Lugu 17
17
Ɗəw koso dan neɗa gə kṵra̰y gə
Mat 18.6-7; Mrk 9.42
1Jeju pa ar ngan njenendoje lə-a na: Ɗəw gə dəw a koso ne dan neɗa gə kṵra̰y ang le godo. Ngaa tuji uba dəw gə ye ɓa to ɗəw koso dan neɗa gə kṵra̰y gə. 2To gə ɓo n-to jigi tuga koso lə ngon gə njɛ̰ kara horo nganje gə njɛ̰-njɛ̰ gə nee nama, to nokarə lə-a kar ꞌtɔ ər kusu ne gɔb-ɛ gə, d-ila mə babo gə. 3Undaje mə-si dɔ rɔ-si gə. To gə ɓo ngon ko̰-i ɗa neɗa gə kṵra̰y nama, ꞌndang-ɛ; a to gə ɓo n-turu kəji lə-a ɗaa, ɔr tar dɔ-ɛ gə. 4Ngaa to gə ɓo, n-ɗa neɗa gə kṵra̰y gɔl siri mə ndɔ gə kara, ɓa n-təl gɔl siri, n-ɗe n-pa na: M-turu kəji lə-m, ꞌi a kɔr tar dɔ-ɛ gə.
5 Njeka̰ykulaje ꞌpa d-ar Jeju na: Ar singa takagə gə lə-si oso dɔ mar-ɛ gə. 6Mbayɓe ila kəne na: To gə ɓo takagə lə-si to yəm-yəm baa to to gə kandə kam nay gə ri-a na mutarədə ja kara, ꞌpaje ar-je kagə sikomɔr gə nee na: Ɔr gə ngira-i ɓo aw maa rɔ-i dan babo gə kən nama n-a kila kuji dɔ si gə.
7Dəw gə ɗa ɓa horo-si gə, to gə ɓo ngon njekula lə-a ndɔ-ndɔ ose ngom daje nama a pa kar-ɛ lo gə ye təl muu ɗe: ꞌƊe gə ngɔdə gə isi nangə usa ne wa? 8A paje kar-ɛje to gə be na: Uwa dɔ gɔl nekusa lə-m, ɓo odo kubu kula ꞌtula rɔ-i gə ɗaa, ar-m nekusa m-usa, gə ar-m nekay m-ay ngaɓa, go-e gugu ɗaa, a kusa gə a kay kar-i ɓi ang wa? 9N-a təl gə oyo kar ngon njekula mba ye ɗa kula gə n-un ndu-e n-ar-ɛ mb-ɛ wa? 10Ɗəw kara baa, sisəy kara, lo gə ꞌɗaje neje tɔ̰y gə d-un ndu d-ar-si nama, paje na: Jeje j-a to gə ngan njekulaje gə j-asə kinga ne kara ang. Kula gə kəm kar-si j-a ɗa le ja baa j-a ɗa.
Jeju aji njebənjije dɔg
11Logə Jeju un ɗəw dɔ-ɛ gə Jerujalɛm, n-nday gə ɗəw gə horo dɔ nangə gə Samari gə dɔ nangə gə Galile. 12N-andə mə ɓe gə kara be ɗaa njebənjije dɔg ꞌɗe ꞌcila kəm-e. D-ɔsə gɔl-je ging d-ar nganga̰. 13ꞌPa tar gə ndu-je gə boy wəəl na: Jeju, ꞌɓəə-sijee, o kəmtondoo lə-si. 14Jeju o-je ɗaa, pa ar-je na: Awje, aw tɔjije rɔ-si ar-je njekapoloje. Logə d-aw d-aw gə kəne gə kaw ja baa ɓi ɗa, rɔ-je arə ngadə. 15Dəw kara horo-je gə o to gə to rɔ-ɛ arə ngadə ɗaa, təl ɗe ila ndu-e nangə ɔsə ne gaji Luba. 16Cibi n-təl n-oso nangə no gɔl Jeju gə, n-dəbə kəm-e nangə no-ɛ gə, ngaɓa n-ɗ-ɛ oyo. Dəw nee le to gə dɔ nangə gə Samari. 17Be ɓa, Jeju un tar pa na: ꞌJeje gə dɔg le rɔ-je arə ngadə gə kəm-je tɔ̰y ja ang wa? Ngaa, nje gə ji nay kara le d-aw ɗa wa? 18Dəw gə ɗangə kara gə unda dɔ dəw dɔ ɓe gə, gə təl ɗe ɔsə gaji Luba nee godo wa? 19Cibi Jeju təl pa ar-ɛ na: Ḭ taar aw, takagə lə-i aji.
