Luka 19

Jesu a Zakeyosi

1Jesu wakanjila mu Jeliko akwiindilila. 2Lino ooko kwakali muntu wakali kutegwa Zakkeyosi. Wakali simutelo mupati, alimwi wakalivubide. 3Lino muntu ooyu wakayanda kubona Jesu, pele akaambo kakufwiimpa kwakwe taakakonzya kumubona bantu bakali banji. 4Nkaako wakatijaanina kumbele akuyootanta mucisamu camukuyu kuti amubone mukuti Jesu nkwakeelede kwiinda. 5Lino Jesu naakasika aawo, wakalungumana, wakati kulinguwe, “Zakeyosi, kofwambaana kuseluka, sunu ndeelede kuyookkala kuŋanda yako.”

6Aboobo wakafwambaana kuseluka, wakatambula Jesu cakukondwa. 7Eelyo bantu nibakabona boobo, bakatongooka akwaamba kuti, “Amubone, muntu ooyu waakusikila kuŋanda yamuntu sizibi.”

8Zakeyosi wakaima akuti ku Mwami, “Komvwa, O Mwami! Mebo cisela calubono lwangu ndiyoocipa kubacete, alimwi naa kuli muntu ngundakacenga kulubono lwakwe, ndiyoomubweedezezya lubono lwakwe akuluyungizya ziindi zili zyone.”

9Mpoonya Jesu wakati kulinguwe, “Sunu lufutuko lwasika kuŋanda eeyi, nkaambo ooyu muntu mwana wa Abulahamu, 10kayi Mwanaa Muntu wakazida kuyandaula akufutula basweekede.”

Cikozyanyo camali aangolida

(Mateyo 25.14-30)

11Nibakacili kuswiilila makani aaya, Jesu wakabaambila cikozyanyo, mukuti wakali afwiifwi kusika ku Jelusalemu, alimwi balo bakali kuyeeya kuti bwami bwa Leza buli afwiifwi kusika. 12Wakati kulimbabo, “Kwakali mwaalumi wakali kulemekwa, wakatola lweendo kuya kucisi cakali kulaale kuti akapegwe bwami bwacisi eeco, kwamana akapiluke. 13Katanainka wakaita babelesi bakwe bali kkumi akubapa boonse di lyomwe-lyomwe lyangolida, wabaambila kuti ‘Mwaapindaule mali aaya kuti ndaakuboola nzoojane mpindu yawo.’

14“Pele basicisinyina tiibaali kuyanda kuti abe mwami. Aboobo bakatumya mulomo munsi lyakwe wakuti, ‘Swebo tatuyandi kuti muntu ooyo abe mwami wesu.’

15“Nikuba boobo muntu ooyo wakaakupegwa bwami, amane wapiluka. Mbwaakasikila buyo, wakaita babelesi bakwe mbaakapede mali, kuti azibe nzibakajana mukupindauka kwabo. 16Mutaanzi wakaboola wati, ‘Mwami, di lyako lyakajana aambi aali kkumi.’ 17Mpoonya wakati kulinguwe, ‘Wakacita kabotu, omubelesi mubotu! Lino nkaambo wasyomeka kuzintu ziniini, ndilakucita kuti ube mweendelezi waminzi iili kkumi.’ 18Awalo mubelesi wabili wakasika wati, ‘Mwami, di lyako lyajana aambi osanwe.’ 19Mwami wakati kulinguwe, ‘Yebo ulaba mweendelezi waminzi yosanwe.’ 20Mubelesi wamamanino wakaboola wati, ‘Ndeeli di lyako. Ndalilivungaide mukasani akuliyobola. 21Ndakayoowa, nkaambo uli mukali. Ulatola ncootakabikka, akutebula mpootakasyanga.’

22“Mwami wakati kulinguwe, ‘Yebo omubelesi mubi! Tee kayi majwi aako omwini akuzula? Mbuli mbozi kuti ndimukali, ndatola zitali zyangu, alimwi ndatebula mpindatasyanga, 23ino nkaambo nzi ncootakapindaula di lyangu Kutegwa ndaboola njane mpindu?’ 24Mpoonya mwami wakabaambila bakaimvwi afwiifwi anguwe wakati, ‘Amumunyange ngolida, mwiipe kuli uujisi ngolida, zili kkumi!’ 25Balo bakati, ‘O Mwami, ulijisi kale ngolida zili kkumi.’ 26Mwami wakabaingula kuti, ‘Ooyo uujisi uyooyungizizilwa, pele uujisi kasyoonto uyoonyangwa koonse nkajisi nikaceya. 27Lino abaya basinkondoma batakali kuyanda kuti mbe mwami, amukabalete okuno, bazoojaigwe nkelangilila!’”

