Lucas 12
12
Katij najj mjaa'yëtë naa'xkë'n fariseostëjjk
1Nits kawinaak miijl jaa'y nyamyujk'atëëjtsëtë, maynyäxy y'ijjty jaa'y, yëkxon nyanyastijjë'y'oo'kexyë tu'uk janitu'uk. Jäts Jesús jawyiin tnëëjmjaay y'ixpëjkpëttëjjk: Na'y'ijxy'ittëtë jäts katij fariseostëjjk mwin'ëënyëtë, yë' ëjts ntijjpy ku kä'ä tkuytyuntë mati' kë'm nyaskajpx'eetyë'p. 2Jä'ku yëkpatp jä' tukkë'yë mati' yu'utsy ijtp, jäts yëknijaa'w'eepy jä' mati' yëktump amää'tsk. 3Tukkë'yë mati' miits tëj xkäjpxy akootsy'attüjpy yëknijawë'p jä' ku it xyëëjnyë't; jäts tukkë'yë mati' miits mkajpxtë'p amää'tsk attujkpety, nyijaa'wëkyëxtë'p jä' nitukkë'yë jaa'y.
Pën jä' jyeexyë yëktsë'ëjk'eepy
4Miits muku'uktëjjktë, ixyam ëjts nwa'any, katij xtsë'ëkëtë pën nikkëjjx tyëk'oo'ktë'p, jä'ku yë' jä' jä'yë maajyëtë'p. 5Ixyam ëjts nnikkäjpxy pën mtsë'ëkëtë'p: Tsë'ëkëtë jä' pën myëk'ookëtë'p jawyiin, nits tyëknikuttukkë't jäts jënjötypy mpakkäxëtë't. Tëy ëjts nwa'any jä' mtsë'ëkëtë'p.
6Tyatsotüjkypy mäjtsk pujjxmeeny nimuwoxk jon'uu'nk, oyë'mts jä' në'n jyakatsowaaty, jaa'myetsy jä' Yës Teety yëk'ityëtë. 7Ninyajjts miits, matsyoy Yës Teety mwaay tyëk'ity. Jakëjxts ëjts nwa'any katij mtsë'ëkëtë: Jawäänë këjx'am miits mtsowaaty, kä'ä në'n tsyowaaty nimay jon'uu'nk.
Katij Jesús xkutso'oyëtë
8Ixyam ëjts nnikkäjpxy, pënpën tkakkutso'oy'eepy nits nitukkë'yë jaa'y tnëëjmë't jäts ëjts jä' xtëyjyaa'w'eepy, ninyajj ëjts nnëëjmë't Yës Teety tyumpëttëjjk mati' jäm tsapjotm, nits tëyë'm jä' jäts xtëyjyaa'w'eepyë'm ëjts jä'. 9Pënts tkutso'oyjyaa'w'eepy jäts jaa'y tnëëjmë't nits x'ijx'eepy ëjts jä', ninyajj ëjts mëët nnëëjmë't Yës Teety tyumpëttëjjk mati' jäm tsapjotm jäts kä'ä ëjts jä' n'ijxë.
10Myää'kxtukp Yës Teety pën y'uu'nk ka'oytyijjxë'p mäjtsk tuwëëkyaajjë; pënpënts tka'oytyijjp kë'm Yës Teety jyaa'wë'n, nittij mää'kx kya'itt.
11Ku jaa'y mmunëjkxëtë't, maj pawaa'n yëk'ixpëjkpëttëjjk yo'ymyuktë, ok yëkkuttujkpëttëjjk wyinkujkm, katij xwinmaytyë ntsoj mnakyuwa'anëtë't ok ntsoj mnakyu'atsowëtë't, 12ku tpaatt jäts miits mkajpxt, kë'm Yës Teety jyaa'wë'n mwaa'nxëtë't ntsoj mwa'antë't.
Kumeenyjyaa'y mati' winjaa'w'ëë'ny tkamëët
13Jäm tu'uk jaa'y kyajpxkeejky jaa'y'akujkm jäts tnëëjmjaay Jesús:
—Wintsën, nnëëjmë ëjts n'ajjtsy jäts ëjts xmo'ot mati' ëjts xpatp, jä' mati' ëëts nteety yyëktaan.
