Luk 22
22
Retimanɛ rebi ndi rɛbaŋa Jisɔs
(Mt 26:1-5; Mk 14:1-2; Jn 11:45-53)
1Ndi kegbu kɛtɔmɔ ɔyɔ kɛbɨm, nci bajia mɨnɛ ya kɛtɔmɔ kɔjagi na botiga kekunɛ, 2bakɨm bajɔmɔ-kɔya na bakpɛbɛ Ibina Mosis bara baduga ɛyɔ nji bakoŋu Jisɔs na rɛŋɨba ndi bara bawɔŋɛ jɛnɛ bani.
Judas onyiɛ kokwɛ Jisɔs
(Mt 26:14-16; Mk 14:10,11)
3Sɔtan ɔnɔ Judas ŋɔ bajiŋɛ mɨnɛ ya Iskariɔd, ŋɔ ɔra mɨnɛ na kɔrɔ bani iti jubi na ifa mbɛ banyɛgɛ Jisɔs. 4Judas oruŋɛ ɛyɛ bakɨm bajɔmɔ-kɔya na bani retu mbɛ bababɛrɛ ɛtɔ-Ɛbrɔkpabi ɔkakuri na abɛ kɛmanci okokwɛ Jisɔs ɔjɛ bɛ. 5Botima bɔrɔmɔ bɛ mɨnɛ banyiɛ kɔkpɛɛ mɔ bagbuga. 6Judas onyiɛ, mɨnɛ ɔbɨnɛ kodugi brika ɛyɔ kokwɛ Jisɔs ɔjɛ bɛ na kwa bani babɔ batumɛ.
Jisɔs otubɛrɛ ɛkpaju kodi kekurɛ kɛtɨbi bedidi kɛtɔmɔ cia taŋɛ
(Mt 26:17-25; Mk 14:12-21; Jn 13:21-30)
7Ndi reyi kɛtɔmɔ ɔyɔ kɛbɨm rebigɛ, ndi bakoŋu bɔrɔri bedidi cia taŋɛ. 8Jisɔs otigɛ Pita na Jɔn ɔkanɛ bɛ ya, “Taŋɛ nu kasi bedidi kɛtɔmɔ cia taŋɛ mbi rekodi.”
9Basɨna mɔ ya, “Aduga ya rɛkasibi nfan?”
10Ɔfɛlɛ bɛ ramu ya, “Aya minɔŋɛ kanya na rɔrɛ, oni ŋɔ ɔsɔgɛ edemba mani kuɔkɨmanɛ nu. Nyɛgɛ mɔ nu taŋɛ na ɛtɔ nji ɔkɔnɔ, 11mɨnɛ kanɛ nu ɔkɔɛtɔ ya: “Ɔkpɛbɛ ya, ɛmaŋɔŋ nji bacincɛ bariɛnɛ, kwa nkodi bedidi kɛtɔmɔ cia taŋɛ na banyɛgɛ mi nɛ?” 12Kuɔkɔgɛ nu ɛmaŋɔŋ ɛrɛnɛ birebirɛ, bayuɛ ji. Tubɛrɛ nu gbanambunɛ kafa.”
13Baruŋɛ mɨnɛ bakafɛ gbanambunɛ kɛmanci Jisɔs ɔkanɛ bɛ mɨnɛ basi bedidi kɛtɔmɔ cia taŋɛ.
Ɛkpaju Krais
(Mt 26:26-30; Mk 14:22-26; 1Kɔr 11:23-25)
14Ndi kegbu kebigɛ, Jisɔs ɔkatumetumɛ na keti bedidi na Apɔsɨl bamɔ. 15Mɨnɛ ɔkanɛ bɛ ya, “Nra nduga mɔ ndi bedidi kɛtɔmɔ cia taŋɛ mbi na anu nabɔ nfɛ rasinkanɛ! 16Yɔgɛ nkanɛ nu, mbodi bedidi kɛtɔmɔ cia taŋɛ bejuju ta Ɛbrɔkpabi esi nu minjɔɛ retu kɛtɔmɔ nci.”
17Jisɔs ɔbɛ ekunɛ mantugi na ibɔ imɔ, ɔsamɛ Ɛbrɔkpabi mɨnɛ ɔkanɛ ya, “Kɔ nu yibanɛ jɛ bɔkpaju bonua. 18Nkanɛ nu mbɔ ŋɔ mantugi mmɛ ta Rɔrɛ-rɛkɨm Ɛbrɔkpabi rowu.”
