Ghalasi 2
2
Pɔl bɛ nɛ bɛdhiiti bot ɛ lwoma
1Bhii tak, ye naazɛkpaa membu kam nɛ ená. Wɔ gwaa, mɛ baazɛsik pɛ Yeluzalɛm, bis nɛ Bhaanabhas zɛnɔɔ Tit. 2Mɛ nasik penek ɛ́ étɛp ɛlooba nɛ sa Zɛɛb natel mɛ ɛ. Tin, bis naazɛboma bis nɛ bot ɛ nadi ebeeaa dáa bot ɛ duu ɔ é kwan. Mɛ naakaada bɛ Mbɛɛ Bhaadal mɛ nadi egoola nɛ bot ɛ di ààbɛ bot ɛ mbyak eYuda ɔ. Etɛɛ náá, mɛ nabɛ ɛ́ ààdi ekwyɛl náá, mɛsa mɛ mɛ nazesa ɛ, nɛghu mɛsa mɛ mɛ aasa ɛ, di yii toto. 3Tin, Tit mot bis nɛ nɛ nadi egyee ɔ, nyɛ nabɛ ɛ́ mot mbyak eGhɛlɛk, mot ngɔt nabɛ ɛ́ ààbesal nyɛ náá, nyɛ ni beka. 4Bela náá, ye nabɛ ɛ́ nɛ bɛdhiiti bɔn-nyɛɛg bis, bot ɛ mɛdjhaaz pɛ ɛko bhimis pɛ si nazesyela pak'es étɛp ɛsaŋ ɛ́ ɛniigal nyɛ beka ɔ. Bot binɔk nasyela tɔ ɛdhuu ɛ les ɛ, étɛp bɛ neebee dáa bis di ekɛ pɛka tɔ ekwom e tsi ɛ, nɛ dáa di náá bis moo ɛ́ mot ngɔt nɛ Yezu Klisto ɛ. Tin, bɛ nadi ekwyɛl náá, bis di ekwom e tsi. 5Tin, bis nabɛ ɛ́ ààkoobet-betak náá, ɛkwosak ɛ bot ɛ tak sael, etɛɛ náá, etsɛɛtsɛ e Mbɛɛ Bhaadal needi nɛ nen.
6Tin, yɛ kabɛ bot ɛ nadi ebeeaa dáa bot ɛ duu ɔɔ, etɛp bɔɔ ààgwyák mam, etɛɛ náá, Zɛɛb ààsa mbɛk pak bot. Ekukuma binɔk nabɛ ɛ́ ààdi ebe mɛ nɛ bhel náá, mɛ swoola Mbɛɛ Bhaadal mɛ di egoola ɛ. 7Ghuna, bɛ naabee náá, Zɛɛb naadjɛ mɛ mɛsa mɛ ɛgoola Mbɛɛ Bhaadal pɛ daa bot ɛ nadi ààni beka ɔ, dhatyee nyɛ nabaadjɛ Pyɛɛd mɛsa mɛ ɛkɛgoola Mbɛɛ Bhaadal pɛ daa bot ɛ nani beka ɔ. 8Tin, dáa Zɛɛb sa náá, Pyɛɛd di mot-lwoma étɛp bot ɛ mbyak eYuda ɔ, nyɛ nabaasa ɛ́ náá, mam di mot-lwoma étɛp bot ɛ di ààbɛ bot ɛ mbyak eYuda ɔ. 9Dáa bɛ nabee ɛkɛɛ ɛ Zɛɛb nadjɛ mɛ ɛ, wɔ gwaa Zak, Pyɛɛd nɛ Zaŋ bot ɛ nadi dhatyee ɛgwiŋ ɛ sɛɛg yii zɛɛga mendjaala ɔ, zɛsɛɛb bis nɛ Bhaanabhas mbɔ eghɛŋ bɔɔ. Ye kwyɛl ɛlyaal ɛ́ náá, bɛ eemyaal, bis ɛ́ nɛ ghwyil ɛ́ katɔ́ pɛ kyee bot ɛ di ààbɛ bot ɛ mbyak eYuda ɔ, da bɔɔ ɛ́ tɔ́ pɛ kyee bot ɛ mbyak eYuda. 10Tin, bɛ nazoke nɛ nes ɛ́ náá, da bis ɛ́ taala ɛkwyee bɛdjel ɛ bot, ye nabɛ ɛ́, mɛ naasa yɛ nɛ lyem wat.
