Yohané 6

Mba Yésu kém benntùn ntsha' tàn bàn nà

(Mat. 14.13-21; Mark. 6.30-44; Luk. 9.10-17)

1Tshen nà lo be tshùa, Yésu nèn mo' yoṅ dibantse Galiléa ke Tibériade lo. 2Là mo' bwoṅ benntùn yàm tam njam i, nummbe bo lo ke njen nsà ts'a ke ngù num ghangokèt là. 3Là Yésu ko' num mbale, ntswe nsi bwe, boa ghazi'te nu i. 4Là Pasa lé'njù jùa ba Yuda lo ghebte. 5Yésu bù' miag mi, mbe yen ndù mo' bwoṅ benntùn yàm tshwèt nse' mbaṅ i, ntshob Filibo ndù: Be nsi jun bàn à yà kà tshen ben ni jù à? 6Là, a tshob ndùlal'a num nelo' ndaṅt'é yi, nummbe tu wul i lèn ju z'a nsi ghù là.

7Filibo bùnte yi ndù: Be jun bàn denario nkù bàa mb'a ke ku' njoṅ z'a be mba we lo kwé meju i là. 8Mo' mèn netèt ghazi'te nu i, Andréa mfèt Simon Pétro tshob yi ndù: 9Mo' ménnshum num nsen ni z'a ghù ntu' bàn ntàn mba ndô ngontse bàa là, là, a ku' ke num yen njoṅ benntùn ni à? 10Yésu tshob ndù: Bin ghù benntùn tswe nsi. Là nenà lo be ntùm yen dù' là yàme. Bandum tse bo tswe nsi là be nguan benntùn ntsha' tàn. 11Ndùlala Yésu lo' bàn, nde'te Nsi, ngabte ben tse bo tswe nsi là, mbèn ngù be ndaṅndaṅ mba num ngontse mba bo ke nkô là. 12Ngelaṅ bo ywèt là, a tshob ghazi'te nu i ndù: Bin tse'te mbe'te mi mi a tù' là ndù kà lèn kam i bi.

13Ndùlala, bo tse'te mbe'te bàn mi a tù' num bàn tàn tse bo jù là, a dun nkag ntshob bàa gham. 14Benntùn yen nsà z'a ghù là, ntshob ndù: Yen mèn ni b'a kua' ngatshob ntshob Nsi z'a se' ntùm njù là. 15Là Yésu lèn ndù bo nsi se' tshùb i, ghom i mfen; a tum mbèn nèn num mbat tù' i.

Mba Yésu zin num ntse là

(Mat. 14.22-33; Mark. 6.45-52)

16A be be mfetnjù, ghazi'te nu i swe' nèn mà dibantse, 17ntsho ntùm kenu nèn mo' yoṅ dibantse, nze Kapernaum. A lo be be ndù njam à sène. Yésu ke yoṅ nse' mbaṅ bo. 18Fetmbaṅ ndùb nke ntshu'u, dibantse nke mbùnte. 19Ngelaṅ bo zin nguan mfi' ntshob tàn ṅam mbàa ke ṅam ntat lo là, bo yen Yésu, a nke nzin num ntse nke ngebte mbaṅ kenu, bo bwôg. 20Là, a tshob bo ndù: A b'a me, kà bin bwôg. 21Ndùlala bo nke nkô nelo' i ntùm kenu; là be ndùse kenu kum kaṅ ntse dù' ze bo ke nèn nà.

Bàn yôg

22Njù be làne, bwoṅ benntùn tse bo tù' yoṅ dibantse là yen ndù mo' kenu lo ke be bwe k'a ke nda' se ntshù', mba ndù Yésu lo ke tsho ntùm kenu boa ghazi'te, là ndù ghazi'te nu i lo nèn à tù' bo. 23Là memo' nkenu fe Tibériade nse' mbaṅ dù' ze bo jù bàn bwe, ngelaṅ Tshùaben lo' bàn, nde'te Nsi là. 24Ngelaṅ bwoṅ benntùn yen ndù Yésu ke ghazi'te nu i lo ke' bèn mbe yen dù' là là, mba bo tsho yub ntùm nkenu, nèn Kapernaum diag Yésu.

