Jɔnə 10
10
Atséebə́nə́múʼ Ńté Ntseŋnə
1Yeso a sóŋ ńgə́, “Mäŋ fiʼtə̂ wɨ́ nə́ ndə̌ŋdəŋ ńgə́ ŋwu páʼ a kě nə́ pə́ ntsǒnkáʼ laŋ ńkwúnə á mə́m nkáʼ məmbéŋ mə́ ndzɛd pô, ḿbɨ́ ḿbáʼnə ńkɔ́ʼə a pə́ á ndú yi ndaʼ ńkwú wɨ́, lə́ ndzə̌lə, ńkə́ ḿbə́ mbə́ʼ məláʼə. 2Lə́ ŋwu páʼ a kwú nə́ á mə́m nkáʼ məmbéŋ ńdaŋə̂ a ntsǒnkáʼ lə́ ntseŋnə məmbéŋə. 3Ŋwu páʼ ä tɨ́ nə́ á ntsǒnkáʼ, a yǐ ŋáʼ ntsǒnkáʼə á mbô yə́, məmbéŋ mə́ ndzɛd mə́ kə́ ńdzóʼ ngye əjǐə, a tíʼ fóŋ məmbéŋ mí nə́ məlɛ́n mɔ́b ə́fógə á mə́m nkáʼə. 4Əghâ ándó páʼ a fóg nə́ məmbéŋ mí tsɔʼə mətsəmə á mə́m nkáʼ lə́, ńtíʼ ńchîə á mbi məmbéŋ mə́ ə́wɨ́ mə́ chîə á ndzəm yí ńté ńgə́ pó jî ngye əjǐə. 5Təmbɔʼ ŋwu ndaʼə a yǐ pó kě yí zoŋ pô, pó kəələ̂ ághɔ́b lə́ kə nə́ á nəpɛnə́ yí ńté ńgə́ pó kě ngye əjí jî pô.”
6Yeso a fiʼtə̂ ághɔ́b nə́ atséebə́nə́múʼ zəənə́, lə́ ətû pɔ́b pə́ ńkě lá nə́ anu páʼ a nə̈ sóŋ nə́ á mbô pó pô.
Yeso Páʼ a pə́ nə́ Ntseŋnə Yi Əshîʼnə
7Yeso a kə́ ḿbɨ ə́sóŋə á mbô pó ńgə́, “Mäŋ sóŋə lə́ ndə̌ŋdəŋə́ á mbô pɨ ńgə́, Maŋ lə́ ntsǒnkáʼ məmbéŋ mə́ ndzɛlə. 8Pɨ pətsəm páʼ pó nə ńkwá nə́ mbi lə́ nə ḿbə́ pəzə̌ ńkə́ ḿbə́ ngaŋə́pə́ʼə́ məláʼə. Lə́ məmbéŋ mə̂ mə́ nə ńkě ngye əzɔb jî pô. 9Maŋ lə́ ntsǒnkáʼə. Ŋwu ntsəm páʼ a laŋ nə́ a ndzəm maŋ ńkwúnə, pə́ yǒ chwádkə yə́; pó yǒ kwúnə kə́ fɛ́lə, kə́ zə́ənə nəyeŋə́ yi féŋtə nə, 10Ndzə̌lə a yǐ lə́ tsɔʼə á mə́ zə nə́ ə́ kə́ jwítə ə́ kə́ tsəŋkə̂. Maŋ yǐ lə́ ńjî ńgə́ təmbɔʼ nə́ túg nchîmbîə, ńkə́ ńtúg nchîmbî páʼ zɨ́d lwɛ́nkə nə ńgɛn fyagə̂.”
