Lugu 19

Jeju aw ɓə lə Jase

1Jeju andə mə ɓe gə Jeriko ɗaa, unda m-e gangə. 2Dəw kara ri-a na Jase ga̰ kəne əng; n-to mbay lə njembo̰ lar gədə ɓeje ngaɓa n-to njenekinga. 3N-sangə ɗəw mba ko se Jeju to na wa, ngaa dəwje bula ya̰ ɗaa, n-inga ɗəw ang, mba n-guji ya̰. 4Be ɓa, n-a̰y ngɔdə n-aw kede ɗaa, n-al kagə gə ri-a na sikomɔr, n-isi taar ɓa gə mba ko Jeju gə a nday gə ɗəw gə kəne əng. 5Lo gə Jeju ce lo-e gə nee ɗaa, ye un kəm-e gə taar ɗaa pa ar Jase na: Jase, ꞌɗisi ur nangə gə ngɔdə: May kar-m m-isi mə kəy gə lə-i ɓogəne. 6Jase ɗisi ur nangə gə ngɔdə ɗaa ɗe uwa-a mba gə rɔləl. 7Dəwje tɔ̰y gə d-o ne gə nee le d-o̰ Jeju yom-yom ɗaa, ꞌpa na: N-aw n-to kəy lə njeneɗa gə kṵra̰y səmə!

8Jase ar taar ɗaa, pa ar Mbayɓe na: O! Mbayɓe, m-a kar njendooje dəbə nekingaje lə-m tɔ̰y, ngaɓa, to gə ɓo m-ta ne lə dəw gə dɔ buguru nama, m-a kar-ɛ gɔl sɔɔ dɔ mar-ɛ gə. 9Be ɓa, Jeju pa ar-ɛ na: Kaji ɗe ɔji dɔ mə kəy gə nee ɓogəne, mba ꞌi kara, ꞌto ngon ka Abəraham tɔ. 10Mba ꞌma gə Ngon lə dəw m-ɗe mba sangə gə kaji nje gə d-igi.

Gusutar gə ɔji dɔ ngan sulay

Mat 25.14-30

11Logə d-isi d-aw d-o tarje nee be ɗaa, Jeju pa gusutar ila dɔ mar-ɛ gə ja cibi mba n-unda dɔ ɓe gə Jerujalɛm dəb ɗaa, ꞌjeje dəji mə-je gə to gə ɓeko̰ lə Luba le a tɔji rɔ-ɛ gə ɗaga kəm naa gə nee ja baa. 12N-pa to gə be na: ꞌMay kuji kara aw mba ɓe gə əw mba kar d-ula mbay dɔ-ɛ gə ɓa a təl ɗe ɓi. 13Kede nam ɓa kar n-aw ɗaa, n-ɓar ngan njekulaje lə-a dɔg, na-na kara n-ar-ɛ sulay kara kara ɗaa, n-pa n-ar-je na: ꞌTəl-je ji-si saar ndɔ gə m-a təl ɗe. 14Ngaa njebaɓeje lə-a njigi ang gə kɔrɔ ɗaa, d-ula ngan njekulaje go-e gə d-ar ꞌpa d-ar njeɓeje gə n-aw kəne le na: Jeje j-a njigi mba kar dəw gə nee le to mbay lə-si ang. 15Be ɓa, lo gə d-ula mbay dɔ-ɛ gə ɗɔdə ɗaa, ndɔ gə n-təl ɗe, ɗaa n-ula ɓar ngan njekulaje gə n-kay-je lar nee le no-ɛ gə gə mba ko, se dəw gə ɗa-ɗa kara təl ji-a to gə ban wa? 16Ngon njekula gə dɔngɔr ɗe, ɗaa pa na: ꞌƁəə-mje, sulay lə-i gə kara le inga sulay mar-ɛ dɔg. 17ꞌƁəə-eje le pa ar-ɛ na: Yanga, ngon njekula gə may, mba ne gə njɛ̰ ja baa ꞌto ngon kuji kəne nee ɗaa, m-unda-i gə njeko̰ dɔ ɓeboje dɔg ngaa. 18Ngon njekula gə njekum gə joo ɗe ɗaa pa na: ꞌƁəə-mje, sulay lə-i le inga mar-ɛ mi. 19N-pa n-ar-ɛ na: ꞌI kara, ɗəw kara baa, m-unda-i gə njeko̰ dɔ ɓeje mi. 20Ye gə kara gə ɗangə ɗe ɗaa, pa na: ꞌƁəə-mje, a o sulay lə-i gə m-ɓiri gə ta kubu wad-wad m-ngom le ɓa nee. 21M-ɓəəl-i mba ꞌi le ꞌto dəw gə kədərə ya̰: ne gə to kar-i ang ja baa kara uwa ar-ɛ təl kar-i nəm, ne gə ꞌdubu ang ja baa kara unja nəm tɔ. 22ꞌƁəə-eje le ila-a kəne na: Gə go tar gə ta-i gə ja m-a gangə ne tar dɔ-i gə, ngon njekula gə kṵra̰y; ꞌGərə to gə m-to dəw gə kədərə ya̰, gə ne to kar-m ꞌma ang baa kara, m-uwa m-ar-ɛ təl to kar-m ꞌma nəm, ne gə m-dubu ang baa kara m-unja nəm tɔ. 23Be ɗaa, mba ɗi ɓa ꞌngom lar lə-m le kəy ngom lar gə ang wa? A ɓo ndɔ gə m-təl nama, m-a ta lar lə-m gə man-e dɔ-ɛ gə. 24Ngaɓa ꞌɓəə-eje pa ar nje gə d-ar lo-e gə le na: ꞌTaje sulay gə kara gə ji-a gə le ar-je dəw gə k-ɛ dɔg. 25Pa d-ar mbay na: Mbayɓe, sulay dɔg to ji-a gə ngaa. 26M-pa m-ar-si: Dəw gə ne ga̰ ji-a gə ɓa d-a kar-ɛ mar-ɛ kəne, ngaa dəw gə ne godo ji-a gə le, ye gə ga̰ ji-a gə njɛ̰ ja kara, d-a ta ɗɔdə. 27Ye gə ɔji dɔ njeba̰a̰je lə-m, je gə njigi kar m-to mbay lə-je ang nee le ɗaa, ꞌɗeje gə je, ɓo ꞌtunjaje gɔbə-je no-m gə nee.

