Лукастар 11

Ісус сікавел, сар те модліненпес

1Єкгвар, кана Ісус модлінеласпес про єкг тган і преачіля, акор єкг Лескєре сікадендар пгендя Лескє:

— Раєя, сікав амен те модліненпес, сар Іоанн сікадя пескєре сікаден.

2Ов ленґє пгендя:

— Кана модліненпес, пгенен авка:

Даде, мі ашарелпес Тийро свентно нав!

Мі авел Тийро Краліпе!

3Маро амаро сакодівесескєро

де аменґє про сако дівес!

4Одмук аменґє амаре бійні,

бо те амен одмукас саконескє,

ко аменґє камел.

І на пробалін амен аврі.

5Паліш Ісус пгендя ленґє:

— Пгенага, кє варекасте тумендар гін баратос, і ту джяга кє лесте про єпаш рат і пгенега лескє: «Баратона, де манґє про кейчен трін маре, 6бо авля мійро баратос пало дром кє манде, і манґє нане, со лескє те ден». 7Чі пгенела ов андрунестар: «Де манґє смійром! О вудар іма запганло, чаве мійре манца совен про тган, на бійрінав ме канакє те ушен і те ден тукє о маро»? 8Пгенав туменґє, те ов на ушела і на дела лескє, со оне гіне барата, та важ ода, со ов на преачел те манґєн, ов ушела і дела лескє айці, кєці ов манґєл.

9Важ ода Ме пгенав туменґє: манґєн — і дена туменґє, роден — і аракгєна, дуркінен — і пгутерена туменґє. 10Бо сако, ко манґєл, худел, а ко родел, ода аракгєл, а одалескє, ко дуркінел, пгутерена. 11Чі аракгєлапес машкар туменде айсо дад, саво дела пескєре чаворескє ле сапес, кана ода манґєла мачі? 12Або, те ода манґєл о андро, дела лескє ле скарпіонос? 13Те тумен сан подле, а джянен те ден пескєре чаворенґє лаче дарункі, та акор Нєбоскєро Дад минґ федер дела Свентне Духос одаленґє, ко Лестар манґєл!

Кгєр, саво розуладяпес, на тердьола аврі

14Ачіля, со Ісус транля аврі ле нємоскєре дємон. І кана дємон авля аврі, мануш, саво есас нємо, завакєрдя. А о нийпос чудалінеласпес. 15Та вареко лендар пгендя:

— Ов традел аврі ле дємонен Вельзєвулоскєра зорага, хулай дємоненґєро!

16Авер камле те пробалінен ле Ісус аврі і манґєнас Лестар, гой Ов мі сікавел ленґє знаменіє пало нєбос. 17Та Ісус джянелас, пал состе оне думінен, і пгендя ленґє:

— Сако краліпе, саво розуладо андрунестар, чувчісальола. І о кгєр, саво розуладяпес коркоро андре песте, перела. 18Те о сатана коркоро андре песте розуладяпес, акор, сар тердьола аврі лескєро краліпе? Тумен вакєрен, со Ме Вельзєвулоскєра зорага традав аврі ле дємонен. 19Те Ме Вельзєвулоскєра зорага традав аврі ле дємонен, акор тумаре чаве кага траден аврі лен? Важ ода оне ейна судзі туменґє. 20Те Ме Девлескєра зорага традав аврі ле дємонен, акор Краліпе ле Девлескєро авля кє туменде. 21Кана зорало і міште оружоно мануш меркінел про пескєрі двовра, акор лескєро хулаїпе на проперела. 22Та кана вареко, ко зораледер мануш, хутєла пре лесте і марела лес, акор залела лестар лескєро оружіє, про саво есас бійзошно о хулай, і акор розулавела лескєро хулаїпе.

23Ода, ко на Манца, ода джял протів Манде, і ко на іскідел Манца, ода розчівкєрел.

Шуладо аврі кгєр

24Кана нажувжо духос авел аврі ле манушестар, акор блудзінел пало біпанєскєре тгана і родел о тган те спочовінен, та на аракгєл лес. Акор ов пгенел: «Вісалювава ме андро кгєр, катар ме авльом аврі». 25Кана авел пале, акор аракгєл ода кгєр шуладо аврі і жувжо. 26Акор ов джял і лел пега авер ефта духі, саве минґ холяредер, сар ов. І кана оне авен, то ачен одя те джівен. І ода ачел минґ хужедер одалестар, со есас чірла.

Ко гіно бахтало

27Ісус минґ вакєрелас, кана єкг ромні ле буте нийпостар завріскіндя:

— Бахталі оди дай, саві ловтярдя Тут і годовіндя Тут аврі!

28Ісус отпгендя:

— Бахталедер одала, ко шунел Девлескєро лав і кєрел авка!