14Jäts Jesús y'atsoojjë:
—Muku'uk, ¿pën ëjts tëj xkexy yëkkuttujkpë jäts ëjts miits mtsip nyëkwin'oyë't?
15Jäts jyakwaany:
—Na'y'ijxy'ittëtë, katij x'appëjktëjjkëkyëxtë tukkë'yë pëntijjäty m'ijxtë'p m'aa'xtujktë'p; Jä'ku kä'ä yë' jotkujjk'ajjt xtappaajtë'n.
16Nits Jesús tu'uk ijxpäjjt tmatyaajky: Jää'ëëy tu'uk kumeenyjyaa'y, mati' y'ijjty tëj yëkxon myoojk xyëjjk tyëëm'ajjtxyë. 17Nits jä' kumeenyjyaa'y wyinmaay: ¿Tij ëjts ntu'mp? Kä'ä y'ok'ijtnë maj ëjts nkoojnjë'ëkt nmoojk nxëjjk. 18Jäts nya'y'awinmaa'y'ajjtë kë'm: ¡Tëj nijawë tij ëjts ntu'mp!. Ntajjë'këxp ëjts yë' tukkë'yë ntëjjk mati'jäty ëjts nyëktümpy koojnjë'ktaajk nits y'eewyë nyëk'oyë't jawäänë mëjjäty, jäjpts ëjts nkoojnjë'ëkt nmoojk nxëjjk mëët tukkë'yë tijjäty ëjts mëët. 19Nits ëjts nwa'ant: Muku'uk, jäj xmëëtë tij mtajükyë'p kawinaak jumëjjt; poo'kx, kay, uuk, jäts taxonta'ak jüky'ajjt." 20Jäts Yës Teety nyëë'mxë: ¡Kawinjaa'w'eepyë jaa'y! Ya'at tsuuj yi'it m'ookt, jäts mati' tëj xpëjjkjë'ëky, ¿pënts jä' tmutta'mp? 21Najj jaa'y jyäty pën yaj naxwiiny mëjk'ajjt nikoj tyëkmay'eetyë'p, jäts ayoop tyantë Yës Teety wyinkujkm.
Y'ijxy'ijtypy Yës Teety y'uu'nktëjjk
22Nits Jesús tnëëjmjaay y'ixpëjkpëttëjjk: «Ixyam ëjts nwa'any: Katij xmaytyë xtajjtë tij mka'ytyë'p mjëë'kxtë'p jäts xtajükyëtë't, ok tij mwittëtë'p. 23Jä'ku tsowatp yë' jüky'ajjt jawäänë këjx'am kä'ä në'n tsyowë kääky tojkx, jäts tsowatp mëët nikkëjjx kä'ä në'n wit tsyowaaty. 24Ijxtë aa'xtuktë jooky: Kä'ä nyi'iptë yyu'utë, jäts kä'ä tëjjk tmëëtëtë maj tkoojnjë'ëktë't jyee'kxy; oyë'mts jä' jyanajjë kë'm jä' Yës Teety yyëkjee'kxyëtë. Ntsots xtijy y'ijxë Yës Teety mkayëkkayëtë't mkayëk'uukëtë't, nimëjj miits, kä'ä nyë'në yë' tanë'ëk mati' käkyo'ytyë'p. 25Oyë'mts ëëtë'm në'n njamaa'yë'n njattajjë'n, ¿Ntsoj y'ijxë ntuu'në'n jäts njüky'ajjt yaj naxwiiny nyëkyoo'në'n jaktu'kxëëw? 26Pën kä'ä yë' jä'yë mmayëtë, ¿tikëjx xmaytyë xtajjtë mati' nijunë mkamayëtë'p?
