मत्ति 13
13
बिउ कावेत्ओ दोय़ङ्ला
मर्कुस ४:१-१२,२५; लुका ८:४-१०; १०:२३-२४
1मो लेन येसु खिम्दाङ्का म़लोन्ताकि धियाङ्वामाओ अ़केम्दा म़युङा। 2ब़द्धे म़ना मुक्लाचि खोक्कोसोओ अ़चुऱङ्कोप्नि म़कोवान्चिन, खोन्ओसा खोक्को नावादा म़वाङाकि मोदा म़युङा। खोन्कि झारा म़नाचि मो धियाङ्वामाओ अ़केम्दा म़एवा। 3खोन्किना खोक्कोसाआ मोचि दोय़ङ्लाचिदा ब़द्धे य़ङ्चि म़लोचि।
खोक्कोसाआ म़लोचि: “अ़क्छा बिउ कावेत बिउ वेत्सि खारा। 4बिउ वेत्तुङुहिदा अ़क्चित बिउचि लाम्दात्नि म़छुक्ता, खोन्कि छोङ्वाचि म़ताकि मो बिउ अ़चाखात्ता। 5अ़क्चित बिउचि ब़द्धे बाखा मात्द़ङ्याङ्ओ लुङ्खावाचिदात्नि म़छुक्ता। मोचि च़क्नि खेक्तुचि, मेन मोदा ब़द्धे छान्लो बाखा मात्द़ङ्याङ्ओसाआ 6नाम बानाहिदा मो अ़लिम्चि म़राङ्ताखारा खोन्कि मोचिओ अ़चुभेन ह्युहुत्युतारि खात्मा मान्ऱओसा म़युलाखारा। 7अ़क्चित बिउचि त़ङ्खोक्वालादा म़छुक्ता, खोन्किना त़ङ्खोक्वा ताङ्चि म़पोयालोन्ताकि मो बिउचि म़उप्तुदिसुचि। 8मेन अ़क्चित बिउचि अ़नुवाक बाखादा म़छुक्ता, खोन्कि खा-खाक्कोसाआ सयेकास़रो, साथिकास़रो, खोन्कि तिस्कास़रो च़लोक अ़चुसिवा अ़सिसा। 9साङ्को अ़एन्खा नाबाक याक्याङ, मोसाआ एनुने!”
10खोन्किना येसुओ अ़चुकाखेङ्पाचि म़ताकि खोक्को अ़सेना, “देकि खानानिन म़नाचिएनान दोय़ङ्लाचिदा त़चेविन्येन?”
11येसुआ मोचि म़लासुलोचि, “खानानिन निनाम्हाङ्होन्ओ अ़कोङ्दुम्ओ अ़तुक्वादा तुप्खाताया ऩप़न्युङ्सिन, मेन निचि माआङ। 12देकिनालो साङ्एदा युङ्याङ, मो च़लोक प़, खोन्कि मोएदा ब़द्धे लि। मेन साङ्एदा मात्द़ङ, मोएदा युङ्याङ्ओछाङ मोएदाङ्का अ़ङाप। 13खोन्ओसा अ़ङ्का मोचिएनान दोय़ङ्लाचिदा चेप्ङा:
‘देकिनालो मोचिआ चोप्मा ना अ़चोप, मेन ऩखान,
एन्मा ना अ़एन, मोचिआ अ़एन्कि ऩतुप्तुन।’
14 मोचिएदा यसैयाओ निनाम्हाङ्य़ङ खालुमा तालायुङ्सा:
‘एन्मा ना खानानिन त़एनुम, मेन देम्खाछाङ त़तुप्तिमिन,
चोप्मा ना त़चोउम, मेन देम्खाछाङ त़खान्मिन।
15 देकिनालो ओ म़नाचिओ अ़चुओ मिन्माचि मान्तुप्कादा लिसायुङ्सा।
खोन्कि मोचिओ अ़चुओ नाबाक खामान्एन्कादा लिसायुङ्सा।
खोन्कि मोचिआ अ़चुओ म़क अ़सिप्तायुङ्सा।
माङ्नालो मोचिआ अ़चुओ म़क्आ खाङ्मा अ़रुवाओ, खोन्कि अ़चुओ नाबाक्आ अ़एनाओ,
खोन्कि अ़चुसाकोङ्वाआ अ़तुप्ताओ।
