Sélimɛ 9
9
Kulocɛliɛ 'nyakungɛngɛ kpíʔile nɛ́ Nɔwe ní
1A Kulocɛliɛ wi 'diba taʔa wè Nɔwe nɛ́ wi jaala nɛ̄ bèle, nɛ́ jo: «Yeri sii ye niʔɛ, ye‑ dàala le lè ni‑ nyì. 2Gàa ki 'yawiire ti mìɛni kúɔ dè, nɛ́ yafinide ní dè, nɛ́ yafulolido ní dè, nɛ̄ fàri fúɔlɔ nɛ̄ bèle, ti béri fìʔɛ́ kpuʔɔ yeli kɛnmɛ nɛ̄; mi 'ti mìɛni kɛn yeli mɛ́ yeli ye bé puu ti kàfɔlilɔ bèle.
3«Kɛnmɛ bíì nɛ̄ mi yé dàala yaliire nɛ́ tiire yasɛnrɛ ti mìɛni kɛn yeli mɛ́ wè, kire kɛnmɛ nɛ̄ míɛni m'bé yawiire ti mìɛni kɛn yeli mɛ́. Yɛlɛ ó yɛlɛ nī sìi nɛ̄ níɛ nyaari wè, ti‑ puu kaara yeli mɛ́. 4Nɛ̀ sí ki yaʔa kaara dáà nī sìsiɛn ki 'tíin gè, yeli sì yɛli bè ti káaʔ, nɛ́ ki cɛ́n sìi wiī sìsiɛn nī gè.
5«Nɛ̀ taʔa ki nɛ̄, ye míɛni ye‑ ki cɛ́n m'bé yeli yúgo siɛnnɛ pe sìsiɛn ki kaala nɛ̄ lè, nɛ́ ki cɛ́n sìi wiī siɛnnɛ sìsiɛn nī gè. A ki yē yawiʔi káà ki 'siɛn kpúu wè, m'bé ki yúgo siɛn wi sìsiɛn ní gè. Á ki yē siɛn wáà 'wi siɛnnyɛni kpúu wè, m'bé wi yúgo nɛ̄ ki siɛn wi sìi ní wè. 6Siɛn ó siɛn wi 'siɛn kpúu wè, kire siɛn míɛni wè siɛnnɛ pe 'yɛli bè wi kpúu wī. Nɛ́ ki cɛ́n Kulocɛliɛ wi nyɛ́nì siɛnnɛ faan bèle wi líɛrɛ.
7«Yeli bèle, ye‑ sii ye niʔɛ, ye‑ sii ye kàa fàri nìʔɛgɛ yìye nɛ̄ dàala nɛ̄ lè.»
8A Kulocɛliɛ ń'nɛ̀ ki juu Nɔwe nɛ́ wi jaala mɛ́ bèle, nɛ́ jo: 9«Ye‑ wéli, mi wè, mi je ní koli mi nyakungɛngɛ siɛnrɛ nɛ̄ dè bè ti sɔ́migɔ juu yeli mɛ́, yeli nɛ́ yeli siimɛ wuulo ní bèle, 10nɛ́ yawiire ti mìɛni ní dàa dī nɛ́ yeli ní dè, tire dī yafinide nɛ́ yajuuro nɛ́ nyàʔayɛrɛ ti mìɛni, dàa ti 'yiri nɛ́ yeli ní kɔ́rikpuʔɔ nī gè nɛ́ dàa ti bága ba puu náʔa dàala nɛ̄ lè.
11«M'bé koli mi nyakungɛngɛ siɛnrɛ nɛ̄ dè bè ti sɔ́migɔ juu yeli mɛ́, tire dī dàa dè: kàsakpiile sì ní ga tíi siɛnnɛ nɛ́ yawiire ti mìɛni cúʔɔ cígini duniya nī wèʔ; kàsakpiile sì ní ga tíi bè tuu dàala nɛ̄ lè bè ní dàala cúʔɔ lèʔ.»
