Ruka 17
17
Zvikhugunyiso no kuregererana
(Mateu 18:6-7,21-22; Marku 9:42)
1Naye wakati ku vajiji vake: “Akungaitiki kuti zvikhugunyiso zvisazoviya; asi ikhombo kwaari uwo wezvinoviya ndiye! 2Kuri nani kwaari kuti gwiyo ro kukwiya risungihwe muhuro mwake, naye akandihwe mu jombe, kuno kuti akhugunyise umwe wo ava vadoko. 3Jingwarirenyi. Kudari munukuna wako echikushaishira, murambisei; kuti iye echitenderuka, muregererei. 4No kudari iye echikushaishira kanomwe ngo zuva, akakumbira kwouri kanomwe, echiti: Ndinotenderuka, newe unozomuregerera.” 5No vapostori vakati kuna Mambo: “Wanja kugonda kwedu.” 6Na Mambo wakati: “Kudari mwayiva no kugonda kwakadari ngo mbhumba yo mustadhi, mwaizonanga kuno uwu muti wo sukamore, kuti: Bvitwa, ujimikwe mu jombe; nawo waizomupurukira. 7Asi ndiyani kwomuri, uno muranda echirima mu munda, nokuti echihavisa mabvuta, ungazoti kwaari: Apo ooviya echibva mu munda, viya zvino pano, ugare panokuha? 8Aazoti here kwaari: Ndinasirirei chokuti ndihe, ujisimije, undishandire, mbhera ndoha, no kumwa, ngosure kwo uku wozohavo no kumwavo iwewe. 9Unobonga here uwo muranda ngokuti wakayita izvo zvaakapangwa kuyita? 10Ngokudaro imwimwi nemwivo apo mwazopeja kuyita zvese izvo zvomwakapangwa, mwechiti: Tiri varanda vasikadetseri chiro; takaita izvo zvaisisira kuti tizviite.”
Kurapwa kwo vandhu vari gumi vayiva no mapere
11Kwakaitika apo vechienda Jerusarema, kuti iye wakapinda ngo pakati po Samariya no Garire. 12Kwakati echinghwina mu guta rakatikuti, vakasongana naye vandhu vari gumi vayiva no mapere, vakayima vari ngo ndhambo. 13Navo vakamusa izwi ravo, vechiti: “Jesu Mujijisi, tiyitire nyasha.” 14Kwakati apo avavona, wakati kwavari: “Endanyi mujipangijire ku vapristi.” Kwakaitika vechienda, vakaponeswa. 15No umwe wavo apo avona kuti waponeswa, wakahwirira, echikuja Mwari ngo izwi guru. 16Naye wakawa ngo hope patshoka jake, echimubonga; iye wayiva muSamariya. 17Naapo Jesu wakati: “Avazivi kuponeswa vari gumi here? Asi vari kwapi vapfumbamwe? 18Apana wakavoneka here echipetuka kwookuja Mwari, asi ega uwu mupara? 19Wakati kwaari: Mukayi, uende; kugonda kwako kwakuponesa.”
Kuviya kwo Umambo hwa Mwari
(Mateu 24:23-28,37-41)
20Kwakati echibvunjiswa ngo vafarisi kuti Umambo hwa Mwari unozoviya rini, wakavapingura, akati: “Umambo hwa Mwari ahuviyi ngo kuvoneka. 21Avazotizve, vonanyi, pano, nokuti apo! Ngokuti vonanyi, Umambo hwa Mwari huri mukati mwenyu.” 22Naye wakati ku vajiji: “Mazuva anozoviya omunozodisisa kuti muvone rimwe ro mazuva o Mwana wo Mundhu, nemwi amuzorivoni. 23Navo vanozoti kwomuri: Vonanyi, apo! Nokuti vonanyi, pano! Musazoendeyo, nokuti kuvatevera. 24Ngokuti kudari ngo mbheni inorazva yechibva kudivi rimweni ro mu denga, inojekisa kuguma kudivi rimweni ro pasi po mu denga, no kuviya kwo Mwana wo Mundhu kunozodaro ngo zuva rake. 25Asi kutanga kunodikana kuti atambujwe ngo zvakawanda, no kurambwa ngo uwu mubarihwana. 26No kudari ngozvakaitika ngo mazuva a Noa, kunozodarozve ngo mazuva o Mwana wo Mundhu. 27Vakaha, vakamwa, vakarovora, vakarovojwa, mbhera rozoguma zuva raakanghwina ndiro Noa mu ngarava, no ndambi yakaviya, ikapeja vese. 28Kudarizve ngozvakaitika ngo mazuva a Roti; vakaha, vakamwa, vakatenga, vakatengesa, vakasima, vakavaka; 29asi ngo zuva raakabuda ndiro Roti kubva mu Sodhoma, kwakanaya muriro no sorufa zvechibva mu gore, zvikavapeja vese. 30Kunozodarovo ngo zuva raanozopangijihwa Mwana wo Mundhu. 31#Vonayi kuna: Mat. 24:17-18; Mar. 13:15-16.Ngo zuva iro uwo uri panyezuru po nyumba, no mujiyo jake jiri mukati mwo nyumba, asazobzuka kuti ajitore, no uwo uri mu munda asapetuka. 32Cherechejanyi mukaji wa Roti. 33#Vonayi kuna: Mat. 10:39; 16:25; Mar. 8:35; Ruk. 9:24; Joh. 12:25.Uwo unozopshaka kuviyihwa ngo kururama kwake, unozokurasha, asi uwo unorasha kururama kwake iye unozokungwarira. 34Ndinoti kwomuri, ngo uhwo usiku vaviri vanozovapo pa mubhedhi umwewo; umwe unozotohwa, no umweni unozosiyiwa. 35Vanozovapo vanakaji vaviri vechikwiya pamwepo; umwe unozotohwa umweni unozosiyiwa. 36Naapo vandhu vaviri vanozovapo mu munda, umwe unozotohwa, no umweni unozosiyiwa.#17:36 Tshamba jimweni jokare ajina vhesi ra 36.” 37Navo vakapingura, vakati kwaari: “Kwapi, Mambo?” Naye wakati kwavari: “Apo pano muviri wakafa, ndipo panozoungana ngwanga.”
હાલમાં પસંદ કરેલ:
Ruka 17: CINDAU NT
Highlight
શેર કરો
નકલ કરો
Want to have your highlights saved across all your devices? Sign up or sign in
Novo Testamento Cindau © Bible Society of Mozambique, 2023.