खोन्कि अ़ङ्काएदात्नि म़लासाओ,
खोन्कि अ़ङ्का मोचि नुसुङ्च़ङ्ओ’। #
यसैया ६:९-१०
16 मेन आम्नुओ म़क आसिखा कातोक ओ, देकिनालो मोसाआ खाङु। आम्नुओ नाबाक आसिखा कातोक ओ, देकिनालो मोसाआ एनुङु। 17अ़नुछ्या अ़ङ्का खानानिन लोनानिन, खानानिन्आ त़खाम्ओ य़ङ्चि ब़द्धे निनाम्हाङ्य़ङ खाकालुचि खोन्कि साम्योक्मि म़नाचिआ खाङ्मा अ़न्नुनु म़सुवाङा, मेन खाङ्मा मान्तोक्अ़दा। खोन्कि खानानिन्आ त़एनुम्ओ य़ङ्चि मोचिआ एन्मा म़सुवाङा, मेन एन्मा मान्तोक्अ़दा।
दोय़ङ्लाओ अ़तुप्माय़ङ
मर्कुस ४:१३-२०; लुका ८:११-१५
18 हान बिउ कावेत्ओ दोय़ङ्लाओ अ़तुप्माय़ङ एनानुम। 19साङ्आ हाङ्होन्ओ अ़तुक्वादा य़ङ्खान एनु, खोन्कि मो अ़तुप्तुन, मोन्ग़रि सैताना ताकि मोसोओ अ़साकोङ्वादा दि वेत्ताओ, मो ङाप्तुखात्तु। लाम्दात्नि म़छुक्ताओ बिउचि ओचिङा ओ। 20लुङ्खावादा म़छुक्ताओ बिउचि ओचिङा ओ, साङ्आ य़ङ्खान एनुकि अ़ऩङानुयाङ्सा मो च़क्नि लोउ, 21मेन मोसोओ अ़भेन अ़मेत्तुन्ओसा मो अ़क्चित लेन ओन्ङा ह़ङ, खोन्कि निनाम्हाङ्ओ अ़चुय़ङ्दा साकोङ्छ़ङ मुवाओसा अ़चाअ़त्मा माङ्लो ल़क्मा ताहिदा निनाम्हाङ्ओ अ़चुय़ङ साकोङ्छ़ङ मुमादा मो च़क्नि देङ्ला। 22त़ङ्खोक्वालादा म़छुक्ताओ बिउचि ओचिङा ओ: मोसाआ निनाम्हाङ्ओ अ़चुय़ङ एनु, मेन ओ हेन्खामादाओ मिन्राक्चि, चासुम्छेन्बि च़क्ख़य़आ मो निनाम्हाङ य़ङ उप्तुदिसु, खोन्कि मोसाआ अ़सिवा अ़सिसुन। 23मेन अ़नुवाक बाखादा म़छुक्ताओ बिउचि ओचिङा ओ, साङ्आ निनाम्हाङ्ओ अ़चुय़ङ एनुकि तुप्तु, खोन्कि खोसाआ वेत्ताओ बिउदाङ्का अ़नुछ्याङा सयेकास़रो, साथिकास़रो, खोन्कि तिसकास़रो सिवा सिसु।”
सामाओ दोय़ङ्ला
24येसुआ मोचि नि दोय़ङ्ला म़लोचि, “निनाम्हाङ्होन अ़क्छा म़नाएनान तोङ्माखाङ्मा ऱम, मोसाआ अ़व़क्दा अ़नुवाक बिउ वेत्तु। 25मेन झारा म़इम्सादाहिदा खोसोओ अ़ङेङ ता, खोन्कि छुमाचाओ अ़रादा सामा वेत्तुदो खोन्कि खारालोन्ता। 26खोन्किना छुमाचाओ अ़ताङ पोया खोन्कि अ़सिवा सिसु, मोन्ग़रि सामाछाङ मोदा दारा।
27 खिम्हाङ्पाओ अ़हारुक्चि म़ताकि खो अ़लोवा, ‘हाङ्पो, दि खानानिन्आ आम्नुओ व़क्दा अ़नुवाक बिउ त़वेत्तुम्ओ माआङ? खादाङ्का सामा मोदा ता?’
28 खोसाआ मोचि लासुलोचि, ‘ओ खाउ ङेङ्आ मुओ।’
अ़हारुक्चिआ खो अ़सेना, ‘दि आन्कान्का खारिन्काकि मो सामाचि धेलुम्खाइसुम्कानेनि त़मिनिन्येन?’