27»Aa'xtuktë pëjjy mati' yomp kamjötypy: Kä'ä tyuntë nikkä' tya'aktë kyojjtë. Tëy ëjts nwa'any nikkä' yëkkuttujkpë Salomón najj nyaxyojjxë, oyë'm y'ijjty jyakkumeenyë. 28Ntsoj Yës Teety najj txöxy jä' aay jä' ujjts, mati' ixyam jäjp oy kä'xp kamjötypy jäts jawom tëj wyä'në tyëtskëjxnë, ¿ntsots y'ijxë miits xtijy mkaxoxëtë't? ¡Miits kattëyjyaa'w'eepyë jaa'y! 29Katij miits xmay xtajjy, tij mka'ytyë'p m'uuktë'p. 30Yë' jaa'y jä' tmaytyë'p ttajjtë'p pën Yës Teety tka'ijx'eetyë'p, jäts miits jäm xmëëtë mteety mati' tnijaa'w'eepy tij mka'ijjtxëtë'p. 31Ijxta'atë jawyiin Yës Teety kyuttujjkë'n, nits xpaat'të't tukkë'yë mati' miits mka'ijjtxëtë'p.
Yëkmayëtë tsapjotm tukkë'yë mati' tsowatp
32»Katij mtsë'ëkëtë, oy miits ni'ey ëjts xpattuu'yo'oytyë; Yës Teety, miits mteety'ajjt, mmo'owaajnëtë'p pya'ayoo'nkëjxm jüky'ajjt mati' jäm tsapjotm. 33Tooktë tijjäty mmëët'të, jäts mmo'otë ayoopëttëjjk; yëkni'oyëtë jäm tsapjotm meenykyoo'n'ëë'ny mati' nijunë kawintakko'ypy, mëjk'ajjtën mati' junë kakkëxp, maj kä'ä pën myeetsy jäts kä'ä tij wyökyë. 34Pën maj miits xkoojnjë'ëky tukkë'yë mati' këjx'am tsowatp, jämts miits m'aaw mjoojt xkexy.
A'ijxë miits mjää'jëtë't
35»Najj miits a'ijxtë naa'xk tu'uk tëjk'ijxy'ijtpë kyuttëjjk t'a'ijxy ku wyimpitt amäjtsk'eekyuwäjpy. 36Tukkë'yë jëën tyëktoypyëjkexy jäts jüky y'a'ijxy, ku wyintsën tëjjk twinkoxt jäts jätyë tyëk'awa'atst. 37Mëjj xontaajk pyaat'të'p muttumpëttëjjk mati' nijkxy wyintsën pyaatyëtë jüky. Tëy ëjts nwa'any jäts nëë'mxëtë'p kë'm kuttëjjk tsëënë wä'n ëjts kë'm kääky, tojkx t'ijxy. 38Mëjj xontaajk jä' jyup'ijxtë'p, ku nijkxy jüky pyaatyëtë wyintsën, oyë'm jya'att tsuu'm ok xëëjnytya'akwamp. 39Mnijaa'w'eepy miits: Ku jyeexyë kuttëjjk tnijawë junnë mää'tspë jya'atwa'any, kä'äts jä' tnittukt jäts mää'tspë tyëkkë't tyijkypy. 40Ninyajj miits, a'ijxtë jüky; jä'ku nit nijkxy Yës Teety y'uu'nk myiny maj miits wyä'në xkakkumay.»
Nitukkë'yë tumpëttëjjk tpëktë mati' paajt'ajjtëtë'p
41Nits Pedro tyëktëëy Jesús:
—Wintsën, ¿ku yë' ijxpäjjt xmatya'aky ëëts jä'yë xnëëjmjääpy ok mëët nitukkë'yë jaa'y xnëëjmë?
