Мәтта 12
12
Пьрса рʼожа шәмийе
(Марԛос 2:23-28; Луԛа 6:1-5)
1Һьнге Иса рʼожәкә шәмийе нава зәвийарʼа дәрбаз бу, шагьртед Ԝи бьрʼчи бун у дәстпекьрьн сьмбьлед гәньм чьнин у хԝарьн. 2Гава ферьсийа әв йәк дит, Ԝирʼа готьн: «Һәла бьньһерʼә, шагьртед Тә тьште нәщайизи рʼожа шәмийе дькьн».
3Иса ԝанарʼа гот: «Ԝә нәхԝәндийә кӧ Даԝьд чь кьр, гава әԝ у йед перʼа бьрʼчи бун? 4Нә әԝ кʼәтә Хана Хԝәде у нане Хԝәдерʼа дайи хԝар, әԝ нан нә ԝирʼа щайиз бу бьхԝара, нә жи әԝед тʼәви ԝирʼа, ле тʼәне кʼаһинарʼа?#12:4 Ԛануна Кʼаһинтийе 24:9; Пʼадшати I, 21:1-6. 5Йан жи ԝә Ԛанунеда нәхԝәндийә, кӧ кʼаһин рʼожед шәмийе пʼарьстгәһеда шәмийе дьһʼәрʼьминьн у диса бе сущ ьн? 6Ле Әз ԝәрʼа дьбежьм, кӧ ль вьр Йәки жь пʼарьстгәһе мәстьр һәйә. 7Һәгәр ԝә заньбуйа мәʼна ве хәбәре чь йә кӧ те готьне: ‹Әз рʼәʼме дьхԝазьм, нә кӧ ԛӧрбане›#12:7 Һосейа 6:6. , һьнге ԝәйе йед бесущ гӧнәкʼар нәкьрана. 8Чьмки Кӧрʼе Мерьв Хӧдане рʼожа шәмийе йә».
Иса рʼожа шәмийе мәрьве кӧ дәсте ԝи кʼьшийабу ԛәнщ дькә
(Марԛос 3:1-6; Луԛа 6:6-11)
9Иса жь ԝьр рʼабу чу, һатә кʼьништа ԝан. 10Мәрьвәк ль ԝьр һәбу, кӧ дәсте ԝи кʼьшийабу. Һьнәка дьхԝәст кӧ хәйба Иса бькьрана, жь Ԝи пьрсин у готьне: «Щайиз ә кӧ мәрьв рʼожа шәмийе нәхԝәша ԛәнщ бькьн?»
11Әԝи жи ԝанарʼа гот: «Әԝ жь ԝә кʼи йә, кӧ пәзәкә ԝи һәбә у рʼожа шәмийе бькʼәвә чʼәʼле, ԝе нәгьрә у дәрнәхә? 12Ле инсан чьԛас жь пез ԛимәттьр ә! Аԝа рʼожа шәмийе ԛәнщикьрьн щайиз ә». 13Һьнге ԝи мәрьвирʼа гот: «Дәсте хԝә дьреж кә». Әԝи жи дьреж кьр у мина дәсте дьн ԛәнщ бу. 14Ле ферьси дәркʼәтьнә дәрва бона Иса ль һәв шеԝьрин кӧ чаԝа Ԝи бьдьнә кӧштьне.
Хӧламе Хԝәдейи бьжарти
15У гава Иса пе һʼәсийа, жь ԝе дәре чу, гәләк әʼлаләт жи пәй Ԝи чу. Әԝи һʼәму жи ԛәнщ кьрьн 16у тʼәми да ԝан кӧ бона Ԝи нәкьнә дәнги. 17Әва аһа бу кӧ әԝ готьна бь заре Ишайа пʼехәмбәр бе сери:
18«Ва йә хӧламе Мьн, йе кӧ Мьн бьжартийә
у һʼьзкьрийе Мьни кӧ Мьн бәгәм кьрийә.
Әзе Рʼӧһʼе Хԝә дайньмә сәр Ԝи
у Әԝе мьләтарʼа һәԛийе әʼлам кә.
