Lukas 24

Mba Yésu lo num vù là

(Mat. 28.1-10; Mark. 16.1-8; Yoha. 20.1-10)

1A be num mbwe lé'njù ntùm ngabnjù, bènnzwi tum kua' mà nkebnjù, ndo' mfèt labinda ze bo nabte là nèn yi mà ntshufi. 2Bo yen ndù bo bwoṅte loṅ nèn yi ngùanesà mbaṅ fi. 3Bo tsho ntùm fi ke yen fe Tshùaben Yésu. 4Nu tshùa yube, bo to' netshàme; tshù, tsemo' ben bàa se' ndù bo ma' nzwe ṅwa'ṅwa' num bo. 5Bwôg tshùb tshen bènnzwi là, bo ben se tshob nsi. Tshen ben bàa là tshob bo ndù: Numke bin nke ndiag mèn z'a be ntùn nà netèt fe ben à? 6A #Mat. 16.21; 17.22-23; 20.18-19; Mark. 8.31; 9.31; 10.33-34; Luk. 9.22; 18.31-33ke' b'a nsen ni, a bam num vù, bin kwimte ju z'a na' ntshob bin ngelaṅ z'a ke' Galiléa, 7nke ntshob ndù: A bwô ndù bo fà Mén mèn mbu ben kebwô, bo kwimt'é num fanta'tù, a bam num vù mbatte lé'njù tat là.

8Ndùlala bo kwimte men ntshob Yésu là. 9Ngelaṅ bo lo ntshufi mbèn njam nà, bo soṅ njoṅ tshen nu là fa tse ntshob ntshù' gham mba tsemo' ben. 10A na' mb'a Marta ze Magdala, Yohanà, Maria mà Yakobo mba tsemo' bènnzwi tse bo à bo be là. Bo na' mbèn nsoṅ ghantum yen nu là. 11Là men ntshob là tswe bo à mba njem nà, bo ke bam tshobe. 12Pétro lo nsi, nkù nde nèn ntshufi mben wul i, ndôte ntùm fi, njen nda' ba nzwe ntùm fi; a bèn njam la' i, nke ntshàm num nu z'a tshùa là.

Ghazi'te nu num manze Emmaus

(Mark. 16.12-13)

13Tshù, be mum lé'njù mbile, ben bàa netèt bo nke nèn ntùm mo' ngô lén se Emmaus, z'a b'a mfi' ṅam ntôg nelo ndaṅ mbu'nze Yérusalém nà. 14Bo nke ntshobte netèt bo num njoṅ nu fa ts'a na' ntshùa là. 15Ngelaṅ bo ke ntshobte, mbèn nke nsoṅte ntshob netèt bo là, tu wut Yésu kù'te nse' mbaṅ bo, bo à bo nke nène. 16Là miag mub fam kà bo ke lèn i.

17A tshob bo ndù: A nu ke tse bin tshwèt nsoṅte netèt bin num manz'à? Bo tsin ntùm nenywine. 18Mo' mèn netèt bo, lén se Kléopas bùnte ntshob yi ndù: O b'a nda' ze Yérusalém tù' wù z'o ke' lèn nu z'a tôg be ntùm tshen lé'njù li là ké? A tshob bo ndù: Mba kua' nu ke?

19Bo bùnte yi ndù: Nu z'a tshùa num Yésu ze Nazarèt z'a na' mbe neta ngatshob ntshob Nsi ntùm mfa' mi mba ntshob mi mbwe njoṅ benntùn fa là. 20Tshag ghale'te Nsi tse ndùbndùb mba tshag ghakeb ntsha lo tsho't'é, nkeb ntsha ndù bo zwi i, nkwimt'é num fanta'tù. 21Bag lo ke nywinte ndù a b'a yi z'a nsi tshu' ba Israél là; tshù, a b'a mbatte lé'njù tat li mba tshen nu là tshùa là.

22A b'a nenùn ndù tsemo' bènnzwi netèt bag nèn ntshufi, mbèn njam, ntshob mo' nu bag, a kuni yage, ntshob ndù bo nèn ntshufi kua' mà nkebnjù ke yen fe i bwe. 23Mbèn njam ntshob ndù bo yen ba Angél bo tshob bo ndù a b'a ntùn. 24Tsemo' ben netèt bag nèn ntshufi, njen njoṅ tshu fa mba bènnzwi tshob là, là ke yen Yésu.

