Jɔnə 15
15
Yeso lə́ Chigə Atǐə Məloʼə
1“Maŋ lə́ chigə atǐə məloʼə, Tǎ mə a pə́ ŋwu páʼ ä faʼ nə́ á mə́m nkáʼ mətǐ mə́ məloʼə. 2A kwagə̂ məfag mə́ atǐ páʼ mə́ chî nə́ nə́ maŋ ńkě mənta zə́mə pô, ńtsoŋkə̂ məfag páʼ mə́ zə́m nə́ ńgə́ mə́ zə́m mənta əshîʼnə. 3Pə́ pɛ́dtə ńgɛd nə́ ŋwaʼ ńdzoŋə̂ atséebə Əsê páʼ maŋ pɛ́d nə́ tə ə́sóŋə á mbô pəənə́. 4Nə́ mɛdnə̂ nə́ maŋə, maŋ kə́ mɛdnə̂ nə́ pəənə́. Ndzaŋə ándó mbɔʼ əfagə atǐ ə́ kě zə́m mənteemə́ á ngǎ əyí tə ghə́ ə́ pádnə á pə́ á mbəəmə atǐ pô lə́, á kə́ ḿbə́ lə́ tsɔʼə ə́lɨ́d nə́ pəənə́, tə mbɔʼ nə́ kě mənta kə́ ńdzə́m tə ghə́ nə́ mɛdnə̂ nə́ maŋ pô.”
5Maŋ lə́ atǐə məloʼ nə́ pə́ məfag míə. Ŋwu ntsəm páʼ a mɛdnə̂ nə́ maŋə, maŋ kə́ mɛdnə̂ nə́ yə, lə́ yí páʼ a yǒ nə́ zə́m mənta mə́ nə́ənə, ńté ńgə́ təmbɔʼ maŋ chî pɛn chî pô nə́ kě anu yətsə́ ghɛd pô. 6Təmbɔʼ ŋwunə a chî nə́ maŋ mɛdnə̂ pô, Tǎ mə a yǐ myaʼə̂ yə́ ándó əfagə atǐ pə́ lə́g nə́ myaʼ ə́ júmə, pə́ tíʼ ńkyeetə̂ məfag mimə́ ə́wɨ́ ńgɛn maʼə̂ á mə́m móg mə́ kɛ́lə. 7Təmbɔʼ nə́ mɛdnə̂ á mə́m maŋ, atséebə mə á kə́ mɛdnə̂ á mə́m pɨ, nə pítə ajúmə atsəm páʼ nə̈ lɔ nə́ pə́ yǐ fɛ̂ nə́ pəənə, 8lə́ ndzaŋ páʼ pə́ yǐ nə́ zə́ənə nəgháʼ Tǎ mə páʼ təmbɔʼ nə́ zə́m mənta mimə́ nɨ́ nə́, ńdaŋ ə́lɨ́d nə́ nɨd ńgə́ pɨ lə́ ngaŋə́zoŋə́ndzəm mə. 9Ndzaŋə ándó Tǎ a kɔŋ nə́ mə lə́, lə́ kə́ ḿbə́ ndzaŋ maŋ kɔŋ nə́ áwə́ənə́, tíʼ nə́ ḿmɛdnə̂ á mə́m akɔŋnə mə. 10Təmbɔʼ nə́ lɔʼkə̂ məntəgə́ mə tə ḿbə́ nə́ mɛdnə̂ á mə́m akɔŋnə mə, tsɔʼə ndzaŋ páʼ maŋ lɔʼkə̂ nə́ məntəgə́ mə́ Tǎ mə ńkə́ mɛdnə̂ á mə́m akɔŋnə ajíə.
11Mäŋ sóŋə mənu məənə́ á mbô pɨ ńjî ńgə́ mbɨ əzɨ ə́ tə́ ḿbɔŋə̂, akɔŋtə mə á tíʼ ńdwɛ́nkə á mə́m pəənə́. 12“Lɛ̌ ntəgə́ mə, ńgə́ nə́ túgə akɔŋnə á ndzɔʼ pɨ tsɔʼə ndzaŋ maŋ kɔŋ nə áwɨ́ lɛ̌ 13Chigə tə́kɔʼ akɔŋnə páʼ mbɔʼ ŋwunə a túgə á mbô pəshu pí lə́ ńgə́ təmbɔʼ a kwû ńté atûə azóobə́. 14Pɨ lə́ pəshunə́ mə páʼ təmbɔʼ nə́ faʼə̂ anu maŋ sóŋ nə́ ńgə́ nə́ faʼə̂. 15Maŋ kě pɛ́lə̈ ə́fóŋə áwɨ́ nə́ ngaŋə́faʼ pô, ńté ńgə́ ngaŋə́faʼə a kě jîə anu páʼ Tǎ afaʼ əghoobə́ a ghɛd nə́ po. Maŋ fóŋə áwɨ́ nə́ pəshunə́ mə ńté ńgə́ maŋ pɛ́dtə fiʼtə̂ áwɨ́ nə́ anuə atsəm páʼ maŋ zóʼ nə́ á mbô Tǎ mə. 16Lə́ nə́ ńkě pɨ tsɔ́ʼ ńtsɔ́ʼə mə pô, lə́ nə ńtsɔ́ʼ maŋ ńtsɔ́ʼə áwɨ́ ńtú ńgə́ nə́ ghɛn ńdzə́m mənta ńjî ńgə́ mənta mimə ə́wɨ́ mə́ mɛdnə̂. Ńdaŋ ə́lɨ́d ajúmə atsəm páʼ nə́ pítə nə́ á mbô Tǎ ńdaŋ nə́ əlɛ́nə mə, a yǐ fɛ̂ á mbô pəənə́. 17Lɛ̌ anu páʼ maŋ lɔ nə́ ńgə́ nə́ ghɛlə̂, ńgə́ nə́ túgə akɔŋnə a ndzɔʼ pəənə́.”
