Mateu 6
6
Kupa zvipo kuvanopembha
1“Vonanyi kuti musayita kururama kwenyu pamberi po vandhu, kuti vamuvone; kuti mwechizodaro, amuzowani musharo kuna Baba wenyu vari mu gore. 2Ndizvo apo woopa zvipo zvako, usarija mbhayapaya pamberi pako, kudari ngo zvovanoita vajiitisi mu nyumba jo kudira, no mu makwanja, kuti vayirikijwe ngo vandhu. Zvirokwazvo, ndinoti kwomuri, vatoashira musharo wavo. 3Asi apo iwewe woopa zvipo zvako, usatendera kuti nyara yako yo kuboshwe izive chinoitwa ngo nyara yako yo kumuho, 4kuti zvipo zvako zvipuwe ngo kufishika, na Baba wako vanovona mukufishika vanozokupavo.”
Jesu unojijisa kukumbira
(Ruka 11:2-4)
5Naapo mwookumbira, musazodari ngo vajiitisi; ngokuti vanoda kukumbira vakayima mu nyumba jo kudira, no pambhararano po makwanja kuti vavoneke, ngo vandhu. Zvirokwazvo, zvirokwazvo ndinoti kwomuri, vatoashira musharo wavo#6:5 Vajudha vanodira vayidikana kukumbira ngo nguva imweyo. Vamweni vayipshaka ndau jo pamusika kuti vavoneke ngo vandhu. Vonayi kuna Ruka 18:10-14.. 6Asi iwewe, apo wookumbira, nghwina mu nyumba yako yo pakati, naapo wakonya musuvo, kumbirayi kuna Baba wako vari mukufishika, na Baba wako vanovona mukufishika vanozokupavo. 7Asi mukukumbira kwenyu musazohwirijira mazwi asina shwiro, kudari ngo zvovanoita vo majinja; ngokuti avo vanorangarija kuti vanozozwika ngo kuwanda kwo mazwi avo. 8Ndizvo musazodari ndivo; ngokuti Baba wenyu vanoziva izvo zvomunotama musati mwakumbira kwavari. 9#Vonayi kuna: Eze. 36:19-23.Ndizvo kumbiranyi ngo njira iyi: “Baba wedu vari mu gore, ngarireremejwe zina renyu.” 10Umambo hwenyu ngahuviye. Kuda kwenyu ngakuitwe mu nyika kudari ngo mugore. 11Tipenyi ngeiri zuva kuha kwedu kunotamika nyamasi. 12Tiregererenyi ndava jedu, kudari itisu takaregerera avo vane ndava kwetiri. 13Musatinghwinisa mukuejwa, asi mutinunure kuno uwo wakashata.
14Ngokuti kudari imwimwi mwechiregerera vandhu zvishaishi zvavo, Baba wenyu vari mu gore vanozomuregereravo imwimwi. 15Asi kudari musikaregereri vandhu zvishaishi zvavo, na Baba wenyu avazomuregererivo imwimwi zvishaishi zvenyu.
Ndava yo kuera kuha
16Zve mwoera kuha, musayita chisununu muhope jenyu kudari ngo vajiitisi; ngokuti vanoyita chisununu hope javo kuti vavoneke ngo vandhu kuti vanoera kuha. Zvirokwazvo, ndinoti kwomuri, vakatoashira musharo wavo. 17Asi iwewe, apo woera kuha, zoja musoro wako, ushambe muhope mwako; 18kuti usazovoneka ngo vandhu kuti uri kuera kuha, asi ndi Baba wako vari pakafishika; na Baba wako avo vanovona mukufishika, vanozokupavo.
Upfumi wo gwinyiso
(Ruka 12:33-34)
19 # Vonayi kuna:
Jak. 5:2-3. Musajiunganijira upfumi mu nyika, apo honye nokuti chipfundo zvinoshaishira, naapo mbavha jinopwanya jibe. 20Asi jiunganijirenyi upfumi mu gore, apo honye nokuti furuju zvisikashaishiri, naapo mbavha jisikapwanyi jibe. 21Ngokuti apo pano upfumi hwenyu, ndipozve panozova no mwoyo yenyu.
Kujeka kwo muviri
(Ruka 11:34-36)
22Kujeka kwo muviri imajiso, ndizvo kudari majiso ako ari majiso kwawo, muviri wako wese unozogara mukujeka. 23Asi kuti majiso ako akashata, muviri wako wese unozozara ngo chidima. Ndizvo kudari kujeka kuri mukati mwako kuri chidima, kukuranyi kwechidima icho.
Mwari no upfumi
(Ruka 16:13)
24Akuna mundhu ungakona kushandira majimambo maviri; ngokuti unozonyenya umwe, ade umweni, ngokuti unozoshoora umwe abatirire kwo umweni. Amungashandiri Mwari no upfumi.
Mwari unongwarira vana vake
(Ruka 12:22-31)
25Ngo ndava yoichi ndinoti kwomuri, musadembatemba ngo maponero enyu kuti munozohenyi, nokuti munozomwenyi; nokuti ngo ndava yo muviri wenyu kuti munozosimirenyi. Kurarama akupindi kuha here? No muviri aupindi kusimira here? 26Ringiranyi shiri jo mu gore, ajikushi, ajikotori, nokuti kuunganija muzvitumba; kani Baba wenyu vari mu gore vanojipa zvokuha. Imwimwi amupindi kukura kuna ijo here? 27Ndiyani kwomuri ngo kudembatemba ungakwanisa kuengejera urebu hwake mbhimo imwe? 28Nemwi munodembatemba ngenyi ngo zvokufuka? Rangariranyi ngo maruva omushango kumera kwawo; aashandi, aarukizve. 29Asi inini ndinoti kwomuri, na Soromona mu uthende hwake hwese aazivi kusimijwa kudari ngo rimwe rawo. 30Ndizvo, kudari Mwari echisimija kudaro maushwa omushango, awo aripo nyamasi, mangwana anokandihwa muchoto, aazopindi here kukuru kumusimija, imwimwi muno kutenda kudodoko. 31Ndizvo musadembatemba, mwechiti, tinozohenyi? Nokuti, tinozomwenyi? Nokuti, tinozosimirenyi? 32Ngokuti vo majinja vanopshaka izvi zvese, ngokuti Baba wenyu vari mu gore vanoziva kuti munozvitama izvi zvese. 33Asi pshakanyi kutanga Umambo hwake no kururama kwake, no izvi zvese zvinozoengejehwa kwomuri. 34Ndizvo, musazodembera zuva ramangwana, ngokuti, zuva ramangwana unozojidembera. Kutambujika kwezuva kunokwana zuvero.
હાલમાં પસંદ કરેલ:
Mateu 6: CINDAU NT
Highlight
શેર કરો
નકલ કરો
Want to have your highlights saved across all your devices? Sign up or sign in
Novo Testamento Cindau © Bible Society of Mozambique, 2023.
