Mateo 4
4
Jesús nia-sailase wilubdaklesad
(Marcos 1:12-13; Lucas 4:1-13)
1Juan Bab-Dummad-digi-ogleged-igargi Jesús-ogsad-sorba Bab Dummad Burba Nued nega-dule-sulidganba Jesús-sessun, nia-sailase wilubdaklegegar.
2Jesús Bab-Dummadse-golegala iba-dulabogus mutikid, degi, ibginedba mas-gunsuli gudigusad-sorba, ukur itoalid. 3Degi nia-saila, dule-wilubdaked ese nonikid, ega sognonikid:
—Ar be Bab-Dummad-Machi-sunnadile, we-akwamarga be soge: ‘Maduga be-binyeye.’
4Jesús, abin-imakdegu, nia-sailaga sogde:
—Noar be soged, ar Bab-Dummad-Gardagi narmakar naid:
Dule maduginbi dula gudiguosulid,
bela Bab-Dummad-gaya-burba-itogedgi dula gudigubaloed.
Dt. 8:3
5Geb degi nia-saila neggwebur-islidikidse Jesús-ses, Jerusalénse. Agi Bab-Dummadse-goled-neg-uas-birgi ogwisdapgu, 6Jesúsga sogded:
—Ar be Bab-Dummad-Machi-sunnadile, be napase ichomakdo, ar Bab-Dummad-Gardagi narmakar naid:
Na e-angermar bega barmidagoye,
e-argangi be-gamaloye,
adi melle be nag akwagi yolegegarye.
Sal. 91:11-12
7Jesús, nia-saila-abin sogde:
—Nabir be sogendo, ar Bab-Dummad-Gardagi narmakar sognaibalid:
Melle Dummad, be-Bab-Dummad,
be wilubdakoed.
Dt. 6:16
8Geb degi gannar nia-saila yar-matusulidse Jesús-sesbalid, agi belagwable napa-naid, degi, e-gangumalad ese oyosgu, 9geb Jesúsga sogded:
—An-nug odummogegar, be sindigar an-asabin siger, geb we-ibmar belagwapa an bega ukoed.
10Geb degi Jesús, abin-sogded:
—Nia-saila-Satanás, be angi bangu, ar Bab-Dummad-Gardagi narmakar naid:
Ar Dummad, be-Bab-Dummad,
Asebi be goloed e-nug odummogegar, unnila agarbi be ibmar-imakoed.
Dt. 6:13
11Geb degi nia-saila Jesúsgi bangussun. A-sorba angermar Jesússe nonikid, ega ibmar imaknonimalad.
Jesús na e-arbadedgi onoded
(Marcos 1:14-15; Lucas 4:14-15)
12Jesús itoargu, Juan-Bautista eskaryagi mellesiiye, Jesús gannar Galilease nonikid. 13Nazaretgi-maid bangudgu, Capernaumgi megnonikid, mata-dummad-naid-walik, Zabulón-yala, degi, Neftalí-yala-walik. 14Ar Bab-Dummad-gaya-burba-berbeged, epenne-Isaías-sogsa-gusadba guegala deyob gusad, deun sogsa-gusgu:
15Zabulón-yala, degi, Neftalí-yala,
mata-dummad-naidsik,
Jordán-diwar-obakar-bukmalad,
Galilea-dola, Judiosurmalad,
16a-neggweburgi Bab-Dummad-wichuli-bukmalad
nega-sichidgi siidyobid,
dule-wargwen Bab-wisgusar,
gwallu-dummad-meegwad ega ganonikidyobid,
dulemar-neg-sichidgi-burgwednagagi-bukmaladga,
dule-wargwen nonikid,
ega gwallu-meegwad-ganonikidyob nonikid.
Is. 9:1-2
17Degi, agi Jesús Bab-Dummad-gaya-burbagi sunmakarsun: “Be-iskudiidga na be bukib binsamar, be-daed na be ogwamar, ar Bab-Dummad-neg-dakmaid bemarse warmaksad.”
Jesús ua-gamalad-warbakese gochad, e-sapinganga guegar
(Marcos 1:16-20; Lucas 5:1-11)
18Jesús Galilea-mata-dummad-gakaba nadapgu, dule e-urba-ebo mata-dummadgi saki-minai dakalid. Gwensak Simón, Pedroye-nugbalid, degi, e-urba-Andrés. Amarde gusgu ua-gaedgi arbamalad. 19Jesús amarga sogde:
—Anba be dagmar, igi bemar ua-gae, abayobi dulemar-napneggi-bukwad gaega, an be-odurdakmaloed, adi dulemar anba nagumalagar.
20Abga Simón, degi, Andrés, e-saki yog indakar, Jesúsba yog naar imasmalad.
21Jesús sikwas nadbargu, Santiago, Zebedeo-machi, degi, e-urba-Juan, a-ebo urgi e-bab-Zebedeomala saki-matumakbukwa dakdapid. Jesús amar-warbose-gochamogad, eba dagegar e-sapinganga guegar. 22Amar yog ur, degi, e-bab-Zebedeo mete nadmalad, Jesúsba naegar.
Jesús dulemar-bukidar-nudaksad
(Lucas 6:17-19)
23Jesús bela Galilea-yalaganba gudigusad, Judiomar-onmaked-neggi dulemar-odurdakdii, Bab-Dummad-neg-dakmaid-gaya-burba-nuedgi sunmakdii, degine, dulemar bela uelemalad, degi, galagwensuli ibmar-nunmak-itomalad nudakdii-gusad.
24Jesús dulemar-nudakdiidba, bela Siria-yalase e-nug dunguded. A-ular dulemar bela ibmar-naibi-itodimalad, galagwensuli-gegudimalad, abgan-nunmakdimalad, niasamalad, suu-itodimalad, abgan-burgwarmalad, Jesússe senonimalad. Bela Jesús amar-nudaksad.
25Dule-bukidar Jesúsba duurmaknadap-gusmalad, Galilea-dorgan, neggwebur-gwaambe-bukmaladginmalad, Jerusalénginmalad, Judeaginmalad, degi, Jordán-diwar-obakarmalad, amar Jesúsba duurmaknadap-gusmalad.
હાલમાં પસંદ કરેલ:
Mateo 4: cukNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