29 मेन खोसाआ लासुलोचि, ‘मान्धेन्दानुम, देकिनालो खानानिन्आ सामा त़धेलुम्योम्हिदा मोएनान छुमाचाछाङ धेन्माखान्मा त़ऱम। 30चा कोप्मा मान्लियुक्तारि ह्वातात्माङ अ़क्नि पोन्मा पुवानुम्च़म। चा कोप्मा ग़रिदा चाकाहेक्चि अ़ङ्का लोङ्च़ङ, बुया सामा धेलानुम खोन्कि मोचि भोङानुम्च़म्कि ह़त्माखाइसानुम्च़म। खोन्किना छुमाचा अ़ङ्स़ङ्कुलुधुन्दा कोआनुम।’”
प़सैओ अ़ल़वा खोन्कि खमिराओ दोय़ङ्ला
मर्कुस ४:३०-३४; लुका १३:१८-२१
31येसुआ मोचि नितात दोय़ङ्ला खाम़एत्तुचि, “निनाम्हाङ्होन प़सैओ अ़ल़वावाको ओ। मो अ़क्छा म़नाआ खात्तुकि अ़व़क्दा वेत्तु। 32मो झारा बिउचिदा अ़चुप्पो मुनुछाङ मो पोन्कि झारा लिम्खान्चिदाङ्का अ़धिवाङ लिलाप। खोन्कि ओ अ़क्तात स़ङ्ताङ्वाको लिओसा, नाम्छ़ऱदुओ छोङ्वाचि म़ताकि ओसोओ अ़खेत्चिदा याङ म़पाक।”
33खोक्कोसाआ मोचि नितात दोय़ङ्ला खाम़एत्तुचि, “निनाम्हाङ्होन खमिरावाको ओ। मो अ़क्छा मेत्छामाआ खात्तु खोन्कि ब़द्धे बुत्थ़दा खमिरा होलु, खोन्कि खमिराआ झारा बुत्थ़ होम्सुलोइसु।”
34येसुआ ओ झारा य़ङ्चि दोय़ङ्लाचिदा म़नाचि खाम़एत्तुचि। खोक्कोसाआ दोय़ङ्ला मान्याङ्माङ दित्छाङ मोचि मान्लोम़दोचि। 35ओवात्नि निनाम्हाङ्य़ङ खाकालुदाङ्का य़ङ्माय़ङ ताला:
“अ़ङ्का दोय़ङ्लाचिदा मोचिएदा चेप्ङा,
हेन्खामा मुयादाङ्का कुम्सायुङ्साओ य़ङ्चि अ़ङ्का मोचि खाएत्तुङ्च़ङ।”#साम्ऱङ्भुङ ७८:२
सामाओ दोय़ङ्लाओ अ़तुप्माय़ङ
36खोन्किना खोक्कोसाआ म़ना मुक्लाचि म़छिरुदोचिकि अ़चुखिम म़खारा। खोन्कि खोक्कोसोओ अ़चुकाखेङ्पाचि खोक्कोएदा म़ताकि अ़लोवा, “व़क्दाओ सामाओ अ़तुक्वादाओ दोय़ङ्लाओ अ़तुप्माय़ङ आन्कान्का खाएत्नि।”
37खोक्कोसाआ मोचि म़लासुलोचि, “अ़नुवाक बिउ कावेक म़नाओ अ़छा ओ। 38व़क हेन्खामा ओ, खोन्कि अ़नुवाक बिउ निनाम्हाङ्होन्दाओ अ़चुछाचि ओ, खोन्कि सामा सैतानाओ अ़छाचि ओ। 39सामा कालित ङेङ सैताना ओ। चा कोप्मा जुगाओ अ़लुक्मा ओ, खोन्कि चा काकोप्चि निनाम्हाङ्ओ अ़चुकाफाचि ओ।
40 देत्नि सामा धेन्किना मिदा ह़त्खान, जुगाओ अ़देङ्दाछाङ मोवात्निङा लि। 41मो लेन म़नाओ अ़छाआ अ़चुकाफाचि म़छुत्तुचि, खोन्कि मोचिआ खोक्कोसोओ अ़चुहाङ्होन्दाङ्का झारा हेवा मुकामेत खोन्कि अ़त्लो काच़चि झारा म़कोउचि। 42खोन्कि मोचि मिराक्दा म़वेइसुदिसुचि। मोदा म़नाचि म़खाप खोन्कि अ़चुक़ङ अ़ऱक। 43खोन्किना साम्योक्मि म़नाचि अ़चुओ निनाम्हाङ पापाओ अ़चुहाङ्होन्दा नाम्वात्नि म़लेत। साङ्को अ़एन्खा अ़नाबाक याक्याङ मोसाआ एनुने!
