يَحْيَى 4
4
عِيسَىٰ دَ وَتَ مَثٜىٰ دَغَ سَمَرِيَ
1أَنَانً سَيْ ڢَرِسِيَاوَا سُكَجِ لَابَرِ ثٜىٰوَ عِيسَىٰ يَنَ سَامُنْ أَلْمَجِرَيْ، يَنَ كُمَيِ مُسُ بَڢْتِسْمَ ڢِيٜىٰدَ يَحْيَى؞ 2عَمَّا دَيْ بَ عِيسَىٰ نٜىٰ دَ كَنْسَ يَكٜىٰيِنْ بَڢْتِسْمَرْ بَ، أَلْمَجِرَنْسَ نٜىٰ؞ 3دَ عِيسَىٰ يَسَامِ لَابَرِ غَمٜىٰدَ وَنَّنْ سَيْ يَبَرْ يَهُودِيَ، يَكُواْمَ غَلِيلِ؞
4يَذَمَ دُواْلٜىٰنٜىٰ عِيسَىٰ يَبِے تَثِكِنْ سَمَرِيَ؞ 5سَيْ يَذُواْ وَنِ غَرِ عَثِكِنْ سَمَرِيَ مَيْ سُونَ سَيْكَرْ؞ غَرِنْ يَنَ كُسَدَ يَنْكِنْ ڧَسَرْدَ يَعْڧُوبَ يَبَا طَنْسَ يُوسُڢَ تُنْدَا؞#ڢَارْ 33.19؛ يُواشْ 24.32 6أَوَنَّنْ وُرِے نٜىٰ رِجِيَرْ يَعْڧُوبَ تَكٜىٰ؞ دَ عِيسَىٰ يَغَجِ دَ تَڢِيَ، سَيْ يَذَوْنَ عَبَاكِنْ رِجِيَرْ؞ وَنَّنْ يَڢَرُ وَجٜىٰنْ ڟَكَرْ رَانَ نٜىٰ؞
7سَيْغَا وَتَ مَثٜىٰ یَرْ سَمَرِيَ تَذُواْ طِبَنْ ضُوَ؞ عِيسَىٰ يَثٜىٰ مَتَ «بَانِ ضُوَ إِنْ شَا؞» 8أَلْمَجِرَنْسَ كُوَ سُنْ شِغَ ثِكِنْ غَرِ دُواْمِنْ سَيٜىٰنْ عَبِنْثِ؞
9سَيْ مَثٜىٰنَّنْ بَسَمَرِيَ تَثٜىٰ وَ عِيسَىٰ «يَيَ كَيْ بَيَهُودٜىٰ ذَاكَ ضُواْڧٜىٰنِ ضُوً شَا، نِے دَ نَكٜىٰ مَثٜىٰ دَغَ سَمَرِيَ؟» غَمَا يَهُودَاوَا بَاسَ حَطَ عِدُواْ دَ سَمَارِيَاوَا؞#4.9 غَمَا يَهُودَاوَا بَاسَ حَطَ عِدُواْ دَ سَمَارِيَاوَا: وَنِ جُويِ نَوَطَنَّنْ كَلْمُواْمِنْ شِينٜىٰ «يَهُودَاوَا بَاسَ أَمْڢَانِ دَ ݣُوڢْ دَ ݣُونُواْنِنْ دَ سَمَارِيَاوَا سُكَيِ أَمْڢَانِ دَسُو؞»#عُزَيْرُ 4.1-5؛ نٜىٰهْ 4.1-2
10 عِيسَىٰ يَأَمْسَ مَتَ يَثٜىٰ «دَ كِنْ سَنْ ݣَوْتَرْ اللَّهْ دَ كُمَ وَنْدَ يَكٜىٰثٜىٰ مِكِ، ‹بَا نِے ضُوَ إِنْ شَا،› أَيْ دَ كِنْ ضُواْڧٜىٰشِ، شِيكُوَ ذَيْبَاكِ ضُوَ مَيْ بَادَ رَيْ؞»
