От Матфея 24

Иисусым А̄пқаңа Храмым На̄вылъыҳқа̄

1Иисус а̄нлюни Храмымың аӷуляқумалюку малихся̄ҳтыңита такулюку кылгуткӣт мыңтыӷат Храмым пиңи. 2Пикӣ: «Ысҳаӷаси тама̄кут мыңтыӷат. Ипа пӣмси, талўа ата̄сиқ уйӷак нымининъа̄нӷитуқ. Қамахлъютың улъыҳқуӷьяҳқа̄гут».

Сыӷлылӣлъҳытлъю, Амьюқыта̄ткылъҳытлъю

3Иисус ақумьян Елеоным найӷаҳакун, малихся̄ҳтыңита такулюку лъңинаҳа̄ма̄ӷлютың а̄птыка̄т: «Уңипа̄тикут, қакун тама̄кут пияҳқа̄ўат? Сяңулъықа лӣсимакусиҳқаҳпут тагилъыҳқаҳпынун, нунамлъю иқухтылъыҳқа̄нун?»

4Иисусым кӣмсиқӣ: «Кылыңалюси, китумун алңунак пӯҳтыстыхпынаси. 5Қаюҳлъяк угля̄пихлъыӷӣ тагияҳқа̄гуқ атуқлъюку а̄тқа, хўатын пӣқлъютың: “Хўаңа Христосыңӯңа”, пӯҳқуҳта̄яҳқақа̄тлъю юлӷун. 6Нагақӯлъықуси пилъюўаның, акусқаҳта̄ткылъҳитныңлъю пилъюўат; алиңыхпынаси қаюҳлъяк тама̄на пияҳқа̄гуқ. Иўырңа сялин иқухнақңунӷитуқ. 7Нунат югит пилъюгутулъықут, атаныҳпагулъҳытлъю пилъюгутулъықут, нани алңунак нықаңисяхлъяхлъықуқ, нунат увылыхтаҳлъяхлъықут. 8Қамахлъюни тама̄на аӷнам иӷниюкысталъҳатун аюқылъықуқ.

9Та̄хкын тама̄на пималюку югыт тугулъықӣси, амьюқыта̄ткылъықӣси, туқулъықӣсилъю. Нунатаҳа̄н тамаҳа̄н рамкыңан угумӣлъықӣси хўаңа апалъюқлъюңа. 10Ынка̄м Угля̄пихлъыҳӣми ухпықнаниҳлъықа̄тңа, увыҳпагутусягулъықут, угумӣсягулъықутлъю. 11Та̄хкын ӯкналиқистысиӷўа̄лӷутыт тагилютың пӯҳқуҳлъықӣт юлӷутыт. 12Сыӷлық нулям аңталяңаның апалъюқлъюку алъюлъютың югыт пиниқинаниҳлъықут. 13Иўырңа кина алңунак нуқынъыҳтуқақ кынлымун югулилъыңьяҳқа̄гуқ. 14Укутлъю Пинилӷӣт Уңипат Кияӷныӷым Атаныҳпагулъҳаның аюқылӷӣт уңипақсяҳқа̄гут нунатаҳа̄ни тамаҳа̄ни рамкыңитнун нагақӣсқылъюки. Та̄хкын нуна иқухлъықуқ».

Иисусым А̄пқаңа Сыӷлылӣлъыҳқаҳлъяк

15«Йықай атиҳтуҳтым лӣгиклъигу сямың писӣтаңа ӯкналиқистым Даниилым ӯкналиқуткыхка̄. Ӯкналиқуткыхка̄ та̄на аглыӷнӣлңӯгуқ па̄ҳқӣтыстилӷӣ аглыӷналӷӣми ными. Ысҳақуфсигу тысқамани ныкывылӷӣ, 16Иудеямылңӯт анагнӣҳа̄т на̄йӷанун. 17Ю̄к мыңтыӷам қа̄йңанилңуқ укиглюни сяӷьяқуфқа̄ми пилӷа̄қ. 18Ю̄к пӣтысӣӷаӷвигмылңуқ қа̄слъиҳқуфқа̄ми пилӷа̄қ. 19Тама̄ни аӷныӷни сыӷлыӷўа̄ӷунақңӯт қумилгыт аӷнат, мамаҳталгытлъю! 20Юӷаҳтык анагнӣфқа̄фси уксюми писқылъюси налиӷмың Субботами, 21қаюҳлъяк тама̄ни сыӷлылӣқ ынңа̄талъ сыӷлыҳлъягуҳсяҳқа̄гуқ. Сыӷлыӷатаӷа̄яҳқа̄гуқ сыӷлылӣӷақылъыӷның има пӣнлиӷьюха̄лъҳаның нунам хўавымун кынляңа. Алъямыңлъю таўатылңуқ пина̄нӷитңўа̄ҳтуқ. 22Тама̄кут аӷныӷыт Кияӷныӷым палялъимаңисяқаки, кина алңунак уңуванаянӷитуқ. Иўырңа апалъюқлъюки накмикыхкани аӷныӷыт палялъияҳқақӣ.

