Jɔnə 7
7
Yeso pópə Pɔ́pə́mɛ́ píə
1Əghâ ándó Yeso a nə ḿməgtə̂ nə́ á mə́ tsáb nə́ pópə ngaŋə́zoŋə́ndzəm əjí lə́, ńtíʼ ńgɛnə̂ á Galili ńtə́ ńnyinə̂ wɨ́, ńkě pɨ ńkɔŋə̂ á mə́ nyi nə́ Judya pô, ńté ńgə́ Pəjus pó nə ńtə́ ńnáŋ əsê ndúmə á mə́ jwítə nə́ yə. 2Əghâ yi wɨ́, alě akɔŋtə Məntaŋ mə́ ndɛ̂ əsê Pəjus nə ńtə́ ḿbáatə, 3pɔ́pə́mɛ́ pí pó tíʼ ə́sóŋə á mbô yí ńgə́, “Mɛdtə̂ aliʼ zɨ ńgɛnə̂ á Judya ńjî ńgə́ ngaŋə́zoŋə́ndzəm əzô ə́ jɨ́ mənu páʼ gho faʼ nə́. 4Ńté ńgə́ ŋwu tsə̌ a kě anu páʼ ä faʼ nə́ lyáŋə pô páʼ təmbɔʼ a tə́ ńdoonə̂ ńgə́ pə́ pyádnə ńjîə yə́ əshîsaŋə. Təmbɔʼ gho tə́ faʼə̂ mənu mi gho nɨd mbɨ əzo á mbô mbîə.” 5Ńté ńgə́ tsɔʼə pɔ́pə́mɛ́ pí pó nə ńkě ntɨ́ nə́ yí néŋ pô.
6Yeso a sóŋə á mbô pó ńgə́, “Ndɛlə mə kě kə́ koʼə̂ pô, lə́ ndɛd ətsəm pə́ ńkoʼə̂ á mbô pəənə. 7Təmbɔʼ mbî kě áwɨ́ pa pô, lə́ pə́ peenə̂ mə ńté ńgə́ maŋ sóŋə á mbô mbî ńgə́, ngɛdmə́nu əghɔ́b ə́ kě pɔŋ pô. 8Kɔ́ʼ nə́ ńgɛnə̂ aliʼə́ akɔŋtə ə́wə́ á ngǎ pəənə, maŋ kě tə́ ńkɔ́ʼə ńgɛnə̂ aliʼə́ akɔŋtə yi ə́wɨ́ pô, ńté ńgə́ ndɛlə mə kě kə́ chígə́ koʼə̂ pô.” 9A nə sóŋ ə́lɨ́d lə́ ńtíʼ ńchîə yə́ á Galiliə.
Ndzaŋə Ándó Yeso a nə Ńgɛn nə́ Aliʼə́ Akɔŋtə Məntaŋə́
10Əghâ ándó pɔ́pə́mɛ́ pí pó nə ńkɔ́ʼ nə́ ńgɛnə̂ aliʼə́ Akɔŋtə wə́ lə́, Yeso a kə́ ńkɔ́ʼ ńgɛnə̂ ajíə, a nə ńkě ghɛnə̂ á əshîsaŋ pô, a nə ńgɛn lə́ nəlyaŋnə́. 11Pəjus pó nə ńtə́ ńnáŋə a yə́ aliʼə́ akɔŋtə wə́ ńtíʼə ḿbítə ńgə́, “A ə́fó?”
12Məntsəmə́ mimə nɨ́ nə́ mə́ nə ńchîə á mə́mə apoŋə pɨ zə́ ńté Yeso. Pɨ pətsə́ pó sóŋ ńgə́, “Lə́ ŋwu yi əshîʼnə” Pətsə́ pə́ sóŋ ńgə́, “Ngá, a fɨgə̂ lə́ pəənə.” 13Lə́ ḿbə́ ńté ńgə́ pó nə ńtə́ ḿbɔ́gə Pəjusə, ŋwu tsə̌ a kě ə́wɨ́ chî təmbɔʼ a fɛ́d ńtə́əmə á əshîsaŋ ńtsáb ńté yí pô.
14Ndzaŋə ándó alěmbî akɔŋtə zə̂ á nə ńgɛn nə́ tə́ ńgabkə̂ tətɨ lə́, Yeso a kɔ́ʼ ńgɛnə̂ á Tə́kɔʼndɛ̂sê ńtə́ ńdzéʼkə anǔəsê. 15Anu yə ə́wə́ a nə ńdánə ńchígə́ ńkɨʼnə̂ Pəjus, pó tíʼə ḿbítə ńgə́, “Ŋwu ghɛnə̂ a lánə ńchígə́ ńdɔgə̂ ají lə́ ə́fó páʼ a nə ńkě nə́ aŋwaʼlə ghɛn pô?”