11سَيْ مَثٜىٰنْ تَثٜىٰوَ عِيسَىٰ «مَيْغِرْمَ، أَيْ، بَاكَ دَ غُغَ، رِجِيَرْ كُوَ دَ ظُرْڢِ؞ تُواْ، عَ إِنَا نٜىٰ ذَاكَسَامِ وَنَّنْ ضُوَ مَيْ بَادَ رَيْ؟ 12كُواْ كَاڢِ عُبَنْمُ يَعْڧُوبَ نٜىٰ، وَنْدَ يَبَرْ مَنَ رِجِيَرْ، حَرْ شِ دَكَنْسَ دَ یَیَنْسَ دَ دَبُّواْبِنْسَ، سُكَشَا ضُوَ دَغَ ثِكِ؟»
13 عِيسَىٰ يَأَمْسَ يَثٜىٰ «دُكْ وَنْدَ يَشَا وَنَّنْ ضُوَ ذَيْسَاكٜىٰ جِنْ ڧِشِ؞ 14عَمَّا دُكْ وَنْدَ يَشَا ضُوً دَ ذَنْبَاشِ، بَذَيْ ڧَارَ جِنْ ڧِشِبَ حَرْ أَبَدَا؞ ضُوً دَ ذَنْبَاشِ ذَيْ ذَمَ مَسَ مَٻُٻُّغَرْ ضُوَ وَدَّ يَكٜىٰ ٻُلْٻُلُّواْوَ ذُوَاغَ رَيْ نَهَرْ أَبَدَا؞»
15سَيْ مَثٜىٰنْ تَثٜىٰمَسَ «مَيْغِرْمَ، كَبَانِ ضُوًنَنْ، دُوانْ كَدَ إِنْڧَارَ جِنْ ڧِشِ، دُواْمِنْ كَدَ كُمَ إِنْدِنْغَ ذُوَا نَنْ دُواْمِنْ طِبَنْ ضُوَ؞»
16سَيْ عِيسَىٰ يَثٜىٰ مَتَ «كِجٜىٰ كِكِرَا مِجِنْكِ كُظُواْنَنْ؞»
17سَيْ تَأَمْسَ تَثٜىٰ «أَيْ، بَانِدَ مِجِ؞»
عِيسَىٰ يَثٜىٰ مَتَ «كِنْ ڢَطِ غَسْكِيَ دَ كِكَثٜىٰ بَاكِدَ مِجِ؞ 18دُوانْ عَيْنِحِنْ غَسْكِيَرْ كُوَ شِينٜىٰ، كِنْ عَوْرِ مَظَا بِيَرْ، وَنْدَ كُكٜىٰ تَرٜىٰ يَنْذُ كُوَ بَمِجِنْكِ بَنٜىٰ؞»
19سَيْ مَثٜىٰنْ تَثٜىٰ وَ عِيسَىٰ «مَيْغِرْمَ، إِنَ غَنِ كَيْ أَنَّبِے نٜىٰ؞ 20كَاكَنِّنْمُ سُنْيِ وَ اللَّهْ سُجَّدَ عَبَبَّنْ تُدُنَّنْ؞ عَمَّا كُو يَهُودَاوَا كُنْثٜىٰ أَ عُرُوشَلِيمَ نٜىٰ يَا كَمَاتَ عَيِ وَ اللَّهْ سُجَّدَ؞»
21سَيْ عِيسَىٰ يَأَمْسَ مَتَ يَثٜىٰ «عُوَرْغِدَا، كِبَادَ غَسْكِيَ غَ أَبِنْدَ نَكٜىٰ ڢَطِ، غَمَا لُواْكَثِ يَنَ ذُوَا دَ مُتَنٜىٰ بَذَاسُيِ وَ عُبَا سُجَّدَ عَبَبَّنْ تُدُنَّنْ، كُواْ أَ عُرُوشَلِيمَ بَ؞ 22كُو مُتَنٜىٰنْ سَمَرِيَ كُنَيِ وَ أَبِنْدَ بَكُ سَنِبَ سُجَّدَ؞ عَمَّا مُو يَهُودَاوَا مُنْ سَنْ أَبِنْدَ مُكٜىٰيِوَ سُجَّدَ، غَمَا ثٜىٰتُواْ يَڢِتُواْ دَغَ يَهُودَاوَا نٜىٰ؞ 23عَمَّا لُواْكَثِ يَنَ ذُوَا، حَرْ مَا يَارِغَا يَاذُواْ دَ مَاسُ سُجَّدَ نَغَسْكِيَ ذَاسُيِ وَ عُبَا سُجَّدَ ثِكِنْ رُوحُ دَ كُمَ غَسْكِيَ، غَمَا عُبَا يَنَ نٜىٰمَنْ إِرِنْ وَطَنَّنْ نٜىٰ سُيِ مَسَ سُجَّدَ؞ 24اللَّهْ رُوحُ نٜىٰ، مَاسُ يِمَسَ سُجَّدَ كُمَ سَيْ سُيِ مَسَ سُجَّدَ ثِكِنْ رُوحُ دَ ثِكِنْ غَسْكِيَ كُمَ؞»
25سَيْ مَثٜىٰنْ تَثٜىٰ وَ عِيسَىٰ «نَا سَنِ أَلْمَسِيحُ وَنْدَ عَكٜىٰثٜىٰ دَشِ كِرِسْتِ يَنَ ذُوَا؞ عِدَنْ يَا ذُواْ ذَيْ بَيَّنَ مَنَ دُكَنْ كُواْمٜىٰ؞»
26 عِيسَىٰ يَثٜىٰ مَتَ «نِے مَيْ مَغَنَ دَكٜىٰ، نِينٜىٰشِ؞»
27سُنَ غَمَ مَغَنَ كٜىٰنَنْ سَيْغَا أَلْمَجِرَنْسَ سُكَ دَاوُاْ، سُكَ كُوَيِ مَامَاكِنْ غَنِنْ يَنَ مَغَنَ دَ مَثٜىٰ؞ عَمَّا بَابُوَنْدَ يَثٜىٰ مَتَ «مٜىٰكِكٜىٰ بُڧَاتَ؟» كُواْ كُمَ يَتَمْبَيٜىٰشِ «مٜىٰيَسَا كَكٜىٰ مَغَنَ دَ عِتَ؟»
28سَيْ مَثٜىٰنَّنْ تَبَرْ تُلُنْتَ أَوُرِنْ تَجٜىٰ ثِكِنْ غَرِ تَثٜىٰ وَمُتَنٜىٰ، 29«كُذُواْ، كُغَ مُتُمِنْدَ يَغَيَ مِنِ دُكْ أَبِنْدَ نَتَٻَ يِ! كُواْ يَيِوُ وَنَّنْ شِينٜىٰ أَلْمَسِيحُنْ؟» 30سَيْ مُتَنٜىٰ سُكَ ڢِڢِّتُواْ دَغَ ثِكِنْ غَرِ سُكَذُواْ وُرِنْ عِيسَىٰ؞
31أَنَ ثِكِنْ وَنَّنْ كٜىٰنَنْ، سَيْ أَلْمَجِرَنْ عِيسَىٰ سُكَ ضُواْڧٜىٰشِ سُكَثٜىٰ «مَلَمْ، كَثِ عَبِنْثِ؞»
32عَمَّا عِيسَىٰ يَثٜىٰ مُسُ «إِنَدَ وَنِ عَبِنْثِنْ دَ بَكُسَنْ كُواْمٜىٰ عَكَيْبَ؞» 33سَيْ أَلْمَجِرَنْسَ سُكَ تَمْبَيِ جُونَ سُكَثٜىٰ «كُواْ وَنِ يَكَٰوُاْ مَسَ عَبِنْثِنٜىٰ؟»
