Йуһʼәнна 20
20
Тʼьрба вала
(Мәтта 28:1-10; Марԛос 16:1-8; Луԛа 24:1-12)
1Рʼожа йәкшәме#20:1 Бь йунани хәбәр бь хәбәр аһа йә: «Рʼожа һʼәфтийейә пешьн», чьмки бона щьһуйа рʼожа һʼәфтийейә пешьн йәкшәм бу, аԝа готи «ләʼд». , ԛәрәбәрбанга сьбәһе зу, Мәрйәма Мәждәлани чу сәр тʼьрбе. Дина хԝә дайе, ԝе кәвьр жь бәр дәре тʼьрбе ԝеда кьри йә. 2Дәстхԝәда рʼәви чу щәм Шьмһʼун-Пәтрус у ԝи шагьрте дьн, йе кӧ Иса же һʼьз дькьр у ԝанрʼа гот: «Хӧдан жь тʼьрбе дәрхьстьнә у әм ньзаньн кӧ Әԝ данинә кʼӧ дәре!»
3Һәма һьнге Пәтрус у шагьрте дьн дәркʼәтьнә дәрва у бәрбь тʼьрбе чун. 4Һәр дӧ жи һәврʼа дьрʼәвийан, ле шагьрте дьн жь Пәтрус зутьр дьрʼәвийа у әԝ пешийа ԝи гьһиштә сәр тʼьрбе. 5Ԝи хԝә ԛуз кьр у дина хԝә дайе, ԝе кʼәфән ль ԝьр ә, ле хԝәха нәкʼәтә һьндӧрʼ. 6Һьнге Шьмһʼун-Пәтрус кӧ пәй ԝи дьһат гьһиште, кʼәтә һьндӧрʼе тʼьрбе, дина хԝә дайе, ԝе кʼәфән ль ԝьр ә 7у дәстмала сери нә тʼәви кʼәфән бу, ле ԛаткьри алики дани бу. 8Паше шагьрте дьн жи кʼәтә һьндӧрʼ, йе кӧ пешийе гьһиштьбу сәр тʼьрбе. Әԝи дит у баԝәр кьр. 9Ԝан һе ньвисар фәʼм нәкьрьбу, кӧ гәрәке Иса жь мьрьне рʼабуйа. 10Пәй ве йәкерʼа шагьрт вәгәрʼийанә щийед хԝә.
Иса Хԝә нишани Мәрйәма Мәждәлани дькә
(Марԛос 16:9-11)
11Ле Мәрйәм жь тʼьрбе дәр сәкьнибу у дьгьрийа. Ԝе бь гьри хԝә ԛуз кьр у ль һьндӧрʼе тʼьрбе ньһерʼи, 12һьнге дина хԝә дайе, ԝе дӧ мьлйакʼәтед кʼьнщсьпи, ль ԝи щийе кӧ щьнйазе Иса ле данибу рʼуньштьнә, йәк бәрсәрийе у йе дьн бьнпʼийе. 13Мьлйакʼәта ԝерʼа гот: «Әʼвде! Тӧ чьма дьгьрийи?» Мәрйәме гот: «Хӧдане мьн һьлданә у әз ньзаньм Әԝ данинә кʼӧ дәре». 14Гава әԝе әв йәк гот, ль пьшт хԝәва вәгәрʼийа у дит кӧ Иса ль ԝе дәре сәкьнийә, ле ԝе ньзаньбу кӧ әԝ Иса йә. 15Иса готә ԝе: «Әʼвде, тӧ чьма дьгьрийи? Тӧ ль кʼе дьгәрʼи?» Мәрйәме тʼьре ԛәй әԝ рʼәзван ә, әԝе готе: «Әз хӧлам, һәгәр тә Әԝ һьлдайә, мьнрʼа бежә тә Әԝ данийә кʼӧ дәре, ԝәки әз Ԝи жь ԝе дәре һьлдьм». 16Иса готе: «Мәрйәм!» Мәрйәме бәре хԝә да Ԝи у бь ибрани готе: «Рʼаббони!» кӧ те фәʼмкьрьне: «Дәрсдар».