16Yeso a tíʼ ńkwěe ághɔ́b ńgə́, “Anu páʼ maŋ zéʼkə nə́ lə́ á kě lə́ á mbô maŋ lǒo pô, a lǒo lə́ á mbô Əsê páʼ ə́ tú nə́ mə.” 17Ŋwu ntsəm páʼ a kɔŋ nə́ á mə́ ghɛd nə́ anu páʼ Əsê lɔ nə́, ä yǐ jî ńgə́ anu maŋ zéʼkə nə́ lə́ á lǒo lə́ á mbô Əsê kɨ ńgə́ maŋ tséebə lə́ nə́ mətəənə mə. 18Ŋwu páʼ ä tsáb nə́ nə́ mətɨ míə, a náŋə lə́ əyǐ nəgháʼə, ńkě yi Əsê pô: Lə́ ŋwu páʼ ä lɔ nə́ nəgháʼə á mbô ŋwu páʼ a tú nə́ yí, ä tséebə lə́ ndə̌ŋdəŋə́, ntsɨd yətsə́ kě kə́ ńchî ńté yí pô. 19Mosisə a nə ńkě Pənoŋkə á mbô pɨ fɛ̂? Lə́ ŋwu ə́wɨ́ yitsə̌ a pə́ ńkě Pənoŋkə pi wɨ́ lɔʼkə̂ pô. Nə́ pɛn ńtíʼə ńdoonə̂ á mə́ jwítə nə́ mə lə́ ńté akə̂?
20Apoŋə pɨ zə́ a kwěe yí ńgə́, “Gho túgə ajwiə təpɔŋə a mbɨ gho! Á gho lə́ lɔ əwə á mə́ jwítə nə?” 21Yeso a sóŋə á mbô pó ńgə́, “Maŋ kə ghɛlə̂ táʼ nkɨʼnənuə, anu yə ə́wə́ a kɨʼnə̂ áwɨ́ pətsəmə. 22Mosisə a nə sóŋ ńgə́ nə̈ tə́ ḿbóʼə pɔ́ pɨ pipə́ mbyâŋnə (anu zɨ́d zəənə́ á nə ńkě lə́ á mbô Mosisə lǒo pô, á nə fɛ́d lə́ á mbô pətǎ pə́ənə́), nə́ kə̈ ḿbóʼə mɔ́ mbyâŋnə Alěláʼsê. 23Lə́ pə́ ńgə́ təmbɔʼ a pə́ Alěláʼə́sê nə́ póʼə ŋwu ńjî ńgə́ kɔ pə wǔəə noŋkə Mosisə, lə́ ghɛlə̂ akə̂ nə tíʼ ńdzáŋ ndě nə́ maŋ ńté ńgə́ maŋ tsóʼə a ŋwunə Alěláʼə́sê? 24Kɔ nə tsɔ́ʼtə əsáʼ ńdzoŋə̂ á pə́ mənu nə́ jɨ́ nə́ nə́ əmə́gə, tsɔ́ʼtə nə́ əsáʼ á pə́ ndə̌ŋdəŋə́.”
Yeso lə́ Yi Ńtsəʼ nə́ Wə́?
25Əghâ yi ə́wɨ́ pɨ pətsə́ páʼ pó nə ńdǒo nə́ á Jɛlusalɛm pó chúʼə á mə́ pítə nə́ ńgə́, “Lɛ̌ kě ŋwu páʼ pə́ nə ńdɔ nə á mə́ jwítə nə́ lə́ pô? 26Lɛ̌ kě yí páʼ a chî nə́ aliʼə́ nə́ ńtséebə á əshîsaŋ lɛ pô, pó pə́ ńkě anu yətsə́ á mbô yí tə́ ə́sóŋə pô! Təmbɔʼə a pə ńgə́ mətû mə́ aláʼ mə́ pyádnə ńjî ńgə́ lɛ̌ lə́ Yi Ńtsəʼ nə́ Wə́? 27Aŋwaʼlə Əsê sóŋ ńgə́ əghâ ándó Yi Ńtsəʼ nə́ a yǐ nə́ yǐ, ŋwu tsə̌ a kě yǐ jîə aliʼ páʼ a lǒo nə́ ə́wɨ́ pô, lə́ pɛn pə́ ńjîə aliʼ páʼ ŋwu nə́ á lǒo nə́ ə́wə́.”
