Ин 1
1
1 ГЛАВА
1-18 Шомак айдеме лийын. 19-34 Тынеш Пуртышо Иоаннын таныклымыже. 35-42 Эн ончычсо тунемшыж-влак. 43-51 Иисус Филипп ден Нафанаилым ӱжеш.
1Тӱҥалтыште Шомак улмаш.
Шомак Юмо дене улмаш,
да Шомак Юмо улмаш.
2Тӱҥалтыштак Тудо Юмо дене улмаш.
3Мо ышталтын, чылажат Тудын гоч лийын,
Тудын деч посна нимо ышталтын огыл.
4Тудын кӧргыштыжӧ илыш улмаш,
а илыш – еҥ-влаклан волгыдо.
5Волгыдо пычкемыште волгалтеш
да тудым пычкемыш авалтен огыл.
6Теве Юмо айдемым колтен, тудын лӱмжӧ Иоанн. 7Чылан Волгыдо нерген уверым колышт да ӱшанышт манын, Иоанн Волгыдо нерген таныклаш толын. 8Тудо шкеже Волгыдо лийын огыл, а Волгыдо нерген таныклаш колтымо улмаш. 9Но чын Волгыдо улмаш. Тудо тӱняшке толшо чыла айдемымат волгалтара.#1:9 Тидым тыгеат кусараш лиеш: «Чыла еҥым волгалтарыше чын Волгыдо тӱняшке толеш улмаш».
10Тӱняште Тудо улмаш,
тӱня Тудын гоч ышталтын,
но тӱня Тудым пален огыл.
11Тудо шкенжын-влак деке#1:11 «Шкенжын-влак деке»: тидым «Шке мландышкыже» манынат кусараш лиеш. толын,
но шкенжын-влак Тудым порын вашлийын огытыл.
12А кӧмыт Тудым порын вашлийыныт
да Тудын лӱмжылан ӱшаненыт,
нунылан Юмын икшывыже лияш властьым пуэн#1:12 «Властьым пуэн» – але: йӧным ыштен.
13Нуно вӱр деч огыл, кап кумыл деч огыл,
пӧръеҥ кумыл деч огыл, а Юмо деч шочыныт.
14Шомак капаҥын да мемнан коклаште илен.
Ме Тудын чапшым,
Ачан Ик Шкет Эргыжын гай чапшым, ужынна.
Тудо порылык да чын дене темын улмаш.
15Иоанн, Тудын нерген таныклен, виян ойлен: «Мый ойленам: мыйын почеш Толшо мыйын ончылно лие, вет Тудо мый дечем ондак улмаш. Тиде – Тудо».
16Тудын тичмашлыкше деч ме чылан
порылык ӱмбаке порылыкым налынна.
17Закон Моисей гоч пуалтын,
а порылык ден чын Иисус Христос гоч толыныт.
18Юмым нигӧ нигунам ужын огыл,
Ачан кӧргыштӧ улшо Ик Шкет Эрге
Тудым палдарен.
19Иоаннын таныклымыже теве тыгай. Иудей-влак тудын деч кӧ улат манын йодаш Иерусалим гыч иерей-влакым да Левий тукым еҥ-влакым колтеныт. 20Тудо, нимом шылтыде, тура ойлен, мый Христос омыл манын увертарен. 21Нуно йодыныт: «Тый вара кӧ улат? Тый Илия улат?» «Уке», – вашештен. «Але саде пророк#1:21 Иудей-влак кугу пророкым вученыт. Нунын шонымышт почеш, тыгай пророк Христос деч ончыч толшаш улмаш. улат?» «Уке», – каласен тудо. 22Нуно ойленыт: «Тый кӧ улат? Мемнам колтышо-влаклан вашмутым пуышаш улына. Тый Шкендым кӧлан шотлет?» 23Тудо пророк Исаиян мутшо дене вашештен: «Господьлан корным вияшым ыштыза манын, ир мландыште кычкырышын йӱкшӧ#1:23 Ис 40:3. улам». 24А колтымо-влак фарисей кокла гыч лийыныт. 25Нуно Иоанн деч йодыныт: «Тый Христосат, Илият да саде пророкат отыл гын, молан еҥ-влакым тынеш пуртет?» 26Иоанн вашештен: «Мый вӱд дене тынеш пуртем, но тендан коклаште Весе уло – те Тудым огыда пале, 27Тиде Тудо, кӧ мыйын почешем толеш да мый дечем ончылно лиеш, мый Тудын йолчием кылжымат рудаш ом йӧрӧ». 28Чыла тиде Вифаварыште, Иордан эҥер вес могырышто, лийын. Тушто Иоанн тынеш пуртен.