25A tshob bo ndù: Kagni, benntùn tse ntù tshob lèt nebam njoṅ nu fa ghatshob ntshob Nsi tshob là. 26A lo ke bwô ndù Kristô yen nge' kà ntsho ntùm nkuni mi ké? 27A to' num Mosé nèn nkum num ghatshob ntshob Nsi fa, ntote njoṅ nu fa tse bo kite mfà num i là bo.

28Ngelaṅ bo ke ngebte mbaṅ ngô bo ke nèn bwe là, Yésu ghù mb'a nèn à tà ngùanesà là. 29Là bo nànt'é, ntshob ndù: Bag à bin tswe, a tù' b'a mfetnjù, njù à sène. A tsho ndà, ntswe bo à bo. 30Ngelaṅ bo à bo tswe num téblé là, a lo' bàn nde'te Nsi, mbe'te, mbèn mfà bo. 31Miag mub ké', bo bèn ndèn i, là, a bi netèt bo. 32Bo tshob bo bo ndù: Ntù be lo ke kù ntùm bwe, ngelaṅ z'a lo nke ntshob be num manze, ngelaṅ z'a lo nke ntote ṅwa'ni Nsi be là ké?

33Bo lo be num yen ngelaṅ nà, mbèn njam Yérusalém, ntèt tse ntshob ntshù' gham, ndù bo tse'te boa ben tse bo à bo ke mbe là. 34Bo tshob ndù: Tshùaben lo num vù kua' nenùne, a la'te wul i Simon.

35Bo bèn nsoṅ yub nu z'a lo ntshùa bo num manze, bo mba bo lèn i ngelaṅ z'a be'te bàn mfà bo là.

Mba Yésu ṅwag tse ntshob ntshù' gham nà

(Mat. 28.16-20; Mark. 16.14-18; Yoha. 20.19-23,24-29)

36Ngelaṅ ze bo ke ntshobte netèt bo là, tu wut Yésu ṅwag ntsin netèt bo. 37Bo vèt, mbwôge, nke nkwate ndù bo yen ywèle. 38A tshob bo ndù: Numke bin mvètt'à? Numke magte nko' ntùm ntù tsin à? 39Bin yen mbu màm bo nku màm njene; a b'a kua' me. Bin kwag àm, njen ndù ywèt ke' be ghù mbàb bo mvôge, mba bin yen ndù me ghù là. 40A tshob ndùlala, nda'te mbu mi mba nku mi bo. 41Mba bo ke ntsiaṅte ke yoṅ mbam tshobe, mbèn nke ntshàm nà, a tshob bo ndù: Bin ghù ju nejù nsen ni ké? 42Bo fà kam ngontse neton yi, 43a kwé mfèt mbwe bo, 44ntshob bo ndù: Tshù men ni b'a ntshob mi me na' ntshob bin ngelaṅ ze me ke' netèt bin nà ndù: A bwô ndù njoṅ tshu fa tse bo na' nkite num àm ntùm ntshù' Mosé, ntùm ṅwa'ni ghatshob ntshob Nsi mba ntùm ṅwa'ni Yobkwi là bumte. 45A gha' zenu yub num neju' ṅwa'ni Nsi, 46ntshob bo ndù: Ndùlala bo lo kite ndù Kristô a' yen nge', mbam num vù mbatte lé'njù tat; 47bo nsi tshob nu nekaṅ ntù num lén se, ndù Nsi lagte nukebwô benntùn, ntùm ngô fa, nto' à Yérusalém. 48Bin b'a ghakwénta tshen nu là. 49Tshù, #Mfa' Gha. 1.4me nsi tum ju ze Tàa na' nka' là bin. Mba bin nà, bin tswe ntùm ngô, tà nkum ngelaṅ bo nsi ma' neta mfe tù num bin nà.

Mba Yésu ko' nèn kamànyam nà

(Mark. 16.19-20; Mfa' Gha. 1.9-11)

50A #Mfa' Gha. 1.9-11lo' yub nèn yi tà nze Bètania, mbù' mbu mi, naṅ mbotni num bo. 51Ngelaṅ z'a ke naṅ mbotni num bo là, a fagte bo à bo, nko' mfe kamànyam. 52Bo be miagte neghamt'é, ndo mbèn njam Yérusalém, ndù bo dun tsiaṅte. 53Bo nke mbe njoṅ ngelaṅ fa ntùm Ndà Nsi, nke ngamte Nsi.

હાલમાં પસંદ કરેલ:

Lukas 24: BMa

Highlight

શેર કરો

નકલ કરો