11Maŋ lə́ ntseŋnə məmbéŋ yi əshîʼnə, ntseŋnə məmbéŋ yi əshîʼnə ä fɛ̂ nchîmbî əjǐ ətsəmə á mbô məmbéŋ míə. 12Ngaŋəfaʼ páʼ pə́ lɔg nə́ yí lə́ kě ntseŋnə páʼ a túg nə́ məmbéŋ pô; Təmbɔʼ a zɨ́ na təpɔŋ ə́ tə́ ńgyǐəə, a myaʼ məmbéŋ mə̂ ńkəələ̂ yə́, na təpɔŋ zə̂ tíʼ ńgwamtə̂ mətsə́, apuʼə á tíʼ shamnə̂. 13Ngaŋəfaʼ wə̂ a tíʼ ńkəələ̂ yí ńté ńgə́ məmbéŋ mə̂ mə́ pěʼ ńkě nə́ anu yətsə́ á mbô yí chî pô. 14Maŋ lə́ ntseŋnə məmbéŋ yi əshîʼnə, maŋ jî məmbéŋə mə, məmbéŋə mə mə́ kə́ ńjîə mə. 15Lə́ tsɔʼə ndzaŋ páʼ Tǎ a jî nə́ mə, Maŋ kə́ ńjîə yə́, Maŋ fɛ̂ nchîmbîə mə ńté məmbéŋə mə. 16Maŋ túg mətsə́ məmbéŋ mə́ ndzɛd páʼ mə́ kě nə́ á mə́mə akwɛlə məmbéŋ zɨ chî pô, maŋ yǐ kə́ shib yǐ nə́ pó, pó kə́ ńjwə́ʼtə ngye mə. Pó yǒ tíʼ pə́ táʼə akwɛlə nə́ táʼ ntseŋnə.
17Lɛ̌ anuə a ghɛd nə́ Tǎ a kɔŋə̂ mə ńté ńgə́ maŋ nə fɛ̂ nchîmbî mə nə́ anu yi ə́wɨ́ ńjî ńgə́ mbɔʼ maŋ pɨ ńkwáalə zə́ələ́. 18Ŋwu tsə́ a nə ńkě nchîmbîə mə á mbô maŋ kwá pô, lə́ nə ńkɔŋ maŋ á mə́ fɛ̂ nə́ zə́ələ́. Maŋ nə ńtúg mətəənə á mə́ fɛ̂ nə́ ázə́ələ́, ńkə́ mbɨ ńtúg mətəənə á mə́ kwá nə́ zɨ́d ngǎ yitsə̌; Lɛ̌ anu páʼ Tǎ mə a nə sóŋ nə́ ńgə́ maŋ faʼə̂.
19Pəjus pó nə mbɨ ńkə́ ńgabnə̂ əpag pɛ̌ ńté ətsáb pəənə́. 20Pó pi nɨ́ nə́ nə sóŋ ńgə́, “A túgə pɛ̌sê a mbɨ yə́, ńkə́ ḿbɛ́ɛlə. Nə́ jwə́ʼtə lə́ anuə akə̂ á mbô yə́?”
21Lə́ pətsə́ pɨ pó sóŋ ńgə́, “Lɛ̌ kě atséebə a ŋwu páʼ a túg nə́ pɛ̌sê a mbɨ yí pô. Təmbɔʼ pɛ̌sê ə́ ŋáʼkə əmə́g mə́ əfəg.”
Pəjus pó Kǐəə Yeso
22Lə́ nə ḿbə́ ndɛlə akɔŋtə páʼ Pəjus pó kə kwúmtə nə́ ndɛd páʼ pə́ kə pɨ nə́ ńtə́ ŋáʼə Tə́kɔʼndɛ̂sê á Jɛlusalɛmə, lə́ pə́ ḿbə́ ndɛd əfə́gə, 23Yeso a tíʼ ńtə́ ńnyinə̂ á mə́m Tə́kɔʼndɛ̂sê, á mə́mə alaakə Solomunə. 24Pəjus pó tíʼ ńkyeetə̂ ńdíblə yí, ḿbítə yí ńgə́, “Gho yǐ ghɛd pəg pyáabə a mə́ jî nə́ ŋwu páʼ gho pə́ nə́ wɨ́d tə koʼ lə́ nə́ ndɛlə́ akə̂? Təmbɔʼ gho pə́ pə́ Yi Ńtsəʼ nə́ Wə́, gho fiʼtə̂ áwə́g nə́ ndə̌ŋdəŋə́.”
