João 21
21
Jesus Sete Rasruklene Hakanhayehixyawaka Piranapni
1Wane pnute Jesus hakanhayehitatnakna rasruklene Tiberíades powha tshinikowakaya. Wan-rixa hakanhaleta:
2Rapatjekanatna Simão Pedro; Tomé, walekatkani Dídimo tshinkaluru; Natanael, Caná poktshi Galileia tshijne hajeru; Zebedeu whenene; hiyrunu pimrine hepi hasruklune.
3Waneya Simão Pedro wla tshinna:
— Hita mariskatapanu.
Waneya wanna wla tshinru:
— Pixaymapwu. Waneya hyatkana. Kanawa hpokownatkana seyni wale yetshno, hi satukna hkachitna.
4Waneya yetshpotukawa rixinixka, Jesus hipowha wnaha hyopkaka seyni rasruklene hi himathetlu Jesus rixyawaka.
5Waneya Jesus wla tshinna:
— Maklujine, hi he chima hkachita?
Ruhitluna Jesus, wla htshinruna:
— Hike, hi satukna.
6Hiyáhoni wla htshinna:
— H-tarrafa-te kanawa potukle sretate hiknokanu waneya hikchikanro. Hiyáhoni ruknokatkaluna h-tarrafa-tna. Waneya hixo chima rixyawaka tshinanu, hi rumukata kosretluna h-tarrafa-tna.
7Waneya hasrukluru, Jesus hamotleru, wla htshinru Pedro tshinkaluru:
— Tsru Hixikatshriwatkani tujra!
Waneya Simão Pedro jeminixkalu Tsru Hixikatshriwa hapojyawaka hmakawatatka klu tshinanu mamkatukananni hmariskaxyawaka tshinanu. Waneya ruptekhamtlu hipowha.
8Pimrine hasrukkalune kanawa runyana hwanha nwaka. Hi howuk-potutkalu hwanha. Cem metros pchini hetko hya kosretluna tarrafa hixo chima yehi.
9Waneya hiwnaha rapojinixkana, wane rexyaluna tshitshipawa wane twatka chima jimluro hiyrunu pão koxa.
10Waneya Jesus wla tshinna:
— Pimro chima hkachrero hanikanu wkata.
11Waneya Simão Pedro pokownatka. Waneya tarrafa hixo chima tsrokakalo hwaleru hkoseta hiwnaha. Chimane cento e cinquenta e três pejnu. Katseplu chima wanepnawaka hi ruskata tarrafa.
12Waneya Jesus wla tshinna:
— Hinanu, hnikanu.
Hiyrunu hi satukna hasrukkaluru haluk-hepomhaletlu Jesus, katni wale. Klu tshinanu rimathetluna Tsru Hixikatshriwa Jesus rixyawaka.
13Waneya Jesus pão hkochtsheka waneya wanna rapiklu. Waneko pixka rixlo chim-koxa.
14Jesus hipuktshi riwejinritka wkatanu, map-kata rasruklene yehi ruphujewniyatka xawakniymakananuko.
Jesus Hepomhiywaklu Pedro Piranapni
15Waneya rali niklexinixkana, Jesus wla tshinru Simão Pedro:
— Simão, Jonas whene, puchinikanretnohe hita nyi pimrine pnute?
Waneya Pedro wla tshinru:
— Hehe Tsru Hixikatshriwa, pimatlu nuchinijyawakyi.
Waneya Jesus wla tshinru:
— Pohlutanna noprane carneiro whenene pixkalune.
16Waneya rimepe wane tshinretatnaka:
— Simão, Jonas whene, puchiniknohe hita?
Waneya Pedro wla tshinru:
— Hehe Tsru Hixikatshriwa, pimatlu nuchinijyawakyi.
Waneya Jesus wla tshinru:
— Puslahanna noprane carneiro-ne pixkalune.
17Waneya map-kata rixinri wla htshinru:
— Simão, Jonas whene, puchiniknohe hita?
Seyni Pedro wamonuwata klu tshinanu map-kata wla htshinru: “Puchiniknohe?” Hiyáhoni wla htshinru:
— Nutsrukate ptowru potuko pimata, pimatlu nuchinikyi.
Waneya Jesus wla tshinru:
— Pohlutanna noprane carneiro-ne pixkalune.
18Halikaka, halikaka wla ntshinyi: Makluji pixakanaxini palpokoxnawa, hanuktako paluka yaletatka wane pyatka. Seyni tsrutsoleji pixinpatka pkanrakanu. Satu tsatanyi, pmaluka yalexyawakanu ranikanyi.
19Wane htshina, rimaxyawakaplu han-hixatshri hipuktshi retanu Pedro hiyrunu Hoyakalu ruphujexyawakapa. Waneya rali wan-tshinretatka Jesus, wla htshinru:
— Pomkahitanno hita.
20Waneya Pedro hiprotakatka, retlu Jesus hasrukleru ramotleru potuko hapakamnu. Xyekni Jesus sta hinaple hikoluhakaynokanatatshri hnikakanaxinna mitshi wla tshinakanatatshri mitshi:
— Tsru Hixikatshriwa Jesus kathe hekhitanyi?
21Waneya Pedro rexiniklunru wla htshinru Jesus:
— Tsru Hixikatshriwa Jesus, ha xye jeji, hanu hixatshripnihe?
22Seyni Jesus wla tshinru:
— Pomkahichatanno pixa. Seyni nalujiniplu riwejyawaka xye haté nsatojinipa kluhe rixyi?
23Wale tshinanu xye pirana hipalatatka Jesus halixatshine yehiya, xye Jesus hasrukleru hima hi hipnanu. Seyni Jesus-mka hi wan-tshinru hma mupniywakanupa seyni wla htshinru: Nalujiniplu riwejyawaka haté nsatojinipa, kluhe rixyi?
João Hiphujexyawaklu Piranapni
24Xye honukla hasrukkaluru xyekaka pirana hiphujetatshrini hiyrunu xyekaka pirana yonatatshri. Wimatlu halikakni ruphujtaleru pirana.
25Hiyrun-koxa hi heppiklu pimri Jesus kamhaleru. Seyni ptowru piranako yonatkomka hitaho hi hetkomka xye tshijneko poyahotanro papel steno ptowruka Jesus kamhaleru pirana yonatkomka.
હાલમાં પસંદ કરેલ:
João 21: mpdBiblia
Highlight
શેર કરો
નકલ કરો
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
