Luk 13
13
Sugɛ nu bobi bonua ara kanyanɛ kumimba
1Kegbu kanci, bani bajuju barakafa mbɛ bakanɛ Jisɔs mbu bɔjaga na bani Galili bajuju mbɛ Pailɛd ɔjɛ nsɨm ya baŋua. Baŋua bɛ ndi bara basiŋɛ kefin bajɛ Ɛbrɔkpabi. 2Jisɔs ɔfɛlɛ bɛ ramu ya, “Ndi baŋua bani Galili kambɛ na ɛyɔ kanji, na ɛjaga ya bani kambɛ basi bobi bacia bani Galili mbɛka fɛb-ɛ? 3Kanya nɛ! Mɨnɛ nkanɛ nu mɔ ara minkisugɛ bobi bonua, anu fɛb kumimba kɛmanci baba. 4Bani kambɛ iti rokura na itaa mbɛ baba ndi ekikɔbi ɛtɔ ɛnyakanɛ bɛ na Sailom. Na ɛjaga ya bakuba bacia bani mbɛka fɛb na Jɛrusalɛm-ɛ? 5Kanya nɛ! Mɨnɛ nkanɛ nu mɔ ara minkisugɛ kosi bobi, anu fɛb kumimba kɛmanci baba.”
Rɛkana rɛbaŋa keti nci bajiŋɛ ya fig
6Jisɔs otuba yɛ rɛkana ndi ɔjɛ bɛ: “Kegbu cinɛ ɛfɔnɔ oni ŋɔ keti nci bajiŋɛ ya fig kɛtɨma na kɛkana kɛmɔ. Reyi dinɛ oruŋɛ ɔkadugi raduna kɔfa nsu tumdinɛ okifɛ. 7Ɔkanɛ oni ŋɔ ɔbabɛrɛ mɔ kɛkana ya, ‘‘Esi ju ritaa ŋuɛ ndugi raduna keti nci, nkigifɛ tum dinɛ. Gbɛgɛ ci tuba! Bu na kɛbari nfa kekubɛ rɔcɛ?”
8Nsu ɔbabɛrɛ kɛkana ya, ‘‘Ita, sugɛ ci ju dunɛ kwɛ, kuntɔ rɔcɛ nfɛrɛ ci nrɔbɔ rika ndi riyiba birɛ. 9Ara keŋugi raduna ju rojuju, eyibi! Ara kekiŋuga, agbɛgɛ ci yɛ atuba.”
Jisɔs ɔgbana ɔwanɛ ŋɔ ɔra mbɨni reyi Sabad
10Reyi Sabad dinɛ, Jisɔs ɔra ɔkpɛbɛ na ɔsam-rɔrɛ, 11ɔwanɛ ŋɔnɛ ɔra kafa ŋɔ kɛkɔ-kebi kewu bɨni ju rokura na ritaa. Ɔmɛnɛnɛ ta edun ɛjagi mɔ ɔbɔyɛ ɔnabɛnɛ kɔŋ. 12Ndi Jisɔs ɔfɛ mɔ, ojia mɔ na rɔsɔ bani ɔkanɛ mɔ ya, ‘‘Ɔwanɛ, ɛkpaju etigiri wu.” 13Origɛ mɔ ibɔ, ɔmɛ kandi ɔnabɛnɛ mɨnɛ ɔka Ɛbrɔkpabi.
14Oni retu ɔsam-rɔrɛ ɔma etima ndi Jisɔs ɔgbana oni reyi Sabad. Ɔkanɛ bani ya, “Rɛfɨn nandinɛ rɛfɔnɔ rayi ratabarataa ndɛ resiŋɛ rɛsɛ. Ŋuɛ nu na rayi kandɛ bagbana nu, reyi Sabad nɛ.”
15Ɔkɔ-rokuku ɔfɛlɛ mɔ ramu ya, “Basiŋɛ-bobi! Oni ɔranka nfa ŋɔ ɔbɔ ɔŋaɛ eti ɛmɔ nji ɛsɔgɛ rasua na ɛfɔm reyi Sabad ɔkajɛ bu mani-ɛ? 16Kunku nfa ɔwanɛ ŋɔ osi na kɛtɨbi Abraham ŋɔ sɔtan owu sinkanɛ ju rokura na ritaa; bakasɛ mɔ na rasinkanɛ kandɛ reyi Sabad-ɛ?”
17Rɛfɛlɛ ramu ramɔ resi bani ɛban bamɔ gbobi, nsu bani mbɛnka bakana na kɔrɔmetima na birɛ kɔba ɛkpaju mbi osiŋɛ.
Rɛkana egbigbɨra emu reŋuga keti
(Mt 13:31-32; Mk 4:30-32)
18Jisɔs ɔsɨna ya, “Rɔrɛ-rɛkɨm Ɛbrɔkpabi rɔra aya bagagba? Nyumɛ du na bu? 19Rɔra aya oni ɔbɛ egbigbɨra emu reŋuga keti ɔkaba na kɛkana kɛmɔ. Ɛtɨma ɛra rɛtɨna keti, mɨnɛ mininɔɔn minri bɔtɔ na mimbibɔ.”
