno i tikno kotar maro.”
8Yek leskre malendar, o Andreas, ko phraal o Simon Petrestar, penas ap o Yezouseste:
9“Kate hi i čavo. Koles hi panč mare oun douy mače. Kova hi či yaake boud menshenge.”
10O Yezous penas: “Penenn i menshenge, te beshenn pen le!”
Koy his boud zenlepen. Oun yon beshan pen koy. Kolla his nay yaake panč zerya (5.000) morsha. 11Oun o Yezous las kol mare, parkras pes pash o Debleste oun das len i menshende. Kova kras lo ninna kol mačentsa. Oun hakeno las yaake boud, har yob kamas.
12Har yon halauter čalo his, penas yob ap peskre malende: “Čivenn i tsele kotya khetne, hoy pral ačan, te djal kova gar nashedo!” 13Koy čivan leskre mala halauter khetne, hoy pral ačas kol marendar. Koy van deesh-te-douy marengre gone pherdo kol panč marendar.
14Har kol menshe dikan, hoy o Yezous kras an o Debleskri zoor, penan le: “Kova hi čačepah ko Debleskro rakepaskro, kolestar penlo vas, kay vell lo ap kay phoub.” 15O Yezous hayvas, kay kaman yon les te taprell, te krenn le les lengro baro ray. Doleske djas yob doureder pral ap koy berga, te vell lo peske kokres.
O Yezous djal ap o pani
16Har i rat vas, djan leskre mala tele pash o pani, 17djan an i bero#6:17 bero barque , oun ouleran vergel o pani, te venn le an o foro Kapernaum. His rati, oun o Yezous his gar pash lende. 18Koy phourdas i baro zorelo dourho pral o pani. Oun o pani vas divyo. 19Har leskre mala panč, shob kilometarya vin ap o baro pani his, dikan le o Yezouses: Yob djas ap o pani, oun vas pash o bero. Oun yon lan traash.
20Yob penas: “Me hom! Ma darenn!”
21Koy kaman yon les an o bero te lell. Ap yek kopo his le ap i vavar panyeskri rig, kote, kay yon kaman te djal.
O Yezous hi o maro, hoy della o djipen
22O vavar dives poučan pendar kol menshe, kay ačan ap i vavar panyeskri rig, kay o Yezous hi. Yon dikan, kay taysar yek bero čiddo his pash o pani, oun kay leskre mala djan penge. Yon djinan, o Yezous his gar pash lende.
23Koy van vavar bere#6:23 bere barques dran o foro Tiberias, oun čivan pen kote, kay rhans le ko maro, koleske o Yezous parkras pes pash o Debleste. 24Har kol menshe hayvan, kay o Yezous bouder gar koy hi, vitar gar leskre mala, beshan pen yon an kol bere, ouleran vergel o baro pani, oun van an o foro Kapernaum, te rodenn les le.
25Kote hatsan le les, oun poučan lestar: “Sikepaskro, kaana#6:25 kaana quand? val tou kate?”
26Penas o Yezous: “Čačepah, me penau t'menge: T'mer rodan man gar doleske, kay dikan i baro koova, hoy krom an o Debleskri zoor. T'mer rhan ko maro, oun van čalo. Doleske rodenn t'mer man. 27Ma djivenn o rhapaske, hoy paash djala! Djivenn yaake, te lenn ko djipen, hoy gar pre-herella! O Mensheskro Čavo kokres nay dell t'men kova. Yaake sikras o Devel, kay kova leskro čavo hi.”
28Koy poučan yon lestar: “Hoy hounte kras mer? Hoy kamell o Devel mendar?”
29Penas o Yezous ap lende: “O Devel kamella, te patsenn ap koleste, kay yob bičras.”
30Penan yon: “Kre menge i baro koova an o Debleskri zoor, te patsas mer ap toute! Sike men, hoy tou hayveh! 31De men hako dives maro te rhal, yaake har mare phoure menshe rhan o Debleskro maro an o moulo them! Kova hi činlo an o Debleskro lab: Yob das len maro dran o bolepen rhapaske.”
32Penas o Yezous: “Čačepah, me penau t'menge: Hi gar o Mose, kay das t'men o maro dran o bolepen. Kova hi miro dad, kay dell t'men ko čačo maro dran o bolepen. 33O Debleskro maro hi kova, kay vas dran o bolepen, oun dell i menshen o djipen.”
34“Ray,” penan yon, “de men ko maro hako tsiro!”
35O Yezous penas lenge: “Me hom ko maro, kay della ko djipen. Koon pash mande vella, koles vell bouder kek bok. Oun koon ap mande patsella, koles vell bouder kek troush.
36Hi yaake har me t'menge penom: T'mer dikan man, oun kamenn gar ap mande te patsell. 37Halauter kolla, kay dell man o dad, venn pash mande. Oun halauter kolla, kay venn pash mande, kolen vitsrau me gar vin. 38Me vom gar dran o bolepen te krap kova, hoy me kamau. Me vom te krap, hoy kova kamella, kay bičras man. 39Oun o Devel kamella, te nashrap me kekes kolendar, kay yob man das. Yob kamella, te krap len i moulendar djido ap o palstouno dives#6:39 palstouno dives letsto dives .