Ndzaŋə Ándó Mbî Pa nə́ Ngaŋə́zoŋə́ndzəm Yeso
18Təmbɔʼ mbî peenə̂ áwɨ́ nə́ jî ńgə́ mbî nə ḿbɛ́dtə ḿbeg ḿbeenə̂ mə. 19Təmbɔʼ pɨ nə ḿbə́ lə́ pɨ pə́ mbî pɨ, tə ḿbə́ mbî nə ńkɔŋə̂ áwə́ənə́ ándó pɨ píə. Lə́ maŋ nə ńtsɔ́ʼə áwə́ənə́ á mə́m mbî zəənə́, pɨ kě pɛ́d ḿbə́ lə́ pɨ pə́ mbî pɨ pô, lɛ̌ anu páʼ a ghɛd nə́ mbî peenə̂ áwɨ́ lə́. 20Kwúmtə nə́ atsáb páʼ maŋ nə sóŋ nə́ á mbô pɨ ńgə́, Təmbɔʼ ngaŋəfaʼə a kě Tǎ afaʼ əyǐ tsɛ pô. Təmbɔʼ pə́ nə ńtsaŋkə̂ mə, tə ḿbə́ pə yǐ kə́ tsaŋkə̂ áwə́ənə́. Təmbɔʼ pó zóʼnə atséebə mə, tə ḿbə́ pó yǐ kə́ zóʼnə azə́ənə́. 21Lə́ pó yǒ kə́ ghɛd ndɛn mənu ghɛn ətsəm a mbɨ pɨ ńté mə, ńté ńgə́ pó kě a ŋwu páʼ a tú nə́ mə lə́ jî pô. 22Təmbɔʼ maŋ nə ńchî yǐ tséebə á mbô pó pô, tə ḿbə́ pó nə ńkě təpɔŋ ghɛd pô, nə́ pə́ əghâ nə́ anu yətsə́ á kě ə́wɨ́ pɨ ńchî təmbɔʼ pó sóŋ ńgə́ pó nə ńtə́ ńgɛlə̂ təpɔŋ lə́ ńkě jî pô. 23Ŋwu ntsəm páʼə a pa nə́ mə a kə́ ḿbeenə̂ Tǎ mə lə́ tsɔʼə lə́ələ́. 24Təmbɔʼ maŋ nə ńchî faʼə̂ á mə́m pó məfaʼ páʼ ŋwu tsə̌ a nə ńkě nə́ kə́ faʼə̂ pô, tə ḿbə́ pó nə ńkě təpɔŋ ghɛd pô. Lə́ nə́ pə əghâ nə́, pó zɨ́ məfaʼ mimə wɨ́ ńtíʼə ḿbeenə̂ áwə́g Tǎ mə. 25Zəənə́ a chîə á mə́ lɔg nə́ aliʼ ńjî ńgə́ anu pə́ nə ŋ́ŋwaʼlə̂ nə́ á mə́m Pənoŋkə pɔ́b á pə́ ndə̌ŋdəŋ ńgə́, Pó peenə̂ mə lə́ tsɔʼə kətaŋə.
26“Lə́ əghâ ándó Nkwá əwəənə́ á yǐ nə́ yǐ, páʼ maŋ yǐ nə́ túmə á mbô pɨ páʼ a lǒo nə́ á mbô Tǎ mə lə́, tsɔʼə Ajwiə ndə̌ŋdəŋ páʼ a lǒo nə́ á mbô Tǎ a yǐ sóŋə anu ńté mə. 27Lə́ pɨ yǐ kə́ ə́sóŋə anu té mə, ńté ńgə́ maŋ nə ńchî pɛn ə́fɛ́lə a nəchwaakənə́.”
હાલમાં પસંદ કરેલ:
Jɔnə 15: azo
Highlight
શેર કરો
નકલ કરો
Want to have your highlights saved across all your devices? Sign up or sign in