28Ndzaŋ Yeso kə tə́ nə́ ńdzéʼkə á tə́kɔʼndɛ̂sê lə́, ńtíʼ ḿbítə ághɔ́b nə́ tə́kɔʼ ngye ńgə́, “Lə́ pə́ ńgə́ nə́ jîə ŋwu páʼ maŋ pə́ nə́ wɨ́d, ńkə́ ḿbɨ ńjîə aliʼ maŋ lǒo nə́ ə́wɨ́? Maŋ kě yǐəə aliʼə́ nə́ lə́ a ngǎ maŋ pô, ŋwu páʼ a tú nə́ mə lə́ ndə̌ŋdəŋə́ ŋwunə, lə́ nə́ pə́ ńkě yí jî pô, 29maŋ jîə a yí ńté ńgə́ maŋ lǒo lə́ á mbô yə́, lə́ a kə́ ńtú yí ńtúmə mə.”
30Əghâ yi əwɨ́ pó tíʼə ńdoonə̂ á mə́ wam nə́ yə́, lə́ ŋwu tsə̌ a pə́ ńkě yí nə́ apô kwum pô ńté ńgə́ ndɛd əjǐ nə́ ńkě kə́ koʼə̂ pô. 31Lə́ pɨ pi nɨ́ nə́ pə́ nə́ ḿbɛ́d ńnéŋ ntɨ́ nə́ yí, ńtíʼ ə́sóŋ ńgə́, “Əghâ ándó Yi Ńtsəʼ nə́ Wə́ a yǒ nə́ ńgyǐ, tə a yǒ ghɛd əkyeʼmə́nu tə tsɛ pi páʼ ŋwu nə́ a pɛ́d nə́ tə ńgɛd?”
Ndzaŋ pə nə Ntú nə́ Ngaŋə́pyáabə Tə́kɔʼndɛ̂sê ńgə́ Pó yǐ Ńgwaamə̂ Yeso
32Pəfalasi pó zóʼ ndzaŋə ándó apoŋə pɨ zə́ a ŋwuntə̂ nə́ ńté əkyeʼmə́nu páʼ a nə ńgɛd nə́, mbêsê yi ngweŋ pópə Pəfalasi tíʼ ńtú ngaŋə́pyáabə Tə́kɔʼndɛ̂sê ńgə́ pó ghɛn ńgwaamə̂ Yeso. 33Yeso a sóŋ ńgə́, “Maŋ yǐ chî pɛn lə́ tsɔʼə nə́ mɔ́ akəmə ndɛlə, ə́ tíʼ ghɛnə̂ á mbô ŋwu páʼ a nə ńtú nə́ mə. 34Nə́ yǒ ńnáŋə mə ə́ pə́ kě mə zɨ́ pô, aliʼ páʼ maŋ ghɛn nə́ ə́wɨ́ təmbɔʼ nə́ kě ə́wɨ́ yǐ pô.” 35Pəjus pó tíʼ ə́sóŋə a tətɨ pó ńgə́, “Ŋwu nə́ a lánə ńgɛnə̂ lə́ ə́fó, páʼ mbɔʼ pɛn láʼ ńkě yí jɨ́ pô? A loonə̂ á pə́ mə́ ghɛn nə́ á Glik, aliʼ páʼ pɨ pɛn pə́ nə shamnə̂ nə́ ńgɛnkə̂ ə́wɨ́ lə́, ə́tíʼ zéʼkə Pəglik? 36A pěʼ ńkwaŋ lə́ ńgə́ akə̂ ə́sóŋ ńgə́ pɨ yǒ ńnáŋə mə ə́ pə́ kě jɨ́ pô? Aliʼ páʼ maŋ chî nə́ ə́wɨ́ təmbɔʼ nə́ kě ə́wɨ́ yǐ pô?”
Nkǐ páʼ ə́ Fɛ̂ nə́ Nchîmbîə
37A nə ḿbə́ ndwigtə alě páʼ a nə ḿbə́ nə́ tə́kɔʼə alě akɔŋtə lə́, Yeso a tɨ́ ńtsáb nə́ tə́kɔʼ ngye ə́sóŋ ńgə́, “Ŋwu ntsəm páʼ nji nkǐ tə́ nə́ ńdzáŋə a yə́ a yǐəə á mbô maŋ ńnô nkǐə. 38Ŋwu ntsəm páʼ a néŋ nə́ ntɨ́ yí nə́ maŋ ndzoŋ ndzaŋ páʼ aŋwaʼlə Əsê á sóŋ nə́ ńgə́, ‘Á mə́m ntɨ́ əyə́ ńkǐ páʼ ə́ fɛ̂ nə́ nchîmbî ə́ yǒ tíʼə ə́fɛ́lə ə́wə́.’ ” 39Yeso nə sóŋə anu yə wɨ́ ńté lə́ Ajwiə pɨ páʼ pó néŋ nə́ ntɨ́ nə́ yí pó yǒ nə́ kwáalə zə́ələ́, ńté ńgə́ a kə pə́ nə́ ndɛd yǐ ə́wɨ́ lə́ pə́ kě Ajwi kə́ fɛ̂ pô, nə́ ndɛd yi wɨ́ Yeso a nə ńkě kə́ júmnə ə́ kwúnə a mə́m nəgháʼ əyǐ pô.