Ɗe lə ɓeko̰ lə Luba
Mat 24.3-42
20 Parijiyɛ̰je ꞌdəji Jeju na: Ndɔ gə ɗa ja ɓa ɓeko̰ lə Luba le a ɗe wa? N-ila-je kəne na: Ɓeko̰ lə Luba le to ne gə a ɗe kar dəw o gə kəm-e nda̰-nda̰ ang. 21D-a pa na: Ye a to nee ose ye a to nu kən ang. Be ɓa, ɓeko̰ lə Luba le ga̰ horo-si gə nee.
22Ɗaa Jeju pa ar ngan njenendoje lə-a na: Ndɔje a ɗe gə mə-si a njinga mba ko, le ban kara, ndɔ lə ꞌma gə Ngon lə dəw kara baa ja horo mar-ɛ gə, ngaa a koje ndɔ-ɛ ang.
23D-a pa kar-si na: Ye a n-ar kən, ye a n-ar nee. Awje ang nəm, ndole-je go-je ang nəm tɔ. 24Be ɓa, ndɔ təl lə-m ꞌma gə Ngon lə dəw le kara a to to gə təl lə nji gə ḭ ko̰ dara gə kara gə ndogo saar ce ne ko̰ dara gə ɓe kara gə be tɔ. 25Ngaa kede nam ɓa nama, may kar n-o ꞌməsərə ya̰ ngaɓa kar dəwje gə ɓogəne d-a mbad-ɛ.
26Ne gə ce dɔ ndɔ gə lə Nowe le, a ɗe ɗəw kara baa to gə dɔ ndɔ gə lə ꞌma gə Ngon lə dəw tɔ. 27Dəwje d-usa gə d-ay, ngaɓa ꞌta naa saar ce nee ndɔ gə Nowe andə ne mə to gə, ngaɓa man bələm ɗe busu-je rag-rag. 28A to ɗəw kara baa to to gə dɔ ndɔ gə lə Lɔd; dəwje d-usa gə d-ay, ꞌndogo ne, ꞌɗaɓə ne, ꞌmaa kagəje, d-unda kəyje; 29ngaa ndɔ gə Lɔd ce mə ɓe gə Sɔdom ɗaa, Luba ar nji ḭ dara ər, nji gə to pər gə o̰ bilim-bilim ar-je ꞌbusu nee rag-rag. 30Ndɔ gə ꞌma gə Ngon lə dəw m-a kila rɔ-m gə ɗaga le, a to to gə be ja tɔ. 31Dəw gə isi dɔ kəy gə nama, a ɗisi kodo neje lə-a gə to kəy ang; nəm ɓa dəw gə ar aw ɗa kula ndɔ nama, a̰yi dɔ-ɛ gə kede ɓo a təl go-e ang. 32Ar-je mə-si ole dɔ jene lə Lɔd. 33Dəw gə a sangə mba ka dɔ təbə lə-a kər-kər nama, a kila-a kɔrɔ, a ɓo dəw gə ila təbə lə-a kɔrɔ nama a təl kinga-a. 34Oyo, m-pa m-ar-si, mə cil-e gə nee le, dəwje joo d-a to dɔ cira gə kara baa ja, ngaa d-a kun dəw gə kara ɗaa d-a kiya̰ ye gə kara. 35Jeneje joo gə d-a kar kuru gɔy naa gə, d-a kun dəw gə kara ɗaa d-a kiya̰ ye gə kara. 36Jingawje joo gə d-a kar ndɔɔ gə le, d-a kun dəw gə kara ɗaa, d-a kiya̰ dəw gə kara. 37Ngan njenendoje d-un tar ꞌdəji Jeju na: Ne gə nee le a to lo gə ɗa gə wa Mbayɓe? Lo gə yo ne to kəne nama, lo-e gə əng ja malje d-a mbo̰ naa kəne.
હાલમાં પસંદ કરેલ:
Lugu 17: lap
Highlight
શેર કરો
નકલ કરો
Want to have your highlights saved across all your devices? Sign up or sign in
© 2020, ATALTRAB. All rights reserved