19Mɨnɛ ɔbɛ ɔyɔ, ɔsamɛ Ɛbrɔkpabi, ɔgbagɛ mɔ, mɨnɛ ɔjɛ bɛ, ɔkanɛ bɛ ya, “Nfa na ɛkpaju emia nji nwu jɛ na retu renua. Si nu resi ndi minjinɛnɛ mi.”
20Na kɛmanci cinɛ, ndi babodi bedidi korirɛ ɔbɛ ekunɛ, mɨnɛ ɔkanɛ ya, “Ekunɛ nji na ɔcɛ ɔŋɔŋɔ Ɛbrɔkpabi na manji mammia, mmɛ mamfaba na retu renua. 21Nsu oni ŋɔ okokwɛ mi ɔra nka nfa ketu na ami! 22Wɔ Oni kuɔba nansɛrɛ Ɛbrɔkpabi etimanɛ. Nsu kukokuba kɔjɛ oni kaŋɔ ŋɔ okwɛ mɔ!” 23Babɨnɛ kɔsɨnɛ oni ŋɔ okosi ɛdɔ gba mbu.
Ifiri abaŋa oni ŋɔ ociacia
24Ifiri itɔ Apɔsɨl bamɔ ya na ogbigbɛ ɔbɛ yɛnɛ mɔ bafɛ ya ɔfa ocia. 25Jisɔs ɔkanɛ bɛ ya, “Bakɨm Jɛntail bafɔn nsɨm baci bani babɛ, mɨnɛ bani retu bajiŋɛnɛ ya, ‘Bacɛmɛ bani.’ 26Nsu anu katumɛ nu kanya, yɔgɛ oni ŋɔ ɔfa ocia otumɛ aya winwɔ, mɨnɛ oni retu ɔkɔkotumɛ aya ori. 27Yɛnɛ mɔ ɔfa ocia, ŋɔ otum na keti odiŋɛ bedidi din ŋɔ ɔbarɛ mɔ bedidi? Ŋɔ otumtum. Nsu nranka na rɛkaba renua aya ori. 28“Mintumɛ na ami sɛnsɛn kegbu na eyumɛ emia; 29mɨnɛ aya Mintɛ omia ɔjɛ mi nsɨm kotumɛ oni retu aya ɔkɨm, ami kunjɛ nu nsɨm kaŋɔ mɨnɛ. 30Kumindi mɨnɛ miŋɔ na keti kemia na Rɔrɛ-rɛkɨm romia, mɨnɛ kumintumɛ na botu rakɨm kotibi rirɛ jubi na rifa ndi Isɨrɛl.
Jisɔs ɔkanɛ Pita ya kuɔkɨna mɔ
(Mt 26:31-35; Mk 14:27-31; Jn 13:36-38)
31“Saimɔn, Saimɔn! Fugɛ! Sɔtan ɔsa nsɨm kɔrɔbi nu fɛb na eyumɛ, kɔfabɛ boyi na bobi, aya osiŋɛ rɛsɛ kɛkana ɔraŋɛ brika bomu osugɛ bɔkpab.
32Nsu nrɔbi njɔm njɛ wu, Saimɔn, mɔ renyiɛ-etima rɛyɛ rɛka tuɛ. Mɨnɛ ara aŋbɨnɛnɛ awu anyɛgɛ mi, akɔkɔjɛ bama bayɛ kotigiri etima.”
33Nsu Pita ɔkanɛ mɔ ya, “Ita, ami mbaribari koru nkpɔkɔbi na awu mɨnɛ kɔba na awu!”
34Jisɔs ɔfɛlɛ mɔ ramu ya, “Nkanɛ wu, Pita, nabɔ oruma-kɔgi okuga ɛrɛn, akɔkɨn mi begbu bɛtaa ya akigbɨra mi.”
Ebimbam, ɛbam na akaŋkaŋ
35Jisɔs ɔsɨna yɛ banyɛgɛ mɔ ya, “Ndi ntigɛ nu ndi mimbɔ minkijɨba ebimbam, ɛbam na birɛ-ikari, ɛfɔnɔ mbu minduga na minkifɛ-ɛ?” Bafɛlɛ mɔ ramu ya, “Tumgba.”