34عَمَّا عِيسَىٰ يَثٜىٰ «عَبِنْثِنَ شِينٜىٰ إِنْيِ نُڢِنْ وَنْدَ يَعَيْكُواْ نِے، إِنْكُمَ غَمَ عَيْكِنْسَ؞ 35بَكُنَ ثٜىٰوَ سَوْرَنْ وَتَنِّ حُطُ عَيِ غِرْبِبَ؟ عَمَّا إِنَ غَيَ مُكُ ڢَا، كُدُوبِے غُواْنَكِ دَݣَوْ، سُنْ نُونَ، سُنْ كُمَ إِسَ غِرْبِے؞ 36مَيْ غِرْبِے يَنَ سَامُنْ لَادَ، يَنَ كُمَ تَارَ أَمْڢَانِ ذُوَا رَيْ نَهَرْ أَبَدَا، دُواْمِنْ مَيْ شُوكَ دَ مَيْ غِرْبِے سُيِ ڢَضٍ ثِكِ تَرٜىٰ؞ 37أَ نَنْ كَمْ، كَرِنْ مَغَنَرْ نَنْ غَسْكِيَ نٜىٰ، ثٜىٰوَ ‹وَنِ يَيِ شُوكَ، وَنِ يَيِ غِرْبِے؞› 38نَا عَيْكٜىٰكُ غِرْبِنْ أَبِنْدَ بَكُيِ وَهَلَرْسَبَ؞ وَطَنْسُ سُنْيِ وَهَلَ، كُو كُوَ كُنْ مُواْضِ رِيبَرْ وَهَلَرْسُ؞»
39مُتَنٜىٰنْ سَمَرِيَ دَيَوَ دَغَ وَنَّنْ غَرِ سُكَ بَادَ غَسْكِيَ غَ عِيسَىٰ سَبُواْدَ مَغَنَرْ مَاتَنَّنْ دَ تَثٜىٰ «يَغَيَ مِنِ دُكْ أَبِنْدَ نَتَٻَيِ؞» 40دَ مُتَنٜىٰنْ سَمَرِيَ سُكَذُواْ وُرِنْ عِيسَىٰ، سَيْ سُكَ ضُواْڧٜىٰشِ يَذَوْنَ تَرٜىٰدَسُو، سَيْ يَكُوَ ذَوْنَ ݣُونَ بِيُ؞
41مُتَنٜىٰ دَيَوَ كُمَ سُكَ بَادَ غَسْكِيَ غَ عِيسَىٰ سَبُواْدَ مَغَنَرْسَ؞ 42سَعَنً مُتَنٜىٰنْ سَمَرِيَ سُكَثٜىٰ وَمَثٜىٰنْ «يَنْذُ كَمْ، مُنْ بَادَ غَسْكِيَ، بَ دُوانْ مَا أَبِنْدَ كِكَ ڢَطَا كَوَيْبَ، عَمَّا سَبُواْدَ مُو مَا مُنْجِ دَ كَنْمُ، مُنْ كُمَ تَبَّتَا لَلَّيْ وَنَّنْ مُتُمْ نٜىٰ مَيْ ثٜىٰتُوانْ دُونِيَا؞»
عِيسَىٰ يَوَرْكَرْ دَ يَرُوانْ مَعَيْكَثِنْ حُكُمَ
43بَايَنْ ݣُونَ بِيُنَّنْ سَيْ عِيسَىٰ يَتَاشِ دَغَ يَنْكِنْ سَمَرِيَ ذُوَا غَلِيلِ؞ 44غَمَا عِيسَىٰ دَ كَنْسَ يَتَٻَ ڢَطَا ثٜىٰوَ «أَنَّبِے بَاشِ دَ دَرَجَ عَڧَسَرْسَ»؞#مَتْ 13.57؛ مَرْ 6.4؛ لُكْ 4.24 45دَ يَكَيْ غَلِيلِ، سَيْ مُتَنٜىٰنْ غَلِيلِ سُكَ كَرْٻٜىٰشِ حَنُّ بِيُ بِيُ دُواْمِنْ سُو مَا سُنْجٜىٰ بِكٍ ڧٜىٰتَرٜىٰوَ أَ عُرُوشَلِيمَ، سُكَ كُمَ غَ دُكْ أَبِنْدَ عِيسَىٰ يَيِ؞#يَحـ 2.23