12A Kulocɛliɛ ń'nɛ̀ jo: «Mi nyakungɛngɛ ki fìɛ n'ŋɛ ŋàa wī mi nɛ́ yeli sunʔɔmɔ ní bè, mi nɛ́ yawiire ti mìɛni ní dàa dī nɛ́ yeli ní wè; ki fìɛ ŋáà wi bé puu yeli nɛ́ kɛ̀ngɛlɛ ke mìɛni siɛnnɛ ní bèle súuri. 13Mi kàsaŋɔnɔ ń'nɛ̀; mi nyɛ́nì ni tɛ́ngɛ kàsadibarɛ nī dè, kire ga buu ni‑ puu mi nyakungɛngɛ ki fìɛ, gàa mi 'kpíʔile nɛ́ duniya ní wè. 14Lɛ̀lɛ ó lɛ̀lɛ nī a nyìʔɛnɛ ni 'wúɔ, a kàsaŋɔnɔ ni 'yiri lè kàsadibarɛ nɛ̄ dè, 15m'bé sɔ̀ngi bè taa mi nyakungɛngɛ ní gè gàa mi 'kpíʔile mi nɛ́ yeli sunʔɔmɔ ní bè, yeli nɛ́ yawiire ti mìɛni feliye ní yè: lakpuʔɔ sícuugo lawiʔile nɛ́ nyìʔɛnɛ kàliile luɔrɔ sì ní ga tíi pínɛ tìi nī bè kò kàsakpiile bè siɛnnɛ nɛ́ yawiire ti mìɛni cúʔɔ cígini duniya nī wèʔ. 16A ki pɛ́nì puu lɛ̀lɛ ó lɛ̀lɛ nī kàsaŋɔnɔ ni 'yiri kàsadibarɛ nɛ̄ dè, m'bé ni wéli bè sɔ̀ngi bè taa nɛ́ bànguɔ nyakungɛngɛ siɛnrɛ ní dè, dàa dī mi Kulocɛliɛ nɛ́ duniya yawiire nɛ́ siɛnnɛ pe mìɛni sunʔɔmɔ ní bè.»
17A Kulocɛliɛ 'ki juu Nɔwe mɛ́ nɛ́ jo: «Gàa kire gī mi nyakungɛngɛ fìɛ wè, gàa gī mi nyɛ́nì kún nɛ̀ kɛn duniya yawiire nɛ́ siɛnnɛ pe mìɛni mɛ́ bèle.»
Nɔwe jaala bèle Sɛmi nɛ́ Kami nɛ́ Jafɛti
18 Nɔwe jaala bálì pe 'yiri kɔ́rikpuʔɔ nī gè, peli pe 'puu Sɛmi, Kami, nɛ́ Jafɛti; Kami wire wi 'puu Kanaa tuu wè. 19Nɔwe jaala peli taanri bīɛlɛ, peli pìile pe 'niʔɛ nɛ́ cɛrigɛ duniya nī wè.
20Nɔwe 'puu tàfaliwɛ; wire wi séli nɛ̀ ɛrɛzɛn siʔi fáli gè. 21Cɛngɛ káà a Nɔwe kɛ́nì diviɛn gbuɔ nɛ̀ tín, a wi 'buruyo fòri yè, nɛ́ sínɛ nábori wi fɛ̀ni saʔa nī gè. 22Kami wè, Kanaa tuu wè, a wi sɛ́nì wi tuu nyaa wè nábori, a wi pɛ́nì ki juu wi lɔbilɔ mɛ́ bèle kpànʔanɛ gè. 23A Sɛmi nɛ́ Jafɛti a pe 'fɛ̀ni líɛ nɛ̀ taʔa pe fíkɛnnyuyɔ nɛ̄ yè, níɛ waa nɛ́ kàduʔu ní, nɛ̀ sɛ́nì pe tuu tɔ́n wè bɛ̀ wi 'puu nábori wè; pe yé pe yiɛyɛ wáa yè kɔli káà mɛ́ kire ga buu pe fǎga pe tuu wi náborimɛ nyaa bèʔ.
24Bà diviɛn wi kɛ́nì yiri Nɔwe nī wè, á Nɔwe 'ti lúʔu gàa wi jaa sɛnwɛ wi 'kpíʔile wi nɛ̄ wè, 25a Nɔwe 'fali nɛ́ jo: «Mi 'dɛ́ngɛ taʔa wè Kanaa nɛ̄ wè, wi‑ puu sùkulowo wi siinyɛninɛ mɛ́ bèle, ŋàa wi 'wi siinyɛninɛ sùkulolo kàduʔu tɔ́n gè.»
26A wi ń'nɛ̀ jo: «Sɛmi Kulocɛliɛ, Yewe wè, wi‑ kpuʔɔrɔ taʔa wi nɛ̄; Kanaa‑ sí puu sùkulowo Sɛmi mɛ́. 27Kulocɛliɛ‑ sí de kàa fàrí Jafɛti nɛ̄, Jafɛti‑ sí de sùɔ́n Sɛmi wi fɛ̀ni saaya nī yè, Kanaa‑ sí puu wi sùkulowo.»
28Kàsakpiile tuulo kàduʔumɛ gè, a Nɔwe 'yiʔɛlɛ sirakeli tekɔlisiin nɛ́ kpɔrigɔ (350) taa. 29Nɔwe yiʔɛlɛ ke mìɛni bìnɛ wi 'puu yiʔɛlɛ sirasicɛri tekɔlisiin nɛ́ kpɔrigɔ (950), á wi 'kùu.
હાલમાં પસંદ કરેલ:
Sélimɛ 9: sev
Highlight
શેર કરો
નકલ કરો
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.