João 19
19
1Hiyáhoni Pilatos haniklu Jesus waneya hkotshipjejixatkalu.
2Waneya soldado-ne kawchiriplu hsaxpatna sahyi hkamhiywakapna waneya Jesus jiwu rutakatkaluna. Waneya mkatshri sama serolu hmakatluna Jesus.
3Hiyrunu walestsi rapokjejetna, wla htshina halikletluna:
— Hali judeu-ne Tsru Hixikatshriwate!
Waneya rumpakhojitluna Jesus.
4Hiyrunuko ruchpakatka Pilatos waneya wla htshinatkana judeu-ne:
— Hetanu! Jesus nanikanwakathi himaxyawakapa hi psojikna hikolukanuwnalu nukchijyalu xye jeji.
5Waneya Jesus himuchpakkatka serolu mkatshri hitakamtatshri hiyrunu kawchiri sahyetamtatshritka, Pilatos wla tshinna:
— Xyetkani jeji!
6Waneya tsru hixikatshinwa sacerdote-ne hiyrunu soldado-ne hajeyna retawaluna Jesus, hyinuwaka saplewletna, wla htshinna:
— Cruz puylaxinri! Cruz puylaxinri!
Seyni Pilatos wan-tshinna:
— Hixako hanikanru, cruz hiylaxinri! Klu tshinanu hitaho hike hikolukanuwnalu nukchijyalu xye jeji.
7Waneya judeu-nerune hipokananu wla tshinru:
— Hixanu yonreru pirana tshinanu rujha hipnaleta klu tshinanu wale wan-tshina, Hoyakalu potuko hima ruruta.
8Waneya xye hjeminixka Pilatos, pnute hpikatka.
9Hiyáhoni hjihlokatnaklu hipjiru. Waneya repomhalu Jesus:
— Hanhe puchpajya?
Seyni Jesus hike tshina.
10Waneya Pilatos wla tshinru:
— Haklu tshinanhe hi piynumsatno? Hi he pimata hita himukata towutletlu cruz pupniywakapa ho puchoxikowakapa?
11Seyni Jesus hihitlu, wla htshina:
— Hike ptowuta pixa hita tshinanu Hoyakalu menekkanuklunyi. Wale tshinanu hita nsamyokjeru pixa pnute hektuwatatka.
12Hiyáhoni waneklukananuko Pilatos haluk-hicholetmaklu Jesus seyni judeu-ne saplewata, wla htshinruna:
— Xye jeji puchoxinipa, hi César himatletlerupatkayi klu tshinanu katukta pohirtshi tshinnawa hkamnitlu César.
13Wale hjemini Pilatos, maleka raniklu Jesus. Hikolukanuwnayehjexikowaka htuplata “Sotlumta tshinikowaka”, (waleni “Gabatá” judeu tokanuya).
14Hiyáhoni Páscoa hohne halpokotkaluru hohnestsitkani, hanikaj-hohnestsitkani. Waneya Pilatos wan-tshinna judeu-ne:
— Haha xyetkani hpohire.
15Seyni judeu-ne wan-tshin-sapleta:
— Puylatanru, puylatanru. Cruz putakanru.
Waneya Pilatos wla tshin-hepomhaletna:
— Hpohirrahe cruz nutakanu?
Waneya tsru hixikatshinwa sacerdote-ne wla tshinru:
— César-pkani wpohire.
16Hiyáhoni renekatkana Jesus cruz rupniywakpatka.
Cruz Rupniywaka Jesus Piranapni
17Waneya soldado-ne hanikatkalu Jesus. Waneya cruz rutjitatka Jesus, hyatka, Calvário tshinikowaka, wale tokantshi yokakkaluru, yineru jiwuta pixkalutu yehi, hya.
18Wane cruz rutajyaluna hiyrunu hepi yine. Satkaka pa sreta hwa. Jesus hanikaji hwa.
19Pilatos yonakjixlu hjihyehixikolu pirana tábua hoho, rutakakjixlu cruz-stsipto. Wane htshin-yonhata: “Jesus, Nazaré hajeru, judeu-ne pohire”.
20Hiyáhoni hixo judeu-ne het-yonhatlu xye pirana klu tshinanu cruz rutajikowaka Jesus hi howukaylu tsru poktshi. Hiyrun-koxa mapa nru hyonaxika, judeu tokanu, latim tokanu hiyrunu grego tokanu.
21Waneya tsru hixikatshinwa sacerdote-ne wan-tshinmaklu Pilatos:
— Hi wane ptshin-yonhakakanru: “Judeu-ne pohire rixyawaka”, seyni wla ptshina yonretanru waleko htshinyawaka pixka: “Hitni judeu-ne pohirno”.
22Seyni Pilatos wla tshina:
— Nyonakjixlerutka hyonatkatka.
Soldado-ne Hiknojyawaka Jesus Mkalu Hkayaxyawakna Piranapni
23Waneya soldado-ne cruz rutakatkaluna Jesus, ranikatkaluna himkalu. Quatro hkaniprexyatkaluna satkaka soldado-ne. Satu himkalu myotsletu hixeta. Teno ruyak-saxpalexika haté tshiji sreta.
