Yoana 7
7
Yeso o lalachera lenyena
1Kore payie eidipai inia, nemanaa ꞉Yeso ta Galilaya, amu meyieu apa nemanaa te Yudea tankaraki nayieta ꞉larikok loo Lyiaudi ninye payie ear metua. 2#Lal 23:34; Nkit 16:13Kake kore amu ketinyikua nochi tasim ee Lyiaudi nachetieki nkorrimpani, 3nejoki ꞉lalachera lenyena Yeso, <<Tung'ai ene ng'oji chomo Yudea payie etum looiteng'eni linono aatodol siaitin le nking'asia niasita. 4Meatae ltung'ani oas mbae to lkutoto, tanaa keyieu neyielouni. Kore tanaa iasita iyie kuna baa, nchoo naa kiyielouni to nkop pooki!>> 5Amu kore abaki lalachera lenyena naa meiruk apa ninye.
6Nejoki ꞉Yeso ninche, <<Ewuon eitu elotu nkata naaichiaakino payie alo inie, kake kore taa ntae naa keichiaakino nkata pooki. 7Meidim nkop aibai ntae, kake kaaiba nanu amu kalimu sipata naipirita ninye ajo, kore mbaa naas naa keitorrok. 8Eiliepa enchom Yerusalem entam ntasim. Mailiepita nanu alo anya inia tasim amu ewuon eitu ebau nkata naaichiaakino.>> 9Kore payie ejo nejia, nebikoo ta Galilaya.
Eiteng'enichie ꞉Yeso taatua nkaji e Nkai
10Kore payie epuo lalachera lenyena aanya inia tasim, nelo Yeso ailiep medolitae aleliari. 11Naa kore apa larikok loo Lyiaudi, keyieita Yeso taatua inia tasim eiparu aajo, <<Kore ilo tung'ani?>>
12Netii apa inie lturrurri naa kore taatua ninche, neing'unyung'unyita ltung'ana tankaraki Yeso. Keatae loojo, <<Keisupat ele tung'ani>>, nejo lkulie, <<Mara nejia! Keitopong'orito ltung'ana.>> 13Kake kore eyia, nemeatae ltung'ani oitieu atilimu mbaa e Yeso ening'itoi, tankaraki naurie larikok loo Lyiaudi.
14Kore payie eaku nkiji e ntasim, nelo Yeso nkaji e Nkai neng'asu aiteng'enicho. 15Neing'asia larikok loo Lyiaudi nejo, <<Kaji eikuna ꞉ele tung'ani payie eyielo kuna baa, eitu eiteng'eni?>> 16Nejoki ꞉Yeso, <<Kore nkiteng'ena ai naa mara nanai, kake ne ilo laairriwua. 17Kore pooki ng'ae oyieu neas yieunoto e Nkai naa keyielou tanaa Nkai eing'uaa nkiteng'ena ai, tanaa lomon lainien alimuta. 18Kore ilo oiro mbaa enyena, neing'uraki koon rrepeta, kake kore ꞉ilo oing'oru rrepeta naayaki ilo oirriwua, naa loosipat ninye, nemetii sapare atua ninye. 19Mara keichoo apa ntae Musa nkitanapat? Kake meatae hoo ꞉lobo linchi oibung'uta nenia kitanapat. Aanyo naa payie kiyieuu nikiarrar matua?>> 20Nejoki ꞉ilo turrur, <<Iata taa lairirua! Ng'ae likiyieu nikiar?>> 21Nejoki ꞉Yeso, <<Kataasa apa mbae nabo e nking'asia ta Sabato, ning'asiasia pooki tankaraki inia. 22#Lal 12:3, Ng'as 17:10Keitanapa apa Musa ntae payie imuratrat nkayiok inchi, namara sii Musa eing'uaa inia, kake loo papa lang. Naaku imuratrat ntae nkayieni ta mparri e Sabato. 23#Yoa 5:9Amaa tanaa keng'amaa ake ltung'ana aajo keyiere nemurati nkayieni abaki ta Sabato, payie megili nkitanapat e Musa, aanyo naa payie kigorokinono nanu eji, amu ltung'ani omuai aichiunyie katukul ta mparri e Sabato? 24Emidung'oki nkiguana to nkung'urata e mbaa e oriong, kake etundung nkiguana te sipata.>>
Kera Yeso ilo Aitejeunoni oaanyutae oji Kristo
25Netii inie ltung'ana le Yerusalem, aaiparuta aajo, <<Mara lochi tung'ani ele oyieitai payie eri metua? 26Naa lele ninye taata, oirorita tekue ltung'ana, nemeatae ltung'ani ejoki pito. Kebaki sa neteyieloutua lkutuaa aajo ninye ilo Aitejeunoni oanyutae? 27Kake kore ele tung'ani, ikiyielo neing'uaa, naa kore kenya tenelotu ilo Aitejeunoni oanyutae, nemeatae ltung'ani oyielo neing'uaa ninye.>>