कुम्माय़ङ फेक्वाओ दोय़ङ्ला
44 निनाम्हाङ्होन व़क्दा कुम्माय़ङ फेक्वावाको ओ। मो अ़क्छा म़नाआ धिरुकि मो लासुकुम्सु, खोन्कि अ़ऩङानुयाङ्सा खो खात्कि खोएदा युङ्याङ्ओ झारा सामा इनु खोन्कि मो व़क खिरु।
वाचेत्लुङ्ओ दोय़ङ्ला
45 हान, निनाम्हाङ्होन अ़नुवाक वाचेत्लुङ्चि कालाम अ़क्छा काखित-काइन म़नावाको ओ। 46मोसाआ अ़क्तात ब़द्धे अ़लुङ छ़ओ वाचेत्लुङ धिरु, खोन्कि खात्कि खोएदाओ झारा सामा इनुकि मो खिरु।
ङा लाप्खा बोप्छ़क्ओ दोय़ङ्ला
47 हान, निनाम्हाङ्होन धियाङ्वामादा वेत्माय़ङ्ओ अ़क्तात बोप्छ़क्वाको ओ। मोदा झाराकाखालाओ ङाचि म़धा। 48खोन्किना बोप्छ़क भेप्ताकि म़नाचिआ मो धियाङ्वामाओ अ़केम्दा अ़सारालोत्ता। खोन्किना म़युङाकि अ़नुवाक्चि खेङ्चिदा म़कोउचि, मेन अ़अ़त्पाचि म़वेत्तुखाइसुचि। 49हेन्खामाओ अ़लुक्मा ग़रिदा ओवात्निङा लि। निनाम्हाङ काफाचि म़ताकि अ़अ़त्पाचि साम्योक्मिचिओ अ़चुरादाङ्का म़फेउचि, 50खोन्कि मोचि मिराक्दा म़वेइसुदिसुचि। मोदा म़नाचि म़खाप, खोन्कि अ़चुक़ङ अ़ऱक।”
51येसुआ म़सेनुचि, “दि खानानिन्आ ओ झारा य़ङ्चि त़तुप्तुम्च़म?” मोचिआ खोक्को अ़लोवा, “तुप्तुम्च़म्का।”
52खोक्कोसाआ मोचि म़लोचि, “खोवात्निओसा, साङ्छाङ निनाम्हाङ्होन्ओ अ़तुक्वादा चिन्ताकिना अ़य़ङ्हुप काचिन्पा लिसानालो, खो अ़क्छा खिम्हाङ्पावाको ओ। खोसाआ अ़स़ङ्कुलुधुन्दाङ्का अ़ऩङ्वा खोन्कि बुयाओ अ़लुङ छ़ओ सामाचि बुङ्खादा लारुचि।”
नासरत्दा येसु ऩङाअ़छिराओ
मर्कुस ६:१-६; लुका ४:१६-३०
53दोय़ङ्लाचि खाम़एत्तुचिउचिकि येसु मोदाङ्का म़खारा। 54खोन्किना अ़चुसहरा नासरत्दा म़ताकि खोक्कोसाआ मोचिओ अ़चुयावायोक्खिम्दा म़नाचि म़चिन्तुचि, खोन्कि मोचि दोम्दायाङ्सा म़य़ङा, “खादाङ्का ओक्को म़नाआ ओवाको खारु खोन्कि म़दोम्दाओ काचि मुमा सावा तोक्तु? 55दि ओक्को स़ङ्काचि कामुओ अ़छा माआङ? दि ओसोओ अ़माओ अ़ऩङ मरियम माआङ? खोन्कि दि ओसोओ अ़निछा दुवाछाचि याकुब, योसेफ, सिमोन खोन्कि यहुदा माआङ कि? 56दि ओसोओ झारा अ़छेत्कुमा निछाचि आन्कान्एनान ऩयुङ्निनिन कि? ओसाआ ओ झारा य़ङ खादाङ्का तोक्तु?” 57खोन्ओसा मोचिआ खोक्को अ़सुङ्ता खोन्कि साकोङ्छ़ङ मान्मुअ़दा। मेन येसुआ मोचि म़लोचि, “निनाम्हाङ्य़ङ खाकालु अ़तेन्दा खोन्कि आप्पि अ़खिम्दा साया ऩमेत्तुन, मेन नि झारादा साया अ़मेत।” 58खोन्कि मोचिओ अ़चुसाकोङ्छ़ङ मान्मुदामाआ, खोक्कोसाआ मोदा म़दोम्दाओ काचिचि ब़द्धे मान्मुअ़दा।
હાલમાં પસંદ કરેલ:
मत्ति 13: bap
Highlight
શેર કરો
નકલ કરો
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