19Әԝе нә бькʼәвә һʼӧщәте, нә бькә ԛарʼә-ԛарʼ
у нә жи йәке дәнге Ԝи мәйданада бьбьһе.
20Әԝ ԛамише пʼәрчʼьԛи һур накә,
пʼьлта дьчʼьрусә венасинә,
һʼәта кӧ һәԛийе бьгьһинә сери.
21У һʼәму мьләт ԝе гӧмана хԝә дайньнә сәр наве Ԝи»#12:18-21 Ишайа 42:1-4. .
Иса у Бәлзәбул
(Марԛос 3:20-30; Луԛа 11:14-23; 12:10)
22Һьнге щьнакʼәтики кори лал анинә щәм Ԝи у Әԝи әԝ ԛәнщ кьр, ӧса кӧ әԝи һьн дит у һьн жи хәбәр да. 23У тʼәмамийа әʼлаләте зәндәгьрти ма у гот: «Гәло Әв ә кӧрʼе Даԝьд?»
24Ле гава ферьсийа бьһист готьн: «Әва бь һʼӧкӧме сәрԝере щьна Бәлзәбул щьна дәрдьхә».
25Ле нетед дьле ԝан Исава әʼйан бун у ԝанарʼа гот: «Һәр пʼадшатийа кӧ нав ԝеда тʼьфаԛ тʼӧнәбә ԝе ԝеран бә у һәр бажар йан мала кӧ ль нава ԝеда тʼьфаԛ тʼӧнәбә әԝ наминә. 26Һәгәр мирещьн хԝәха хԝә дәрдьхә, кӧ ӧса йә нава пʼадшатийа ԝида бетʼьфаԛи һәйә, иди пʼадшатийа ԝи ԝе чаԝа бьминә? 27Һәгәр Әз бь һʼӧкӧме Бәлзәбул щьна дәрдьхьм, ле йед кӧ пәй ԝә тен бь чь дәрдьхьн? Ԝәки ӧса йә әԝе бьбьнә һʼакьмед ԝә. 28Ле һәгәр Әз бь һʼӧкӧме Рʼӧһʼе Хԝәде щьна дәрдьхьм, иди Пʼадшатийа Хԝәде гьһиштийә ԝә. 29Йан чаԝа йәк дькарә бькʼәвә мала мерхасәки у һәбука ԝи тʼалан кә, һәгәр пешийе ԝи мерхаси гьренәдә? Гава гьреда, һьнге ԝе бькарьбә мала ԝи тʼалан кә.
30Кʼи кӧ нә тʼәви Мьн ә, мьԛабьли Мьн ә у кʼи кӧ тʼәви Мьн тʼоп накә, бәла дькә. 31Бона ве йәке Әз ԝәрʼа дьбежьм, һәр гӧнә у готьнед хьраб ԝе ль мәрьва бенә бахшандьне, ле әԝе кӧ готьнәкә хьраб мьԛабьли Рʼӧһʼ бежә, ль ԝи найе бахшандьне. 32Кʼи тьштәки мьԛабьли Кӧрʼе Мерьв бежә, ԝе бе бахшандьне, ле һәгәр йәк һьндава Рʼӧһʼе Пирозда бежә, ль ԝи найе бахшандьне, нә ве дьне нә жи ԝе дьне.
Дар у бәре ԝе
(Луԛа 6:43-45)
33Һәгәр дар ԛәнщ ә, бәре ԝе жи ԛәнщ ә, һәгәр дар хьраб ә, бәре ԝе жи хьраб ә, чьмки дар жь бәре хԝә те наскьрьне. 34Чʼежькед мәʼра! Һун чаԝа дькарьн ԛәнщ хәбәр дьн, һәгәр һун хьраб ьн? Чьмки дьл чьва тʼьжи йә зар жи әԝе дьбежә. 35Мәрьве ԛәнщ, жь хьзна хԝәйә ԛәнщ ԛәнщийе дәрдьхә, ле мәрьве хьраб, жь хьзна хԝәйә хьраб хьрабийе дәрдьхә. 36Әз ԝәрʼа дьбежьм, Рʼожа Ахрәте мәрьв бона һәр хәбәрәкә пʼучʼ кӧ хәбәр дьдьн ԝе щабдар бьн. 37Чьмки һуне бь хәбәред хԝә бесущ бьн у бь хәбәред хԝә гӧнәкʼар бьн».