Ле Іонаскєро знаменіє

29Кана іскіденаспес минґ бутередер мануша, акор Ісус кєздиндя те вакєрен:

— Када родос — подло. Оне чак роден знаменіє, та ода на делапес ленґє, чак о знаменіє ле Іонаскєро. 30Бо сар о Іона ачіля знаменьога прекал мануша андро Ніневія, авка ейла те о Ча ле Манушенґєро кадале родоскє. 31Кралєвна югостар тердьола про судос кадале родоскєре манушенца і судзінела лен. Ой пало авер пгувакєро аґор авля те шунен Соломоноскєро ґодяверіпе. А канакє туменца аде Ода, Саво гіно баредер Соломоностар! 32Мануша андал Ніневія тердьона про судос кадале родоскєре манушенца і засудзінена лен, бо оне покаїндепес, кана шунде Іонаскєре лава. А канакє туменца Ода, Ко баредер Іонастар!

Пало шветлос

33Кана вареко залабарел е лампа, на тговен ла те тердьол андро ґарудо тган або толо чаро, а чак про лампакєро тган, гой одала, саве заавен, мі дикгєн о шветлос. 34Тийрі якг — лампа тийре тєлоскє. Кана якг тийрі жувжі, акор цейло тийро тєлос ейла пгердо ле шветлога. Те кє туте тийрі якг подло, акор те саворо тийро тєлос ейла цма. 35Важ ода дикг, гой шветлос, саво андре туте, те на ейл цма. 36Те тийро саворо тєлос пгердярдо ле шветлога і нане андре лесте нісаві цма, акор саворо тєлос ейла шветло, авка, сар кана е лампа ошвецінел тут пескєре віланіга.

Ісус судзінел буджяндіпе фарісєйсько те Законоскєре танітовен

37Кана Ісус авка вакєрелас, єкг фарісєй вічіндя Лес кє песте про дийлос. Ісус авля і захундя о тган пажо скамін. 38Фарісєй чудаліндяпес, кана дикгля, со Ісус на мордя о васта анґлал о хавібе. 39Акор о Рай лескє пгендя:

— Тумен, фарісєї, жувжарен кувча те о чаре аврунестар, а андрунестар тумен пгерде сан гамішаґога а те подліпнага. 40Дилине! Чі Ода, Ко кєрдя аврунескєро, на кєрдя те андрунескєро? 41Ода, со андрунесте, ден сар мілостиня, і акор саворо прекал туменде ейла жувжо!

42Біда туменґє, фарісєї! Тумен анен дештато котор андал е мята те андал е рута і андал шільяко чар, а чачібе те Девлескєро камібен тумен обджян! Кампел те кєрен те ода, та наший те бістерен те пало дуйто.

43Біда туменґє, фарісєї! Тумен камен те бешен про єкг федер тгана андре сінаґоґа і камен, кана туменґє палікєрен про піяціс.

44Біда туменґє! Тумен маренпес про нєобозначіме гробі, пал саве пгірен о мануша і на джянен пал ода!

45Акор єкг танітов Законоскєро пгендя Лескє:

— Танітов, Ту Тийре лавенца шіртинес те амен.

46Ісус отпгендя:

— Біда туменґє, танітова Законоскєре! Тумен тговен про мануша пгарібена, саве пгарес те гординен, а тумен коркоре ані анґуштега на дотговена ко ода.

47Біда туменґє! Тумен строїнен памятніка ле пророкенґє, савен тумаре дада мурдарде. 48Одалега тумен сікавен, со подлікєрен ода, со кєренас тумаре дада. Оне мурдарнас ле пророкен, а тумен строїнен ленґє памятніка. 49Важ ода ґодяверіпе Девлескєро і пгендя: «Бічавава Ме ленґє ле пророкен те ле апостолен, єкгє лендар мурдарена, а дуйтонен лендар традкєрена». 50Важ ода дадівесескєре родостар пгучелапес важо рат саворе пророкенґєро, саво есас чьордо отканастар сотворіме есас о светос, 51ле Авельоскєре ратестар джі ко Захаріяскєро рат, саво есас мурдардо машкар о алтаріс те о храмос. Га, пгенав туменґє, адале родостар пгучелапес важ саворо.

52Біда туменґє, Законоскєре танітова! Тумен заілян е клєя ґодяверіпнастар; та коркоре на заґейлян, а те одаленґє, ко заджялас, на динян.

53Кана Ісус авля аврі андал о кгєр, танітова Законоскєре а те о фарісєї кєздинде те худенпес кє Лесте і бут со пгучкєренас Лестар. 54Оне камле те худен Лес про лав.

હાલમાં પસંદ કરેલ:

Лукастар 11: ЗРБ

Highlight

શેર કરો

નકલ કરો