Yoana 9
9
Eichiunyie ꞉Yeso ltung'ani otiiwuaki era modooni
1Kore eibung'uta Yeso nkoitiei alo, nedol ltung'ani otiiwuaki era modooni. 2Neiparichere ꞉looiteng'eni lenyena ninye aajoki, <<Laiteng'enani, ng'ae otaasa ng'oki, ele tung'ani ana ntoiwuo enyena, payie etiiwuaki era modooni?>> 3Newoliki ꞉Yeso ajoki, <<Mara ninye oataasa ng'oki tanaa sii ntoiwuo enyena, kake ketiiwuaki ninye era modooni payie eibalunyieki asat e Nkai te inia nataasaki te ninye. 4Kore ewuon era parkiji meata ajo mikias asat e ilo laairriwua nanu, amu kelotuta naimin nemeatae ltung'ani oidim ataasa siaai. 5#Mat 5:14; Yoa 8:12Kore atii nanu nkop, nara wong'an e nkop.>> 6Kore payie eidip atejo nejia, nenataki nkamilak nkop, neitibir mparpar tee nenia amlak neelie nkonyek e ilo tung'ani. 7Nejoki, <<Chomo ntukoii to lturoto le Silaom.>> Kore nautu apa inia arna naa, <<Loipaayieki.>> Nelo ilo tung'ani neituko, nechukunyie etodoliche. 8Kore latia enye o ltung'ana pooki ootoduaa apake ninye eomonicho nejo, <<Amaa, mara lapa tung'ani dei ele owuon chiaake aomonicho?>> 9Nejo lkulikae, <<Ee ninye ilo>>, nejo aitoki lkulie, <<Mara ninye, keinyinyukore ake ninye.>> Kake kore ilo tung'ani, nelimu koon ajo, <<Nanu dei ake ilo.>> 10Neiparichere aajoki, <<Naaku nyo nataase payie itodoliche?>> 11Newoliki ajoki, <<Lochi tung'ani oji Yeso oitibira mparpar naaelie nkonyek, naajoki <Chomo Silaom ntukoii.> Nalo, naituko, nadolichoii.>> 12Nejoki ꞉ninche, <<Kore ninye?>> Newoliki ajoki, <<Mayielo nanu.>>
Eitu eiruk ꞉Lparisayo laduo tung'ani modooni
13Nerikokini ilo tung'ani apa modooni Lparisayo. 14Kore inia parri apa naitibira Yeso mparpar, nebol nkonyek e ilo tung'ani modooni metodolicho, naa mparri e Sabato. 15Neitoki Lparisayo aaiparichiere ninye neikuna payie edolichoii. Nejoki ninche, <<Ketipika mparpar nkonyek ainien, naituko, naaku kadolicho taata.>> 16Nejo lbata loo Lparisayo, <<Mara Nkai nairriwua ele tung'ani, amu meibung ninye nkitanapata e Sabato.>> Nejo lkulie, <<Kaji eiko ltung'ani loo ng'ok payie eidim ataasa mbaa e nking'asia naijo kuna, naaitodolu nkitoo enye?>> Nepuku nchankar taatua ninche. 17Nejoki aitoki ꞉Lparisayo laduo ltung'ani modooni, <<Amaa, amu ikinchiunyie ele tung'ani todolichoi, kaa ijo iyie naipirita ninye?>> Newoliki ajoki, <<Loiboni le Nkai ninye.>>
