เกาตีนา 8
8
ญาม นอก ออจ
1-2อุ เจ็นนัน วัล เอาซาง ก็ กึด เลือง แป โนอา เคิบ ปึง ซัด จู มบลึ ตัก อุ เลิม เคิบ นำ ใน เฮือ นัน เอาซาง ก็ แอง ระ เล็ห งกริม นทูด โตะ นอก เจ็น เซ็บ ก็ ไอ มี โตะ เตาะ มพุง นอก ตัก วาง นทึห ก็ ฮัด แอ็ม เมียะ ก็ งเกิด แอ็ม นอก ก็ เคริบ ออจ ติกๆ 3ปน 150 งิ แลว นอก ก็ ออจ แดๆ 4ตัก วัน ที ซิบเจ็ด เดือน เจ็ด เฮือ ก็ ซัก อุ ตัก ญวัง อารารัด 5เจ็นนัน นอก ก็ เคริบ ออจ ติกๆ เล็ห วัน ที นึง เดือน ซิบ ก็ เลิม ตาด มแบ็จ ญวัง
6อุ เจ็นนัน วัล ซีซิบ งิ โนอา ก็ พลาง นาตาง แย็ด ตี นำ แอง ระ อน ใน เฮือ นัน 7นำ ก็ ปลอย เซ็ม งกาก เซ็ม งกาก นัน ก็ พาล เริล พาล วัล จำปอ ฮัด แอ็ม นอก ไอ มี อี วัล เตาะ
8เจ็นนัน โนอา ก็ ปลอย งกรุก มี นัง นำ ซีรอก เม็จจึด ซิก นัน ทัง ลู ไอ มี ตัน ทัง 9แต งกรุก นัน ไอ มี เม็จ ตี ต็อก ออ ควะ มี นอก ทวม อุ ทัว แพนซิก มด เย็ห ก็ ลบ วัล โตะ และ โนอา ตัก เฮือ วัล โนอา ก็ นจืน ที ออ เอิด งกรุก นัน ระ อุ เลิม เคิบ ออ วัล
10อุ เจ็นนัน วัล เจ็ด งิ นำ ก็ ลบ วัล ปลอย งกรุก นัน 11เย็ห ก็ พาล เริล ออ แจ็ล เย็ห ก็ ลบ วัล โตะ ตัก เฮือ แต ลบ เน เย็ห กาบ ซับ นทู แพะ ค็อก แต็จๆ ตัก โนอา โนอา ก็ เคาใจ ออจ นอก แลว ซีเละ 12นำ เพา อุ เจ็ด งิ เจ็นนัน วัล นำ ก็ ลบ วัล ปลอย เซ็ม งกรุก นัน แต ลบ เน เย็ห ไอ มี วัล โตะ และ โนอา ตัก เฮือ เตาะ
13ทาเน เล็ห วัน ที นึง เดือน นึง ตัก วาง นัน โนอา ก็ อาญุ 601 ปี แลว ซิก ก็ ทัง แดๆ ตัก งิ นัน โนอา ก็ รึห แอ็ม ซีนุม ลัห ทึห ดอม ซิก นเซ็บ เม็จ ทัง แดๆ 14เล็ห วัน ที ซาวเจ็ด เดือน ซอง แพนซิก ก็ เลอะ ทัง งโค็ล ลบ นะ
15เจ็นนัน เอาซาง ก็ ไล โนอา ทอก เจ็น เฮือ 16“แป ทอก เจ็น เฮือ กุญ แลว ดาย แป เลอะ ทอก มด ตึง มัห ตึง ยัห ตึง ควัน เคิบ ซีมัน มด ดาย 17แป พระ แอ็ม ซัด จู มบลึ ตัก อุ เลิม เคิบ แป นัน ดาย เป็น เซ็ม เป็น วะ ซัด แย็ด ซัด จ็อง ก็ พระ แอ็ม มด ระ เย็ห มี ควัน ดกๆ ระ แปร เริล ทัว โลก แพนซิก เน วัล” เอาซาง อัง
18ทาเน แป โนอา ก็ ทอก เจ็น เฮือ มด ตึง ยัห ตึง ควัน ตึง ซีมัน อัห ก็ ทอก มด 19ซัด จู มบลึ เคิบ เซ็ม จู มบลึ ตัก อุ ใน เฮือ นัน เย็ห ก็ ทอก มด เย็ห ทอก เป็น มบลึ เป็น มบลึ ฮัก
โนอา ทวาย ซะ อน ตัก เอาซาง
20แลว โนอา จูล เจ็น เฮือ แลว นำ ก็ แอง ตี ทวาย ซะ อน ตัก เยโฮวา ซัด เคิบ เซ็ม ตี ทวาย อน ตัก เยโฮวา กุญ นำ ก็ เอิด มี นัง มี มบลึ นำ มเบิล เคิม แอ็ม มด ตึง นัง ทวาย อน ตัก เยโฮวา 21เยโฮวา เม็จ งกอด นำ ก็ ปอใจ นำ ก็ กึด ใน ใจ ออ ฮุนเน “เจ็นเน นโดน เอิญ ไอ งกิ มเบิล ครำ มเบิล ซัด ระ ซุด แอ็ม ฮุน ลบ เน เตาะ อัห กึด แอง ไอ มี เลาะ เจ็น แย็ด จำ แกะ ก็ ตึก เอิญ ไอ งกิ จม แจง โลก แพนซิก เน วัล เตาะ ไอ งกิ เอิญ แอง นอก ทวม โลก ฮุน ลบ เน วัล เตาะ 22กัน ควะ มี โลก แพนซิก เน อุ
เอิญ ก็ ระ มี นวจ แซ็ด แซ เกียว ซา
มี นาเคด นาฮอน นาแลง นาเมียะ
มี งิ มี แจ็ล จู มบลึ ก็ เป็น มอก เน
จำ นเดย จำ กวา นโดน” เอาซาง อัง
હાલમાં પસંદ કરેલ:
เกาตีนา 8: Prai
Highlight
શેર કરો
નકલ કરો
Want to have your highlights saved across all your devices? Sign up or sign in
Global Partners