24Waneya wannakakluko wla tshina:
— Hi wsuskakanru seyni hiknokkaluru wuknokanu wimaxyawakapa katu kayatanru Jesus-ni mkalu.
Wan-rixa hpoyahokajyawakaplu Hoyakalu tokanu mitshikawluru yonatkaluru tshinyawaka, wla tshinatshri: “Nomkalu hkanipretna wannakakluko, hiknoklu rikamhaluna rimaxyawakapna katu kayatanru nomkalu.”
Hiyáhoni wan-rixatkana soldado-ne.
25Cruz-stsi hyopkakna Jesus hinro, nato htshinrero, Maria, Clopas tshinkaluru hnunro hiyrunu Maria Madalena.
26Waneya Jesus hexinro runro hiyrunu rasrukleru ramotleru runrostsi hwakanatatshri, wla htshinro runro:
— Suxo, klalutkani pituru.
27Wane pnute wla htshinru rasrukleru:
— Klalotkani punro.
Waneklukawa rasrukleru hanikatkalo waleyma twiywakpatka.
Jesus Hipnale Piranapni
28Wane pnute, rimaxinixka Jesus ptowruka rali kamhalexinixka hiyrun-koxa hpoyahokajyawakaplu Hoyakalu tokanu mitshikawluru yonatkaluru, Jesus wla tshina:
— Honunnahno.
29Wanekananro pa stonha vinagre-ha. Hiyáhoni wanna kamkolu ruhakluna vinagre-ha. Hissopo tshinkalurujestsipto rutakluna waneya Jesus nama rutakluna.
30Waneya rurinixkalo vinagre-ha Jesus, wla htshina:
— Ralixatka.
Waneya hyonohjiwutatka, rupnanatka renek-hiwekletatka.
Hyohlokwansataxikowaka Jesus Piranapni
31Sábado hohnepatkani wale prika. Tsru kahwakpiratkaluru hohnepatkani. Judeu-ne hi halukatkalu hipnatshinni mane cruz rutujyawakatka haté sábado hohne. Hiyáhoni judeu-ne hanjitlu Pilatos hitpali hapu ruknahjixyawakapa. Waneya hiknahatpalitkalunni mane hanikjixkatka.
32Hiyáhoni runna soldado-ne. Mitshikananu cruz hwatshri Jesus hinaple hwakanatatshri hitpali hapukaka ruknahna. Waneya Jesus pastate hwakanatatshrini koxa ruknajrotpalitna.
33Seyni Jesus nwaka rapojinixkana soldado-ne retluna rali hipnaletatka Jesus-ni. Hiyáhoni hi ruknahatpalitluna Jesus.
34Seyni satu soldado wane hwakanatatshri yohlokwansatatlu Jesus harpão-ya. Chinpotukawa hrahtshi hichpaka honhayma.
35(Xye hetatshri hinkaklewata. Halikaka htshina. Rimata halikakni htshinyawaka. Runkakletlu hix-koxa himukata halixlexyawakaplu tshinanu.)
36Xyekaka wan-hixatka Hoyakalu tokanu yonatkaluru tshinyawaka himukata poyahokaklexyawakapa. Wane htshina: “Hi satukna hihapu hiknahko.”
37Hiyrunuko wane htshinatnaka Hoyakalu tokanu mitshikawluru yonatkaluru: “Hyopukhatanruna hyohlolerna.”
Jesus Kapnaxikolu Piranapni
38Wane pnute José tshinkaluru, Arimateia hajeru, hanjitlu Pilatos Jesus-ni mane renejikowakapa. José Jesus hasrukler-koxni seyni yohimaxikatshriwani judeu-ne hamlenu tshinanu. Waneya Pilatos hitshitlu hiyáhoni runa ranijyawakaplu Jesus-ni mane.
39Waleymalu Nicodemos tshinkaluru, mitshikawa Jesus yehi hapkapyetshnotatshri. Nicodemos haniklu phamlu pahiru mirra tshinkaluru hiyrunu aloés tshinkaluru yapjetkaluro, quarenta e cinco kilos hetkolu.
40Waneya Jesus-ni mane hkochtshekna, mkatshri sama, linho sama, phamlu pahiru yapjetkaluroyma ruwtokluna. Wan-rixjetna judeu-ne hkapnaxikowakapa tshinanu.
41Cruz rutajikowakastsi rawa satu hitaklucha. Wane hitaklucha rawa satu jitopnatkaluru herotu hike mutajikowakanuwa.
42Judeu-ne halpokohnaputanru hohnestsi potuko rixyawaka tshinanutka hiyrun-koxa hejitotkolu wanestsiko hwatka, wan-rutakmanetanatkaluna Jesus-ni.
હાલમાં પસંદ કરેલ:
João 19: mpdBiblia
Highlight
શેર કરો
નકલ કરો
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
