Lucas 2

Jesús yurinqan

Mateo 1.18-25

1Tsë witsanmi Augusto César willakatsëqan mandakunqan nacionkunaćhö llapan runakuna censakuyänanpaq. 2Tsë punta kaq censakï witsanqa Cirenio shutiyoq runam Siria provinciaćhö mandakoq këkäqan. 3Llapan runakunam unë castankunapa markankunaman ëwayäqan shutinkunata apuntatseq.

4Unë castan rey David Belénćhö yurishqa kaptinmi Josépis Galilea provincia Nazaretpik Judea provincia Belénman censakoq ëwäqan. 5Warmin kananpaq parlashqaña karninmi Maríatapis censakoq pushäqan. Tsë diaskuna Maríapaqa killan paqtashqañam këkäqan waćhakunanpaq. 6Belénćhö këkäyaptinñam Maríapa höranña kaptin dolornin tsariskëqan. 7Tsëćhöñam qećhpa kaq wawanta waćhaköqan. Qorpakuna patsäkuyänan cuartu untaña kaptinmi inćhanawan piturkurñam animalkuna mikukuyänan kaqman puñïkatsëqan.#2.7 Tsë witsan wasikuna ishkë cuartuyoqllam käqan. Uk cuartum käqan qorpakuna patsäkuyänanpaq y uk cuartuñam käqan wasiyoqkuna castankunawan puñuyänanpaq. Tsë wasiyoqpa cuartun kućhunćhömi animalkuna mikukuyänanpis käqan. Tsëmanmi ñïñu Jesústa puñïkatsëqan.

Ïsha täpaqkunata angelkuna yuripuyanqan

8Tsë paqasmi Belén markapa ñöpan ñiraqćhö mitsikoqkuna ïshankunata täpëkäyäqan. 9Tsëman Teyta Diospa angelnin yuripuskiptinmi chipipikyarraq ankat atsikyaskëqan. Tsëta rikëkurmi ïsha täpaqkunaqa alläpa mantsakäyäqan. 10Angelñam ñëqan: “Ama mantsakäyëtsu. Qamkunapaq alli willakïtam apamö. Tsëta wiyarmi llapan runakuna kushikuyanqa. 11Kananmi rey Davidpa markanćhö salvayäshoqniki yurishqa. Pëqa Teytantsik Cristum. 12Kë willayanqaq rasun kanqanta musyayänëkipaq kanan ëwarmi llullu wamrata tariyanki animalkuna puñukuyänanćhö inćhashqa usurëkaqta”.

13Ángel tsënö ñiykaptinmi atska angelkuna yuriskirña Teyta Diosta alabarnin ñiyäqan:

14“¡Ciëlućhö kaqkuna Teyta Diosta alabëkuyätsun!

¡Kë patsaćhöpis Teyta Dios kuyanqan kaqkuna alli kawëćhö katsun!” ñir.

15Angelkuna ciëluman kutiskiyaptinñam mitsikoqkuna uknin ukninpis ñinakuyäqan: “Teyta Dios willatsimanqantsiknö aku ëwashun Belénman ëwar rikämushun”.

16Tsënö ñir saslla ëwarmi Joséta, Maríata y llulluntapis tariyäqan. Wamraqam animalkuna mikukuyänanćhö usurëkäqan. 17Tsënö rikëkurñam willakuyäqan ángel yuripuskir llullupaq willanqankunata. 18Willakuyaptinmi llapan wiyaqkuna kushikuyäqan. 19Maríaqa tsëkuna päsanqankunata shonqullanćhömi yarparäqan. 20Mitsikoqkuna ángel willanqannölla llapanta tariskirmi rikäyanqanpik y wiyayanqanpik Teyta Diosta alabarnin kutikuyäqan.

Jesústa templuman apayanqan

21Wamra semänayoq këkaptinñam pishqunćhö señalatsiyäqan. María manaraq qeshyaq kaptin ángel yuripur ñinqannöllam shutin ćhurayäqon Jesús.

22Moisés qellqanqan ley ñinqannö María waćhakunqanpik purificäkunan unaq ćhëkuptinñam#Levítico 12.2-8. Joséwan María Jerusalén templuman llulluta apayäqan Teyta Diospa munëninman entregayänanpaq. 23Tsënö apayänanpaqmi Teyta Diospa leynin qellqaranqanćhö ñiykan: “Qećhpa kaq ollqu tsurikeqa Teyta Diospam kanqa” ñir.#Éxodo 13.2, 12-13; Números 3.11-13, 45-47; 18.15-16. 24Tsënöllam Diospa leynin qellqaranqanćhö ñiykan: “Ishkë kullkullta o ishkë llullu palumakunata apamunqa” ñir.#Levítico 12.8. Tsë ñinqantapis cumpliyänanpaqmi templuman ëwayäqan.