Ndzaŋə Ándó Pɨ pó nə ńtíʼ nə́ Ńgabnə̂
40Ndzaŋə ándó pɨ pə̂ pó nə ńdzóʼ nə́ atséebə ají lə́, pɨ pətsə́ pó sóŋ ńgə́, “Lə́ ndə̌ŋdəŋə́, ŋwu nə́ lə́ ntûsê.”
41Pətsə́ pó sóŋ ńgə́, “Lə́ Yi Ńtsəʼ nə Wə́!”
Lə́ pətsə́ pó pítə ńgə́, “Təmbɔʼ Yi Ńtsəʼ nə́ a fɛ́lə á Galili lə́ ə́lɛ́? 42Lə́ aŋwaʼlə Əsê a pə́ sóŋ ńgə́ Yi Ńtsəʼ nə́ a yǒ fɛ́d lə́ nə́ ngwud əfo Debilə, pə́ pîə yə́ á Bɛtəlɛɛmə, á aláʼ páʼ Debilə a nə ńchî nə́ ə́wə́.” 43Pɨ pə́ nə ńtíʼ ńgabnə̂ ńté Yeso. 44Pɨ pətsə́ pə́ loonə̂ á mə́ wam nə́ yə́, lə́ ŋwu tsə́ a pə́ ńkě yí nə́ apô kwum pô.
Mətû mə Pəjus mə́ nə Ńkě Ntɨ́ nə́ Yeso Néŋ pô
45Ngaŋə́pyáabə Tə́kɔʼndɛ̂sê kə ḿbɨ ḿbəənə̂ á mbô pətə́kɔʼ pə́ ngaŋə́pêsê pópə Pəfalasi lə́, pó tíʼ ḿbítə ághɔ́b ńgə́, “Lə́ á pěʼ ńgɛlə̂ akə̂ nə kě nə́ yí yǐ pô.”
46Ngaŋə́pyáabə Tə́kɔʼndɛ̂sê zə̂ pó kwěe ńgə́, “Ŋwu tsə̌ a kě ándó ŋwu nə́ kə́ láʼə tséebə pô!”
47Pəfalasi pó pítə ághɔ́b ńgə́, “Nə loonə̂ á mə́ sóŋ nə́ lə́ ńgə́ pə kə́ fɨgə̂ azə́ənə́ aliʼə́?” 48Pɨ pɛ́d tə ńdjɨ́ mətû mə́ Pəfalasi mətsə́ mə́ néŋ ntɨ́ nə́ yí? 49Apoŋə pɨ zəənə́ á kě noŋkə Mosisə jî pô, ndɔ Əsê ə́ chîə atû pó.
50Nikodemɔs páʼ a nə ḿbə́ nə́ táʼ ŋwu əghɔb yitsə̌, lə́ nə ḿbə́ yí páʼ a nə ḿbeg nə́ ńgɛn ńdzə́ənə Yeso. A tíʼ ə́sóŋə á mbô pó ńgə́, 51“Ńdzoŋ ndzaŋ páʼ noŋkə əwɛ́nə á sóŋ nə́, təmbɔʼ pɛn kě əsáʼ ŋwu lə́g tə́ ghə́ pə́ peg ńdzóʼə anu páʼ a sóŋ nə́, kɨ ńjîə anu páʼ a ghɛd nə́ pô.”
52Pó kwěe ńgə́, “Gho kə́ ńdǒ azô lə́ tsɔʼə Galili? Chígə́ ńnáŋ, gho yǐ jɨ́ ńgə́ təmbɔʼ ntûsê a kě á mə́m Galili fɛ́d pô. 53Ŋwu ntsəmə a fɛ́d ńtíʼ ńkwə̂ á ngyaʼə́ yə́.”
હાલમાં પસંદ કરેલ:
Jɔnə 7: azo
Highlight
શેર કરો
નકલ કરો
Want to have your highlights saved across all your devices? Sign up or sign in
