От Матфея 10

Қуля Ма̄лӷук Сӣпнықлъюку Апостолыт

1Иисусым қырңуҳлъюки қуля ма̄лӷук сӣпнықлъюку малихся̄ҳтыни, аҳтуӷьяҳқа̄нӷилъылиткӣ а̄ныстияҳқа̄люки туӷныӷаӷның, на̄лъҳутияҳқа̄люки тамаҳа̄ның ақниӷныӷныңлъю, қинуюгныңлъю. 2Укуңӯт қуля ма̄лӷук сӣпнықлъюку апостолыт: сивулиқ, Симон (алъя атылык Петырымың), Андрей (аңлыгутаңа), Иаков Иоанн (Зеведейем иӷныӷык), 3Филипп, Варфоломей, Фома, Матфей (налогмың қырңуҳтистыңуялӷӣ), Иаков (иӷныӷа Алфейем), Фаддейенлъю, 4Симонылъю Зилот ынка̄м Иуда Искариотлъю (увыҳпагутияҳқақ Иисусымың).

Қуля Ма̄лӷук Сӣпнықлъюку Апостолыт Қыпҳақаҳқа̄т

5Иисусым, та̄кут қуля ма̄лӷук сӣпнықлъюку апостолыт каяхтыкӣ қылӷӯмӣта: «Язычнигытлъю, Самарияӷмӣтлъю нунаңитнун пифқа̄фси. 6Йыӷлыги Израилыӷмӣнун пикатык қаюҳлъяк ифлъякастун пынъӣӷыстун аюқут. 7Навык алңунак пиныҳпысини хўатын уңипаӷақитык: “Атаныҳпагулъҳа Қилягым ка̄сяҳтӯма̄қ!” 8Қинуюгыт на̄лъҳутыки, туқукат уңуваҳтыки, проказалгыт на̄лъҳутыки, туӷныӷа̄тлъю а̄нысқуҳтыки югның. Акиңуна̄н алъхыӷутка̄гуси, ынка̄м акиңуна̄н тӯнитык. 9Кылъқыхпынаси манимың: золотамың, серебромың, талўа медмың. 10Кылъқыхпынаси акмахтамың, симӣткаҳқамың, камыгмың талўа аявӣӷмың, қаюҳлъяк қыпҳаҳта аклъюкыхка̄ның тӯньяҳқа̄гуқ.

11Селениянун налиӷмың нунаҳаӷмун ка̄нъыҳпысини иваӷӣқитык китумың пинилӷӣмың ынка̄м лъңанитақитык кынляңа аӷуляқсяҳқа̄ҳтылъыҳпысинун. 12Ӣтқуфси мыңтыӷа̄нун қуястақитыки таўанлыңӯт хўатын: “Кияӷныӷым ныкыхмылъҳа лъпысинилъи”. 13Упуӷаскаңиси, қуястилъыҳси таўантыснакыси. Иўырңа упуӷанъыӷилъкаңиси, қуястилъыҳси выҳнакыси. 14Китум алңунак упуӷанъыӷилъкаңиси налиӷмың наганъыӷилъкаңиси, а̄нуткылъюку мыңтыӷамың налиӷмың аӷуляқуткылъюку нунаҳаӷмың, итыгаҳпыси пагуляңи уфсюгунъакыси. 15Ипа уңипа̄тамси, Нанқихтилъҳым Аӷныӷани, Содомыӷмӣтлъю, Гоморраӷмӣтлъю аӷью̄лъыҳқыста̄ҳа̄яҳқа̄гут та̄хкын юганың!»

Апостолыт Амьюқыта̄ткысилъыҳқа̄т

16«Укуҳси! Каяхтыкумси пынъӣӷыстун қуңаңитнилңуӷыстун ама̄стун лъӣӷлықуси ынка̄м пыҳқинӷулюси нымыӷьястун, ныкыхмылъюси голубистун. 17Кылыңалюси, қаюҳлъяк югыт тугулюси агля̄лъықӣси агӷистынун, кахсягмихлъықӣсилъю синагогамыхни. 18Хўаңа апалъюқлъюңа, ныкывыслъықӣси сивуңитхун иглыӷутистытлъю, умӣлгытлъю. Ынка̄м лӣгикысяҳқа̄ҳлъықаҳпысиңа лъңитнунлъю, язычнигынунлъю. 19Нанқихтыстымун агля̄скаңиси, тыгиҳлъҳпынаси натын акузилъыҳқаҳпысиның, налиӷмың сямың пилъыҳқаҳпысиның. Акузияҳқа̄ҳтыкуфси акузиткаҳқалгулъықуси. 20Акузитыт лъпыси пикынӷитаси қаюҳлъяк Атахпыси Таӷныӷакык акузилъықук лъпысигун.

21Югыт лъмың катам аңлыгутытың туқутыслъықӣт, ататлъю авақутатың таўатын пияҳқақӣт. Авақутат аңуйӣлъюки аңаюқатың туқутыслъықӣт. 22Хўаңамның апалъюқлъюси югым қамахлъюни угумикылъықӣси. Иўырңа нуқынъыҳтуқат кынляңа кынлымун югулилъыңьяҳқа̄гут. 23Такукаҳпысини амью̄ткыхкаңиси, иляңанун нунамун қимаха̄си. Ипа уңипа̄тамси, қамахна̄нӷитаси Израилым нунаӷи, сивуңани Иӷныӷан Югым тагилъыҳқа̄н.