25Bo be fon i mo' yoṅ dibantse ntshob yi ndù: Rabbi, o se' nsen ni à zit ngelaṅ à? 26Yésu bùnte bo ntshob ndù: Bin ke ndiag àm ke b'a mba bin lo njen nsà là, là nummbe bin lo njù mbàn njwèle. 27Bin fa'a, ke b'a num jujù z'a num mbi là, là num jujù z'a be ntswe num yôg matmat, ze Mén mèn nsi fà bin nà; nummbe a b'a yi ze Tà, Nsi te sitam i num i là.

28Ndùlala bo tshob yi ndù: Bag nsi ghù à ke ndù bag fa' mfa' Nsi à? Yésu bùnte ntshob bo ndù: 29Fa' Nsi b'a sen ni ndù bin bam mèn z'a tum nà. 30Ndùlala bo tshob yi ndù: A zit nsà z'o ghù ndù bag yen mbam o à? A sit fa' s'o fa' à? 31Ba #Netu. 16.4,15; Yobk. 78.24tà tshag lo jù mànà num kônkwa, ndaṅndaṅ mba bo kite là ndù: A fà bàn z'a fe kamànyam nà bo, bo jù. 32Ndùlala Yésu tshob bo ndù: Kua' nenùne, kua' nenùne, me tshob bin ndù: A ke' b'a Mosé na' mbèn mfà bàn z'a b'a ze nenùn nà. 33Nummbe bàn Nsi b'a z'a fe kamànyam, z'a fà yôg njù là. 34Ndùlala bo tshob yi ndù: Tshùaben, ke mfà be lèn yen bàn nà bag njoṅ ngelaṅ fa.

35Yésu tshob bo ndù: Tu wul àm, me b'a bàn yôg. Mèn z'a se' me là mba nziku' ke bèn ney'é, mèn z'a bam àm nà, mba ntù i ke bèn nekù. 36Là me lo tshob bin ndù bin yen àm ke bam. 37Njoṅ i fa ze Tà num mfà me là nsi se' me; mèn z'a se' me là, mba me ke nsi ma' i njù. 38Nummbe me swe' mfe kamànyam, nse'e, ke b'a neghù à yàm nekô, là nekô mèn z'a tum àm nà. 39Là nekô mèn z'a tum nà b'a yen ni ndù kà me ghù sàm ju bi num njoṅ i fa z'a fà me là; là ndù me se' mbam i num vù ntùm miagte lé'njù. 40Nummbe nekô Tàa b'a yen ni ndù mba we lo z'a yen Mén i mbam i là ghù yôg matmat, mba ndù me se' mbam i num vù ntùm miagte lé'njù.

41Ndùlala ba Yuda tshobte tun ntô num i, nummbe a lo tshob ndù: Tu wul àm, me b'a bàn z'a swe' mfe kamànyam nà. 42Bo nke ntshob ndù: Yen ni ke b'a Yésu mén Yosèf, ze be lèn tàab mba màab là ké? K'a ke ntshob ndonni ndù: Me swe' à mfe kamànyam à ndùke? 43Yésu bùnte ntshob bo ndù: Kà bin tshobte tun ntô netèt bin. 44Sàm mèn ke' ku'ni nese' me, a be ze Tà z'a tum àm nà ke' soṅt'é là; mba tu wul àm nsi se' bam i num vù ntùm miagte lé'njù.

45Bo #Es. 54.13lo kite ntùm ṅwa'ni ghatshob ntshob Nsi ndù: Nsi nsi tswite njoṅ yub fa. Mba we lo z'a ju' nu Tà nzi'te là num nse' me. 46Ke b'a ndù mèn to' yen Tà k'a ke nda' mèn z'a fe mbaṅ Nsi là, a yi z'a yen Tà là. 47Kua' nenùne, kua' nenùne, me tshob bin ndù: Mèn z'a bam nà ghù yôg matmat. 48Tu wul àm b'a bàn yôg. 49Ba tà tsin lo jù mànà num kônkwa mbèn nkwù. 50Yen ni b'a bàn z'a swe' mfe kamànyam nà, ndù mèn jù i ke bèn nekwù là.