23Тама̄ни китум алңунак пикаңиси: “Ӣи, Христос хўа̄”, налиӷмың: “Тазиңантуқ!” ухпықыхпына̄н, 24қаюҳлъяк Христосысиӷўа̄ӷытлъю, ӯкналиқистысиӷўа̄ӷытлъю тагилъықут. Алъя̄ҳлъюхўаҳтиҳлъяхлъықут, сяӷӣӷанаҳқыҳлъяхлъықутлъю пӯҳналюки югыт, талўа Кияӷныӷым накмикыхкӣ пӯҳсяқлъыгукумыхтыки. 25Та̄ўа уңипа̄тамси сивутҳулъюку пилъыҳқақ.

26Ынка̄ңам хўатын пикаңиси: “Ӣи, Христос па̄ҳқилъҳанитуқ!” такухпына̄н; налиӷмың хўатын пиката: “Ӣи, мыңтыӷам илюңанитуқ”, ухпықыхпынаки. 27Қаюҳлъяк Иӷныӷа Югым тагикуми таўатысяҳқа̄гуқ ниӷухпагӯтылъыҳтун кӯкхулъықуқ асиваӷмың пакфалъямун.

28Қаўа̄хпагыт қырңуҳтақут нани алңунак кымыхқўа̄лгунӷани».

Тагилъыҳқа̄ Иӷныӷан Югым

29«“Киңуңӣҳӣтның тама̄кут сыӷлылӣлъыҳлъягыт Кияӷныӷым сиқинық мамлыхтыслъықа̄,

танқиқ ниӷугунъаниҳтыслъықа̄, иӷалықыта̄ӷыт ифкақӯтыслъықӣ қилягамың,

аҳтуӷьяҳқа̄нӷилъҳыт қилягамылңӯт иглыӷалъҳит алъяңуҳқӯтыслъықӣ”.

30Та̄хкын қилягакун сяңўа̄ алъхыҳлъықуқ лӣсимакусиҳқақ Иӷныӷаның Югым. Та̄хкын қамахтыңъўа̄ӷлютың нунам рамкыңи қивӷум қия̄ӷӯтыҳлъяхлъықут. Ысҳаҳлъықа̄т Иӷныӷа Югым тагилӷӣ қилягўа̄ҳтыхун, аҳтуӷьяҳқа̄нӷилъыҳтӯмаӷмилъю, ниӷуҳқылъылиҳлъяглюнилъю. 31Ынка̄м Иӷныӷан Югым қалӷиҳта̄н қалӷиҳтыстыҳлъякумигу каяхлъықӣ яқулыни навык алңунак қырңуҳтысқылъюки накмикыхкани нунатаҳа̄ның тамаҳа̄ның».

Смоквам Уқфига Лӣтфиксяҳқақ

32«Лӣтфикитыху уқфига смоквам. Ысҳақуфсики авайӣ унӣлъӣӷалӷӣт, қуқуңӣ пӣтыкысталӷӣт, лӣсимакаҳси кӣгьяҳтуңыстаӷа̄. 33Таўатыҳпигақ қамахтыңъўа̄ӷлюки а̄пқанка тама̄кут ысҳақуфсики, лӣсимакылъықаҳси лъңа ка̄сяҳтуңыста̄ма̄қ, а̄қун амигмун лъӣӷума̄қ. 34Ипа уңипа̄тамси, ма̄тын уңувалӷӣт туқуляӷа̄тыстыхпынаки қамахлъютың тама̄кут пияҳқа̄гут. 35Қилягалъю, нуналъю авӣӷусяҳқа̄гук, иўырңа хўаңа акузитынка авӣӷунъа̄нӷитут».