Rɛkana ratɔ ɔyɔ
(Mt 13:33)
20Jisɔs ɔsɨna mɨnɛ okuɛ ya, “Nyumɛ rɔrɛ-rɛkɨm Ɛbrɔkpabi na bu-e? 21Rɔra aya ara ɔwanɛ ɔbɛ ratɔ ɔyɔ ɔsɨmanɛ na igu nji bakɔgɔkɔgɔ banyɔgɔrɔ ta bɛsɨmanɛ lɛll bɛtɨna.”
Egbigbɨra okegere
(Mt 7:3-4; 7:21-23)
22Ndi Jisɔs ɔra na ɛyɔ oruŋɛ ndu Jɛrusalɛm, ɔkpɛbɛ bani na irirɛ mɨnɛ na irɛ irɛnɛ. 23Oni ɔsɨna mɔ ya, “Ita, egbigbɨra bani bɛ bakɔsɔri-ɛ?”
Jisɔs ɔfɛlɛ ramu ya, 24“Si gbanambunɛ mbu bɔyɔmɛ bɔjɛ ya asi koci na egbigbɨra okegere anɔ! Ndi bani ecii kubaju kɔnɔ, nsu bayɛŋɛ. 25Ara ɔkɔɛtɔ ɔgbɛ ofin rɛma; akosu kɛbari na rofia. Alɨba okegere atanɛ ya,
‘‘Ita, yirɛ yu rɛma!” Ɔkɔfɛlɛ nu ramu ya, ‘‘Nkigbɨra ndu minsi miŋuɛ!’’
26Minkɔbɨnɛ yɛ kɔtanɛ ya, ‘Redi mɨnɛ rɛŋɔ na awu; mɨnɛ akpɛbɛ na rɔrɛ royua!’
27Nsu ɔkɔkanɛ okwɛ ya, ‘Nkigbɨra ndu minsi miŋuɛ. Jaga mi nu na rɔsɔ, bani babi!’’
28Minkobi mɨnɛ mindi rasa ndi minkɔfɛ Abraham, Aisik, Jekɔb mɨnɛ na bakanɛ-rotuma Ɛbrɔkpabi fɛb na Rɔrɛ-rɛkɨm Ɛbrɔkpabi, nsu anu batuba na rofia. 29Bani kubasi kwa nancɛnɛ, batumɛ na Rɔrɛ-rɛkɨm Ɛbrɔkpabi kɔkan kɛtɔmɔ. 30Kafa bani mbɛ bara babɛ rɔsɔ kunku kubatiganɛ irɨma mɨnɛ mbɛ batiganɛ irɨma kunku kubabɛrɔsɔ.”
Rɔraganɛ Jisɔs na Jɛrusalɛm
(Mt 23:37-39)
31Ɛdɔ kegbu kanci Bafarisi bajuju bakɨmanɛ Jisɔs bakanɛ mɔ ya, “Akɔkɔjagi nfa aruŋɛ mbari ojuju, ndi Hɛrɔd oduga koŋu wu.”
32Jisɔs ɔfɛlɛ bɛ ramu ya, “Taŋɛ kakanɛ ɛgba-kɛtɨma kanji ya: “Nkpuŋɛ bɔkɔ-bobi mɨnɛ ŋbana bani ɛrɛn na refu, na rayi rataa kunyɛ na rɛsɛ remia.” 33Nsu nra na ɛyɔ emia ɛrɛn, refu, mɨnɛ na ɔnyakanɛ reyi. Ekitumɛ brikagba ya baŋua ɔkanɛ-rotuma Ɛbrɔkpabi kwa kajuju ekicia na Jɛrusalɛm.
34“Jɛrusalɛm, Jɛrusalɛm! Aŋua bakanɛ-rotuma Ɛbrɔkpabi, mintuba banyiɛ-rotuma mbɛ Ɛbrɔkpabi etigɛ ɛjɛ nu rata! Begbu bɛmɛn mbi nduga mɔ nrigɛ nu kɔbɔ, kɛmanci ɔma kɔgi ofigɛ bɔ bamɔ na bɔkpagantuŋ bɔmɔ, nsu minkiduga! 35Yumɛ nu ratu na mbu bɔkɔjagi: Ɛbrɔkpabi kuɛkɨna rɔrɛ ronua. Nkanɛ nu kpikpɛ mɔ mimbɔfɛ mi ta kegbu kewu nci minkɔkanɛ ya, ‘Ɛbrɔkpabi jɛ mɔ reŋunɛ ŋɔ owu na rirɨna Ɔkɔ-Rokuku.’ ”
હાલમાં પસંદ કરેલ:
Luk 13: Olulumo-Ikom
Highlight
શેર કરો
નકલ કરો
Want to have your highlights saved across all your devices? Sign up or sign in
©️2022 Luke Initiative for Scripture Translation