51Tu wul àm b'a bàn z'a yôge, z'a swe' mfe kamànyam nà; a be ze mèn jù yen bàn ni là, mb'a' yôg matmat. Bàn ze me nsi fà là b'a mbàb wul àm num yôg njù. 52Là ba Yuda nke nta ntshu netèt bo ntshob ndù: Yen mèn ni ku'ni nefà mbàb wul i be be fèl à ndùke? 53Ndùlala Yésu tshob bo ndù: A be ze bin ke' fèt mbàb wut Mén mèn ke bèn nu lem tse là, mba bin ke ghù yôg num bin.

54Mèn z'a fèt mbàb wul àm mbèn nu lem tshàm nà ghù yôg matmat, tu wul àm nsi se' bam i num vù ntùm miagte lé'njù. 55Nummbe mbàb wul àm b'a kua' ju nejù, lem tshàm bèn mbe kua' ju nenu. 56Mèn z'a fèt mbàb wul àm, mbèn nu lem tshàm nà ghô num àm, mba me yàm ghô num i. 57Mba Tà z'a yôg tum àm, me nke ntshùa njam i njôg là, be ndaṅndaṅ, mèn z'a fèl àm nà nsi tshùa njam àm yôge. 58Yen ni b'a bàn z'a swe' mfe kamànyam nà. A ke b'a lèn ze ba tà tsin na' njù mbèn nkwù là. Mèn z'a jù yen bàn ni là mb'a' yôg matmat. 59A tshob tshen nu li ngelaṅ a ke ntswite ntùm sinagogue mà Kapernaum nà.

60Ghazi'te nu i yàm be ju' ndùlala, ntshob ndù: Men ntshob li lèle, we z'a ku'ni neju' à? 61Là Yésu be lèn ntùm ntù i ndù ghazi'te nu i tshwèt ntshobte tun ntô num yen nu là, ntshob bo ndù: Yen nu li fa'te zin ké? 62Kà bin yen Mén mèn ko' nèn dù' z'a be bwe mbwe l'o? 63Ywèt bèn nke mfà yôg, mbàb wut ke' be ywimte sàm ju. Ntshob mi me lo ntshob bin nà b'a Ywèle, mba yôg. 64Là tsemo' ben num netèt bin tse bo ke tshwèt mbam nà. (Nummbe fe neto'te Yésu lo lèn ben tse bo ke mbe ke bam nà, mba mèn z'a nsi swèn i là). 65A nke ntshob ndù: A num ndùlala me lo tshob bin ndù sàm mèn ke' ku'ni nese' me, a be ze Tà ke' fà yi là.

Pétro bam ndù Yésu b'a Kristô

66Fe num yen ngelaṅ nà, ghazi'te nu i yàm lo njam i, ke bèn nezin bo à bo. 67Ndùlala Yésu tshob tse ntshob bàa gham ndù: Mba bin zin, bin ke' kô nenèn ké? 68Simon #Mat. 16.16; Mark. 8.29; Luk. 9.20Pétro bùnte yi ndù: Tshùaben, bag nèn tèl à we? O ghù ntshob yôg matmat; 69bag lo bame, bag lo lèn ndù o b'a mèn nelàn z'a fe Nsi là. 70Yésu bùnte bo ndù: A ke b'a me na' mbèn ntsho' zin bin tse ntshob bàa gham ké? Là mo' mèn netèt bin b'a ywètkebwô. 71Là, a ke ntshob à Yuda mén Simon ze Iskariot. Nummbe a b'a yi, mo' mèn netèt tse ntshob bàa gham, z'a nsi swèn i là.

હાલમાં પસંદ કરેલ:

Yohané 6: BMa

Highlight

શેર કરો

નકલ કરો