Tekang Kbuten 3
3
Yóm là kimón tau
1Bè kdê yó kem gel nô lem bnes deng dlimun yóm sana Dwata hol gónó mogot, ulal yóm alì hulung smukat bélê le. Ne snólók yóm ulal yóm libun, monen, “Tahu kô deng mon Dwata mò kuy hol bê ye abay ken yó kem bungu koyu bè nim hungul ni?”
2Ne yó balaen du yóm libun, monen, “Hyu kken me du balù kihu kay bungu koyu bè nim hungul ni, 3tek són yóm koyu mteg bè gónón sóól, là hken Dwata du kum bunguhen ne là se kô gdù me du. Ke yó nmò me matay me.”
4Ne bud mon yóm ulal bè yóm libun, “Là kô ye na a matay. 5Yó gónó Dwata mngali du kuy yóm yó, abay se tngónen ke ken ye tódô ye mkél béléen, tódô tngón ye yóm hyu ne tódô tngón ye se yóm sidek.”
6Timbow henklol hnunu yóm libun yóm koyu yó, tey minggel ktonen du ne hendemen dô hyu mken du bunguhen, lelen hemdem du tey hyu ke baling temngón. Yó gónón wen nwahen bè yó kem bunguhen ne kenen. Ominen wen blayen ke tuha logihen ne kenen se kun. 7Mung bè yóm kken le du, tódô henmungen wen tngón le ne ton le tódô le hlówó. Yó ne sotu kun ma doun koyu fig, tenbé le mò dowin le.
8Na a móyón kifu bè yó, tódô gungol le yóm Dwata hol gónó mogot mógów gu lem yóm hungul yó ne yó nmò le, mom henbnos le Dwata lem blóng yó kem koyu. 9Okóm tnaba Dwata yóm logi, monen, “Gónóm nô de?”
10Yó balaen du yóm logi yó, monen, “Gungolu uu se yóm kkólem bè ni okóm likoe, henbnosu uu abay se tódóe hlówó.”
11Ne yó snólók Dwata béléen, monen, “Tau du se tmulón du kóm yóm tódô kehlówóhem yó? Deng kenem kô yóm bungu koyu nalihu kuy?”
12Ne yó balaen du yóm logi, monen, “Yó sem libun nmoem mò dumuhu bemlay du dou, ne tódô kenu.”
13Ne snólók Dwata yóm libun, monen mò du, “Moen de ke nmoem nim ni?”
Ne yó balaen du yóm libun, monen, “Yóm ulal fen smukat dou, yó sem gónóhu mken du.”
Ktafak Dwata kul le Adam ne Ib
14Ne yó mon Dwata ebè yóm ulal, monen, “Bè nim nmoem ni, wen tafaku kóm. Bè kdê yó kem mowil talak tonok, tek són uu gembô du nim tafak ni. Lemwót bè nim kdaw ni, tódô sónmoem mulu se kóm ne gemken kfung bè yóm klawihem mowil. 15Hlós senfohonu yu yóm libun. Yóm kun lugod ne yóm kóm lugod sónmò le tendo sfohon. Ne wen bè kun lugod yóm libun angat lemuna kuluhem. Ne yóm kóm lugod, fen mékét bè tekeden.”
16Ne yó bud mon Dwata ebè yóm libun, “Angat tennuu yóm ksidek kegnómem du bè yóm keblututem, ne hol hdesu yóm ksut blututem. Baluen se ke lómón yó kmoen, là kóen mkó óyóem du yóm tuha logihem, ne du se gónóhem kmulu.”
17Ne yó udél Dwata ebè yóm logi, monen, “Deng nimónem udél tuha libunem ne deng kenem yóm bungu koyu nalihu kuy. Lemwót bè nim nmoem ni, tódô gomong megtafak béléem yóm klamangen tonok. Bè yóm klawihem mowil, ke là nam hol hgel mò nmò là kô wen gónóm ma mò ken ye. 18Tódô senflósen mget knuon ne semnual yóm tonok ye, ewenem sana kmò ye hulu tahen mò ken ye. 19Ke là nam na hol hinget mò hulu là kói gemtob ken. Ni se mò kmoen béléem efet bud kulékem elem tonok, abay se bè tonok tehe gónóm gu lemwót. Nifilu uu lemwót gu bè tonok, ne angati bud baling tonok.”
20Ne yó boluy Adam du yóm libun yehenen, Ib, abay se du yê yóm kdéen tau mowil te tonok. 21Ne wen nes lemwót bè kulit ógóf nmò Dwata bè Adam lewu le Ib mò nes le.
Kehdó Dwata ke Adam ne Ib bè yóm hungul koyu bè Idin
22Ne yó bud mon Dwata yóm hol gónó mogot, “Ngem, yóm tau deng baling mkél tekuy, deng tngónen yóm hyu ne deng tódô tngónen se yóm sidek. Là kóen hyu ke ma bè yóm koyu hlowil tau, abay se ke kenen tódô hlós mowil.” 23Yó gónóm mon, tódô hdó Dwata le Adam bè yóm hungul koyu bè Idin anì nbuten mò nmò ta yóm tonok tehe gónó le mò du. 24Ne wen kem hógówen gu bè longit hbenteyen bè fi dmata kdaw yóm hungul yó. Wen sudeng sù Dwata bè yó, tódô eles sedlu dilóf bè baken ne tendo hilóy lowi anì laen dù tau gehloni ebè yóm koyu hlowil tau.
હાલમાં પસંદ કરેલ:
Tekang Kbuten 3: tbl
Highlight
શેર કરો
નકલ કરો
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.