36Jisɔs ɔkanɛ bɛ ya, “Nsu kunku ara afɔnɔ ebimbam, na ɛbam, bɛ; mɨnɛ ara akifɔnɔ akaŋkaŋ, kwɛ kɔkpa kɔyɛ kunɛ yama ŋɔnɛ. 37Barɛ ya: ‘Babagɛ mɔ barɔbɔ na kɔrɔ basiŋɛ bobi,’ mɨnɛ nkanɛ nu, ramu ndɛ kurabara kɛmanci barɛ babaŋa mi, ndi mbu barɛ babaŋa mi kubɔjaga kanya.”
38Banyɛgɛ Jisɔs bakanɛ mɔ ya, “Fɛ, Ita, ikaŋkaŋ ifa iranka.” Jisɔs ɔfɛlɛ bɛ ramu ya “Itɨm!”
Njɔm Jisɔs birebirɛ rokuku Olif
(Mt 26:36-46; Mk 14:32-42)
39Jisɔs osugɛ rɔrɛ oruŋɛ birebirɛ Rokuku Olif, aya ɔra osiŋɛ, mɨnɛ banyɛgɛ mɔ baruŋɛ na amɔ. 40Ndi bajaga kaka, ɔkanɛ bɛ ya, “Rɔbɔ nu njɔm ya minka tɔ minjɛ eyumɛ.” 41Osugɛ bɛ kafa oruŋɛ ɛyɛrɔsɔ kɨri ɔkakpɔgɛ radu na rɔcɛ ɔrɔbɔ njɔm, 42ya, “Mintɛ, ara ɛragi wu, sɛ mi ekunɛ rasinkanɛ nji. Na nsɨm omia nɛ, yɔgɛ mbu atimanɛ botumɛ kanya.” 43Onyiɛ-rotuma Ɛbrɔkpabi osi na kaju ɔmɨlɛnɛ ɔjɛ mɔ kotigiri etima. 44Na etima ojuŋa, Jisɔs ɔrɔbɔ njɔm na etima na etima; keyiga nci kɛjaga mɔ kɛra aya bɔbana manji bu bɔtɨba na rɔcɛ.
45Ndi ɔgbɛ na kwa ɔra ɔrɔbɔ njɔm oruŋɛ na kwa banyɛgɛ mɔ bara, ɔkafɛ bɛ baraɛraɛ, ndi ɛkpaju ɛcɛrɛ bɛ, bawɔn na erun.
46Ɔkanɛ bɛ ya, “Bu na minraɛ? Gbɛ rɔbɔ nu njɔm na esikafa minka tɔ minjɛ eyumɛ.”
Babɨma Jisɔs
(Mt 26:47-56; Mk 14:43-50; Jn 18:3-11)
47Jisɔs ɔbɛnɛ ɔtanɛ ndi ɛrɨm bani bakpunɛ bawu, Judas ŋɔ ɔra na ogbigbɛ banyɛgɛ mɔ iti jubi na ifa mɔ ɔra bɛ ɛyɛrɔsɔ. Oruŋɛ kokugɛ #22:47 KokugɛJisɔs kama.#22:47 48Nsu Jisɔs ɔsɨna mɔ ya, “Judas, akwɛ Wɔ Oni na rekugɛ kama-ɛ?”
49Ndi banyɛgɛ Jisɔs mbɛ bara na amɔ bafɛ mbu bɔkɔjagi, basɨna ya, “Ita, reju na abɛ na bakaŋkaŋ boyua-ɛ?” 50Oni ŋɔnɛ na ogbigbɛ ɔbɛ ɔba, ogbura kotu koruma ori ɔkɨm-bakɨm bajɔmɔ-kɔya.
51Nsu Jisɔs otunɛ bɛ ya, “Ɛdɔ resi ndi rɛkɔgɔjagi!” Mɨnɛ ɔkpɨma kotu orumanɛ kaŋɔ ɔgbana mɔ.
52Jisɔs ɔsɨna bakɨm bajɔmɔ-kɔya, bani-retu bababɛrɛ Ɛtɔ-Ɛbrɔkpabi na banintɨma, mbɛ bawu kɔbɨm mɔ ya, ‘Ami nra osi bobi-ɛ ndi minra ŋuɛ na bakaŋkaŋ na mankpun kɔbɨm mi-ɛ? 53Nra na anu na ɛtɔ-Ɛbrɔkpabi reyi nandinɛ, minkiju kɔbɨm mi. Nsu nfa na kegbu kenua nci keru kɛfɔnɔ nsɨm.’’