Кʼәрәмәтәке чаԝа нишан дьхԝазьн
(Марԛос 8:11-12; Луԛа 11:29-32)
38Һьнге һьнәка жь ԛанунзан у ферьсийа Ԝирʼа готьн: «Дәрсдар! Әм дьхԝазьн кӧ нишанәке жь Тә бьбиньн». 39Әԝи ль ԝан вәгәрʼанд у гот: «Ньсьле хьраб у хальфи нишанәке дьхԝазә, ле жерʼа нишанәкә дьн найе дайине пештьри нишана Уньс пʼехәмбәр. 40Чаԝа кӧ Уньс се рʼож у се шәва зьке һʼутда ма#12:40 Уньс 1:17. , Кӧрʼе Мерьв жи ӧса ԝе се рʼож у се шәва нава кʼурайийа әʼрдеда бьминә. 41Мәрьвед Нинәԝайе ԝе Рʼожа Ахрәте рʼабьн у ви ньсьли нәһәԛ кьн, чьмки әԝана бь даннасинийа Уньс жь гӧнәкьрьне вәгәрʼийан у ва Йәки жь Уньс мәстьр ль вьр һәйә. 42Пʼадша Башуре#12:42 Пʼадшати III, 10:1-13. Әԝ пʼадша жь Шәба Әʼрәбьстане һатә щәм Сьлеман пʼадша. Рʼожа Ахрәте ԝе рʼабә ви ньсьли нәһәԛ кә, чьмки әԝа жь сәре дьне һат, кӧ сәрԝахтийа Сьлеман бьбьһе у ва йә Йәки жь Сьлеман мәстьр ль вьр һәйә.
Пашда һатьна рʼӧһʼе һʼәрам
(Луԛа 11:24-26)
43Чахе рʼӧһʼе һʼәрам жь мерьв дәрте, щийе бе ав дьгәрʼә кӧ рʼьһʼәтийе бьбинә. Ле гава набинә, 44һьнге әԝ дьбежә: ‹Әз вәгәрʼьмә ԝе мала хԝәйә кӧ же дәркʼәтьмә›. Гава әԝ те, дьбинә ԝе мал вала, паԛьжкьри у һәвдайи йә. 45Һьнге дьчә һʼәфт щьнед дьнә жь хԝә хьрабтьр жи тинә, дькʼәвьнә ԝьр дьжин. У ахьрийа ԝи мәрьви жь пешийе хьрабтьр дьбә. Ӧса жи ԝе бе сәре ви ньсьле хьраб».
Де у бьрайед Иса
(Марԛос 3:31-35; Луԛа 8:19-21)
46Һе Әԝи әʼлаләтерʼа хәбәр дьда, ва дийа Ԝи у бьрайед Ԝи ль дәрва сәкьнин, дьхԝәстьн тʼәви Ԝи хәбәр дана. 47Йәки жерʼа гот: «Ва дийа Тә у бьрайед Тә дәрва нә у дьхԝазьн тʼәви Тә хәбәр дьн». 48Әԝи жи ль ԝи вәгәрʼанд у готе: «Кʼи йә дийа Мьн у кʼи нә бьрайед Мьн?» 49Һьнге дәсте Хԝә дьрежи шагьртед Хԝә кьр у гот: «Ва нә де у бьрайед Мьн! 50Чьмки кʼи кӧ хԝәстьна Баве Мьни әʼзмана бинә сери, әԝ ә бьре Мьн, хушка Мьн у дийа Мьн».
હાલમાં પસંદ કરેલ:
Мәтта 12: KmrNTC
Highlight
શેર કરો
નકલ કરો
Want to have your highlights saved across all your devices? Sign up or sign in
© Институт перевода Библии, 2000, 2011