18Naaku, eitu eiruk ꞉lolo arikok loo Lyiaudi aajo kore ilo tung'ani naa ketiiwuaki apa era modooni netodoliche, ana meipoto ntoiwuo enyena. 19Neiparichere ntoiwuo enyena aajoki, <<Nkerai inchi dei ana, inia nijoijo ketiiwuaki aa modooni? Neiko aja payie edolicho taata?>> 20Newoliki ꞉ntoiwuo enyena aajoki, <<Ikiyielo aajo layieni lang ninye, nikiyielo sii aajo ketiwuaki era modooni. 21Kake kore neikuna payie edolichoii taata, tanaa sii ng'ae otobolo ninye nkonyek, naa mikiyielo iyioo. Emparichiere ninye amu ltung'ani kitok, keidim atilimu makoon!>> 22Naa kore tankaraki naurie apa ꞉ntoiwuo enyena larikok loo Lyiaudi, nejo nenia baa. Amu kore apa larikok loo Lyiaudi, naa ketamakinete aajo kore ake ltung'ani oibalunyie ajo kera Yeso ilo Aitejeunoni oanyutae, nemirari aaipung'ie te Sinagogi. 23Inia payie etejo ntoiwuo enyena, <<Kera ltung'ani kitok, emparichiere ninye!>>
24Neigil aipotu nkata e are lapa tung'ani modooni nejoki, <<Tejo ndedei tekue Nkai, ikiyielo iyioo aajo loo ng'ok ele tung'ani.>> 25Newoliki ajoki, <<Kore tanaa loo ng'ok ninye mayielo. Ntoki nabo ake ayielo, kara apa modooni, kake kadolicho taata.>> 26Neiparichere aitoki aajoki, <<Nyo kintaasa ninye iyie? Aji kinkuna payie kibol nkonyek?>> 27Newoliki ajoki, <<Kaidipa apa atiliki ntae neitu Ining'ning. Aanyo payie iyieuu nintokiki aaning? Iyieuu sa ntae niakuku looiteng'eni lenyena?>> 28Nedek ninye aajoki, <<Iyie loiteng'eni le ilo tung'ani, kore iyioo ikira looiteng'eni le Musa! 29Ikiyielo aajo keirorie ꞉Nkai Musa, kake kore ele tung'ani naa mikiyielo ng'oji neing'uaa!>> 30Newoliki ilo tung'ani ajoki, <<Nking'asia taa inia! Eji miyielolo ntae ng'oji neing'uaa, kake netebolo ninye nkonyek ainien! 31Ikiyielo aajo mening ꞉Nkai loo ng'ok, kake tenetii ꞉ltung'ani ourie Nkai neas ana nayieu ninye, naaku kening ꞉Nkai ninye. 32Kore payie eji eitibiraki nkop, eitu aikata ening'i ltung'ani otobolo nkonyek e ltung'ani otiiwuaki era modooni. 33Kore ele tung'ani tanaa mara netii Nkai eing'uaa, anata meidim ataasa toki.>> 34Newoliki aajoki, <<Amaa iyie otiiwuaki katukul taatua ng'ok, iyie onyok aiteng'en iyioo?>> Nemiraa ninye.
Modokicho e ltau
35Nening Yeso ajo ketimirayieki ilo tung'ani meipung'o. Kore payie etum ninye nejoki, <<Iruk iyie Nkerai e Ltung'ani?>> 36Newoliki ajoki, <<Lokitok, tilikaaki ajo ng'ae ninye, payie atum airuko!>> 37Nejoki ꞉Yeso, <<Indipa atoduaa ninye, naa ninye sii ele likirorie taata.>> 38Nejo ꞉ilo tung'ani, <<Kairuk, Laitoriani!>> Negil kung, neirrigokino asai ninye. 39Nejoki ꞉Yeso, <<Kayewuo ana kop payie easai nkiguana, paa kore lolo modook nedolichoi, naa kore lolo oodolicho nemodoku.>> 40Kore Lparisayo otii tenebo o ninye ootining'o ejo nejia neipar aajoki, <<Aaku iyieu nijo ikira aitoki iyioo modook?>> 41Newoliki ajoki, <<Kore tanaa irara modook, anata meiguanare ntae ng'ok, kake kore amu ijoijo idolichocho, nedung'oki ntae ng'ok inchi nkiguana.
હાલમાં પસંદ કરેલ:
Yoana 9: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