25Yeso a kwěe ághɔ́b ńgə́, “Maŋ nə ḿbɛ́d tə fiʼtə̂ áwə́ənə́, nə pə́ ńkě pímə anu páʼ maŋ sóŋ nə́ pô. Məfaʼ páʼ maŋ faʼ nə́ nə́ əlɛ́n Tǎ mə, mə́ sóŋə anu ńté mə. 26Lə́ nə́ pə́ ńkě mə pí pô ńté ńgə́ nə́ kě lə́ məmbéŋ mə́ ndzɛlə mə pô. 27Məmbéŋ mə́ ndzɛlə mə mə́ zóʼ ngye mə, maŋ jîə ághóobə́, pó kə́ ńdzoŋə̂ a mə. 28Maŋ fɛ̂ nchîntɨ páʼ ḿmɛdnə̂ ngǎ mɔʼə́ á mbô pó, pó láʼ kě kwû pô, təmbɔʼ ŋwu tsə̌ láʼ ńkě lɔg mətɨ ńkwáalə ághóobə́ á mbô maŋ pô. 29Tǎ mə páʼ a fɛ̂ nə́ ághóobə́ á mbô maŋ, a tsɛɛlə̂ ajúmə atsəmə, ŋwu tsə́ a kě ə́wɨ́ chî təmbɔʼ a kwáalə ághóobə́ á mbô Tǎ mə pô. 30Pəg Tǎ lə́ táʼə.” 31Pəjus pó pyá məngɔʼə á mə́ tə́mtə nə́ yí ə́wə́. 32Lə́ Yeso sóŋə á mbô pó ńgə́, “Maŋ nəələ̂ áwɨ́ nə́ mənu mimə əshîʼnə páʼ mə́ lǒo nə́ á mbô Tǎ. Á mə́m mənu mɨ́d mɨ pɨ̈ tə́mə mə nə́ ngɔʼ ńté lə́ zəənə́?”
33Pəjus pó kwěe ńgə́, “Pəg kë tə́mə gho ńté lə́ mənu mimə əshîʼnə páʼ gho faʼ nə́ pô, lə́ pə̈g tə́mə gho ńté lə́ ńgə́ gho zɔmtə̂ Əsê, gho lə́ tsɔʼə ŋwu mbîə, ḿbə́ sóŋ ńgə́ gho lə́ Əsê.”
34Yeso a kwěe ághɔ́b ńgə́, “Pə́ kě á mə́mə aŋwaʼlə pənoŋkə azɨ́ ŋwaʼlə̂ ńgə́ ‘Maŋ sóŋ ńgə́, pɨ lə́ məsê?’ 35Təmbɔʼ Əsê a tíʼ ə́fóŋ pɨ páʼ a kə fɛ̂ nə́ nkɨ əyə́ á mbô pó lə́ nə́ məsê (Anu páʼ aŋwaʼlə sóŋ nə́ lə́ ndə̌ŋdəŋ tə láʼ kě kwúblə pô). 36Lə́ nə́ maŋ, Tǎ a kə́ tsɔʼə mə ńtíʼ ńtúmə mə á mə́m mbîə. Lə́ ghɛlə̂ akə̂ nə́ sóŋ ńgə́ maŋ zɔmtə̂ Əsê ńté ńgə́ maŋ sóŋ ńgə́ maŋ lə́ Mɔ́ Əsê? 37Kɔ nə néŋ ntɨ́ nə́ maŋ páʼ mbɔʼ maŋ chîə pə́ afaʼə Tǎ mə tə̈ faʼə̂ pô. 38Lə́ təmbɔʼ mäŋ faʼə̂ lə́ zɨ́d, ndzaŋ nə́ pǎ nə́ tə ńkě mə pí pó lə́, nə́ pí məfaʼ mə́ wɨ́ ńjî ńgə́ ńdaŋ ə́lɨ́d pɨ jî ńgə́ Tǎ a chîə á mə́m maŋ, maŋ kə́ ńchîə á mə́m yə́.”
39Pó nə ńkə́ ḿbɨ ńtə́ ńdoonə̂ á mə́ wam nə́ yə́, lə́ a pə́ ḿbéŋə á ndzɔʼ pó.
40Yeso a pɨ ḿbəənə̂ á ndzɛnə́ nkǐ Jodan aliʼ páʼ Jɔnə a nə ḿbeg nə́ ə́fɛ̂ nkǐ ə́wɨ́ lə́ ńtíʼ ńchî ə́wə́. 41Pɨ pi nɨ́ nə́ pó yǐəə á mbô yi ńtíʼ ə́sóŋə ndzɔʼ pó ńgə́, “Jɔnə a nə ńkě akyeʼə́nu yitsə̌ kə́ ghɛlə̂ pô, lə́ anuə atsəm páʼ Jɔnə a nə sóŋ nə́ ńté ŋwu nə lə́ ndə̌ŋdəŋə́” 42Aliʼ wɨ́d wə̂ pɨ pi nɨ́ nə́ pó néŋ ntɨ́ nə́ Yeso.
હાલમાં પસંદ કરેલ:
Jɔnə 10: azo
Highlight
શેર કરો
નકલ કરો
Want to have your highlights saved across all your devices? Sign up or sign in