25Tsë witsankunam Jerusalénćhö Simeón shutiyoq runa täköqan. Pëqa alli ruraq karmi Teyta Diosta alabar kawäqan. Tsënöllam Espïritu Santupa munëninćhö kawaq. Pë shuyäköqan Israel runakuna ñakayanqanpik salvakoq shamur orqunanpaq kaqtam. 26Uk unaqñam Espïritu Santu musyatsëqan Teyta Dios kaćhamunqan Cristuta rikëkurraq wañukunanpaq kaqta. 27Tsë unaqmi Espïritu Santu pushaptin templuman Simeón ëwäqan. Tsëmanñam Maríawan José ley ñinqankunata cumpliyänanpaq Jesústa ćhätsiyäqan. 28Simeónñam llulluta marqarkur Teyta Diosta alabar ñëqan:

29“Teyta Diosnë, ñimanqëkita cumpliskinkiñam.

Kananqam kushishqaña wañukushaq.

30Kaćhamunqëki salvakoqta rikaskëñam.

31Pëta kaćhamunqëkitam mëćhö tsëćhöpis täkoq runakuna musyayanqa.

32Mana Israel runakunapaqpis aktsinö kaptinmi entiendiyanqa salvanëkipaq kaqta.

Pë rëkum kuyanqëki Israel runakunapis reqsishqa kayanqa”.

33Simeón tsënö ñinqankunata wiyarmi Joséwan María kushikuyäqan. 34Simeónñam Teyta Diosman mañaköqan pëkunata yanapëkunanpaq. Ñirkur Jesúspa maman Maríatañam ñëqan: “Kë wawëkitam Teyta Dios ćhuramushqa wakin Israel masintsikkunata salvananpaq y wakintaña juzgananpaq. Pëtaqa atskaq runakunam ćhikiyanqa. 35Tsënöpam runakuna allita o mana allita yarpäyanqanpis musyakanqa. Tsëkuna päsaptinmi qampa shonqïki espädawan tuksikaqnöraq llakikïwan nananqa” ñir.

36Templu patiućhömi këkäqan Teyta Diospa profëtan Ana shutiyoq ćhakwaspis. Pëpa teytanmi Aser trïbupik Fanuel käqan. Shipashlla casarakunqanpikmi qanćhis (7) watallatam qosan wañöqan. 37Tsëmi viüdalla kaköqan pusaq ćhunka ćhusku (84) wata. Templu patiupik mana yarqïpam paqasta unaqta Teyta Diosta adorar täköqan. Tsënöpis ayunarmi Teyta Diosman mañakoq. 38Simeón mañakur ushaskiptinmi Anapis llullu Jesúsman witiykur Teyta Diosta agradëciköqan. Ñirkurñam Teyta Dios kaćhamunqan Cristuta shuyarëkaq runakunata ñëqan: “Kë llullum shuyanqantsik salvakoq” ñir.

39Teyta Dios leyninćhö mandakunqankunata templućhö cumpliskirñam Joséwan María Galilea provincia Nazaret markanman kutikuyäqan. 40Teyta Dios yanapaptinmi wiñar Jesúsqa alläpa yaćhaqña y kallpayoqña tikräqan.

Templućhö Jesústa tarinqan

41Cada watam Jesúspa papäninwan maman Jerusalénman ëwayaq Pascua fiestata päsaq. 42Jesús ćhunka ishkë (12) watayoqña këkaptinmi pëwanpis tsë fiestaman ëwayäqan Israel runakunapa costumbrinkunaman. 43Fiesta ushëñam Joséwan María markankunapa kutikuyäqan. Jerusalénćhö Jesús qepanqanta manam cuentata qokuyäñaqtsu. 44Pëkunaqa wakin runakunawan Jesús ëwëkanqanta yarparmi qoyatña ëwëkäyanqantaraq watukaskir ashiyäqan. Castankunata reqsinakunqankunata tapupakurpis manam tariyäqantsu. 45Manaña tarirmi Jerusalénman asheqnin kutiyäqan.

46Ćhäyanqanpik warantinraqmi Jesústa tariyäqan templućhö yaćhaq runakunapa ćhöpinkunaćhö tapurninkuna uchurëkaqta. 47Tsëćhömi wiyaqkunapis kushikuyäqan tsë runakunawan allish yaćhaq këninwan parlapänakuyanqanpik. 48Tsëćhö tariykurñam mamankuna alläpa kushikuyäqan. Mamanñam ñëqan: “Ö wamrä, ¿imanartan këćhö qepäköqonki? Ñoqakuna alläpa llakirnikim ashikuyäqoq”.

49Jesúsñam ñëqan: “Mamë, ¿imanartan ashiyämäqonki? ¿Manaku musyayanki Papänëpa wasinćhö kanäpaq kaqta?” 50Tsënö ñiptin pëkunaqa imapaq ñiykanqanta manam entiendiyäqantsu.

51Tsëpikñam pëkunawan Nazaretman Jesús kutiskir mandanqankunata ruräqan. Mamanqam llapan ima päsanqankunatapis shonqullanćhö yarparäqan. 52Wiñarëkar Jesús imëkapaq yarpëniyoq tikraptinmi Teyta Diospaq y runakunapaqpis alläpa alli käqan.

હાલમાં પસંદ કરેલ:

Lucas 2: qcgPB

Highlight

શેર કરો

નકલ કરો