24Малихся̄ҳта қа̄сҳутиңанӷитуқ апыҳтуӷистыминың, талўа қыпҳаҳта қа̄сҳутиңанӷитуқ умӣлыгминың. 25Итагнаӷияҳқа̄гуқ малихся̄ҳта апыҳтуӷистымитун лъӣқуми, қыпҳаҳталъю умӣлыгмитун лъӣқуми. На̄сқӯтилӷӣ ныңлъюгутминың, Веельзевулымың атӣмакатху, ныңлъюгутаңи сыӷлыӷатаӷа̄люки атиӷьяҳқақӣт.

26Ынка̄м аликыхпынаки тама̄кут амьюқытаҳтыт. Сяңўа̄ алңунак налъюкыхкақ лӣтысяҳқа̄гуқ, қамахлъюнилъю аксяқыхкақ қайвиҳқысяҳқа̄гуқ. 27Лъпысинун сяңўа̄т а̄пқанка апыӷьяҳқақаси тамаңанун. Сигутқӯткыхканка лъпысинун, уңипақсяҳқақаси мыңтыӷат қа̄йңитның.

28Ынка̄м аликыхпынаки югыт туқутикаюгыт югусиҳӣнаӷмың иўырңа туқутина̄нӷитут уңувасимың. Итупилъ аликитыху Кияӷнық, қаюҳлъяк геенами на̄фқӣяҳқа̄гуқ тамаҳа̄хкының югусимыңлъю уңувасимыңлъю. 29Монетамың тукфиӷьяҳқақахси қаўа̄ха̄к, нақамлъю а̄лъҳа ифкақан Атахпыси лӣсимака̄. 30Иўырңа лъпыси афлъыңакатаӷаӷлюси аюқӣси, қаюҳлъяк талўа нуяҳпыси угляҳталңи лӣсимакӣ. 31Ынка̄м алиңыхпынаси, Атахпыси мыгнукатаӷаӷӣси қаўа̄хаӷның!»

Тугуклъиӷилъық Налиӷмың Иҳсякилъық Христосымың

32«Китум алңунак уңипа̄скаки югыт, хўаңамнун пикнилюни, хўаңалъю Атака̄ қилягмылңуқ уңипа̄лъықақа хўаңамнун пикнилюку. 33Иўырңа китум алңунак уңипа̄скаки югыт хўаңамнун пикынӷинъилюни хўаңалъю Атака̄ қилягмылңуқ уңипа̄лъықақа хўаңамнун пикынӷинъилюку».

Иисус Ныкыхмылъыңыстияҳтӯнӷитуқ

34Иисусым паниның алыҳқуқӣ: «Сюмыҳтаӷаҳпынаси ныкыхмылъыңыстияҳтӯнилюңа нунам юганун. Йыӷлыгилъю! Ныкыхмылъыңыстияҳтӯнӷитуңа, та̄ўаңинақ пилъюгутыстияҳтӯгуңа. 35Тагиңӯңа югмун аңуялӣтысқылъюку атаңа, аӷнамун аңуялӣтысқылъюку на̄ңа, ука̄ӷанун аңуялӣтысқылъюку сякиңа аӷнақ. 36Ынка̄м ю̄к ныңлъюгутаңита аңуялӣлъықа̄т.

37Китум алңунак пиниқыхкумигу атани налиӷмың на̄ни пакихулъюку хўаңамның, хўаңа пикыпагниңитақа. Китум алңунак пиниқыхкумигу иӷныни налиӷмың панини пакихулъюку хўаңамның, хўаңа пикыпагниңитақа. 38Китум алңунак қақӯрани тугуюнӷилъкумигу малихна̄нӷита̄ңа, ынка̄м хўаңамни итагнанӷитуқ. 39Китум алңунак уңувалъыни лъңанун пикниқумигу ифлъяяҳқақа̄. Иўырңа китум алңунак уңувалъыни пыхтыкумигу хўаңа апалъюқлъюңа алъхыҳсяҳқақа̄ уңувалъыпик».

Акилыҳтӯсят

40«Китум алңунак упуӷаскаңиси, хўаңалъю упуӷалъықа̄ңа, ынка̄м китум алңунак упуӷаскумиңа, упуӷалъықа̄ каяхтистыка. 41Китум алңунак упуӷаскумигу ӯкналиқиста ӯкналиқистыңутаңаның, акилыҳтӯсяңылъықуқ ӯкналиқистытун. Китум алңунак упуӷаскумигу ылъқуӷутңалӷӣ ю̄к ылъқуӷутңатаңаның, акилыҳтӯсяңылъықуқ ылъқуӷутңалӷӣтун юхтун. 42Китум алңунак ныңлыкыхлъыҳӣмың мыҳсикумигу укалиҳпигақ малихся̄ҳтыка апалъюқлъюку малихся̄ҳтыкутымның, ипа пӣмси акилыҳтӯсяңыпыста̄ӷьяҳқа̄гуқ».

હાલમાં પસંદ કરેલ:

От Матфея 10: ess2

Highlight

શેર કરો

નકલ કરો