Pita ɔkɨna Jisɔs
(Mt 26:57,58,69-75; Mk 14:53,54,66-72; Jn 18:12-18,25-27)
54Babɨma Jisɔs, babɛ mɔ baruŋɛ na ɛtɔ ɔkɨm-bakɨm bajɔmɔ-kɔya; mɨnɛ Pita ɔnyɛgɛ bɛ nyaŋɛnyaŋɛ. 55Bani bajuju bakɔrɛ roku manti keyuga, mɨnɛ batum bafɛrɛ du. Pita otum kafa na abɛ. 56Ndi wɔ ɔwanɛ ŋɔnɛ ŋɔ osiŋɛ rɛsɛ kafa ɔfɛ Pita ketu ɔbɔŋɛ roku, ɔrɔ mɔ sii, ɔkanɛ ya, “Oni ŋɔ ɔra na Jisɔs!”
57Pita ɔtaŋa, ya, “Ɔwanɛ, nkigbɨra mɔ!”
58Egbigbɨra kegbu oni ojuju ɔfɛ Pita mɨnɛ ɔkanɛ ya, “Awu mɨnɛ ara na abɛ!” Nsu Pita ɔfɛlɛ mɔ ramu ya, “Ayi, ami na abɛ nra!”
59Kegbu kekifɨranɛ oni ojuju ɔjaga ɔnyakanɛ remu, “Kpikpɛ orumanɛ ŋɔ ɔra na Jisɔs, ndi amɔ mɨnɛ osi Galili!”
60Nsu Pita ɔfɛlɛ ramu ya, “Ayi, nkigbɨra mbu atanɛ.” Ɔmɛ-kandi, ndi ɔbɛnɛ ɔtanɛ, oruma-kɔgi okuga. 61Ɔkɔ-rokuku ocimɛnɛ ɔrɔ Pita. Mɨnɛ Pita ojinɛnɛ ramu ndɛ Ɔkɔ-rokuku ɔkanɛ mɔ: “Nabɔ oruma-kɔgi okuga ɛrɛn kuakɨna mi begbu bɛtaa ya akigbɨra mi.” 62Pita ɔjaga na rofia ɔkabi bayig.
Basɔŋɔ Jisɔs mɨnɛ badu mɔ
(Mt 26:67,68; Mk 14:65)
63Bani mbɛ bababɛrɛ Jisɔs basɔŋɔ mɨnɛ balɨbkanɛ mɔ. 64Babɔbɔ mɔ kɛkpa ɛfɔ na rɔsɔ mɨnɛ basɨna mɔ, “Yɛnɛ mɔ ɔlɨba wu? Kpɔbɔ!” 65Mɨnɛ batanɛ birɛ rɛsɛgɛlɛ bejuju ecii bajɛ mɔ.
Babarɛ Jisɔs na rɔsɔ bakɨm
(Mt 26:59-66; Mk 14:55-64; Jn 18:19-24)
66Ndi reyi rɛcɛ, ogbigbɛ banintɨma, bakɨm bajɔmɔ-kɔya na bakpɛbɛ Ibina Mosis bakɨmanɛ, babɛ Jisɔs babarɛ na rɔsɔ rɔbɛ.
67Basɨna Jisɔs ya, “Kanɛ yu, awu mɔ ara Ɔnyaŋɛ-rokuku-ɛ?” Jisɔs ɔfɛlɛ bɛ ramu ya, “Ara nkanɛ nu, minyiɛ. 68Mɨnɛ ara nsɨn nu rɛsɨn, minfɛlɛ mi ramu. 69Nsu bɨnɛ kunku taŋɛ rɔsɔ, Wɔ Oni kuotumɛ na koruma Ɛbrɔkpabi nji ɛfa ecia.”
70Abɛ fɛb basɨna mɔ ya, “Awu, yɛ, mɔ ara Wɔ Ɛbrɔkpabi-ɛ?” Jisɔs ɔfɛlɛ bɛ ramu ya, “Anu bɛ minkanɛ ya ami mɔ nra Wɔ Ɛbrɔkpabi.”
71Mɨnɛ bakanɛ ya, “Rekikɔdugi bani bajuju bawu kanɛ yu ratanɛ babaŋa mɔ! Ayu bakikɔ refugɛ na kama kamɔ!”
હાલમાં પસંદ કરેલ:
Luk 22: Olulumo-Ikom
Highlight
શેર કરો
નકલ કરો
Want to have your highlights saved across all your devices? Sign up or sign in
©️2022 Luke Initiative for Scripture Translation