Jesu mbwaakanjila mu Jelusalemu

(Mateyo 21.1-11; Maako 11.1-11; Joni 12.12-19)

28Jesu naakamana kwaamba boobu, wakabasolweda kuya ku Jelusalemu. 29Naakasika kufwiifwi aminzi ya Betefage a Betani, kucilundu camisamu ya Oliva, wakatuma basikwiiya bakwe bobilo kuya mumunzi. 30Wakabalailila kuti, “Kamuya mumunzi uulya. Mwaakunjila buyo muyoojana mwanaa mbongolo uutanatantidwe muntu pe, ulisungidwe kucisamu. Mukamwaangunune mumulete kuno. 31Kuti naa kukabe muntu uyoomubuzya kuti, ‘Ino mucitila nzi oobu?’ Mukamwaambile kuti, ‘Mwami ulamuyanda.’”

32Eelyo bakainka akuyoojana mbubonya mbuli Jesu mbwaakabalailila. 33Lino nibakacili kumwaangununa, bamukamwini bakati, “Mumwaangunwida nzi mwanaa mbongolo?”

34Balo bakabaingula kuti, “Mwami uyanda kumubelesya.” 35Mpoonya bakamuleta kuli Jesu, bayala majansi aabo alinguwe, akumukkazika mpawo Jesu. 36Jesu naakali kuya buya ku Jelusalemu katantide amwanaa mbongolo bantu bakayala majansi aabo mumugwagwa.

37Naakasika afwiifwi a Jelusalemu aawo mugwagwa mpowakali kuselemukila munselelo lyacilundu ca misamu ya Oliva, nkamu yoonse yabaccilili bakwe yakatalika kukondwa akoongolola kulumbaizya Leza akaambo kamilimo mipati njibakabona. 38Bakati, “Mwami Leza, aaleleke Mwami ooyo uuboola muzina lyakwe! Kuli luumuno kujulu, a Leza ulalumbaizigwa!”

39Lino bamwi Bafalisi bakali munkamu yabantu bakati kuli Jesu, “O Mwiiyi, baambile baccilili bako baumune.”

40Walo wakabaingula kuti, “Nikuba kuti aaba baumune, mabwe alakonzya koompolola.”

Jesu mbwaakuulilila munzi wa Jelusalemu

41Lino Jesu naakaswena afwiifwi amunzi wa Jelusalemu akuubona, wakuulilila. 42Wakati, “Akaka noolizizi zintu zikonzya kukuletela luumuno! Pele ono zilisisidwe kuzwa kulinduwe! 43Nikuba boobo ayoosika mazuba notikabule coolwe, aawo basinkondonyoko nibayookusida mulindi uuyookuzinguluka, bakakubikke akati akukusinkila koonse koonse mane ukabule ambolikwabilila. 44Alimwi bayookumwaila ansi yebo omunzi. Bakkala mulinduwe bayoobanyonyoona boonse. Taakwe bbwe niliba lyomwe ndyobatikasiye kalili atala aabbwenyina, nkaambo tookaciziba ciindi Leza ncaakazide kuzookufutula!”

Jesu mbwaakaya kuŋanda ya Leza

(Mateyo 21.12-17; Maako 11.15-19; Joni 2.13-22)

45Jesu wakanjila muŋanda ya Leza akutalika kutanda baabo bakali kusambalila mumo, 46wakati kulimbabo, “Kulilembedwe kuti, ‘ŋanda yangu iyooba ŋanda yakukombela.’ Pele nywebo mwaicita ciyubilo cababbi!”

47Jesu wakali kwiisya muŋanda ya Leza mazuba oonse. Bapaizi basilutwe, bamayi ba Mulawo, abeendelezi babantu bamucisi bakali kuyandaula nzila yakuti bamujaye. 48Pele bakakacilwa kwiijana, nkaambo bantu boonse bakali kumuswiilila, akumvwisya nzyaakali kwaamba.

હાલમાં પસંદ કરેલ:

Luka 19: Tonga96

Highlight

શેર કરો

નકલ કરો