40Kova kamell miro dad: Hakeno, koon o čaves dikella, oun ap leste patsella, lell o djipen, hoy gar pre-herella. Oun me krau les i moulendar djido ap o palstouno dives.”
41I bibolde his rhoyemen pral kova, kay yob penas: Me hom ko maro, hoy dran o bolepen tele vas.
42“Hi kova gar o Yezous, ko Yosefeskro čavo?” penan yon. “Mer prindjrah leskro dades oun leskri da. Har nay penell lo: Me vom dran o bolepen?”
43Koy penas o Yezous ap lende: “Ma rhoyrenn t'men pral kova, hoy me t'menge penom! 44Kek nay vell pestar pash mande. O dad, kay bičras man, hounte anell les pash mande. Oun koon pash mande vella, koles krau me i moulendar djido ap o palstouno dives.
45An o Debleskro lab činan kol Debleskre rakepangre: O Devel hi o sikepaskro halauterenge.#6:45 dik: Yesaya 54:13
Hakeno, koon ap o dadeste shounella oun krell, hoy yob kamella, vell pash mande. 46Kek dikas o dades. Kova kokres, kay vas o Deblestar, dikas les. 47Čačepah, me penau t'menge: Koon ap mande patsella, koles hi o djipen, hoy gar pre-herella.
48Me hom ko maro, hoy dell t'men ko djipen.
49T'mare phoure rhan ko maro, hoy o Devel len das an o moulo them, oun yon meran.
50Me hom ko čačo maro, hoy dran o bolepen vella. Koon kova rhala, kova merell gar. 51Me hom ko maro, hoy dell o djipen, oun hoy vas dran o bolepen. Hakeno, koon rhala kava maro, lell o djipen, hoy gar pre-herella. Oun ko maro hi miro mass. Me dau les i menshenge, te lenn le ko djipen.”
52Kanna čingran pen kol bibolde, oun penan: “Har nay dell men ko morsh peskro mass te rhal?”
53Koy penas o Yezous ap lende: “Čačepah, me penau t'menge: Te rhan t'mer gar o Menshengro Čaveskro mass, oun piyenn gar leskro rat, hi t'men gar o djipen, hoy gar pre-herella. 54Koon rhala miro mass, oun piyell miro rat, lell o djipen, hoy gar pre-herella. Oun me krau les i moulendar djido ap o palstouno dives.
55Miro mass hi o čačo rhapen, oun miro rat o čačo pipen. 56Koon rhala miro mass, oun piyell miro rat, kova ačella an mande, oun me ačau an leste.
57Yaake har o dad, kay bičras man, hi djido, oun das man o djipen, yaake dau me o djipen kolende, kay rhan miro mass. 58Kava hi ko maro, hoy vas dran o bolepen. Koon kava maro rhala, lell o djipen, hoy gar pre-herella. Kava hi i vavar maro har kova, hoy t'mare phoure rhan.”
59Kova penas yob an i biboldengri kangri, har yob an ko foro Kapernaum lenge o Debleskro lab penas.
60Har kolla, kay leha djan, kova shounan, penan boud lendar: “Kova hi kek shoukar koova, hoy yob koy penella. Koon shounell kova nay?”
Boud menshe djan bouder gar o Yezouseha
61Har o Yezous lendar hayvas, kay yon pen pral leste rhoyrenna, penas lo ap lende: “Rhoyrell t'men kova? 62Hoy krans t'mer, te dikans t'mer, te djal o Mensheskro Čavo pale an o bolepen? 63O Debleskro Dourho hi kova, kay dell o djipen. O mensheskri zoor nay krell kova gar. Mire laba, hoy me t'menge penom, van dran o Debleskro Dourho. Doleske anenn le t'menge ko djipen. 64Mashkral t'mende hi menshe, kay patsenn gar.”
O Yezous djinas, koon kolla his, kay patsenn gar. Ninna djinas lo, koon ap leste phoukrella. 65Oun yob penas doureder: “Doleske penom me t'menge, kay kek nay vell pestar pash mande. O dad kokres nay anell les pash mande.”
66Ap ko tsiro tserdan pen boud kolendar pale, kay leske palla djan, oun djan bouder gar leha.
67Koy poučas o Yezous kol deesh-te-douyendar: “Kamenn t'mer man ninna te moukell?”
68“Ray, pash koneste djas mer?” penas o Simon Petro. “Tout hi laba, kay denn men o djipen, hoy gar pre-herella. 69Mer patsah oun djinah, tou veh o Deblestar. O Devel bičras tout.”
70O Yezous penas lenge: “Me rodom t'men deesh-te-douyen vin. Oun an yekeste t'mendar hi o beng.”
71Yob rakras o Youdasestar, leskro dad hi o Simon Iskariot. O Youdas his yek kol deesh-te-douyendar, kova kay phoukrella ap leste.
હાલમાં પસંદ કરેલ:
Yohanni 6: Sint-Man2024
Highlight
શેર કરો
નકલ કરો
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