46سَيْ عِيسَىٰ يَسَاكٜىٰ كُواْمَ غَرِنْ كَنَ تَ غَلِيلِ، وَتُواْ عِنْدَ يَمَيْدَ ضُوَ يَذَمَ ضُوً إِنَبِے؞ أَوُرِنْ كُوَ أَݣَويْ وَنِ مَعَيْكَثِنْ حُكُمَ وَنْدَ يَرُوانْسَ أَ كَڢَرْنَهُمْ بَاشِ دَ لَاڢِيَ؞#يَحـ 2.1-11 47دَ وَنَّنْ مُتُمِنْ يَجِ ثٜىٰوَ عِيسَىٰ يَدَاوُاْ غَلِيلِ دَغَ يَهُودِيَ، سَيْ يَتَڢِے وُرِنْسَ يَضُواْڧٜىٰشِ يَجٜىٰ يَوَرْكَرْدَ طَنْسَ وَنْدَ يَكٜىٰ بَاكِنْ مُتُوَ؞ 48عِيسَىٰ يَأَمْسَ مَسَ يَثٜىٰ «عِدَنْ بَكُغَ عَلَمُ دَ أَيُّكَنْ بَنْ مَامَاكِبَ، بَذَاكُ بَادَ غَسْكِيَابَ كُواْ كَطَنْ؞»
49سَيْ مَعَيْكَثِنْ حُكُمَرْ نَنْ يَثٜىٰ وَ عِيسَىٰ «مَيْغِرْمَ، كَذُواْ مُتَڢِے كَاڢِنْ يَرُواْنَ يَمُتُ؞»
50 عِيسَىٰ يَثٜىٰ مَسَ «كَتَڢِے، غَمَا يَرُوانْكَ ذَيْ رَايُ؞» مُتُمِنْ كُوَ يَغَسْكَتَادَ أَبِنْدَ عِيسَىٰ يَڢَطَا مَسَ، سَيْ يَيِ تَڢِيَرْسَ؞ 51يَنَ كَنْ حَنْيَرْسَ ذُوَا غِدَا كٜىٰنَنْ، سَيْغَا بَايِنْسَ سُكَ غَمُ دَشِ، سُكَثٜىٰ مَسَ «يَرُوانْكَ يَنَ سَامُنْ سَوْڧِ؞»
52سَيْ يَتَمْبَيٜىٰسُ عَيْنِحِنْ لُواْكَثِنْدَ يَڢَارَ سَامُنْ سَوْڧِنْ؞ سَيْ سُكَثٜىٰ مَسَ «جِيَ دَ ڧَرْڢٜىٰ طَيَ نَرَانَ نٜىٰ ظَظْذَاٻِنْ يَسَكٜىٰ شِ؞» 53سَيْ بَابَنْ يَرُوانْ يَغَانٜىٰ ثٜىٰوَ أَدَيْدَيْ وَنَّنْ لُواْكَثِ نٜىٰ عِيسَىٰ يَثٜىٰ مَسَ «كَتَڢِے، غَمَا يَرُوانْكَ ذَيْ رَايُ؞» سَيْ مُتُمِنْ دَ دُكَنْ عِيَلِنْسَ سُكَ بَادَ غَسْكِيَ غَ عِيسَىٰ؞
54وَنَّنْ نٜىٰ عَيْكِنْ بَنْ مَامَاكِ نَبِيُ دَ عِيسَىٰ يَيِ بَايَنْدَ يَبَرْ يَهُودِيَ يَتَڢِے غَلِيلِ؞
હાલમાં પસંદ કરેલ:
يَحْيَى 4: hauAS
Highlight
શેર કરો
નકલ કરો
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