29Вес кечынже Иоанн тудын деке толшо Иисусым ужын да ойлен: «Теве Юмын Пачаже,#1:29 Пача – рушла Библийыште «Агнец». Тудо тӱнян языкшым Шке ӱмбакыже налеш! 30Мыйын почеш толшо Айдеме мый дечем ондак лийын, сандене Тудо мый дечем ончылно манын, кӧн нерген ойленам, тиде – Тудо. 31Кӧ Тудо, мый шкеат пален омыл, но Израильлан палыме лийже манын, мый вӱд дене тынеш пурташ толынам». 32Иоанн таныклен ойлен: «Пылпомыш гыч кӧгӧрчен семын Шӱлыш волымым да Тудын дене кодмым мый ужым. 33Кӧ Тудо, мый шкеат пален омыл, но мыйым вӱд дене тынеш пурташ Колтышо каласыш: ”Шӱлыш кӧн ӱмбакыже волымым да кӧ дене кодмым ужат, Тудо – Святой Шӱлыш дене тынеш пуртышо”. 34Мый тидым ужым да таныклем: Тудо – Юмын Эрге».
35Вес кечын Иоанн угыч туштак шоген, тудын дене пырля кок тунемшыже лийын. 36Воктене коштшо Иисусым ужмеке, Иоанн ойлен: «Теве Юмын Пачаже!» 37Тидым колмеке, Иоаннын кок тунемшыже Иисус почеш каеныт. 38Тудыжо савырнен, почешыже ошкылмыштым ужынат, нунылан ойлен: «Тыланда мо кӱлеш?» Нуно йодыныт: «Равви, кушто Тый илет?» Равви мутшо туныктышо манме лиеш. 39Тудо ойлен: «Ончалаш толза». Жап лу шагат наре улмаш.#1:39 «Лу шагат наре»: мемнан жап дене кечывал деч вара ныл шагат наре лийын. Нуно Тудын дене пырля каеныт, кушто илымыжым ужыныт да кас марте Тудын дене лийыныт.
40Иоаннын мутшым колшо да Иисус почеш кайыше кок еҥ гыч иктыже Симон-Петрын Андрей шольыжо лийын. 41Тудо эн ондак Симон изажым кычал муын да тудлан каласен: «Ме Мессийым муынна». Мессий мутшо Христос манме лиеш. 42Вара тудым Иисус деке намиен. Иисус тудым ончалын каласен: «Тый Ионан Симон эргыже улат. Тыйым Кифа манын лӱмдаш тӱҥалыт». Тиде лӱмжӧ Петр, вес семынже кӱ манме лиеш.
43Вес кечын Иисус Галилейыш каяш шонен пыштен. Тудо Филиппым вашлийын да ойлен: «Почешем кае!» 44Филипп Вифсаида гыч улмаш, Петр ден Андреят тиде ола гычак лийыныт. 45Филиппше Нафанаилым вашлийын да тудлан каласен: «Кӧн нерген Моисей законеш возен, да кӧн нерген пророк-влакат сереныт, ме Тудым муынна. Тиде Иисус, Назарет гыч Иосифын эргыже». 46Нафанаил вашештен: «Назарет гыч иктаж-мо сай лийын кертеш мо?» Филипп тудлан ойлен: «Тол да ончо».
47Иисус, Шкеж деке лишемше Нафанаилым ужмеке, тудын нерген каласен: «Теве чынжымак Израиль еҥ, тудын нимогай шоякшат уке». 48Нафанаил йодын: «Мыйым кушеч палет?» Тидлан Иисус вашештен: «Филипп тыйым ӱжмӧ деч ончычак тыйым смоква пушеҥге йымалне ужынам ыле». 49Нафанаил каласен: «Равви, Тый Юмын Эрге улат, Тый Израильын Кугыжаже улат!» 50Иисус тудлан вашештен: «Тыйым смоква пушеҥге йымалне ужынам манын ойлымемлан кӧра ӱшанет? Тылеч кугуракымат ужаш тӱҥалат». 51Вара ешарен: «Чынак, чынак тыланда ойлем: тылеч вара почмо пылпомышым да Юмын Суксыж-влакын Айдеме Эрге деке волымым да кӱзымым ужыда».
હાલમાં પસંદ કરેલ:
Ин 1: УС
Highlight
શેર કરો
નકલ કરો
Want to have your highlights saved across all your devices? Sign up or sign in
Библийым кусарыше институт, Хельсинки 2007