17Иса готә ԝе: «Мьн нәгьрә, чьмки Әз һе рʼанәбумә щәм Баве. Ле һәрʼә щәм бьред Мьн у ԝанрʼа бежә. ‹Әзе рʼабьмә щәм Баве Хԝә у щәм Баве ԝә, щәм Хԝәдейе Хԝә у щәм Хԝәдейе ԝә›». 18Мәрйәма Мәждәлани чу щәм шагьрта у ԝанрʼа гот: «Мьн Хӧдан дит» у тьштед кӧ Иса ԝерʼа готьбу ԝанрʼа гьли кьр.
Иса Хԝә нишани шагьртед Хԝә дькә
(Мәтта 28:16-20; Марԛос 16:14-18; Луԛа 24:36-49)
19Хут ԝе еваре, рʼожа йәкшәме, гава шагьрт щьвийайи бун, жь тьрса щьһуйа жи дәри ль сәр ԝан дадайи бун, һьнге Иса һат нава ԝанда сәкьни у ԝанрʼа гот: «Әʼдьлайи ԝәрʼа». 20Әв тьшт гот, дәст у нәкʼса Хԝә нишани ԝан кьрьн. Һьнге шагьрт гәләки ша бун, гава кӧ Хӧдан дитьн. 21Паше Иса диса ԝанрʼа гот: «Әʼдьлайи ԝәрʼа. Чаԝа кӧ Баве Әз шандьм, ӧса жи Әз ԝә дьшиньм». 22Әв йәк кӧ гот, пʼьфи сәр ԝан кьр у ԝанрʼа гот: «Һане Рʼӧһʼе Пироз бьстиньн. 23Һун гӧнед кʼе бьбахшиньн, әԝе бенә бахшандьне, гӧнед кʼе нәбахшиньн, әԝе нәйнә бахшандьне».
Иса у Тʼума
24Тʼумайе йәки жь һәр донздәһа, кӧ жерʼа «Һәвал-щеԝи» дьготьн, нә тʼәви ԝан бу гава кӧ Иса һат. 25Һьнге шагьртед майин ԝирʼа готьн: «Мә Хӧдан дит». Әԝи ԝанрʼа гот: «Һʼәта кӧ әз дәԝса мьха дәстед Ԝида нәбиньм, тʼьлийа хԝә нәдьмә сәр дәԝса мьха у дәсте хԝә жи нәкьмә нәкʼса Ԝи, әз тʼӧ щар баԝәр накьм».
26Пәй һʼәйшт рʼожарʼа, шагьртед Иса диса малда бун у Тʼума жи тʼәви ԝан бу. Дәри дадайи бун, ле Иса һат, нава ԝанда сәкьни у гот: «Әʼдьлайи ԝәрʼа». 27Паше Тʼумарʼа гот: «Тʼьлийа хԝә бинә вьр у дәстед Мьн бьньһерʼә, дәсте хԝә жи бинә у бькә нәкʼса Мьн. Нәбаԝәрийе нәкә, ле баԝәр бькә!»
28Тʼума ле вәгәрʼанд у готе: «Хӧдане мьн у Хԝәдейе мьн!» 29Иса готә ԝи: «Тә Әз дитьм ләма баԝәр кьр? Хԝәзи ль ԝан, йед кӧ нәдитьнә, ле баԝәр дькьн!»
Мәрәме ве кʼьтебе
30Иса ль бәр шагьртед Хԝә һе гәләк нишанед дьн жи кьрьн, кӧ ве кʼьтебеда нәһатьнә ньвисаре. 31Ле бәле әв һатьнә ньвисаре, ԝәки һун баԝәр бькьн, кӧ Иса йә Мәсиһ, Кӧрʼе Хԝәде у бь ве баԝәрийа пе наве Ԝи жийина ԝә һәбә.
હાલમાં પસંદ કરેલ:
Йуһʼәнна 20: KmrNTC
Highlight
શેર કરો
નકલ કરો
Want to have your highlights saved across all your devices? Sign up or sign in
© Институт перевода Библии, 2000, 2011