Кылыңаклъюку Тагилъыҳқа̄

36«Китум алңунак налъюка̄ та̄м аӷныӷым афлъюңа қакун ка̄сяҳқа̄таңа. Талўа қилягмылңӯт яқулгыт налъюка̄т, Иӷныӷымлъю налъюка̄, Атаңинаҳа̄м лӣсимака̄. 37Катам тама̄ни Нойем кияҳтылъҳани, югыт таўатысяҳқа̄гут Иӷныӷан Югым тагилъыҳқа̄ни. 38Тама̄ни аӷныӷни, сивуңани улывым югыт ныӷақлъютың, мыӷақлъютың, ныңуӷутақлъютың аюқыхкат кынляңа таўавык аӷныӷмун Нойелъю итылъҳитнун ковчегымун. 39Налъюкыхка̄т натысяҳқа̄таңа кынляңа улывылъыӷмун, ынка̄м қамахтыңъўа̄ӷлютың туқуляӷа̄ткат. Таўатыҳпигақ Иӷныӷа Югым тагикан, налъюкылъықа̄т натысяҳқа̄таңа. 40Таўани пилъыӷми ма̄лӷук югык пӣтысӣӷаӷвигмыгни қыпҳа̄тык, а̄лъҳа тугулъықа̄, иляңа уныхлъықа̄. 41Аӷнак кагимтилӷӣк зерномың, а̄лъҳа тугулъықа̄, иляңа уныхлъықа̄.

42Ынка̄ңам кылыңалюси, қаюҳлъяк налъюкңўа̄ӷаҳси нани аӷныӷми Атаныҳпыси тагилъыҳқа̄. 43Налъюнықнӣтуқ, мыңтыӷам юган лӣсимаксяқумигу тыглыгнӣҳтым тагилъыҳқа̄, қаваҳпынани кылыңанаяҳтуқ на̄фқулъюни итыӷнаюкан мыңтыӷаминун. 44Ынка̄м тама̄кын апалъюқлъюку лъпысилъю апыӷӣҳсяӷлюси қӯнпың, қаюҳлъяк Иӷныӷа Югым тагияҳқа̄гуқ ўа̄кынӷилъҳаҳлъюси».

Қыпҳаҳта Ата̄сӣӷмылңуқ Налиӷмың Ата̄сӣӷмынъыӷилңуқ

45«Кинаңа̄ўа ата̄сӣӷмылңуқ пыҳқинылӷӣ қыпҳаҳта? Та̄наңӯқ умӣлган иглыӷутистыңлъяқа̄ қыпҳаҳтылгутаңанун, нықылита̄тӣсқылъюкилъю аҳутаңа тамаҳа̄н. 46Та̄на қыпҳаҳта қуястылъыңьяҳқа̄гуқ умӣлган ка̄лъюни ысҳақумигу қылылъыӷмитун пилӷӣ. 47Ипа уңипа̄тамси, та̄на қыпҳаҳта умӣлган афлъыңакистыңлъяӷьяҳқақа̄ сяминун тамаҳа̄нун. 48Иўырңа та̄на қыпҳаҳта сыӷлыӷукуми сюмыҳтаӷаҳлъықуқ хўатын: “Умӣлъка тагилӷаҳтуӷна̄нӷитуқ”, 49ынка̄м амью̄ткысягулъықӣ қыпҳаҳтылгутни. Илялъықуқлъю сю̄мылӷӣнун, ныӷылгусиӷақлъюки, мыӷылгусиӷақлъюки лъӣҳлъықуқ. 50Та̄хкын ата̄сими аӷныӷми умӣлга ка̄лъықуқ қыпҳаҳта ята̄ҳқылъҳилъюкулъю, сиӷимакылъҳилъюкулъю. 51Ынка̄м умӣлган қывӯлъюку аӷью̄ҳлъықа̄, агляҳтыслъықа̄ пинӣюгныӷнун аӷью̄ӷьяҳқа̄люку малигулъюку. Таўани қийиқылъықут, хутытың тышқита̄хта̄мӣта».

હાલમાં પસંદ કરેલ:

От Матфея 24: ess2

Highlight

શેર કરો

નકલ કરો