42Nits Jesús wyaany: Jä' tumpë mati' tkuytyump yëkxon ntsoj wyintsën pyawa'anyë, jä'äts wyintsën ttamunikkääk'attë'p jäts tyëkka'yty tyëk'uukt nitukkë'yë pënjäty jäjp tyëjkëntüjpy pën junë tu'kyaajjë jatu'kyaajjë pyaatyëtë. 43Mëjjxontaajk jä' pyaatp muttumpë ku wyintsën wyimpitt jäts pyaatë't jäjp wyä'në tkuytyuujnë pyawaa'n. 44Ixyam ëjts nwa'any, jä'äts kuttëjjk kyë'moykyëxp tukkë'yë myaay pyëjkta'aky jä' muttumpë jäts t'ijxy'itt. 45Ok ntsoj jyatt ku jä' tumpë wyinma'yty nits kä'ä wyintsën jätyë wyimpitwa'any, jäts myëëttumpëttëjjk ntsokkattunk t'ijxt twopt tkoxt nits kya'yty jäts y'uukt myu'ukë't. 46Jä' xëëw maj wyä'në tkakkumay, nijkxy jya'aty wyintsën, mëjk jä' yyëk'ayoo'npaatë't, naa'xkë'n yyëktuntë ka'oytyumpëttëjjk. 47Jä' tumpë mati' tnijaa'w'eepy ntsoj wyintsën tsöky namyuttunë, jäts kä'ä tmumatoy, jä' nijkxy mëjk yyëkwöpy yyëkköxy. 48Jäts tumpë pën tkanijaa'w'eepy nits ttakkoypy, wäänë'ts jä' nijkxy y'ayoo'npaaty. Pënpën may yëkmoypy, ninyajj jä' may yëk'amato'ot; jäts pënpën may yëktakkë'tëjjk'eepy, may jä' yyëktappayo'oyty.
Jesús jaa'y tnaktsyiptünyë
49Tëj ëjts nminy jäts jëën nyëkmëjjë't ya'at it naxwiin; njatsöjkypy ëjts jäts jäänë jyeexyë jëën tyoynë. 50Kuwanë'ts ëjts jawyiin ntanaxt mëjknäxy ayoo'n, mëjk ëjts oy ntsätsywinmay kunë'm najj kyuytyunë't. 51¿Ntsoj miits mwinmaytyë jäts jotkujjk'ajjt ëjts nyëkmimpy yaj naxwiiny? Ixyam ëjts nnikkäjpxy jäts kä'ä, tsip ëjts tëj nyëkminy. 52Ixyam tsyoo'nta'aky, maj nimuwoxk jaa'y tu'ktëjjk tsyëënëtë nyawyä'kxëtë'p jä', nituwëëk ttsiptu'ntë't nimäjtsk, ok nimäjtsk ttsiptu'ntë't janituwëëk. 53Kë'm nitteety ttsiptu'nt myajjnk, jäts jä' una'ajnk ttsiptu'nt tyeety; nittaak ttsiptu'nt nyëëx, jäts kiixy ttsiptu'nt tyaak; jäts xä'kxytyaak ttsiptu'nt xyä'kxy'uu'nk, nits jä' to'oxytyëjjk tsyiptu'mp xyä'kxytyaak.
Winjawëtë it xëëw
54Nits Jesús jaa'y tnëëjmjaay: Ku miits x'ijxtë yoots pyitsemy maj xëëw kyita'aky, nëm mwa'antë jäts tu'wamp it, mimpë'mts tuuj. 55Kuts it pyojjy wimpät, nëm mwa'antë jäts annaxwamp it, naa'mts y'annäxy. 56¡Miits kawinjaa'w'eepyë jaa'y! Mjajt'të'p naxwiin tsapwiin xyëkwimpitsë'mtë't, ¿ntsots y'ijxë xkayëkwimpitsëmtë tij it tij xëëw ixyam mjükyëtë?
Mëëtnamyu'oy'attë mmutsip'eepyëttëjjk
57¿Tij ku miits kë'm xkawin'ijxtë xkawinjawëtë mati' m'oy'ajjtxëtë'p? 58Ku jaa'y mniwampättë't, tamëëtyëkwin'oyë m'ayuujk jätyë, niyam mkamunijkxyë kumuun. Pën kä'äts xyëkwin'oyë jätyë, mpawawë'p jä' jaa'y yëkkuttujkpë wyinküjkypy, nits jä' yëkkuttujkpë mkë'yakkë't ijxy'ijtpë kyë'jë'm jä'äts mpujxtëjkpëmë'p. 59Ixyam ëjts nwa'any jäts kä'ä jäjp jätyë mpitsë'mtë't kunë'm tukkë'yë xkujuykyëxt.
હાલમાં પસંદ કરેલ:
Lucas 12: LUKMya
Highlight
શેર કરો
નકલ કરો
Want to have your highlights saved across all your devices? Sign up or sign in
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