28Go tar gə Jeju pa to gə be ɗaa, ɔdə un ɗəw aw dɔ-ɛ gə Jerujalɛm.

MƏ ƁE GƏ JERUJALƐM. JEJU UY ƁA NDOL

Jeju andə mə ɓe gə Jerujalɛm

Mat 21.1-9; Mrk 11.1-10

29Be ɓa, logə ꞌce əw ang gə ɓe gə Ɓɛdəpaje, gə ɓe gə Ɓetani əər gə dɔ wuri gə kagə Olibiyeje d-ar kəne ɗaa, n-ula ngan njenendoje lə-a joo. 30Ɗaa n-pa n-ar-je na: Awje mə ɓe gə to no-si gə kən; logə a kandəje mə ɓe gə le nama, a kingaje ngon kororo gə dəw al-ɛ ang ɓi gə ꞌtɔ-ɛ nangə; ꞌtud-eje ɗaa ꞌɗeje sə-a. 31To gə ɓo dəw dəji si na: Mba ɗi ɓa ꞌtud-eje wa? Ɗaa a kila-aje kəne na: Mba Mbayɓe ɓa aw ndoo-e. 32Ngan njenendoje gə d-ula-je le, d-aw ɗaa, d-inga neje gə lo-e jəbə to gə Jeju pa ne tar-ɛ ar-je le ja tɔ. 33D-ar mba tudu ngon kororo be ɗaa, Ꞌɓəə-jeje dəji-je na: Mba ɗi ɓa ꞌtuduje ngon kororo nee wa? 34D-ila kəne na: Mbayɓe aw ndoo-e. 35ꞌƊeje gə ngon kororo le ɗaa, ꞌtɔrəje kubuje lə-je d-um dɔ-ɛ gə ngaɓa d-ar Jeju al-ɛ ɓi. 36Logə Jeju aw dɔ-ɛ gə kede tɔ ɗaa, ꞌlabəje kubuje lə-je nangə ɗəw boo. 37Logə Jeju nay dəb gə Jerujalɛm, logə ꞌɗisi dɔ wuri gə kagə olibiye d-ar kəne ɗaa, ngan njenendoje gə kobəre, d-un kudu pidi Luba gə rɔləl, gə ndu-je gə boy wəəl, mba nemisije tɔ̰y gə d-o. 38ꞌPa na:

Ndu tɔr to dɔ mbay, dəw gə ɗe gə ri Mbayɓe!

Ɗɛgɛgɛ to mə dara gə,

Ngaɓa, rɔnduba to sam dara gə.

39 Parijiyɛ̰je gə kɛm horo bula dəwje gə, ꞌpa d-ar Jeju na: Njenetɔji, ꞌndangə ngan njenendoje lə-i ar-je d-udu ta-je. 40N-ila kəne na: M-pa m-ar-si: To gə ɓo ꞌjeje d-udu ta-je kara kɔr ərje d-a kuru ꞌkuwi.

41Logə ꞌɗe dəb gə ɓe gə Jerujalɛm ngaɓa kəm-e oso dɔ-ɛ gə ɗaa, n-no mba tar lə-a na: 42N-pa na: Sisəy dəwje gə Jerujalɛm, to gə ɓo ꞌgərəje ne gə ɔji dɔ ɗɛgɛgɛ lə-si dɔ ndɔ gə ɓogəne, be je kara ne gə nee le iya rɔ-ɛ kəm-si gə. 43Oyo, ndɔje a ɗe kɔji dɔ-i, kar njeba̰a̰je lə-i d-a kila ndogo gugu ne dɔ-i mbugu, mba kila ɗɔ dɔ-i gə; d-a gugu dɔ-i mbugu kula naa gə, d-a kor-i wɔgɔgɔ gə loje tɔ̰y. 44D-a tɔl-i gə dəw mə ɓeje lə-i kərəng; d-a rundu neje tɔ̰y nangə pulug-pulug, mba mə-i uy dɔ ndɔ gə Luba ɗa nee sə-i may.

Jeju andə mə kəy gə lə Luba

Mat 21.12-17; Mrk 11.15-17; Ja̰ 2.13-17

45Jeju andə mə kəy gə lə Luba, ɗaa tɔbə nje ɗabə neje. 46N-pa gə je na: ꞌƊa mə mbede gə na: Kəy lə-m le a to kəy dəji Luba. Ngaa sisəy ꞌɗaje gə buja lə nje ɓogoje. 47Jeju tɔji ne gə ndɔje tɔ̰y mə kəy gə lə Luba. Buba njekapoloje, njekɔr gəl toronduje gə buba ɓeje ꞌsangə ɗəw gə mba tɔl-ɛ. 48Ngaa ꞌgərə gusu gə d-a ɗa ne ang, mba dəw mə ɓeje ꞌtunga mbi-je gə dɔ tar gə lə-a.

હાલમાં પસંદ કરેલ:

Lugu 19: lap

Highlight

શેર કરો

નકલ કરો