28Kore inia kata, nebuak Yeso to ltoilo sapuk eiteng'enicho ta nkaji e Nkai ajo, <<Naaku ikiyielolo nanu o ng'oji naing'uaa? Eitu naa alotu nanu makoon, kore ilo laairriwua naa keisiligai, nimiyielolo ntae ninye. 29Kayielo ninye, amu ninye aing'uaa nanu, naa ꞉ninye lairriwua.>>
30Nenyok ninche aajo embung'a ninye, kake meatae hoo lobo oiseyie ninye, amu ewuon eng'or nkata enye. 31Naa keiruko ninye ꞉lkumo te ilo turrur, nejo, <<Amaa kenya tenelotu ilo Aitejeunoni oanyutae, keas ninye mbaa naaitodolu nkitoo enye alang ele tung'ani?>>
Eyieu Lparisayo neibung Yeso
32Nening ꞉Lparisayo ilo turrur eing'amng'am aaimaki nenia baa naipirita Yeso, Neirruaaya ꞉laitainok kutuaa la lasar o lolo Parisayo, sikarini meibung'a ninye. 33Nejo ꞉Yeso, <<Ewuon ake ati tenebo o ntae te nkiti kata, naitoki arrinyokino ilo laairriwua. 34Naa iking'oruru kenya inia kata, nimikitumtum, amu kore inie natii mindimdim aaotu.>>
35Neipara larikok loo Lyiaudi aajokino, <<Kaji sa dei inie netaa kelo ele tung'ani nimikitumie? Kelo sa neti ꞉ltung'ana lang otii atua loreren? Naa keiteng'en lolo oreren? 36Nyo sa eutu payie ejo, <Iking'oruru nanu, nimikitumtum,> o <Kore inie natii, mindimdim aaotu>?>>
Nkare e nkichui
37 #
Lal 23:36
Kore te inia parri e siedi naisul pooki te inia tasim, neinyuototo Yeso, nebuak to ltoilo sapuk nejo, <<Kore pooki ng'ae oata nkure, nchoo elotu natii nanu amat. 38#Ese 47:1; Sak 14:8Kore pooki ng'ae laairuk nanu, <nerukunyie ta ltau lenye nkare e nkichui>, ana nejo Lkigerot.>> 39Kore ana bae natejo Yeso, naa keipirita Ltau Sinyati otum kenya pooki ng'ae oiruko ninye, amu kore apa inia kata naa ewuon eitu eichoruni ilo Tau Sinyati, tankaraki ewuon eng'or nkata payie eiliepieki.
Nduat naapaacha, naaipirita ꞉Yeso
40Kore payie ening lolo tung'ana le ilo turrur Yeso ejo kulo omon, nejo lbata, <<Kore ele tung'ani naa kesipa kera ilo Oiboni le Nkai oaanyutae.>> 41Nejo lkulie, <<Ele taa ilo Aitejeunoni oanyutae!>> Nejo lkulikae, <<Amaa sa, mara meing'uaa ilo Aitejeunoni oanyutae Galilaya? 42#2Sam 7:12; Mika 5:2Mara kejo Lkigerot nchere, kore apa ilo Aitejeunoni naa le ichoi e lkinkii Daudi, neing'uaa Beteleem, ilo lkerenket oing'uaa sii apa Daudi?>> 43Nepuku oro te ilo turrur, tankaraki Yeso. 44Kore apa lbata lenche neyieu payie eibung Yeso, kake meatae hoo lotoochoyie ninye.
Etanya larikok lo Lyiaudi eiruk Yeso
45Nerrinyo naa sikarini aapuo netii laitainok kutuaa la lasar o Lparisayo, nejoki ꞉ninche sikarini, <<Aanyo payie eitu iyau ninye ene?>>
46Newoliki ꞉sikarini aajoki, <<Meatae aikata ltung'ani oiroro ana neikuna ele tung'ani!>> 47Nejoki ꞉Lparisayo, <<Keitopong'oyieki abaki ntae? 48Keatae sa lobo laa larikok tanaa loo Lparisayo oiruko Yeso? 49Kake kore ele turrur lemeyielo nkitanapat, naa ketii ninche taabori ldeket le Nkai.>>
50 #
Yoa 3:1,2 Kore Nikodemo oara lobo lenche, ochomo apa netii Yeso tekue, nejoki ninche, 51<<Amaa, kedung'oki nkitanapat ang ltung'ani nkiguana eitu eng'asi ainining ninye, neyielouni naasita?>> 52Newoliki ajoki, <<Aa Galilaya aitoki ing'ua iyie? Terrerrekuanu soma Lkigerot, niyielou ajo meatae loiboni le Nkai oing'uaa Galilaya.>>
53Nerrinyo pooki ng'ae alo nkang enye,
હાલમાં પસંદ કરેલ:
Yoana 7: saq
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Bible Translation and Literacy