Pɔl bɛ nɛ Pyɛɛd pɛ ghaada Antiɔs
11Deenek, dáa Pyɛɛd nazyɛ pɛ Antiɔs ɛ, ye nabɛ ɛ́, mɛ naalii nɛ nɛ ɛbiyoɛpe é mis mɛ bot, etɛɛ náá, nyɛ nadi ɛ́ nɛ ndjɛ. 12Tin, ɛsok nɛ bɛdhiiti bot ɛ Zak nalwom ɔ kum, Pyɛɛd nadi edɛ lɔɔg wat bɛ nɛ bɔn-nyɛɛg bot ɛ nadi ààbɛ bot ɛ mbyak eYuda ɔ. É di'enek, dáa bot ɛ tak nakakum ɛ, Pyɛɛd eezɛkyee bot ɛ bɛ nɛ bɛnɔɔ nadi edɛ ɔ, ekaab bot ɛ nazeni beka ɔ. 13Bɛdhiiti eYuda zokazɛdu embee mɛfulu ɛ Pyɛɛd, tin, wɔ gwaa, ye baazɛsa náá, Bhaanabhas zokabaazɛni tɔ embee mɛsa yii mɛdjhaaz pɛ ɛko, bhimis pɛ si. 14Dáa mɛ nabee náá, bɛ nabɛ ɛ́ ààdi esa esonok ɛnyɔɛpe dáa etsɛɛtsɛ e Mbɛɛ Bhaadal di elɛɛ ɛ, mɛ ɛ́ boozɛlii nɛ Pyɛɛd é mis mɛ bot náá: «Wɔy mot di mot mbyak eYuda ɔ, wɔ kɛ wak ɛ́ dáa mot di ààdi mot mbyak eYuda ɔ, wɔ ààlooba nɛ etsi ɛ Moiiz. Haaa étɛp yé wɔ di ebesal bot ɛ di ààbɛ bot ɛ mbyak eYuda náá, bɛ du etsi eYuda?»
Tsik kɔ ɛsu ɛ ɛdum ɛ koŋ nɛ Yezu
15Bisɔ bak, bis ɛ́ mbyela eYuda, bis tok bot ɛ edhiiti membyak di ààduwal etsi e Zɛɛb ɔ. 16Tin, mena nɛ guka náá, mot ààdi mot epiki kɔ ɛsu ɛ ɛlooba etsi ɛ Moiiz, yɛ ɛ́ kɔ ɛsu ɛ ɛdum ɛ koŋ nɛ Yezu Klisto. Bisɔ pe, bis naadum koŋ nɛ Yezu Klisto, etɛɛ náá, bis needi bot ɛ epiki kɔ ɛsu ɛ ɛdum ɛ koŋ nɛ Yezu Klisto, ààkabɛ kɔ ɛsu ɛ etsi ɛ Moiiz. Deenek, mot aanàdi piki, etɛɛ náá, nyɛ eelooba nɛ etsi ɛ Moiiz. 17Tin, yɛ bɛ náá, bisɔ eYuda, bis ɛpesaa ɛdi ɛ́ bot ɛ epiki kɔ ɛsu ɛ Yezu Klisto ɔɔ, ye lyaal ɛ́ náá, bisɔ pe ɛ́ bot ɛ mesyem. Deenek ye kakwyɛl ɛlɛɛ ɛ́ náá, Yezu Klisto ɛ́ mot-mɛsa mɛ mesyem é? Ààbɛ, ye tok deenek! 18Mɛ baabula tɔ ɛduwal ɛ etsi ee mɛ nazebet ɔɔ, deenek, mam ɛmet ɛpelyaal náá, mɛ ɛ́ mot di ààlooba nɛ etsi ɔ. 19É di'enek, dum nɛ etsi, mɛ eezegwyɛ, etɛɛ náá, etsi tokapɛ nɛ ghwyil kɔ lam. Djas'enek nasael ɛ́, étɛp mɛ needi nɛ tsik etɛp Zɛɛb. Mɛ eezegwyɛ bis nɛ Yezu Klisto kɔ mɛlaaba. 20Deenek, mɛ di nɛ tsik mos ɔɔ, ye tok mam di nɛ tsik, yɛ ɛ́ Yezu Klisto ɛ di nɛ tsik tɔ lam. Etɛɛ náá, tsik mɛ kadi nɛ yɛ mos kɔ ɛko ɛ bɔs'ak ɛ, yɛ ɛ́ kɔ ɛsu ɛ ɛdum ɛ koŋ ɛ lam nɛ Mɔn ɛ Zɛɛb, mot nakwyɛl mɛ, da djɛ tsik'ɛ étɛp mɛ neetsak ɔ. 21Mɛ ààbyen enɛm nɛ embɛɛ e Zɛɛb. Tin, yɛ bɛ náá, etsi ɛ Moiiz ɛ di edjɛ epiki tɔ mot ɔɔ, deenek, Yezu Klisto nagwyɛ ɛ́ gwyes.
હાલમાં પસંદ કરેલ:
Ghalasi 2: bkwNT
Highlight
શેર કરો
નકલ કરો
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.